У Катары ізноў пачынаюцца перамовы пра прыпыненне агню ў Газе і вызваленне закладнікаў. На мінулых тыднях Ізраіль і групоўка ХАМАС былі блізкія да яе заключэння, але заставаўся шэраг нявырашаных супярэчнасцяў.

Цяпер перамовы аднаўляюцца на фоне заявы ЗША пра немагчымасць цалкам знішчыць ХАМАС вайсковым чынам і пратэстаў у Тэль-Авіве з патрабаваннем заключыць дамову каб вярнуць закладнікаў — і целы тых, хто загінуў.

Як ХАМАС прыйшоў да ўлады ў сектары Газа

Ва Украіне з аўкцыёну прадалі Maybach і квадрацыкл “кума Пуціна” Віктара Мядзведчука. Грошы пойдуць на вайсковыя аблігацыі.

У 2022-м Мядзведчука, затрыманага па падазрэнні ў здрадзе дзяржаве, абмянялі на ўкраінскіх ваеннапалонных. Цяпер ён у РФ.

Мядзведчук меў буйны бізнес і свае інтарэсы не толькі ў Расіі. @euroradio падрабязна расказвала пра яго сувязі з беларускімі ўладамі.

У Беларусь можа завітаць спёка з цэнтральнай Еўропы. Папярэднія прагнозы паказваюць, што бліжэйшы тыдзень тэмпература можа падымацца вышэй за +30, а ў наступную сераду месцамі магчымыя +37 градусаў.

Што праўда, доўгатэрміновыя прагнозы не вельмі дакладныя, і такое прадказанне можа не збыцца. Але гатовымі таксама трэба быць.

Ускладненні аж да смерці: як перажыць спёку

Згодна са злівамі, “выбары прэзідэнта” пройдуць у Беларусі 23 лютага. Хто фармальна мусіць прызначыць іх і ў якія тэрміны? @euroradio тлумачыць.

Згодна з Выбарчым кодэксам, дату выбараў прызначае Палата прадстаўнікоў. Яна цяпер на канікулах і пачне працу ў сярэдзіне верасня.

“Выбары прэзідэнта прызначаюцца Палатай прадстаўнікоў не пазней чым за пяць месяцаў і праводзяцца ў нядзелю не пазней чым за два месяцы да заканчэння тэрміну паўнамоцтваў папярэдняга прэзідэнта”, — кажа ВК.

То бок, яны мусяць прайсці не пазней за 20 ліпеня 2025-га. Мінімальны магчымы тэрмін паміж рашэннем і самімі выбарамі — 85 дзён, бо за 85 дзён да даты мусіць пачацца вылучэнне кандыдатаў і фармаванне гарадскіх камісій.

Калі ўлады сапраўды рыхтуюцца да даты 23 лютага — яна мусіць быць агучана не пазней за лістапад.

Пра магчымасць такога сцэнару ў эфіры @euroradio паразважаў і прадстаўнік НАУ, дэлегат КР Арцём Брухан. На яго думку, прызначэнне прэзідэнцкіх выбараў на люты 2025 года выглядае цалкам верагодным.

Эфір цалкам: https://youtu.be/6w-ZU7cYyhY

Ужо некалькі месяцаў у Беларусі не стае крытычна важнага лякарства, а тэрміны паставак пераносяць ужо другі раз запар. Гаворка ідзе пра тамоксіфен, які выкарыстоўваюць пацыенткі з ракам малочнай залозы.

Аптэчныя сеткі казалі, што прэпарат з’явіцца ў жніўні. Але цяпер кажуць толькі пра верасень.

Пры гэтым з іншымі лекамі, якія выкарыстоўваюць пры новаўтварэннях у малочнай залозе, праблемы існуюць больш за год.

▪️ Як не праспаць рак? Тлумачыць доктар

Украіна ратыфікуе Рымскі статут. Гэта дасць магчымасці Міжнароднаму крымінальнаму суду весці справы адносна вайсковых злачынстваў Расіі на тэрыторыі Украіны.

Прапанову ратыфікаваць дакумент у Вярхоўную Раду ўнёс Уладзімір Зяленскі.

Суд у Гаазе ўжо расследуе справы пра расійскія злачынствы ва Украіне і ў тым ліку выдаў ордар на Пуціна, але гэта адбывалася па звароце ўкраінскіх уладаў і падтрымкі расшырэння юрысдыкцыі шэрагам краін. Цяпер юрыдычных перашкод для працы ў МКС не будзе.

У тым ліку і па магчымым злачынствам супраць чалавечнасці, у якіх удзельнічаюць беларускія ўлады — у прыватнасці, па справе выкрадання дзяцей з акупаваных тэрыторый.

