Мінск. Прэм'ер-міністр Беларусі Раман Галоўчанка ў праграме "Маркаў. Нічога асабістага" на тэлеканале АНТ назваў кошт вяртання кантролю над беларуска-расійскай мяжой. Тэхнічна абсталяваць мяжу будзе каштаваць бюджэту 2,5-3 мільярды рублёў ($1-1,2 млрд). А сама гэтая праца зойме тры-пяць гадоў.

Мінск. Спартовы каментатар Уладзіслаў Татур сышоў з тэлеканала "Беларусь 5"

"Зрителям спасибо за внимание и критику! Коллегам — за совместную работу и помощь! Надеюсь, мы еще услышимся. Во всяком случае я в это верю! Берегите себя!" — напісаў Татур у "Фэйсбуку".

Мінскі раён. 20 жніўня па Мінску ўвесь дзень каталася калона аўтамабіляў з чырвона-зялёнымі сцягамі і песняй "Саня останется с нами" з вокнаў. А ў раёне Новая Баравая пад Мінскам калона хвілінаў 20 ездзіла кругамі. Каб ужо ўсе запомнілі і зразумелі: застанецца. Дзяржаўная прапаганда — яна такая!

Мінск. Затрыманні кіроўцаў трапілі на відэарэгістратар

10 жніўня Максім трапіў у затор на праспекце Пушкіна ў Мінску. Неўзабаве там з'явіўся АМАП. Кіроўцаў пачалі затрымліваць — з матам і пагрозамі. Усё гэта трапіла на відэарэгістратар, да якога хлопец дабраўся толькі праз тры дні — калі яго выпусцілі з ізалятара ў Жодзіне.

Відэа захавалася, бо навігатар палічыў яго аварыйным праз тое, што АМАП грукаў па шкле. На памяць пра затрыманне Максіму засталіся сляды ад пластыкавых сцяжак на руках — яны дагэтуль не прайшлі.

Сёння мы жадаем вам добрай ночы прыгожым відэа, знятым 14 жніўня на плошчы Незалежнасці. Гэта той вечар, калі беларускія жанчыны абдымаліся на плошчы з беларускімі сілавікамі. Бадай што адзіны момант сёлетняй выбарчай кампаніі, калі апазіцыя і ўлады знайшлі простае чалавечае паразуменне.

"Давайце сустрэнемся тут заўтра, вы прыйдзеце, і ўсё — ізноў пагаворым!"

Маладзечна. Апантаная прыхільніца Аляксандра Лукашэнкі дабралася да мікрафона падчас праўладнага мітынгу. Гэтае відэа лепш за каву дапаможа вам прачнуцца сёння раніцай!

Крыніца: "Рэгіянальная газета"

Святлана Ціханоўская запісала зварот да беларускіх рабочых. Яна просіць працягваць і пашыраць забастоўкі. І нагадвае, што гэта абсалютна легальны спосаб пратэставаць.

"Вы запужалі дыктатуру, яна дрыжыць ад страху перад вамі, вашай сілай і мужнасцю. Таму сёння вы адчуваеце агромністы ціск, таму вам пагражаюць. Забастоўкі заціснулі дыктатуру ў кут, паранілі яе ў самае сэрца. Таму цяпер вас усімі спосабамі спрабуюць падзяліць і пасварыць".

http://euroradio.pl/svyatlana-cihanouskaya-vypuscila-zvarot-da-rabochyh

Мінск. Кандыдатка ў прэзідэнты Ганна Канапацкая абскардзіла вынікі выбараў у Вярхоўным судзе. І не ўпусціла выпадку паддзець сваіх сапернікаў па выбарчай кампаніі:

"Я прайшла ўвесь гэты складаны электаральны цыкл, выдаткаваўшы значную суму уласных сродкаў. Так, вось такая я — беларуская жанчына-палітык. Не ўсім зразумелая, не ўсімі любімая, без цудоўных катлет у анамнезе, але не заплямленая ў крыві нашых грамадзян".

