Лукашэнка накарміў Фазэля абяцаннямі, а той і рады

На сайце IIHF апублікаванае вялікае інтэрв'ю з Рэнэ Фазэлем. З яго вынікае, што падчас візіту ў Мінск прадстаўнікі Міжнароднай федэрацыі хакея агучылі некалькі палітычных умоваў:

- знайсці мірныя рашэнні крызіса ў грамадстве;
- даць усім беларускім спартоўцам магчымасць вярнуцца ў свае віды спорту;
- садзейнічаць расследаванню ў дачыненні да старшыні ФХРБ Дзмітрыя Баскава;
- нармалізаваць сітуацыю з COVID-19, якая "не адпавядае міжнародным стандартам".

Рэакцыю беларускіх ўладаў на гэтыя патрабаванні Фазэль апісвае так:

- "мы атрымалі абяцанне ад урада прытрымлівацца ўсіх правілаў IIHF";
- "яны прызналі сур'ёзнасць абвінавачванняў [да Баскава] і паабяцалі сабраць усе магчымыя факты";
- "шмат хто недаацэньвае здольнасці ўрада Беларусі рухацца наперад".

Цяпер стратэгія Лукашэнкі і Фазэля цалкам зразумелая. Неўзабаве беларускія ўлады прадставяць IIHF "факты" пра тое, што ў Беларусі ўсё выдатна, і ЧС-2021 па хакеі застанецца ў Мінску.

МУС расказала, колькі пагроз і абразаў паступіла за апошнія 5 месяцаў у адрас іх супрацоўнікаў:

— 225 пагроз;
— 382 абразы;
— 92 "факты" паклёпу;
— больш за 18 тысяч выпадкаў разгалошвання персанальных звестак.

У дачыненні да людзей, якія пісалі абразы і разгалошвалі асабістыя звесткі сілавікоў, заведзена 332 крымінальныя справы. Да адміністрацыйнай адказнасці прыцягнута 127 чалавек.

Вам не падабалася леташняя цёплая зіма? Трымайце лютыя маразы: у нядзелю да -31!

"На жаль, па гэтай тэме няма матэрыялаў", — часты надпіс на платформе для дыстанцыйнага навучання, на якую Міністэрства адукацыі патраціла $120 тысяч. Сайт працуе ў тэставым рэжыме. У поўную моц запусціцца пасля пандэміі?

Мінадукацыі запусціла платформу для дыстанцыйкі, але яна не даробленая

Журналіст і медыяменеджар Андрэй Аляксандраў знаходзіцца ў Кастрычніцкім РУУС Мінска. Пра гэта са спасылкай на калег журналіста паведамляе @bajby.

З якой нагоды ён затрыманы, у міліцыі паведаміць адмовіліся. Туды накіраваўся адвакат журналіста.

Фота Вольгі Хвоін, БАЖ

“Такога вы не чулі”: навагодні кліп ад каманды Еўрарадыё — ПРЭМ'ЕРА!

Музычная рубрыка “Такога вы не чулі” прадстаўляе кліп на “Навагоднюю” песню ад каманды Еўрарадыё. Праца над відэа крыху зацягнулася, бо яна вялася паралельна са звыклай працай нашай рэдакцыі — навіны, рэпартажы, эфіры ніхто не адмяняў.

Але мы вырашылі, што радаваць людзей ніколі не позна, тым больш што акурат сёння яшчэ адзін Новы год, хоць і стары. І ды Каляды ў Беларусі працягваюцца. Так што слухайце, глядзіце, стаўце лайкі і падпісвайцеся на нашы сацсеткі.

https://youtu.be/gp-dl_9HzTw

13 студзеня ў судзе Ленінскага раёна Мінска прайшлі працэсы над пенсіянерамі, якіх 14 снежня затрымалі на "Маршы мудрасці" ля Чырвонага касцёла.

Пенсіянерам, якія нарадзіліся ў 1938, 1942 і 1945 гадах, далі штрафы ў 20-30 базавых велічынь (ад 580 да 870 рублёў).

Марш Мудрасці 14 снежня скончыўся, не паспеўшы пачацца. Сілавікі абкружылі ўсіх, хто сабраўся на Плошчы Незалежнасці, адвялі іх у бусы і адвезлі ў РУУС.

Дызайнера Анатоля Лазара, вядомага як Wiecier Mechaniczny, раніцай 13 студзеня забралі ў фінансавую міліцыю разам з кампутарам. Жонцы сказалі — каб праверыць, ці сплаціў падаткі.

Вецер — культавы дызайнер. Ён працаваў над дзясяткамі прабеларускіх праектаў, ад цішотак да сайтаў. Ён аўтар вокладкі кнігі "Беларуская нацыянальная ідэя" вядоўцы @euroradio Змітра Лукашука і філосафа Максіма Гарунова.

Дна няма: беларускі суд прызнаў відэаролік, апублікаваны ў інтэрнэце, несанкцыянаваным масавым мерапрыемствам

Відэазварот работнікаў грамадзянскай авіяцыі, апублікаваны 20 лістапада, суд Кастрычніцкага раёна Мінска палічыў "пікетаваннем з выкарыстаннем кампутарнай сеткі інтэрнэт". Па 15 сутак за яго ўжо атрымалі Нядзея Букатая і Уладзімір Галаш. Суды над астатнімі ўдзельнікамі роліка працягваюцца 13 студзеня.

Чым небяспечны Усебеларускі народны сход?

