У Варшаве пройдуць здымкі першага беларускамоўнага стэндап-канцэрта. Яго зладзіць комік (і па сумяшчальнасці журналіст @euroradio) Міхась Ільін.

Мерапрыемства нашага калегі пройдзе 10 траўня. Іншыя падрабязнасці тут

Расія "нешта рыхтуе" ў Беларусі летам 2025 года. Пра гэта казаў удзельнікам Саміта Трымор'я ў Варшаве прэзідэнт Украіны Уладзімір Зяленскі:

"І паглядзіце на Беларусь — гэтым летам Расія там нешта рыхтуе, прыкрываючыся ваеннымі вучэннямі. Менавіта так звычайна пачынаюцца яе новыя атакі. Але куды на гэты раз? Я не ведаю. Украіна? Літва? Польшча? Не дай Божа! Але мы ўсе павінны быць гатовымі".

Беларусь і Расія плануюць правесці сумесныя вучэнні "Захад-2025" у верасні 2025 года. Польшча адкажа на іх уласнымі манеўрамі з удзелам вайскоўцаў з краінаў NATO.

Увечары і ўночы на 30 красавіка расійскія дроны атакавалі буйныя ўкраінскія гарады. Ёсць ахвяры.

У Харкаве пацярпелі 45 чалавек, у тым ліку двое дзяцей і адна цяжарная жанчына. У Дняпры загінуў 53-гадовы мужчына, яшчэ адзін чалавек паранены.

У панядзелак Пуцін вырашыў абвясціць пра часовае спыненне вагню ва Украіне з 8 па 10 траўня. У Кіеве і Вашынгтоне задаліся пытаннямі: чаму нельга было пачаць перамір'е адразу ж ад 28 красавіка — і чаму на тры дні, а не хаця б на трыццаць.

МЗС Літвы не бачыць перадумоў і падставаў для ўзнаўлення пасажырскіх чыгуначных перавозак з Беларуссю. Так у ведамстве пракаментавалі чарговую спробу Мінска вярнуць на рэйкі пасажырскія цягнікі.

Пасажырскае чыгуначнае спалучэнне паміж Літвой і Беларуссю спынілася ў 2020 годзе праз пандэмію COVID-19. Яно не было адноўленае да гэтага часу, хаця "Беларуская чыгунка" неаднаразова звярталася з такой просьбай.

Справа ў штучна арганізаваным "мігранцкім крызісе" на межах Беларусі з краінамі Еўрасаюза, у саўдзеле Мінска ў расійскім нападзе на Украіну і ў палітычных рэпрэсіях, звязаных з выбарамі 2020 года.

Той-сёй з беларусаў ужо ўвогуле не ў курсе, што раней з Мінска да Вільні можна было даехаць на цягніку

У Акадэміі навук працуюць над тым, каб у бульбе фры стала менш канцэрагенаў. Даследаванні праводзяцца шляхам цеплавой апрацоўкі пасечанай на кавалачкі бульбы ў духавой шафе.

Хацелі б мы працаваць у гэтым аддзеле — аддзеле тэхналогій прадукцыі з корнеклубняплодаў Навукова-практычнага цэнтра Нацыянальнай акадэміі навук Беларусі па харчаванні!

Там кажуць, што пры абсмажванні ў фрыцюры ў бульбе можа ўтварацца акрыламід. У вялікіх дозах ён можа выклікаць рак у жывёлаў, але яго канцэрагеннае ўздзеянне на чалавека не пацверджанае. Тым не менш, сёння ў лабараторыі "праходзіць навукова-даследчая праца па вызначэнні механізму ўтварэння акрыламіду ў бульбапрадуктах і па распрацоўцы спосабаў зніжэння яго ў такіх прадуктах".

Пуцін падняў пытанне пра завод па вытворчасці расійскіх беспілотнікаў на тэрыторыі Беларусі. Паводле яго, Масква гатовая пачаць рэалізацыю праекта.

На сустрэчы з Лукашэнкам у Валгаградзе ён нагадаў і пра дамоўленасці пра супрацоўніцтва ў авіябудаўнічай галіне: "...ёсць таксама над чым можна працаваць: і невялікі самалёцік, і кааперацыя па сярэднямагістральных самалётах, і гэтак далей".

