Дзіўныя рэчы адбываюцца ў Гродне. Памятаеце 5-гадовую дзяўчынку Юлю, якая 11 жніўня пацярпела падчас масавых пратэстаў? За гэта нікога не пакараюць. Больш за тое: ніхто не будзе выбачацца. Па версіі Аляксандра Лукашэнкі, сям'я дзяўчынкі проста "трапіла ў ДТЗ". Сюжэт пра гэта ўчора выйшаў у "Панараме":

— Вярталіся дадому. Перад намі было шмат аўтамабіляў. Я спужаўся, выехаў на сустрэчную паласу. Пасля чаго праз імгненне адбылося сутыкненне, — распавядае там бацька Юлі.

А вось як усё было на самай справе:

— Ехалі. Перад намі трапляе машына, бус. Муж хоча аб'ехаць, бо перад намі шмат мянтоў, танкаў... Два танкі было перад намі, адзін за намі [гаворка, найхутчэй, пра "Dongfeng Mengshi". — Еўрарадыё]. Каб выратаваць нас, муж выязждае на сустрэчную паласу. Адтуль выбягае куча амапаўцаў, — кажа маці. — Не памятаю, колькі іх было — штук 15. Групоўка! І яны не глядзяць: хто, што. І пачынаюць па ўсёй машыне..."

— Я выйшаў з машыны даставаць дзіця і атрымаў дубінкай па галаве, — дадае бацька.

Мінск. Да людзей, якія традыцыйна збіраюцца на плошчы Незалежнасці, нечакана выйшаў АМАП. Блізу 10 байцоў схаваліся за помнікам Леніну. Але пратэстоўцаў гэта не збянтэжыла — паглядзіце, колькі іх шмат ізноў!

Відэа даслаў слухач @euroradio

Расійскі палітык Максім Кац талкова раскладае, як запрошаныя днямі ў Беларусь расійскія прапагандысты дапамагаюць Аляксандру Лукашэнку ўтрымаць уладу. Мітынгі "За Бацьку!" (у Беларусі Лукашэнку так ніхто не называе), калоны аўто з дзяржаўнымі сцягамі і песняй "Саня застанецца з намі!", сюжэт пра дзяўчынку з Гродна, у якім словы бацькоў нарэзалі так, што іх версія падзей змянілася да непазнавальнасці, — яскравыя прыклады іх працы.

Асноўны меседж, які яны прасоўваюць, гэта не "Лукашэнка выйграў выбары" (такое прадаць грамадству зараз нерэальна), а "Пратэсты выдахліся". Адчуваеце?

https://www.youtube.com/watch?v=w7GNQ2ZUu7k

Крымінальная справа па факце забойства ў Мінску дэманстранта Аляксандра Тарайкоўскага дагэтуль не пачатая. Упраўленне Следчага камітэта па Мінску ўжо 11 дзён "праводзіць праверку". Грамадзянскай жонцы загінулага Алене Герман дагэтуль не далі азнаёміцца з вынікамі судова-медычнай экспертызы.

Жанчына не разумее, што можна правяраць так доўга: відэа, на якім у Тарайкоўскага страляюць, апублікаванае ў медыя. Максімальны тэрмін, на які Следчы камітэт можа зацягнуць праверку, — тры месяцы.

Праваабаронцы з "Прававой ініцыятывы" заўважаюць, што за тыя ж 11 дзён у дачыненні да 46 грамадзян заведзеныя справы за гвалт да сілавікоў. "Дзіўна, што супрацоўнікаў міліцыі дзяржава абараняе імгненна, крымінальныя справы пачынаюцца на наступны дзень. А калі забіты шараговы грамадзянін, следчыя органы цягнуць час", — дадаюць яны.

Мінская вобласць. 23 жніўня ДАІ збіраецца выставіць "Фільтры" на ўездах у Мінск і на выездах з райцэнтраў у напрамку Мінска. На асобных участках трас хуткасць будзе штучна зніжацца да 50 км/г — магчыма, для таго, каб кожны аўтамабіль можна было спыніць і праверыць.

