“ወደ ግጭት ከተገባ ግጭቱ በቀጥታ ከአየር ኃይል ጋር እንደሆነ እናውቃለን” ሜጀር ጀነራል ይልማ መርዳሳ የኢፌዴሪ አየር ኃይል ዋና አዛዥ
*********************************
(ኢፕድ)
ቢሾፍቱ ፦ ወደ ግጭት ከተገባ ግጭቱ በቀጥታ ከአየር ኃይል ጋር እንደሆነ እናውቃለን ሲሉ የኢፌዴሪ አየር ኃይል ዋና አዛዥ ሜጀር ጀነራል ይልማ መርዳሳ አስታወቁ። አየር ኃይሉ የ24 ሰዓታት ዝግጁነት እንዳለው አመለከቱ ፡፡

ጀነራል ይልማ መርዳሳ በተለይ ከአዲስ ዘመን ጋር በጉዳዩ ዙሪያ ባደረጉት ቃለ ምልልስ ፣ ከአባይ ውሃ ጋር በተያያዘ ጭቅጭቅ እያነሱ ያሉ አካላት ከ 2ሺ ኪሎ ሜትር በላይ ተጉዘው በእግረኛ ጦር ይዋጋሉ ብለን አናስብም ብለዋል ።

ወደ ግጭት ከተገባ ግጭቱ በቀጥታ ከአየር ኃይል ጋር እንደሆነ እናውቃለን ፤ ለዚህም የመሳሪያ፣ የቴክኖሎጂ ፣የሰው ኃይል ብቃት እና የስልጠና ደረጃቸው ምን ይመስላል? ለሚሉት ጥያቄዎች ምላሽ ከማግኘት ጀምሮ 24 ሰዓት ዓይናችን ህዳሴው ግድብ ላይ ነው ብለዋል ።

በእኔ እምነት የኢትዮጵያን አየር ኃይል እኛ ከምናውቀው በላይ እነሱ ጠንቅቀው ያውቁታል ያሉት ሜጀር ጀነራል ይልማ ፣ እስከ አሁንም ዝም ያሉት ስለወደዱን ወይም አቋማችንን ስለተቀበሉ ሳይሆን ሁኔታዎች ወዴት ሊሄዱ እንደሚችሉም ጠንቅቀው ስለሚያውቁ እንደሆነ አመልክተዋል ።

የፕሬዚዳንቱ ንግግር በዓለም ኃያል ከሆነ ሀገር መሪ የሚጠበቅ እንዳልሆነ አመልክተዋል ። የአንድን አገር ሉዓላዊነት በንግግርም ቢሆን መጣስ ከባድ ጥፋት እንደሆነም ገልጸዋል። ይህንን ተከትሎ ሊመጣ የሚችልን አደጋ ለመመከት አየር ኃይሉ የ24 ሰዓታት ዝግጁነት እንዳለው አመልክተዋል።

መሪዎቻችንና ዲፕሎማቶቻችን በዲፕሎማሲው መድረክ መልስ እንደሚሰጡ ሁሉ አየር ኃይሉ ደግሞ ፕሬዚዳንቱ ለጎሰሙት የጦርነት ነጋሪት አስፈላጊውንመልስና እርምጃ ለመውሰድ ዝግጁ መሆኑን አስታውቀዋል ።

ህዳሴ ግድብ የኢትዮጵያ ሕዝብ ከሌለው ላይ ቆጥቦ እየገነባው ያለው በመሆኑ ከፍተኛ ትኩረት እንደሚሻ የጠቆሙት አዛዡ ፣ አየር ኃይሉ በጠቅላላው የአገሪቷን መሰረተ ልማቶች የፖለቲካ ፣የኢኮኖሚ እና ወታደራዊ ማዕከሎችን በንቃት እንደሚጠብቅ አረጋግጠዋል።

አያይዘውም ገዢውን ፓርቲ ጨምሮ ፖለቲከኞች ሕገ መንግስታዊ በሆነ መንገድ ተወያይተው፣ተደራድረው፣ ምርጫ አካሂደው ወደስልጣን ሲመጡ ሰራዊቱ ይታዘዛል። ሆኖም ኢ- ሕገመንግስታዊ በሆነ መንገድ በግርግር ወደስልጣን እመጣለሁ ለሚለው አካል የሚታዘዝ ሰራዊት እንደሌለም አስታውቀዋል ።

መንግስት የፖለቲካ ምህዳሩ መስፋት አለበት ብሎ ወስኖ ለ40 ዓመት በባእድ አገር ተሰደው የነበሩ፣ በአገር ውስጥም ያሉ በትጥቅ ትግል ላይም የነበሩትን ሁሉ ወደ አገራቸው እንዲገቡ አድርጓል ፤ ይህ ለእኔ በጣም ትልቅ ድል ነው ፤ ይህንን ደግም ሕዝቡም ሆነ የፖለቲካ ፓርቲዎች ሊረዱት ይገባል ብለዋል።