Чарговы Усебеларускі народны сход у адных выклікае ўсмешку і параўненне са з’ездамі КПСС, у іншых — занепакоенасць. Першыя лічаць, што сход гэты нічога не вырашае і гэта не больш як забава для Лукашэнкі. Іншае стаўленне да УНС у сябраў Народнага антыкрызіснага ўпраўлення. У НАУ падазраюць, што падчас правядзення Усебеларускага сходу не выключаная спроба канстытуцыйнага перавароту.

Якім чынам дэлегаты сходу могуць зладзіць канстытуцыйны пераварот і адкуль такія падазрэнні? Ці паўплывае на дэлегатаў сходу пагроза ўнясення іх у санкцыйныя спісы і ці ўсіх дэлегатаў туды трэба ўносіць? На гэтыя ды іншыя пытанні адказвае каардынатарка Народнага антыкрызіснага ўпраўлення і заснавальніца некамерцыйнай арганізацыі “Сумленныя людзі” Алена Жываглод.

https://youtu.be/HBLiWtRZ1-A

13 студзеня сілавікі прыйшлі таксама да Генадзя Вінярскага, кіраўніка выдавецтва "Кнігазбор". Забралі камп'ютар, тэлефон і самога Генадзя. Паводле інфармацыі @PENBelarus, гэтым займаюцца супрацоўнікі АБЭП.

Навіны пра 5G у Беларусі. Аператар beCloud завяршыў тэставанне гэтай тэхналогіі, якое пачалося ў траўні 2020 года.

Тэставыя ўчасткі былі разгорнутыя ў Мінску (20 базавых станцый у дыяпазонах 3500 МГц і 2600 МГц), Гомелі (18 базавых станцый у дыяпазоне 2600 МГц), на радовічшы граніту "Сітніцкае" на поўдні Беларусі і на тэрыторыі Нацыянальнага аэрапорта Мінск.

З прэс-рэліза на сайце ААЦ, незразумела, наколькі паспяхова прайшло тэставанне. Паведамляецца толькі, што адрымалася дасягнуць хуткасці перадачы звестак 1,9 Гбіт/с.

Бізнесовец Аляксандр Кныровіч, які з канца студзеня 2017 года знаходзіцца за кратамі, запісаў цёплае віншаванне з 2021 годам. Паглядзіце, як ён цяпер выглядае!

Кныровічу засталося сядзець яшчэ каля года. Прадпрымальнік быў асуджаны па карупцыйных артыкулах, але справу шмат хто называў палітычнай. На час затрымання Кныровіч быў адным з самых медыйных бізнесменаў у краіне, адкрыта крытыкаваў Лукашэнку і яго эканамічную мадэль.

Інфляцыя за 2020 год апынулася амаль у 1,5 разы вышэйшай, чым прагназавалі ўлады.

Футбольны клуб "Смалявічы" спыніў існаванне — такое рашэнне прынялі ў Смалявіцкім райвыканкаме. Усе футбалісты, трэнеры і персанал ужо атрымалі на рукі працоўныя кніжкі.

https://euroradio.pl/spynyae-isnavanne-futbolny-klub-smalyavichy

Андрэй Аляксандраў затрыманы ў межах крымінальнай справы, якую распачало ўпраўленне Следчага камітэта па горадзе Мінску. Пра гэта распавяла адвакат журналіста.

Пазней з заявы афіцыйнай прадстаўніцы СК стала вядома, што следчыя падазраюць Аляксандрава ў датычнасці датычнасці да "дзеянняў, што груба парушаюць грамадскі парадак, якія адбыліся на тэрыторыі Мінска".

Адлічаныя за акцыі пратэсту студэнты адзін за адным апынаюцца ў беларускім войску. Восеньскі прызыў падоўжылі — складаецца такое ўражанне, што ледзь не адмыслова дзеля іх. Усё робіцца вельмі хутка: пратэстоўцаў адпраўляюць служыць адразу пасля медкамісіі, нават не даючы часу сабрацца.

10 хвілін на зборы: як студэнтаў, адлічаных за пратэсты, забіраюць у войска >>

У Брэсцкім раёне школьны аўтобус трапіў у ДТЗ. У ім было 11 дзяцей. Пацярпелых няма.

Учора колькасць карыстальнікаў "Тэлеграма" перавысіла 500 млн чалавек. А ці папулярны гэты месенджар у Беларусі? І так, і не.

Даследаванне #DB3 паказвае, што тэлеграмам карыстаецца 43% беларускай інтэрнэт-аўдыторыі. Гэта крыху меней за 3 млн чалавек. Але гэта не топ: больш за ўсё ў Беларусі карыстальнікаў Viber — іх каля 5 млн.

Салдаты Нацыянальнай гвардыі ЗША, якія ахоўваюць Капітолій, спяць на падлозе вакол бюста Лінкальна. У гэтыя хвіліны на Капіталійскім пагорку праходзяць слуханні аб імпічменце 45-му прэзідэнту ЗША Дональду Трампу.

Улады Беларусі пашырылі зоны, дзе забаронена выкарыстоўваць квадракоптары. Іх агульная плошча павялічылася амаль удвая — да 1044 квадратных кіламетраў.

У Мінску пад забарону трапіў увесь цэнтр, а таксама (дзіўнае супадзенне!) праспект Пераможцаў, па якім Аляксандр Лукашэнка ездзіць у горад са сваёй рэзідэнцыі ў Астрашыцкім гарадку, і Дразды, дзе чыноўнікі адбудавалі свае катэджы.