Заўтра ў сталіцы мусіць прайсці вялікі марш праціўнікаў Аляксандра Лукашэнкі — па аналогіі з тым, які адбыўся ў мінулую нядзелю і сабраў ад 40 тысяч (ацэнка беларускіх вайскоўцаў) да 400 тысяч (ацэнка журналістаў) чалавек.

Мінск. На плошчы Незалежнасці цяпер цудоўна. Як і заўжды апошнім часам па вечарах!

Фота зрабіў Ігар Лівенцаў

Прыгожая графічная праца ад Гродзенскага дызайнера Андрэя Ціцяка. Кардыяграма ўзяднання: з 09.08 і назаўжды.

В Гродно задержали двух парней около бара «Корица» — это место, где собирается неформальная молодежь. Оно находится недалеко от площади Ленина, где сегодня проходил митинг. Очевидцы рассказали, сегодня на митинг приходила компания неформалов, в ней и были эти ребята. Позже они пошли в бар, где к ним подошли люди в штатском, взяли под руки и затолкали в микроавтобус.

Мінск. Валанцёры пошукава-выратавальнага атрада "Анёл" знайшлі мёртвым Мікіту Крыўцова — 28-гадовага жодзінца, які знік 12 жніўня. Яго цела знойдзенае ў лесапаласе ў Партызанскім раёне.

Мікіта Крыўцоў — апошні са спіса зніклых удзельнікаў масавых пратэстаў 9-13 жніўня.

Раней жонка Крыўцова паведамляла, што яго тэлефон апошні раз быў дасяжны ў раёне РНПЦ нейралогіі і нейрахірургіі ў Мінску. Але там яго знайсці не атрымалася. Знайшлі Мікіту Крыўцова толькі сёння ўвечары — так, быццам бы нехта імітаваў яго самагубства.

Гэта чацвёрты загінулы ўдзельнік паслявыбарных пратэстаў у Беларусі. У Крыўцова засталіся жонка і маленькая дачка.

Брэст. Лідар "Дай Дарогу!" Юра Стыльскі выйшаў з міліцэйскага пастарунку. "Але гэта яшчэ не свабода — хутка будзе суд..." — піша паблік ДД! ва "УКантакце".

Юру затрымалі ўвечары 20 жніўня, і гэта было другое затрыманне за два дні. Музыка актыўна ўдзельнічае ў масавых пратэстах, якія праходзяць у Брэсце, і стрыміць з іх у свой акаўнт у Instagram.

“Папярэдзілі, каб больш нідзе не з’яўляўся, інакш ці буду “сіні”, ці з’явіцца крымінальны артыкул”, — распавёў Юра Стыльскі ў размове з Еўрарадыё. На 28 жніўня лідара “Дай Дарогу!” выклікаюць у суд. Яго вінавацяць ва ўдзеле ў несанкцыянаваным масавым мерапрыемстве.

На адной з буйных акцый пратэсту на мінулым тыдні Юра нёс бел-чырвона-белы сцяг на чале шэсця ў Брэсце. Пасля гэтага музыку забралі “на суткі”. Праз дзень — ізноў. А сёння адпусцілі.

Ён кажа, што ў ізалятары пры Ленінскім РУУС застаецца мала затрыманых. “Людзей выпускаюць. Нікога не б’юць. Кормяць”, — дадаў музыка.

Апошні раз смартфон Мікіты Крыўцова быў уключаны 12 жніўня каля РНПЦ неўралогіі і нейрахірургіі. Гэтая ўстанова месціцца па адрасе: вуліца Францыска Скарыны, 24. Карыстальнікі "Тэлеграма" заўважаюць, што побач з РНПЦ месціцца будынак упраўлення ўнутраных спраў Мінскага раёна. Яго адрас: вуліца Францыска Скарыны, 20. Абедзве ўстановы трапляюць у адну соту.

