У Дворца Независимости люди начали поднимать вверх зажжённые фонарики и поют песни

Мінск. 15 хвілін таму. Вялізны натоўп у тысячы галасоў скандуе: "Трыбунал!" У рэзідэнцыі ў Драздах гэта чуваць дакладна. А можа, і ў Астрашыцкім гарадку чуваць.

Мінск. Моцнае відэа. Смелыя людзі крычаць “Ганьба!” БТРам, якія едуць па праспекце Пераможцаў у бок палаца Незалежнасці. Даслалі слухачы @euroradio

Мінск. У цэнтры Мінска пачалася жорсткая залева. Пратэстоўцы паціху вяртаюцца ад стэлы ў бок Нямігі.

Мінск. На праспекце Незалежнасці ціхары спрабавалі затрымаць пратэстоўцаў, але людзі кінуліся на дапамогу. Пачалася бойка, сілавікі вымушаныя былі схавацца ў бусе, але раз'ятраныя людзі не захацелі іх адпускаць проста так і пачалі лупасіць па "службовым аўтамабілі" (на самай справе — Ford без нумароў і аніякіх апазнавальных знакаў). Па версіі прэс-службы МУС, з гэтага (а не з грубага нападу на мірных пратэстоўцаў) і пачынаецца эпізод. Бусік захлопваецца і з'язджае.

Затрыманыя тры чалавекі. Сярод іх, па інфармацыі МУС, 34-гадовы футбольны трэнер.

Мінск. Нягледзячы на дождж, людзі працягваюць стаяць літаральна за пару метраў ад кардона сілавікоў ля Палаца Незалежнасці. Праз хвіліну пасля таго, як было зробленае гэтае фота, да іх выйшаў чалавек, які прадставіўся Мікалаем Латышонкам — колішнім супрацоўнікам Службы бяспекі Аляксандра Лукашэнкі, а цяпер яго памочнікам па агульных пытаннях. Ён спрабуе ўпэўніць людзей, што пратэсты трэба спыніць. Карэспандэнт @euroradio на месцы, хутка будзе відэа гэтай гістарычнай размовы.

Магілёў. Журналіст-фрылансер Алесь Сабалеўскі затрыманы ў жывым эфіры. Алесь стрыміў са шматтысячнага шэсця і адцягнуўся на вакно, з якога пад ногі пратэстоўцам упаў вазон, калі на яго з крыкам "Міліцыя!" наляцелі сілавікі. Вядома, першае, што яны запатрабавалі зрабіць, — выключыць стрым.

Навошта так рабіць?

Мінск. Карыстальнікі беларускіх мабільных аператараў паведамляюць, што ў іх запрацаваў мабільны інтэрнэт. 30 жніўня звужэнне канала па патрабаванні спецслужбаў працягвалася блізу 3,5 гадзіны.

Мінск. Каля сілавікоў засталося не больш за 30 чалавек. Яны спрабуюць размаўляць з АМАПам. Астатнія разышліся. Сыходзячы, яны пакінулі "падарункі": гарбузы, вянок і шарыкі. А таксама ружовае парася.

Мінск. Калона БМП, якая нарабіла сёння шуму ў горадзе, з'ехала недалёка. Слухачы @euroradio перадаюць, што яна стаіць недалёка ад вёскі Зацань пад Мінскам.

Мінск. У адказ на пытанне пра месцазнаходжанне Аляксандра Лукашэнкі яго прэс-сакратарка скінула "РИА Новости" яго фота з аўтаматам на фоне Палаца Незалежнасці. Але нават калі гэтае фота і зробленае сёння — дык, мяркуючы па цені, паміж 16:00 і 17:00.

Увесь гэты час тысячы пратэстоўцаў былі побач з Палацам Незалежнасці. Але чамусьці Лукашэнка да іх не выйшаў.

Пачакае, пакуль усе пойдуць, і выйдзе пасля, каб на камеры сказаць, што ўсе ізноў разбегліся, як пацукі?

Мінск. Мікалай Латышонак, памочнік Аляксандра Лукашэнкі па агульных пытаннях, спрабуе нешта даказаць пратэстоўцам. Размова была на павышаных танах. За спінай чыноўніка натоўп сілавікоў.

Мінск. Якім пытаннем дастаць памочніка Аляксандра Лукашэнкі?

— Няхай бюлетэні пакажа! — звяртаюцца да Мікалая Латышонка людзі ля Палаца Незалежнасці.

Чыноўнік махае на іх рукой і сыходзіць.

— Праз вашыя ўсе акцыі... Паглядзіце на курс долара! — спрабуе ўпэўніць людзей спыніць пратэсты Мікалай Латышонак, памочнік Аляксандра Лукашэнкі.

Людзі сустракаюць гэтую заяву смехам і нагадваюць чыноўніку пра дэвальвацыю 2011 года.

— А вы памятаеце 1991 год? — раптам пытаецца чыноўнік.

Не, так ён вулічныя пратэсты не спыніць.

— Вы мусіце разумець: усё, што вы робіце, гэта рэвалюцыйны працэс. Гэта мусіць карацца! — так памочнік Аляксандра Лукашэнкі тлумачыць, чаму на шэраг пратэстоўцаў ужо пачатыя крымінальныя справы, а на сілавікоў, якія іх збівалі, — не.