አሁን እየታየ ያለው የዚህ ተቃራኒው ነው ያሉት ሜጀር ጀነራል ይልማ ፤ “ግርግር ለሌባ ያመቻል “ እንደሚባለው በዚህም በዛም መንግስትን ወጥረን ኢ - ሕገመንግስታዊ በሆነ መንገድ ስልጣን እንቀበላለን፤ ይህ ካልሆነ ደግሞ አገሪቷ ትፈርሳለች ማለትም እጅግ አስነዋሪ መሆኑን አመልክተዋል።

“እንደዚህ የሚሉ ሰዎች ያልገባቸው ነገር የኢትዮጵያ ሕዝብ በማይበጠስ ገመድ የተሳሳረ መሆኑ ነው። ማንም ተነስቶ ኢትዮጵያ ትፈርሳለች ስላለ የሚፈጠር ነገር የለም ፤ ሆኖም ግን እነዚህ አካላት ከእኩይ ተግባራቸው የማይመለሱ ከሆኑ ሰራዊት ምላሹ ይሰጣል” ብለዋል። ከዚህ አንጻር ሕዝቡ ፍጹም መረጋጋት እንዳለበትና እንደሚሉትም ሆነ እንደሚያስቡት የሚሆን ነገር አለመኖሩን ተናግረዋል ።

“አሁን ላይ ሰራዊቱ ባልደረሰበት አካባቢ ግጭትን እየለኮሱ ብሔር ከብሔር ሃይማኖት ከሃይማኖት ሊያጋጩ ይችላሉ፤ ግን ደግሞ ይህ ሁኔታም በሂደት እየተስተካከለ ይሄዳል። ከዚህ በላይ አልፎ ለሚመጣ ደግሞ ጠንካራና ሕዝባዊ ሰራዊት አለን “ ብለዋል።
አዲስ ዘመን ጥቅምት 19/2013

“ለሰላም በአንድነት መቆም ይገባል” ተቀዳሚ ሙፍቲ ሃጂ ዑመር እድሪስ የኢትዮጵያ እስልምና ጉዳዮች ጠቅላይ ምክር ቤት ፕሬዚዳንት
***********************************
(ኢፕድ))
አዲስ አበባ፦ አንዱ አንዱን መግደል ሊቆም፤ መጠፋፋት ሳይሆን ለሰላም በአንድነት መቆም እንደሚገባ የኢትዮጵያ እስልምና ጉዳዮች ጠቅላይ ምክር ቤት ፕሬዚዳንት ተቀዳሚ ሙፍቲ ሃጂ ዑመር እድሪስ አሳሰቡ ።

ተቀዳሚ ሙፍቲ ሃጂ ዑመር እድሪስ በዛሬው እለት የሚከበረውን 1 ሺህ 495ኛው የመውሊድ በዓል ምክንያት በማድረግ በሰጡት መግለጫ፣ ነብዩ መሐመድ በምድር ቆይታቸው በጎ ነገሮችን ሰርተው ማለፋቸውን ገልጸዋል።

ኢትዮጵያውያን መተዛዘን፣ አብሮ መብላት እና መረዳዳት እንጂ መገዳደል ባህላቸው እንዳልሆነም አመልክተው ፣ከዚህ አንጻርም አንዱ አንዱን መግደል ሊቆም፤ መጠፋፋት ሳይሆን ለሰላም በአንድነት መቆም እንደሚገባ አሳስበዋል ።ለሀገር ሰላም የሚበጀው መጠፋፋት ሳይሆን መቀራረብና ይቅር መባባል መሆኑንም መክረዋል ። ጠላትን ለመመከት አንድ መሆን ፣ ለሃገሪቱ ልማት መስራት እንደሚገባም አመልክተዋል።

ማንም ሰው በሕይወት እስካለ ድረስ የነብያችንን አደራ፣ አመራርና መልካም ፀባይ ሊከተል እንደሚገባውም አሳስበዋል።

በሀገሪቱ ላይ የተከሰተው የአንበጣ መንጋ እያደረሰ ያለውን ጉዳት ለመከላከልና ሌሎችንም ፈተናዎች ለመሻገር የዜጎች አንድነት ወሣኝ መሆኑንም ተናግረዋል።

ሰው ከኃጥያት እስካልተቆጠበ ድረስ ወደፊት ከአንበጣ በተጨማሪ ሌላ መከራ ሊመጣ እንደሚችል ያስጠነቀቁት ተቀዳሚ ሙፍቲ ሃጂ ዑመር፥ የእምነቱን አስተምህሮ በመከተል ከሙስና፣ ከሌብነትና በደል ራስን ማራቅ እንደሚያስፈልግ ጠቁመዋል።

በመግለጫቸው የአሜሪካው ፕሬዚዳንት ትራምፕ በህዳሴ ግድብ ዙሪያ የሰጡትን አስተያየት አውግዘዋል።የፕሬዚዳንቱ አስተያየት ተቀባይነት እንደሌለውም አስታውቀዋል።
አዲስ ዘመን ጥቅምት 19/2013