Больш за 500 беларускіх сілавікоў захацелі "перайсці на бок дабра" і звярнуліся па дапамогу ў ініцыятыву, створаную Мікітам Мікадам і іншымі беларускімі айцішнікамі.

"Мы пакуль не паспелі разабраць усе сітуацыі. Першымі разглядаем тых людзей, хто публічна выступае супраць таго, што было зроблена рэжымам, — распавядае Мікада, стваральнік PandaDoc, аднаго з самых паспяховых беларускіх стартапаў ever. — Таму што гэта тыя людзі, якім дапамога спатрэбіцца хутчэй за ўсё. То бок, там магчымыя нейкія рэпрэсіі, і трэба дапамагаць тэрмінова. Па-сутнасці, гэта асноўны крытэр на дадзены момант. Але мы прыдумаем яшчэ крытэры, мы проста не паспелі".

Каб разабрацца з усімі заяўкамі, Мікіта Мікада пайшоў у адпачынак. "Я проста не магу больш нічога рабіць, — кажа ен. — Акрамя таго, каб змагацца і дапамагаць змяніць рэжым".

Для расследавання актаў гвалту з боку сілавікоў створаная міжведамасная камісія. Пра гэта міністр унутраных справаў Юрый Караеў распавёў арцыбіскупу Тадэвушу Кандрусевічу.

Міністр дадаў, што не даваў загаду да жорсткіх дзеянняў і суперажывае пацярпелым. Пытанне — хто даў гэты загад і хто ўвогуле ў Беларусі можа аддаваць такія загады? — дагэтуль застаецца адкрытым. Як і пытанне адказнасці за гвалт — бо "міжведамасная камісія" лёгка можа прыйсці да высновы, што сілавікі не парушалі закон.

Міністр абароны Беларусі Віктар Хрэнін непакоіцца, што дзеянні беларускіх сілавікоў за мяжой палічаць генацыдам уласнага народа і гэта стане падставай для вайсковага ўмяшання ў справы Беларусі. Такія думкі ён выказаў у Гродне на нарадзе з удзелам Аляксандра Лукашэнкі.

Хрэнін мяркуе, што ўвайсці ў Беларусь могуць вайсковыя часці НАТА, размешчаныя ў Польшчы і Літве. Ён прыводзіць у прыклад амерыканскія знішчальнікі F-16, якія базуюцца на польскай базе Ласк. Іх падлётны час да беларускай мяжы — 22 хвіліны.

Тым часам НАТА называе заявы Лукашэнкі пра вонкавую пагрозу з Захаду беспадстаўнымі. Не лішнім таксама будзе нагадаць, што абаронай свайго насельніцтва як нагодай для ўмяшання апошняй у рэгіёне карысталася Расія. Менавіта абарона рускамоўнага насельніцтва стала падставай для таго, каб у 2014 годзе развязаць баявыя дзеянні ва Украіне.

"Не магу нават думаць пра гэта без слёз"

Тэнісістка Вікторыя Азаранка вельмі асцярожна, але выказалася з нагоды апошніх падзей у Беларусі.

"Гэта вельмі складаная тэма для размовы. Калі шчыра, тое, што я бачу, разбівае мне сэрца. Я не магу быць там і зразумець усю сітуацыю, гэта сапраўды сумна. Сапраўды сумна, і складана гаварыць пра гэта. Але я спадзяюся, што гвалт неадкладна спыніцца, бо гэта сапраўды Я не магу нават думаць пра гэта без слёз, калі быць шчырай.

Я спадзяюся, галасы людзей пачуюць. Як я ўжо сказала, гэта складаная тэма. Я не хачу, каб нехта карыстаўся маімі словамі ў прапагандысцкіх мэтах, таму я буду перажываць тое, што адчуваю, без лішняй увагі медыя і перакручвання гэтага ў іх мэтах".