Суд у Гаазе можа выдаць ордар на Лукашэнку за катаванні? Адказ праваабаронцы

Будучыня сэкандаў у Беларусі: ці выжывуць пасля новых санкцый? @euroradio паразмаўляла з крамамі, каб даведацца, што цяпер адбываецца і што далей.

Чытаць тут: https://euroradio.fm/buduchynya-sekandau-u-belarusi-ci-vyzhyvuc-paslya-novykh-sankcyy

Без VPN

Што адбываецца ў Курскай вобласці і як Пуцін можа скарыстацца Лукашэнкам з нагоды гэтай аперацыі? Абмеркавалі з вайскова-палітычным аглядальнікам групы "Інфармацыйны супраціў" Аляксандрам Каваленкам: https://youtu.be/74pzWdiy2OM

Што цікавага ў свеце? Старасць падкрадаецца незаўважна, але калі і чаму мы пачынаем старэць, доўгі час заставалася загадкай. Амерыканскія навукоўцы вырашылі разабрацца ў гэтым пытанні, прааналізаваўшы дадзеныя больш як ста ўдзельнікаў даследавання. Вынікі выявіліся нечаканымі.

Гэта ды іншае — у аглядзе цікавых міжнародных навін: https://euroradio.fm/starasc-pad-kantrolem-navukoucau-i-nafta-yakaya-zabivae-ikhnoravy

Без ВПН

Важныя падзеі і сэнсы чацвярга 15 жніўня, у праграме ЕЎРАЗУМ:

01:20 Чаму рэжым спяшаецца правесці прэзідэнтскія выбары

12:34 Навіны спорту

14:34 З’яўленне ўкраінскай камендатуры: што адбываецца пад Курскам?

23:49 Навіны шоу-бізу

26:04 Будучыня сэкандаў у Беларусі: ці выжывуць пасля новых санкцыяў?

Швейцарыя дадала ў беларускі санкцыйны спіс 27 прозвішчаў. Сярод іх — кіраўнік ГУБАЗіК Андрэй Ананенка і яго намеснікі, начальнікі калоній і турмаў, 13 суддзяў. Пра гэта піша @pozirkonline.

Таксама ў спіс трапілі дырэктарка БелТА, галоўны рэдактар “СБ — Беларусь сегодня”, адзін карэспандэнт АНТ і бізнесовец Віктар Шаўцоў, які калісьці быў блізкім да Лукашэнкі.

Мінскае “Дынама” прайграла “Лінкальну” з Гібралтара. Але па суме двух матчаў праходзіць далей у кваліфікацыі Лігі Еўропы і забяспечвае сабе і заўзятарам еўракубкавую восень.

Калі наступным раундзе кваліфікацыі мінчукі пройдуць бельгійскі “Андэрлехт”, дык згуляюць у групавым этапе Лігі Еўропы. Калі не — трапяць у групавы этап Лігі канферэнцый.

Матч жа з “Лінкальнам” скончыўся для “Дынама” паразай 1:2, у тым ліку і дзякуючы аўтаголу ў сярэдзіне другога тайма. Але перамогі 2:0 у першай гульні хапіла, каб па суме двух матчаў крочыць далей.

У Літву ўсё ж можна будзе праехаць на легкавым аўтамабілі, зарэгістраваным у Беларусі. Жорсткія правілы пратрымаюцца толькі адзін дзень — сёння.

Літва забараніла ўезд легкавікоў на беларускіх нумарах з 16 жніўня, кіруючыся апошнімі абмежаваннямі на імпарт з Беларусі. Але рэгламент прадугледжвае магчымасць выключэнняў.

У выніку з 00:01 17 жніўня 2024 года ізноў будзе дазволена ўязджаць на тэрыторыю Літвы на легкавіку, што не прызначаны для продажу і належыць грамадзяніну Беларусі з дзеючай літоўскай візай ці ВНЖ, які сам кіруе транспартным сродкам. Таксама выключэнне зробленае і для ўласнікаў аўто і кіроўцаў з пашпартамі краінаў Еўрасаюза.

Літва дазволіла праязджаць на сваю тэрыторыю на легкавіках з беларускімі нумарамі. Але норма пра тое, што з 18 студзеня 2025 года аўтамабілі, зарэгістраваныя ў Беларусі, не змогуць знаходзіцца на літоўскай тэрыторыі, пакуль што захоўваецца.

Літоўская мытня нагадвае, што з гэтай даты асобы, якія кіруюць такімі аўто, будуць лічыцца парушальнікамі і прыцягвацца да адказнасці. Санкцыі — штраф і канфіскацыя аўтамабіля.

Да 18 студзеня 2025 года аўтамабілі з беларускімі уязджаць і рэгістравацца на тэрыторыі Літвы, а таксама ўдзельнічаць у дарожным руху.