Мінск. Да падарункаў, якія пратэстоўцы пакінулі для Аляксандра Лукашэнкі, падкрадаюцца людзі ў аранжавай вопратцы. Перададуць шэфу?

Поўнае відэа размовы Мікалая Латышонка, памочніка Аляксандра Лукашэнкі, з пратэстоўцамі ля Палаца Незалежнасці

Пра курс долара і пратэсты, смяротнае пакаранне, крымінальныя справы сярод сілавікоў, Каардынацыйную раду. Ёсць моманты, калі Латышонку проста няма чаго адказаць на рэплікі людзей. Ён стаіць, маўчыць і чакае пытання, па якім усё ж сможа хаця б нешта сказаць.

https://www.youtube.com/watch?v=nPKaWv5kk9c

Кароткія высновы рэдакцыі @euroradio. 30 жніўня, безумоўна, можна занесці ў актыў пратэстоўцам:

— нягледзячы на дрэнны прагноз надвор'я, іх сабралася відавочна больш, чым у мінулую нядзелю;

— сілавікі не пусцілі пратэстоўцаў на плошчу Незалежнасці, спрабавалі рассеяць па дарозе і нават зладзілі хапун побач з гатэлем "Мінск". Але пратэстоўцаў было так шмат, што АМАП і ўнутраныя войскі вымушаныя былі зняць усе ланцугі, якія стрымлівалі марш;

— 23 жніўня да плошчы Дзяржаўнага сцяга пайшлі тысячы; 30 жніўня — дзясяткі тысяч;

— ля Палаца Незалежнасці пратэстоўцы сустрэліся з вадамётамі і машынамі "Рубеж", але не сталі дэманстраваць сілу і проста размаўлялі з байцамі АМАП;

— Аляксандра Лукашэнку блізу 16:00 сфатаграфавалі з аўтаматам — нібыта ён ішоў у бок пратэстоўцаў. Але з тэрыторыі Палаца Незалежнасці ён так і не паказаўся;

— да незадаволеных людзей выйшаў "парламенцёр" — Мікалай Латышонак, памочнік Лукашэнкі па агульных пытаннях. Ён спрабаваў упэўніць мітынгоўцаў, што Лукашэнка ўсё роўна застанецца і пратэсты трэба згортваць. Але людзі не згаджаліся, і чыноўнік сышоў, махнуўшы на іх рукой.

— абласныя гарады: Брэст, Гродна, Магілёў — таксама выйшлі на шматтысячныя пратэсты.

Але былі і негатыўныя моманты.

— сітуацыя на праспекце Незалежнасці, калі людзі, абураныя гвалтоўнымі затрыманнямі, усё ж не стрымаліся і ўступілі ў канфлікт з сілавікамі;

— 140 затрыманых: магчыма, гэтыя людзі на нейкі час выбываюць з пратэставага руху;

— улады па-ранейшаму не жадаюць пачуць пратэстоўцаў. Мікалай Латышонак выйшаў да іх не для таго, каб выслухаць, а для таго, каб выказаць пазіцыю, якую, на яго думку, усім давядзецца прыняць.

Мінск. 15 хвілін таму ад Палаца Незалежнасці з'ехала і калона БТРаў.

30 жніўня ў Мінску — чацвёртую нядзелю запар — прайшла масавая акцыя пратэсту. Сілавікі ад пачатку спрабавалі перашкодзіць правесці яе, але людзей сабралася так шмат, што ні вадамётамі, ні калючым дротам зрабіць нічога не атрымалася. Карэспандэнты @euroradio увесь гэты дзень працавалі для вас у самых гарачых кропках. Вось наш выніковы відос — такою мы запомнім нядзелю, 30 жніўня 2020 года!

https://youtu.be/vdxMMqDlarM

"Захапілі свядомасць", "не разумеюць": улады тлумачаць масавыя пратэсты тым, што беларусамі лёгка кіраваць

Увечары 30 жніўня дэпутаты і чыноўнікі актыўна выказваліся ў дзяржСМІ пра масавыя пратэсты на вуліцах беларускіх гарадоў. Дэпутат Палаты прадстаўнікоў Марына Лянчэўская патлумачыла жаночы пратэст — вялікі марш, якім жанчыны прайшлі па Мінску ў суботу — тым, што імі маніпулююць, а яны гэтага не разумеюць.

"Жанчыны нават не разумеюць таго, што збольшага імі маніпулююць. Лічаць, што яны самастойна выйшлі, прыгожа сталі з кветкамі. Але, на самой справе, гэта маніпуляванне, безумоўна, іх свядомасцю".

Начальнік Навукова-даследчага інстытута Узброеных Сіл Беларусі Віктар Тумар даў інтэрв'ю праграме "Галоўны эфір" на "Беларусь 1". На яго думку, людзі ва ўзросце да 30 гадоў, якія "карыстаюцца гэтым інтэрнэтам", робяцца "палівам рэвалюцыі".

"Калі захапілі свядомасць грамадзян пасродкам телеграм-каналаў, у якіх асвятлялася негатыўная інфармацыя супраць сілавікоў, супраць дзяржслужачых, супраць журналістаў, не кажучы пра тое, што неабходна зрабіць, каб гэты негатыў прыбраць, пасля гэтага яны ўключылі пэўнае кіравальнае ўздзеянне", — заяўляе Тумар.

"Нашымі людзьмі стала лёгка кіраваць", — дадае вайсковец.