Мінск. У мімаў укралі голас. У адказ яны правялі акцыю каля Купалаўскага тэатра.

Еўрасаюз гатовы выступіць пасярэднікам пры ўрэгуляванні палітычнага крызісу ў Беларусі. Пра гэта заявіў 20 жніўня прэзідэнт Францыі Эмануэль Макрон падчас сумеснай прэс-канферэнцыі з канцлеркай Германіі Ангелай Меркель.

"Неабходны дыялог паміж уладамі, апазіцыяй і грамадзянскай супольнасцю. Мы б хацелі, каб гэты дыялог пачалі самі беларусы. Але Еўрапейскі саюз гатовы суправаджаць [Беларусь] ва ўсталяванні гэтага дыялогу, калі наша пасярэдніцкая роля можа быць карыснай і калі гэтага захочуць самі беларусы", — сказаў прэзідэнт Францыі.

Аднак беларускія ўлады адмаўляюцца ад дапамогі перамоўшчыкаў з-за мяжы. Траіх з сямі сябраў Каардынацыйнай рады, якая збіралася вырашаць пытанне трансферу ўлады, раніцай 21 жніўня выклікаюць на "перамовы" ў Следчы камітэт.

Мінск. Юрыст Каардынацыйнай рады Максім Знак прыйшоў да будынка Следчага камітэта. Разам з ім адвакат Дзмітрый Лаеўскі, які абараняе інтарэсы незарэгістраванага кандыдата ў прэзідэнты Віктара Бабарыкі.

Людзі скандуюць "Адзін за ўсіх, і ўсе за аднаго". Знак раіць не чакаць яго, бо допыт можа працягвацца 8 гадзін.

Відэа: @motolkohelp

Мінск. 21 жніўня падпісчыкі і кіёскі не атрымаюць свежыя нумары недзяржаўных газет "Комсомольская правда в Белоруссии" і "Народная Воля". Тыпаграфія "Беларускі дом друку" не змагла іх надрукаваць — раптоўна зламалася тэхніка.

З "Камсамолкай" такое за апошні тыдзень здараецца ўжо трэці раз. Па нейкім супадзенні на першых палосах ненадрукаваных газет — бел-чырвона-белыя сцягі і рэпартажы з пратэстаў. А на перадавіцы (во слова якое мы прыгадалі!) адзінага нумара, які такі надрукавалі, была Іна Афанасьева.

Мінск. Побач з будынкам Следчага камітэта з'явіўся Сяргей Дылеўскі, прадстаўнік стачкама Мінскага трактарнага завода.

Фота @motolkohelp

Преподаватели, студенты и выпускники МГУ требуют лишить Лукашенко звания почетного профессора вуза.

https://news.tut.by/world/697517.html?tg

Міністр спорту (і колішні супрацоўнік службы бяспекі Аляксандра Лукашэнкі) Сяргей Кавальчук спрабуе пераканаць спартсменаў падтрымліваць дзейныя беларускія ўлады:

"Усё, што зроблена ў нашай краіне для спорту, фізкультуры і турызму, умацавання здароўя нацыі, стваралася многімі пакаленнямі беларусаў. Разгубіць і разбазарыць [гэта] можна раптоўна. Таму хопіць паддавацца на правакацыі, лозунгі і заклікі да забастовак і стачкі. Гэта шлях у тупік".

Днямі 200 спартоўцаў, сярод якіх прызёры Алімпійскіх гульняў Аляксандра Герасіменя і Аляксандра Раманоўская, падпісалі адкрыты ліст "Спорт у краіне без гвалту". Яны асуджаюць шматлікія факты фальсіфікацый на выбарах, заклікаюць вызваліць і рэабілітаваць палітвязняў.

79% адказалі "Не" на пытанне "Ці ўпэўненыя вы ў сваёй абароненасці ад злачынных замахаў у Беларусі". Апытанка праводзілася на сайце Следчага камітэта РБ.

Замест тысячы слоў Аляксандра Лукашэнкі пра "моцную квітнеючую Беларусь".