Журналісткі Кацярына Андрэева і Дар'я Чульцова — роўна год за кратамі. Іх затрымалі 15 лістапада 2020 года, падчас стрыму з акцыі памяці пра забітага Рамана Бандарэнку на Плошчы Пераменаў у Мінску.

Каця і Даша — двое з 30 беларускіх журналістаў і медыяменеджараў, якія застаюцца ў няволі за сваю працу. А ў колькіх прадстаўнікоў СМІ прайшлі ператрусы, колькі вымушаныя былі пакінуць Беларусь, — не падлічыць.

За гэты год Андрэева і Чульцова сталі лаўрэаткамі некалькіх прэмій у галіне свабоды слова. @euroradio выказвае салідарнасць з мужнымі журналісткамі. Трымайцеся! Чакаем на волі.

Мігранты на беларуска-польскай мяжы пабіліся за дровы. Відавочна, тактыка беларускіх уладаў заключаецца ў тым, каб абставіны і маразы давялі людзей да жывёльнага стану і прымусілі кідацца на агароджу з калючага дроту.

Тым часам на мяжу прыбываюць усё новыя і новыя групы мігрантаў. А слухачы @euroradio дэаноняць датычных да іх дастаўкі.

Відэа @sputnikby

Нацыянальны банк Беларусі працягнуў час працы кас, дзе "старыя" грошы можна абмяняць на "новыя". Калі вы яшчэ не паспелі — цяпер гэтага зрабіць можна толькі ў касах Нацбанка.

"Новыя" грошы — узору 2009 года — былі ўведзеныя ў абарачэнне пасля дэнамінацыі, праведзенай у 2016-м. Банкноты ўзору 2000 года канчаткова ператворацца ў гарбуз 31 снежня 2021 года.

Улады ААЭ забаранілі авіякампаніі "Белавія" рэгістраваць грамадзянаў Ірака, Сірыі, Емена і Афганістана на рэйс з Дубая. Беларускі перавозчык "узмацняе кантроль за праверкай дакументаў". Пасажыры, якія трапляюць пад абмежаванне, змогуць вярнуць поўны кошт квіткоў.

"У сувязі з павелічэннем попыту з боку турыстычных аператараў Беларусі", з кастрычніка 2021 года "Белавія" павялічыла колькасць рэйсаў з Дубая да 5 рэйсаў за тыдзень.

Раней аналагічную забарону для беларускага перавозчыка ўвяла Турцыя.

У беларускіх школах пачаліся "акцыі ў дапамогу ўцекачам, якія знаходзяцца цяпер на мяжы". Можна прыносіць ежу, адзенне, а таксама школьныя прылады, — сказана ў абвестцы, скрыншот якой даслалі @euroradio бацькі.

Усё як бы добраахвотна.

Ладна ежа, ладна адзенне. А школьныя прыналежнасці-та мігрантам цяпер навошта? Так, іх дзеці трымаюць у руках плакаты пра тое, што хочуць у школу. Але ж — у нямецкую школу, а не ў беларускую!

15 лістапада багатае на навіны з беларускіх судоў.

▫️ У Мінскім гарадскім судзе распачаўся працэс над палітзняволенай маці пяцярых дзяцей Вольгай Залатар. Яе ўтрымліваюць пад вартай ужо восем месяцаў.

Вользе пагражае да 7 гадоў пазбаўлення волі. Яна не прызнала віну ні па адным з артыкулаў, па якім яе абвінавачваюць. А артыкулаў шмат: стварэнне экстрэмісцкага фарміравання; арганізацыя дзеянняў, якія груба парушаюць грамадскі парадак; пасобніцтва да арганізацыі такіх дзеянняў.

▫️У Мінскім абласным судзе распачаўся разгляд крымінальнай справы ў дачыненні да анархістаў Дмітрыя Дубоўскага, Ігара Аліневіча, Сяргея Раманава і Дзмітрыя Рэзановіча. У залю пусцілі толькі сваякоў абвінавачаных — каля 15 чалавек — і праўладных журналістаў. А пасля працэс і ўвогуле зрабілі закрытым з прычыны "абароны персанальных дадзеных пацярпелых".

Анархістаў затрымалі больш за год таму. Іх вінавацяць у падпале службовых аўтамабіліяў, будынку ДАІ і дзяржаўнага камітэта экспертыз у Гомельскай вобласці, а таксама ў незаконным абароце і перамяшчэнні праз мяжу зброі і выбуховых прыладаў.

