⚡️ Мінск. Людзі, нязгодныя з вынікамі выбараў, заблакавалі выбарчы ўчастак на вуліцы Чыгуначнай. Старшыня ўчастка, сябры выбарчай камісіі і праўладныя назіральнікі — унутры.

Пінск. На плошчы перад выканкамам каля дзвюх тысяч чалавек. Супраць іх было толькі 20 АМАПаўцаў, але ім на дапамогу прыйшлі памежнікі. Пратэстоўцы выклікалі старшыню гарвыканкама. Ён зараз вядзе перамовы з пяцярымі з іх.

Мінск. З боку Галерэі сцяна шчытоў, стукаюць, адціскаюць. На Мельнікайтэ — сцяна шчытоў, нікога не прапускаюць і адціскаюць людзей. Людзей заганяюць да Стэлы, адразаюць шляхі адыходу. У натоўпе людзі з запаленымі фаерамі.

Мінск. Участкі №60-61 Маскоўскага раёна ў 9-й школе. Амаль 200 чалавек — жыхары звычайнага мінскага "спальніка" сабраліся, каб на свае вочы пабачыць вынікі галасавання.

⚡️ Мінск. У аўтазакі кідаюць фаеры.

Гродна. На вуліцах горада каля 1 тысячы пратэстоўцаў. Як і ў Брэсце, яны паведамляюць, што супраць іх ўжо ўжыты слезацечны газ.

Мінск. АМАП пачаў адцясняць пратэстоўцаў з Нямігі да Стэлы.

Мінск. Разгонам пратэстоўцаў дырыжуе начальнік мінскага АМАП Дзмітрый Балаба. Ён недалёка ад Стэлы.

Мінск. АМАП перагрупіраваўся, сілавікі пачалі выбягаць з-за шчытоў і пераследаваць людзей. Неўзабаве ізноў пачнуцца затрыманні.

Мінск. АМАП рассек натоўп на тры часткі. За спінамі сілавікоў з ачаплення іншыя пераапранаюцца ў бронежылеты.

Пратэстоўцаў вельмі шмат, яны ўвесь час крычаць "Сыходзь!".

⚡️ Мінск. Аўтазак уехаў у натоўп пратэстоўцаў. Карэспандэнт Еўрарадыё перадае, што кіроўца аўтазака, найхутчэй, хацеў напужаць людзей і рухаўся на іх з вялікай хуткасцю.

Адзін з пратэстоўцаў заскокнуў на бампер аўтазака. Той пачаў віхляць управа-ўлева. Чалавек упаў пад колы, яго ледзь не задавіла.

Мінск. Светлашумавыя гранаты, цяпер дакладна.

Мінск. Фатографа Мсціслава Чарнова з Associated Press дужа пабілі. Пад'ехала хуткая.

Мінск. АМАП апрануў процігазы і распыліў газ. Цяпер пратэстоўцы не могуць падыйсці да байцоў АМАП.

Мінск. Участак па адрасе Чурлёніса, 3 — Маскоўскі раён. 63% за Святлану Ціханоўскую.

Смалявічы. Ганна Севярынец паведамляе дадзеныя з двух участкаў.
1. 478 за Святлану Ціханоўскую, 264 за Аляксандра Лукашэнку.
2. 574 за Святлану Ціханоўскую, крыху больш 200 за Аляксандра Лукашэнку.

Мінск. Пасля наезду аўтазака адзін чалавек без прытомнасці, у крыві. Медыкі спрабуюць яго рэанімаваць.

Мінск. Байцы АМАП цягнуць чалавека па зямлі.

Відэа: @tutby_official

Мінск. Жорсткая сутычка з АМАПам каля Палаца Спорту

Відэа: @tutby_official

⚡️ Мінск. У бок Стэлы паехала спецтэхніка — аўтамабілі з кратамі для адцяснення натоўпу на даху і вадамёт.

Мінск. @mbkhmedia піша, што АМАП пачаў страляць па пратэстоўцах халастымі пулямі. Нашы карэспандэнты чулі стрэлы.