Мінск. Удзельніцы маршу ў падтрымку Марыі Калеснікавай дабраліся да плошчы Незалежнасці і танчаць пад "Муры". І Ніна Багінская тут.

У праграме "Дата генератар" пісьменнік Анатоль Тарас распавядае, як бітву пад Оршай доўгія гады хавалі ад беларусаў. Слаўную перамогу войскаў ВКЛ над маскоўскім войскам 8 верасня 1514 года савецкія гісторыкі ігнаравалі — трэба было падтрымліваць міф пра братнія народы.

А значэнне перамогі ў бітве пад Оршай для беларускай гісторыі — велізарнае: https://www.youtube.com/watch?v=eiXU-3BgGW0

Выбаршчыкі сабралі 668 подпісаў за адкліканне дэпутата Алега Гайдукевіча. Людзі лічаць, што дэпутат "захапіўся праглядам крывавага спектакля". Але Мінгарсавет прытрымліваецца іншай думкі — і зрэзаў кампанію па адкліканні дэпутата пасля першага ж кроку.

https://euroradio.pl/vybarshchyki-sabrali-668-podpisau-za-adklikanne-gaydukevicha-ale-im-admovili

Новая праца дызайнера Уладзіміра Цэслера прысвечаная беларускай дыяспары ў ЗША, якая актыўна падтрымлівае пратэстоўцаў.

Сам Цэслер ужо амаль тры тыдні знаходзіцца ў вымушанай эміграцыі.

Слухачы @euroradio звярнулі ўвагу, што на відэа пагранкамітэта з "уцёкамі" сябраў Кардынацыйнай рады скача час на камерах відэаназірання. Калі адмесці версію з падарожжамі ў часе, то атрымаецца, што або камеры назірання на памежным пераходзе не сінхранізаваныя па часе, або што было некалькі розных дубляў асобных сцэн.

Першапачаткова нават парадак дзеянняў на гэтым відэа быў парушаны — але гэта пасля выправілі і перазалілі ролік.

На прэс-канферэнцыі ў Кіеве Іван Краўцоў і Антон Раднянкоў распавялі, што іх і Марыю Калеснікаву прывезлі да мяжы на розных машынах. Ужо хаця б таму версія пра "ўцёкі" не вытрымлівае ніякай крытыкі.

https://euroradio.pl/padarozhzha-u-chase-shto-ne-tak-z-videa-ucyokau-kalesnikavay-z-belarusi

Мінск. Затрыманы адвакат Максім Знак

Сябра прэзідыума Каардынацыйнай рады Максім Знак затрыманы раніцай 9 верасня. Факты:

— на 8:30 у Знака было запланаванае інтэрв'ю праз Zoom на расійскім радыё "Эхо Москвы". Але да размовы ён не далучыўся. Калі адзін з сябраў штаба Віктара Бабарыкі патэлефанаваў яму, Знак сказаў: "Здаецца, да нас нехта прыйшоў", а пасля напісаў слова "Маскі";
— тэлефон Знака з таго часу недасяжны;
— на паркоўцы побач з офісам, дзе ўсё гэта адбылося, заўважаныя мікрааўтобусы без нумароў — такія выкарыстоўваюць беларускія сілавыя структуры.
— ёсць фота, на якім Знака па паркоўцы вядуць сілавікі.

Карэспандэнты @euroradio едуць на месца падзей.

Мінск. Затрыманне адваката Максіма Знака. Сілавікі вядуць яго па паркоўцы да свайго буса.

Знак быў апошнім з актыўных сябраў прэзідыума Каардынацыйнай рады, які на раніцу 9 верасня не быў затрыманы і не быў вымушаны з'ехаць з Беларусі. Цяпер з прэзідыума КР на волі застаецца толькі нобелеўская лаўрэатка Святлана Алексіевіч.

Фота @motolkohelp

Мінск. У штабе Віктара Бабарыкі, дзе затрымалі Максіма Знака, спрацавала сігналізацыя. Прыехаў Дэпартамент аховы, але хлопцаў у памяшканне таксама не пускаюць. З таго боку дзвярэй кажуць, што "праводзяцца следчыя дзеянні".

Тым часам адвакат Дзмітрый Лаеўскі паведаміў, што ператрус чакаецца таксама і ў кватэры Максіма Знака. "Працэсуальнымі дзеяннямі" займаюцца супрацоўнікі Следчага камітэта.

Мінск. Святлана Алексіевіч просіць, каб да яе дома прыехалі журналісты, бо ёй тэлефануюць незнаёмыя нумары і звоняць у кватэру.

Мінск. Дзверы кватэры Марыі Калеснікавай, якія ламалі сілавікі.

Мінск. Да дома, дзе жыве нобелеўская лаўрэатка Святлана Алексіевіч, прыехала некалькі дзясяткаў неабыякавых людзей, а таксама прадстаўнікі шведскай і румынскай амбасадаў. Алексіевіч — апошняя з сямі сябраў прэзідыума Каардынацыйнай рады, якая цяпер на волі і ў Беларусі. Астатнія ці затрыманыя, ці знаходзяцца ў вымушанай эміграцыі.

Мінск. Скончыўся ператрус у штабе Віктара Бабарыкі, дзе сёння раніцай быў затрыманы Макс Знак. Сілавікі вынеслі з памяшкання iMac, манітор і некалькі скрыняў — верагодна, з дакументамі.

Мінск. Штаб Віктара Бабарыкі апячатаны. Перад роспісам — загадкавае прозвішча следчага, які праводзіў вобшук.