▫️Перададзеная ў суд справа Эдуарда Пальчыса. У ёй абвінавачанні па чатырох артыкулах: распальванне сацыяльнай варожасці; арганізацыя масавых беспарадкаў; арганізацыя дзеянняў, якія груба парушаюць грамадскі парадак; заклікі да дзеянняў, накіраваных на прычыненне шкоды нацыянальнай бяспецы Беларусі.

Усё гэта Пальчыс нібыта рабіў праз сацсеткі і тэлеграм-канал.

Мігранты пакінулі лагер на мяжы Беларусі і Польшчы і вялікай калонай кіруюцца да памежнага перахода "Брузгі — Кузніца". Апошні тыдзень у мігранцкім асяродку распаўсюджваліся чуткі, што 15 лістапада палякі адкрыюць мяжу і ўсіх прапусцяць на сваю тэрыторыю.

Гэтыя чуткі распаўсюджваліся як у Беларусі, так і ў родных краінах мігрантаў. Напрыклад, у інстаграм-стрымах, у якіх уцекачам з Ірака дагэтуль абяцаюць лёгкі шлях у Германію праз Беларусь.

Галава калоны мігрантаў дайшла да польскага памежнага перахода "Кузніца". Там дарога перакрытая кароднам польскіх памежнікаў.

З гэтага відэа бачна, што на шляху калону ўвесь час суправаджалі беларускія сілавікі.

На тэрыторыю польскага памежнага перахода "Кузніца" мігранты трапляюць у абыход беларускага памежнага перахода "Брузгі" — праз разламаны плот паміж імі. Сітуацыя абвастраецца: польскія сілавікі падагналі да кардона вадамёт.

Мігранты зблыталі першую стужку калючага дроту і стаяць наўпрост насупраць кардона польскай паліцыі. Іх робіцца ўсё болей.

Кадр зроблены ў 12:58 па мінскім часе.

Пакуль што мігранты па-ранейшаму знаходзяцца на беларускім баку мяжы. Польшча пачынаецца паміж памежнымі слупамі, дзе нацягнуты калючы дрот.

⚡️ Еўрасаюз прыняў рашэнне пашырыць санкцыі ў дачыненні да беларускіх уладаў. У якасці адказу на "гібрыдныя атакі і інструменталізацыю мігрантаў" кіраўнікі МЗС краінаў ЕС дададуць у санкцыйных спіс датычных да арганізацыі крызісу.

У блэкліст увойдуць юрыдычныя і фізічныя асобы, якія "садзейнічаюць арганізаваным і падтрыманым рэжымам Лукашэнкі нелегальным перасячэнням мяжы ЕС", паведамляе @dw_belarus.

Гуманітарны крызіс на мяжы — ці ёсць магчымасць дапамагчы?

Сітуацыя на беларуска-польскай мяжы з кожным днём становіцца ўсё больш напружанай. Нягледзячы на заявы прадстаўнікоў беларускага рэжыму пра аказанне ўсёй неабходнай дапамогі людзям, што захраслі ў памежных лясах, выглядае на тое, што гэтыя мігранты сталі закладнікамі супрацьстаяння Мінска і Захаду. А што адбываецца ў самім лагеры, незалежныя праваабаронцы даведацца не могуць: іх туды не дапускаюць.

Што не так у гэтай сітуацыі з мігрантамі і чым яны адрозніваюцца ад уцекачоў? Ці магчыма ім аказаць дапамогу і якую? Як на эмоцыях людзей гуляе прапаганда? На гэтыя ды іншыя пытанні адказвае праваабаронца, сузаснавальніца праваабарончай арганізацыі Human Constanta Наста Лойка.

Мігранты занялі прастору пад дахам беларускага памежнага перахода "Брузгі" і пляцоўку паміж ім і мяжой з Польшчай. Іх вельмі шмат.

Сітуацыя вельмі дзіўная. Беларускія ўлады ўпусцілі мігрантаў у краіну афіцыйна, паставіўшы візу ў кожны пашпарт, і называлі іх турыстамі. Цяпер "турысты" парушаюць дзяржаўную мяжу Беларусі — але памежнікі ніяк на гэта не рэагуюць.