Лукашэнка ўсяму гэтаму, вядома, пярэчыць не стаў.

Пра планы пабудаваць у Беларусі завод беспілотнікаў для патрэбаў Расіі стала вядома напачатку сакавіка. Там плануюць вырабляць 100 тысяч дронаў за год. Запусціць вытворчасць збіраюцца ўжо ў 2026 годзе.

Каго глядзець/слухаць сёння на @euroradio? Трымайце анонс эфіраў на сераду (час пазначаны беларускі):

12:00 — псіхіятр Уладзімір Пікірэня пра ілжэданосы і прымусовае лекаванне

13:00 — палітычны аглядальнік Аляксандр Фрыдман

14:00 — кіраўнік Агенцтва еўраатлантычнага супрацоўніцтва, дыпламат Валерый Кавалеўскі

15:00 — гісторык Яўген Красулін пра пакістанцаў і суды шарыяту.

Глядзіце стрымы на ютуб-канале Еўрарадыё, задавайце пытанні!

З Мінска цяпер можна паляцець у Сталінград. Ад учора так называецца аэрапорт Валгаграда, які раней меў назву Гумрак.

Артыкул пра аэрапорт у "Вікіпедыі" ўжо таксама пераіменавалі. А вось гораду вяртаць "гістарычную" назву "Сталінград" не збіраюцца. Пакуль.

З Мінска ў Валгаград няма рэгулярных авіярэйсаў, але ёсць чартары, якія звычайна замаўляюць будаўнічыя кампаніі. Апошні на гэты момант быў якраз 29 красавіка — аэрапорт прызначэння яшчэ быў указаны як "Валгаград (Гумрак)".

25 гадоў хаваліся ад пакарання двое забойцаў з Магілёва. Цяпер суд прызначыў ім па 25 гадоў турмы і калоніі.

Злачынства і пакаранне: https://euroradio.fm/vyneseny-prysud-za-zgvaltavanne-i-zaboystva-uchynenyya-25-gadou-tamu

З Беларусі — без VPN

У ФСБ Расіі заявілі пра затрыманне грамадзяніна Беларусі, які нібыта рыхтаваў тэракт. Разам з ім за кратамі апынуліся грамадзяне Расіі і Малдовы.

Але ніхто з тых, каго паказалі ў відэа пра гэта, не размаўляе з беларускім акцэнтам.

Паводле сілавікоў, фігуранты справы хацелі падарваць вайскоўца добраахвотніцкага батальёна ў Ханты-Мансійску. Яны выраблялі выбухоўку ў жылым доме, але ў працэсе адбылася дэтанацыя. Выбух разбурыў дзве кватэры. Тады былі шпіталізаваныя пяць чалавек, а пазней дваіх з іх затрымалі.

Чарговая (але незвычайная) хваля наездаў на прыватную медыцыну ў Беларусі. Стрым з псіхіятрам Уладзімірам Пікірэнем.

Доктар Уладзімір Пікірэня днямі дазнаўся, што нехта ад яго імя піша даносы на беларускія прыватныя клінікі. Псіхіятр часта крытычна праходзіцца па нашай медыцыне. Але даносы?!

Размаўляем пра гэта ў жывым эфіры. Таксама пагаворым пра прымусовае псіхіятрычнае лекаванне. Як так адбылося, што гэтая жахлівая савецкая практыка ўзнавілася ў сучаснай Беларусі?

Глядзіце стрым тут, задавайце пытанні: https://www.youtube.com/watch?v=vl35iQ78b50

Аб'яднаны пераходны кабінет хочуць прызнаць тэрарыстычнай арганізацыяй. Генпракурор з падачы КДБ накіраваў заяву пра гэта ў Вярхоўны суд.

Андрэй Швед лічыць, што АПК створаны "з мэтай захопу і ўтрымання дзяржаўнай улады незаконным шляхам". Далей пералічваюцца метады, якімі дзейнічае арганізацыя. Мяркуючы па іх, баевікі "Талібана" і "Аль-Каіды" — проста дзеці ў параўнанні з сябрамі Аб'яднанага пераходнага кабінета!

Навошта Зяленскі ізноў палохае Захад нападам з Беларусі? Стрым з палітычным аглядальнікам Аляксандрам Фрыдманам.

