Мінск. Знятае ачапленне з праспекта Пераможцаў ля Палаца Незалежнасці. Расфарбаваныя "Рубяжы" паехалі мыцца. Але аўтамабільны рух пакуль не адкрыты.

Мінск. Калона сілавікоў пад прыкрыццём БРДМ-2 накіравалася да МКАД па праспекце Пераможцаў.

У МУС заявілі, што знайшлі ў багажніку адной з машын у Мінску "недзяржаўную атрыбутыку, некалькі нажоў розных відаў, сякеру, налепкі з надпісам "Страйк", "Мы патрабуем перамоваў з народам". А яшчэ там дамкрат, набор ключоў і амывайка.

Прэс-служба МУС сцвярджае, што, пабачыўшы міліцыянтаў, кіроўца машыны збег ў невядомым кірунку.

Сярод сілавікоў, якія сёння знаходзіліся ў раёне Нямігі і Верхняга горада, быў апазнаны начальнік ГУБАЗіК палкоўнік міліцыі Мікалай Карпянкоў. Былы камандзір спецназа МУС "Алмаз".

Ёсць версія, што сённяшнія жорсткія затрыманні ў цэнтры Мінска і ўласна гэтыя людзі ў футболках і бронекамізэльках — гэта і ёсць супрацоўнікі ГУБАЗіК.

Мінск. Апазналі чалавека, які гумовым дручком разбіў дзверы мінскай кавярні o'petit. Гэта той самы Мікалай Карпянкоў, кіраўнік Галоўнага ўпраўлення па барацьбе з арганізаванай злачыннасцю.

Якую арганізаваную злачыннасць ён шукаў у гэтай кавярні? Некалькі пратэстоўцаў, якія забеглі туды, ратуючыся ад хапуна.

Цяпер мы дакладна ведаем, што ў Мінску ёсць людзі, якім дазволена больш, чым нам з вамі. Больш, чым большасці грамадзян. І ім за гэта нічога не будзе, бо пры дыктатуры, усталяванай у Беларусі, менавіта яны — гаспадары жыцця.

У Беларусі з'явілася карта чатаў двароў і раёнаў. Праз яе можна знайсці ТГ-чацік свайго двара, а ў ім раззнаёміцца з суседзямі і пачаць разам змяняць да лепшага жыццё наўпрост навокал сябе! Спасылка: http://dze.chat

"Страшна, што людзі пачынаюць паводзіць сябе як бок зла"

Мы атрымалі на наш тг-акаўнт @euroradio_minsk меркаванне пра сённяшні "Марш адзінства". А дакладней — пра эпізод, калі барыкаду сілавікоў распісалі непрыемнымі для іх лозунгамі.

Мы не можам пагадзіцца з усімі думкамі ў гэтым тэксце. Напрыклад, нам не хацелася б глядзець на тое, як будзе затрымана столькі пратэстоўцаў, што "скончацца месцы ў камерах". Але мы не можам не прызнаць, што рацыя ў гэтых разважаннях ёсць.

Сёння на мітынгах пратэстоўцы крычаць: "Міліцыя з народам" — а праз хвіліну: "Што ты можаш без формы" і "Лашкі-петушкі". Дык можа, перад тым, як ісці на акцыю, трэба вызначыцца, "з народам" ці "петушкі"?

Міністр унутраных справаў Юрый Караеў даў вялікае інтэрв'ю тэлеканалу СТБ. Паглядзець яго варта хаця б дзеля таго, каб разумець, што цяпер адбываецца ў галаве чалавека, які аддае загады сілавікам.

Мінск. Па інфармацыі з некалькіх незалежных адна ад адной крыніцаў, увечары 6 верасня былі затрыманыя выратавальнікі, якія выцягвалі з вады тых, хто скочыў у Свіслач, ратуючыся ад амапаўскага хапуна. Адна з крыніцаў паведамляе @euroradio, што шасцёра супрацоўнікаў станцыі арганізацыі па выратаванні на водах, якая месціцца на Камсамольскім возеры, цяпер знаходзяцца ў Цэнтральным РУУС Мінска.

Нагадаем, 6 верасня пасля таго, як удзельнікі Марша адзінства амаль разыйшліся, сілавікі зладзілі хапун у парку Перамогі. Каб пазбегнуць затрыманняў, пратэстоўцы скочылі з набярэжнай у Камсамольскае возера. Там іх падабралі выратавальнікі — і пераправілі на іншы бераг возера, дзе знаходзіцца іх станцыя.

Для мяне сённяшні Марш адзінства — гэта найперш не крэатыўны пратэст і не жорсткія затрыманні, хаця і тое, і другое я бачыў на свае вочы. Для мяне галоўным, што я пабачыў сёння, стала гатовасць людзей адгукнуцца і дапамагчы.

Журналістам сёння дапамагалі ўсе і паўсюль. Улады адключылі мабільны інтэрнэт — ОК, людзі пусцілі мяне ў кватэру, каб я па вай-фаі перадаў у рэдакцыю фота і відэа. Мне падказвалі, куды трэба ісці, і папярэджвалі, куды не трэба. Падсаджвалі, каб я залез павышэй і зняў паболей.

Грамадства свядома абараняе сваё права ведаць, што адбываецца. Абараняе свае вочы ад дзяржавы, якая спрабуе іх выкалаць. Гэта абсалютна новы ўзровень самаарганізацыі.

Дзяржаве таксама было б не лішне ведаць, што адбываецца. Але яна выбірае жыць у постпраўдзе, біць дзверы кавярняў і затрымліваць усіх, хто не падабаецца. У тым ліку і журналістаў.

Піша галоўны рэдактар @euroradio Павел Свярдлоў

За жнівень золатавалютныя рэзервы знізіліся амаль на $1,4 млрд, ці на 15,8%. Зніжэнне абумоўлена тым, што Нацбанк вымушаны быў прадаваць валюту на Беларускай валютна-фондавай біржы, каб падтрымаць курс беларускага рубля.

https://euroradio.pl/za-zhniven-zolatavalyutnyya-rezervy-belarusi-znizilisya-na-158

Мінск. Чарга па каву да кавярні o'petit стаіць з самай раніцы. Учора супрацоўнікі кавярні схавалі ў сябе некалькі пратэстоўцаў, за якімі гналася міліцыя. Праз пару хвілін сілавікі разбілі шкло ў дзвярах кавярні і забралі адтуль некалькі чалавек.

Фота Кацярыны Андрэевай

Сяброўка прэзідыума Каардынацыйнай рады Марыя Калеснікава знікла ў цэнтры Мінска. Па звестках TUT.by, каля 10:05 побач з Нацыянальным мастацкім музеем невядомыя пасадзілі яе сілай у аўтамабіль з надпісам "Сувязь" і звезлі.

Калеснікава ішла ў паштовае аддзяленне на вуліцы Энгельса, каб забраць нейкі пакет, які прыйшоў ёй з КДБ. Пра гэта яна за некалькі хвілін да выкрадання распавяла рэдактару @euroradio Змітру Лукашуку.

https://euroradio.pl/maryyu-kalesnikavu-u-centry-minska-vykrali-nevyadomyya

Мінск. Акрамя Марыі Калеснікавай, на сувязь не выходзяць прэс-сакратар Каардынацыйнай рады Антон Раднянкоў і выканаўчы сакратар КР Іван Краўцоў.

Раднянкоў перастаў адказваць на тэлефон каля 11:00, але што з ім здарылася — невядома. Па звестках @motolkohelp, Краўцова затрымалі недалёка ад "Цэнтральнай кнігарні" на праспекце Незалежнасці.