Мінск. На Кальварыйскай пратэстоўцы змаглі аб'яднацца ў шматтысячную калону, і цяпер крочаць у бок станцыі метро "Маладзёжная".

Слухачы @euroradio паведамляюць, што яшчэ адна вялікая калона прыняла рашэнне не ісці ў цэнтр горада, развярнулася побач з Оперным тэатрам і кіруецца ў бок Зялёнага Луга.

Брэст. Затрымалі дзяўчыну з бел-чырвона-белым парасонам. Неўзабаве і праўда пачнуць перафарбоўваць бел-чырвона-белыя трубы заводаў...

Відэа @brestgazetatelegram

Мінск. "Найбліжэйшая адчыненая станцыя метро — "Пушкінская", паведамляе абвестка. Але гэта ненадоўга, бо ў бок "Пушкінскай" кіруецца шматтысячная калона пратэстоўцаў.

Дзякуй за фота слухачу @euroradio

Мінск. Агромная калона сілавікоў заблакаваная на мосце да вуліцы Кальварыйскай.

Відэа @motolkohelp

Мінск. Відэа чытачоў @tutby_official з жорсткім затрыманнем на Раманаўскай слабадзе. Мяркуючы па відэа, якое мы пакажам вам наступным, гэта працуе ГУБАЗіК. Трое трымаюць затрыманага чалавека на зямлі, а чацвёрты падлятае да іх і б'е яго нагой у твар.

Бліжэй да канца відэа адзін з сілавікоў кідае бел-чырвона-белы сцяг на дарогу, а чалавек, падобны да кіраўніка ГУБАЗіК Мікалая Карпянкова, падбірае яго і ўносіць з сабой.

Мінск. TUT.by паведамляе пра гучны хлапок побач з гасцініцай "Планета". Гэта зусім недалёка ад Стэлы "Мінск — Горад-герой".

Мінск. Пасля таго, як вялікая калона сілавікоў з’ехала ў бок “Пушкінскай” людзі выйшлі і заблакавалі Кальварыйскую.

Мінск. Сілавікі сустракаюць вялікую калону пратэстоўцаў побач з "Бонатэлем" на вуліцы Прытыцкага.

Мінск. Каля "Бонатэля" супраць пратэстоўцаў ізноў ужылі вадамёт, людзі разбегліся — у тым ліку і па могілках, якія зусім побач. Сілавікі пабеглі іх затрымліваць.

Мінск. Відэа пра тое, хто сёння супрацьстаіць пратэстоўцам на мінскім "Маршы годнасці". Чалавек, падобны да кіраўніка ГУБАЗіК Мікалая Карпянкова, нясе БЧБ-сцяг, які толькі што адабралі ў аднаго з мітынгоўцаў. За ім ідзе чалавек у шэрай байцы, які толькі што біў ляжачага затрыманага. Яшчэ адзін сілавік з гэтай кампаніі выходзіць на дарогу і адбівае люстэрка аўтамабіля, які едзе побач.

Бязмежжа сілавікоў, нематываваная агрэсія і пачуццё ўседазволенасці — вось супраць чаго сёння пратэстуюць людзі ў Беларусі.

Мінск. Знайшлася яшчэ адна калона пратэстоўцаў — яна ідзе па вуліцы Нававіленскай у бок Арлоўскай. Але ёсць і дрэнная навіна: да яе ўжо едуць аўтазакі.

Мінск. Пратэстоўцаў разганяюць на станцыі метро "Пушкінская". Відэа знятае 10 хвілін таму з вакна кавярні.

Мінск. Вось як сілавікі атакавалі пратэстоўцаў ля Стэлы — відэа, знятае з некалькіх метраў. Яны проста наляцелі і пачалі збіваць дубінкамі.

На 0:09 сілавік у цывільным і ў акулярах ударыў пратэстоўцу нагой, але паслізнуўся, упаў і так спужаўся, што хутчэй пабег да сваіх.

Відэа @mbkhmedia

Мінск. Незадоўга да разгону калона пратэстоўцаў на вуліцы Кальварыйскай скандуе ў тысячу галасоў: "Крыса, уходи!"

@euroradio

Мінск. Пратэстоўцы застаюцца на станцыі метро "Пушкінская" і ў яе ваколіцах.

Мінск. Непадалёк ад станцыі метро "Пушкінская" АМАП паспрабаваў затрымаць пратэстоўцаў, аднаго з іх пачалі збіваць дубінкамі. Неспадзявана людзі адказалі — і пасля кароткага канфлікту сілавікі былі вымушаныя адступіць.

Відэа @tutby_official

Мінск. На вуліцы Прытыцкага ў Мінску затрыманы галоўны рэдактар @nashaniva Ягор Марціновіч і фатографка гэтага выдання Надзея Бужан. Пра гэта @euroradio распавялі сведкі затрымання.

Сілавікі цяпер палююць на пратэстоўцаў у дварах вакол станцыі метро "Пушкінская", заходзяць даволі далёка.

Мінск. Бясконцыя атрады сілавікоў спяшаюцца да стэлы, каб разганяць пратэстоўцаў. З калонак у гэты час гучыць песняроўскае "Песни партиза-а-а-а-ан, сосны да туман".

Мінск. Галоўнага рэдактара "Нашай нівы" Ягора Марціновіча (у зялёным) і фатографку Надзею Бужан вядуць да мікрааўтобуса сілавікоў. Бачна, што Марціновіч апрануты ў камізэльку з надпісам "прэса".

Мінск. А 18-й адкрытыя ўсе станцыі мінскага метро, якія зачыняліся на час пратэстаў. У тым ліку і "Пушкінская", у ваколіцах якой дагэтуль працягваюцца затрыманні.

Мінск. Прыкладна 20 сілавікоў сабраліся перад хостэлам "Флэтком" ля станцыі метро "Пушкінская". Спачатку яны спрабавалі выбіць дзверы хостэла. Пасля на відэа, знятым чытачамі @tutby_official, бачна, як з яго выводзяць людзей.