Ці магчымы напад з тэрыторыі Беларусі падчас вучэнняў “Захад” і навошта Зяленскі ўзнімае гэтую тэму? Чым небяспечнае супрацьстаянне Індыі і Пакістана? Запытаемся ў Аляксандра Фрыдмана. Разбярэм таксама заявы "гісторыка" Пуціна пра абарону Мінска і выказванні Лукашэнкі наконт “гергіеўскіх стужак” і памяць пра вайну як “частку нацыянальнай ідэі”.

Глядзіце стрым тут, задавайце пытанні: https://youtu.be/dwGO4C0Df2U

Долар губляе 2,3 капейкі на першых на гэтым тыдні біржавых таргах у Беларусі і ізноў набліжаецца да псіхалагічнага парогу ў 3 рублі. Расійскі рубель даражэе, а ўгодаў па еўра не было.

Вось курсы валют, якія будуць дзейнічаць у бліжэйшыя суткі.

1 USD 🇺🇸 = 3,0282 рубля | -2,3 капейкі
1 EUR 🇪🇺 = 3,4928 рубля | угодаў не было
100 RUB = 3,6539 рубля | +0,68 капейкі

100 дзён таму, у дзень інаўгурацыі Дональда Трампа, 1 долар каштаваў 3,4591 рубля. З 20 студзеня валюта ЗША патаннела на 43 капейкі, ці амаль на 12,5%.

100 дзён Трампа і завод расійскіх дронаў у Беларусі. Стрым з Валерыем Кавалеўскім

Пакуль што ўкраінцы не чапаюць беларускія прадпрыемствы, якія працуюць на расійскае войска. Хаця на такія ж заводы і іх склады ў Расіі ўкраінскія дроны падаюць рэгулярна. Ды і рэзервуары з нафтай час ад часу загараюцца.

А ці зменіцца сітуацыя, калі ў Беларусі з'явіцца завод, які будзе вырабляць для расійскага войска 100 тысяч беспілотнікаў за год? Пра гэта, а таксама пра тое, як Дональд Трамп змяніў свет і ці атрымалася ў яго за першыя 100 дзён ізноў пачаць рабіць Амерыку вялікай, размаўляем з кіраўніком Агенцтва еўраатлантычнага супрацоўніцтва, дыпламатам Валерыем Кавалеўскім: https://www.youtube.com/watch?v=cKgkDeaxcKM

У дызайнера Уладзіміра Цэслера дзень народзінаў — сёння яму спаўняецца 74 гады. Віншуем!

А вось і апошні яго твор — як звычайна, надзённая палітычная сатыра.

Ці шмат адрозненняў паміж судамі шарыяту і судамі ў сённяшняй Беларусі? 150 тысяч працоўных мігрантаў з Пакістана, якіх Лукашэнка збіраецца да нас прывезці, будуць адчуваць сябе як дома. Стрым з гісторыкам Яўгенам Красуліным

Чаму беларусы былі так перакананыя, што яны талерантныя (а па факце апынулася, што не)? Ці былі ў нашай гісторыі часы, калі мы прымалі ў сябе вялікую колькасць перасяленцаў? Як мусульмане будуць сацыялізавацца ў беларускім грамадстве?

Абмяркоўваем з Яўгенам Красуліным: https://youtu.be/kTFAnCag5HQ

"Мінск Крышталь" запускае новы брэнд гарэлкі — "Сукалень". Запісы пра яго з'явіліся ў базах Нацыянальнага цэнтра інтэлектуальнай уласнасці і Распатэнта.

Сукалень — гэта адна з назваў роду буйных балотных птушак сямейства бакасавых з вельмі доўгай дзюбай і доўгімі нагамі. Птушкі гэтага роду таксама называюцца вераценнікамі.

Адзін з чатырох яго відаў — вялікі вераценнік — з'яўляецца птушкай 2025 года ў Беларусі. Ён унесены ў Чырвоную кнігу.

Кандыдат у прэзідэнты Польшчы згадаў Беларусь у нечаканым кантэксце. А заадно і прайшоўся па сваіх канкурэнтах.

Што сказаў Рафал Тшаскоўскі: https://euroradio.fm/ne-dazvolim-ucyachy-u-belarus-pretendent-u-prezidenty-polshchy-pra-kankurentau

З Беларусі — без VPN