Брэст. Лідар "Дай Дарогу!" Юра Стыльскі выйшаў з міліцэйскага пастарунку. "Але гэта яшчэ не свабода — хутка будзе суд..." — піша паблік ДД! ва "УКантакце".

Юру затрымалі ўвечары 20 жніўня, і гэта было другое затрыманне за два дні. Музыка актыўна ўдзельнічае ў масавых пратэстах, якія праходзяць у Брэсце, і стрыміць з іх у свой акаўнт у Instagram.

“Папярэдзілі, каб больш нідзе не з’яўляўся, інакш ці буду “сіні”, ці з’явіцца крымінальны артыкул”, — распавёў Юра Стыльскі ў размове з Еўрарадыё. На 28 жніўня лідара “Дай Дарогу!” выклікаюць у суд. Яго вінавацяць ва ўдзеле ў несанкцыянаваным масавым мерапрыемстве.

На адной з буйных акцый пратэсту на мінулым тыдні Юра нёс бел-чырвона-белы сцяг на чале шэсця ў Брэсце. Пасля гэтага музыку забралі “на суткі”. Праз дзень — ізноў. А сёння адпусцілі.

Ён кажа, што ў ізалятары пры Ленінскім РУУС застаецца мала затрыманых. “Людзей выпускаюць. Нікога не б’юць. Кормяць”, — дадаў музыка.

Апошні раз смартфон Мікіты Крыўцова быў уключаны 12 жніўня каля РНПЦ неўралогіі і нейрахірургіі. Гэтая ўстанова месціцца па адрасе: вуліца Францыска Скарыны, 24. Карыстальнікі "Тэлеграма" заўважаюць, што побач з РНПЦ месціцца будынак упраўлення ўнутраных спраў Мінскага раёна. Яго адрас: вуліца Францыска Скарыны, 20. Абедзве ўстановы трапляюць у адну соту.

Больш за 500 беларускіх сілавікоў захацелі "перайсці на бок дабра" і звярнуліся па дапамогу ў ініцыятыву, створаную Мікітам Мікадам і іншымі беларускімі айцішнікамі.

"Мы пакуль не паспелі разабраць усе сітуацыі. Першымі разглядаем тых людзей, хто публічна выступае супраць таго, што было зроблена рэжымам, — распавядае Мікада, стваральнік PandaDoc, аднаго з самых паспяховых беларускіх стартапаў ever. — Таму што гэта тыя людзі, якім дапамога спатрэбіцца хутчэй за ўсё. То бок, там магчымыя нейкія рэпрэсіі, і трэба дапамагаць тэрмінова. Па-сутнасці, гэта асноўны крытэр на дадзены момант. Але мы прыдумаем яшчэ крытэры, мы проста не паспелі".

Каб разабрацца з усімі заяўкамі, Мікіта Мікада пайшоў у адпачынак. "Я проста не магу больш нічога рабіць, — кажа ен. — Акрамя таго, каб змагацца і дапамагаць змяніць рэжым".

Для расследавання актаў гвалту з боку сілавікоў створаная міжведамасная камісія. Пра гэта міністр унутраных справаў Юрый Караеў распавёў арцыбіскупу Тадэвушу Кандрусевічу.

Міністр дадаў, што не даваў загаду да жорсткіх дзеянняў і суперажывае пацярпелым. Пытанне — хто даў гэты загад і хто ўвогуле ў Беларусі можа аддаваць такія загады? — дагэтуль застаецца адкрытым. Як і пытанне адказнасці за гвалт — бо "міжведамасная камісія" лёгка можа прыйсці да высновы, што сілавікі не парушалі закон.

Міністр абароны Беларусі Віктар Хрэнін непакоіцца, што дзеянні беларускіх сілавікоў за мяжой палічаць генацыдам уласнага народа і гэта стане падставай для вайсковага ўмяшання ў справы Беларусі. Такія думкі ён выказаў у Гродне на нарадзе з удзелам Аляксандра Лукашэнкі.

Хрэнін мяркуе, што ўвайсці ў Беларусь могуць вайсковыя часці НАТА, размешчаныя ў Польшчы і Літве. Ён прыводзіць у прыклад амерыканскія знішчальнікі F-16, якія базуюцца на польскай базе Ласк. Іх падлётны час да беларускай мяжы — 22 хвіліны.

Тым часам НАТА называе заявы Лукашэнкі пра вонкавую пагрозу з Захаду беспадстаўнымі. Не лішнім таксама будзе нагадаць, што абаронай свайго насельніцтва як нагодай для ўмяшання апошняй у рэгіёне карысталася Расія. Менавіта абарона рускамоўнага насельніцтва стала падставай для таго, каб у 2014 годзе развязаць баявыя дзеянні ва Украіне.

"Не магу нават думаць пра гэта без слёз"

Тэнісістка Вікторыя Азаранка вельмі асцярожна, але выказалася з нагоды апошніх падзей у Беларусі.

