هكي كملنا الكوز إن شاء الله غدوه كلنا نجاولوا🤍

توا فقرة النصائح👀

كيف نقرا ورش


#تقنية الورش
متقولش نقرأ نظري بس باش نصفاها او مسائل بس المادة عبارة عن خليط بين النظري والمسائل واسئلة الإمتحانات ما تتكررش يعني لازم انك تكون فاهم كويس باش ماتتلخبطش ف الحل
🔴بالنسبه لأسئلة الباب الأول في الامتحان تجي مباشرة في الامتحان،الباب الوحيد اللي مفيشي تركات وبسيط وعادة مايجيش منه هلبا .
🔴الباب التاني هوا اللي عليه الدوة كلها وأطول باب في النصفي السيم لفات ماجاش عليه هلبا اسئلة مع انه مهم جداً لكن السيم اللي قبله كان جزء كبير من الأسئلة من الباب الثاني ،الباب مفيشي مسائل وكله حفظ استخدامات وتعريفات، ركز معاي
1دير ملخص لكل شي يقول فيه الدكتور مهم وانه يجي في الامتحان
2 النسب مش كلهم حفظ،ف أحفظ فقط اللي يقوللكم عليهم في المحاضرات
3 دير ملخص للي فهمته من الباب بروحك مع كلام الدكتور والأشياء المهمه للي يقول فاها
🛑الباب الثالث يعتبر امتداد للثاني لأنه تقريباً نفس نظامه نسب وارقام غير الفرق ان في جزئية انتاج الفرن العالي وطريقة انتاجه ومعادلة انتاج الحديد والخبث مهمات جدآ .
🔴الباب الرابع[باب الدرجات]
باب ممتع جدا وكل مسائله فيهم كويسة وباب مهم جدآ لانه الدكتور يلعب ع القياسات ال سم ومم (مادابيك في الحل في الباب الرابع باب خواص المواد تخلي وحداتك عالمية وتحولها من البداية باش ماتتلخبطش ف الحل لأن عادة الرقم يكون نفسه ف الخيارات غير الفرق وحدة القياس هل ب الGpaاو Mpa او kpa او pa ) .
سوال مهم ويتعاود أنه يجي يقولك نبي عدد المسامير ف لو انت طلعته متلا 0.8 ولقيت في الخيارات هكي 1و0.8و 0.9و2 شني حتختار!!
رد بالك أدير 0.8 لان مستحيل عدد المسامير يطلع رقم عشري ف المنسق يقول قربوا ديما ف الجواب الصح 1 ولو متلا طلعلك 2.7 معناها 3 وهكدا..
وفي رقم برنل للصلادة لو معطاكش قطر الثلم من ضمن معطيات السؤال أنت تفرضه 10مم وتعوض في قانونه عادي .
🔴الباب السادس
من أسهل الأبواب في النصفي حرفيا فيه شويه دش تعريفات والباقي مسائل،درس القدمة ذات الورنية والميكرومتر كل سيم
يجيبوا عليهم في أسئلة نصفي وفاينل،تجي رسمه واتية في الامتحان وانت اطلع القراءات علي كل جهاز[ركزو ع وحدات كل جهاز سم او مم]،من الاسئله اللي عليهم درجات كبيرة،حاول تفرق بينهم الزوز لأنهم يشبهوا بعض هلبا من ناحيه مفهوم كل جهاز .
في الإمتحان ماتسمعش كلام اللي يقولك ابدا بالمسائل بس او ابدا ب النظري بس لأن نظام الإمتحان مش ثابت مش معروف شن اللي بيجي وشن اللي لا
الفصول الماضية كانت المسائل تقدر تحصل منها درجات اما في الفصل الماضي كانت المسائل دقيقة شوية بحيث ان ممكن تعطلك ف الإمتحان عن بعض الأسئلة اللي تقدر تجاوبها طول (طبعاً مش كل المسائل جو مش مباشرات لكن نقدرو نقولو ان الاغلبية يبو تفكير شوية ) والنظري حاول تحل اللي تعرفه تدريجياً
والمادة تبي طريقة وحدة باش ماتكونش عندك مشكلة فيها أنك (تقرا قراءة متراكمة) يعني انك تحاول اي محاضرة عاطيينها ف الجامعة حتى لو ماحضرتش انك تقراها او تشوفها اقل شي من الشيت نفسه وتحاول تكرر نفس الشي اكثر من مرة باش ماتتعبش في قرايته ف يوم الإمتحان
لأن المنهج دسم جداً ومع كثرة النسب والأرقام ممكن تختلط عليك الأمور شوية وتتلخبط في الإمتحان .
وموفقين ان شاء الله.