"Гэта вельмі складаная тэма для размовы. Калі шчыра, тое, што я бачу, разбівае мне сэрца. Я не магу быць там і зразумець усю сітуацыю, гэта сапраўды сумна. Сапраўды сумна, і складана гаварыць пра гэта. Але я спадзяюся, што гвалт неадкладна спыніцца, бо гэта сапраўды Я не магу нават думаць пра гэта без слёз, калі быць шчырай.

Я спадзяюся, галасы людзей пачуюць. Як я ўжо сказала, гэта складаная тэма. Я не хачу, каб нехта карыстаўся маімі словамі ў прапагандысцкіх мэтах, таму я буду перажываць тое, што адчуваю, без лішняй увагі медыя і перакручвання гэтага ў іх мэтах".

На ўездах у Мінск і на выездах з іншых гарадоў у бок Мінска ДАІ сёння ладзіць аперацыю "Фільтр". Пасты заўважаныя на выездзе з Брэста, Баранавічаў і на ўездзе ў Мінск з боку Маладзечна.

Відавочцы кажуць, што вялікіх зграмаджэнняў аўто няма — інспектары правяраюць дакументы кіроўцаў і хутка ўсіх адпускаюць.

Фота @motolkohelp

Прыхільнікі Лукашэнкі раніцай 23 жніўня здзівілі жыхароў раёна Новая Баравая пад Мінскам. Прыехалі на аўтобусах, наўпрост на стаянцы разгарнулі сцяг, пастаялі роўна паўгадзіны, згарнулі сцяг, селі ў аўтобусы і з'ехалі. Побач стаялі байкеры — "ціпа мы не пры справах", але ў іх таксама былі сцягі.

Што гэта было?

"Водораздел проходит не между сторонниками Лукашенко и его противниками, а между уголовными преступниками и людьми разных взглядов, которые не совершали уголовные преступления.

И вот теперь медработники выходят на улицы с лозунгом «Медики против насилия!». Я плохо представляю тех людей, кто пытается оправдать тот ужас, который произошел. Что здесь можно оправдать?"

Вядомы віцебскі доктар Уладзімір Мартаў выстцпіў з адкрытым лістом пра бязмежжа сілавікоў у Беларусі. Цалкам чытаць тут.

Следчы камітэт: смерць Мікіты Крыўцова не носіць крымінальны характар

Следчыя, якія аглядалі цела Мікіты Крыўцова, не знайшлі на ім бачных цялесных пашкоджанняў. Па факце смерці 28-гадовага жыхара Жодзіна праводзіцца праверка, прызначаная судова-медычная экспертыза.

Мікіта Крыўцоў знік у Мінску 12 жніўня. У той дзень працягваліся вулічныя пратэсты — меркавалася, што хлопец мог удзельнічаць у іх і быць затрыманым. Да ўчорашняга вечара ён быў апошнім са спіса зніклых 9-13 жніўня. 22 жніўня яго цела знайшлі ў лесапаласе на вуліцы Парніковай.

Мінск. На вуліцы Савецкай — безліч вайсковай тэхнікі. Гэта за два крокі ад плошчы Незалежнасці, дзе сёння плануюць збірацца мітынгоўцы.

Следчы камітэт спяшаецца зрабіць выснову, што смерць Мікіты Крыўцова не звязаная з падзеямі, якія адбываюцца ў краіне. Прэс-служба СК асобна заўважае, што малады чалавек "не прыцягваўся да адміністрацыйнай адказнасці за ўдзел у несанкцыянаваных масавых мерапрыемствах і не затрымліваўся з гэтай нагоды".

Але гэта кажа хіба што пра тое, што да пратэстаў у Беларусі сёлета далучыліся людзі, якія раней не ўдзельнічалі ў палітычным жыцці. Канал molovTG публікуе відэа, на якім Крыўцоў падыходзіць да шэрагу АМАПаўцаў, трымаючы ў руках бел-чырвона-белы сцяг. Як і навошта тады следчыя так упэўнена сцвярджаюць, што загінулы хлопец не ўдзельнічаў у пратэстах?

Украіна. Уладзімір Зяленскі ў інтэрв'ю Euronews заявіў, што на месцы Аляксандра Лукашэнкі ён бы для ўрэгулявання крызісу ў краіне правёў новыя прэзідэнцкія выбары.

"Давайце ўявім, што я ўпэўнены ў сабе, я ўпэўнены ў выбары народа. Я — упэўнены чалавек. Як можна ўсіх супакоіць? Я б сказаў: праз месяц — новыя выбары. Я іду. Ідзіце, хто хоча. Міжнародныя назіральнікі — я ўсіх бы запрасіў, усіх. І сказаў бы народу Беларусі: калі ласка, выбірайце. І пасля такога выніку не было б пытанняў ні ў кога. Я ў гэтым упэўнены. Калі б Аляксандр Рыгоравіч перамог, ён бы перамог. А калі б перамог нехта іншы, значыць, нехта іншы. Але ўсё было б спакойна, без крыві, сумленна і ўвайшло б у гісторыю", — сказаў Зяленскі.