ጠቅላይ ሚኒስትሩ የጎዴ - ቀላፎ ፣ የጎዴ-ሐርጌሌ ሎት-1 እና የያአሌ-ደነን መንገዶችን ግንባታ ስራን ዛሬ በይፋ አስጀመሩ
*************************
(ኢፕድ)
የኢፌዴሪ ጠቅላይ ሚኒስትር ዶክተር አብይ አህመድ የጎዴ - ቀላፎ ፣ የጎዴ-ሐርጌሌ ሎት-1 እና የያአሌ-ደነን መንገዶችን ግንባታ ስራን ዛሬ በይፋ አስጀመሩ።

በሶማሌ ክልል ጎዴ ከተማ በተካሄደው የመንገዶቹ ግንባታ ጅማሮ መርሃ ግብር ላይ የኢፌድሪ ምክትል ጠቅላይ ሚኒስትር ደመቀ መኮንን ።፣የኦሮሚያ ክልል ርዕሰ መስተዳድር ሽመልስ አብዲሳ ፣የሶማሌ ክልል ምክትል ርዕሰ መስተዳድር አቶ ሙስጠፌ መሀመድ ፣ የብልጽግና ፖርቲ ጽህፈት ቤት ሃላፊ አቶ ብናልፍ አንዱ አለም የኢመባ ዋና ዳይሬክተር ኢ/ር ሀብታሙ ተገኘ ጨምሮ የፌደራል እና የክልሉ ከፍተኛ የስራ ሀላፊዎች ተገኝተዋል።

በድምሩ 277.6 ኪ. ሜ እርዝማኔ ያላቸው እነዚህ ሶስት የመንገድ ፕሮጀክቶችን በአስፋልት ደረጃ መገንባት ከሀገርም አልፎ ከጎረቤት ሀገራት ጋር ቀጠናዊ የንግድ እንዲሁም የህዝብ ለህዝብ ትስስር ከማሳደግ አንጻር ፋዳቸው የጎላ መሆኑን ጠቅላይ ሚኒስትር ዶ/ር አብይ አህመድ ተናግረዋል።

በተለይም የሀገራችን ከፍተኛ ወጪ ገቢ ንግድ የሚስተናገድበት ጅቡቲ ወደብ ሆነ በኮሪደሩ ላይ ይፈጠር የነበረውን የትራፊክ ጫና ከመቀነስ አኳያ ፕሮጀክቶቹ ሁነኛ አማራጭ ይሆናሉም ብለዋል ።

የሶማሌ ክልል ርዕሰ መስተዳድር አቶ ሙስጠፌ መሀመድ ለአመታት የዘለቀውን የክልሉን የመሰረተ ልማት ጥያቄ ለመመለስ መንግስ እየሰራ ያለውን ስራ የሚደነቅ ነው ብለዋል።

ፕሮጀክቶቹ ከክልሉም አልፍ የሃገሪቱን የወጪ ገቢ ንግድን በማቀላጠፍ የጎላ ሚና አላቸው ብለዋል።

የኢመባ ዋና ዳይሬክተር ኢ/ር ሀብታሙ ተገኘ 4.5 ቢሊዮን ብር ወጪ የሚደረግባቸው የጎዴ - ቀላፎ ፣ የጎዴ-ሐርጌሌ ሎት-1 እና የያአሌ-ደነን መንገዶች ግንባታ በተቀመጠላቸው የጊዜ ገደብ እና የጥራት ደረጃ ለማጠናቀቅ ከመንገድ ወሰን ማስከበር ጋር ተያይዞ በመንገዶቹ ክልል ውስጥ ያሉ ንብረቶች በቶሎ ማንሳት ወሳኝ መሆኑን ጠቅሰው።
የሚመለከታቸው የመስተዳድር አካላት አስፈላጊውን ትብብር እና ድጋፍ እንዲያደርጉ ጥሪ አቅርበዋል።

ፕሮጀክቶቹ ካላቸው ኢኮኖሚያዊ እና መህበራዊ ጠቀሜታ አንጻር የመንገድ ግንባታ ስራውን የሚያከናውኑት የስራ ተቋራጭ ድርጅቶች እና ጥራቱን የሚቆጣጠሩት አማካሪ ድርጅቶች ሀላፊነታቸውን በአግባቡ እንዲወጡ አሳስበው።

የባለስልጣኑ መ/ቤትም አስፈላጊውን ትብብር እና ድጋፍ ያደርጋል ብለዋል።በዛሬው እለት የመንገድ ግንባታ ስራቸው በይፋ የተጀመሩት የጎዴ - ቀላፎ ፣ የጎዴ-ሐርጌሌ ሎት-1 መንገዶች በጠጠር መንገድ ደረጃ ያሉ ሲሆን ሎላኛውና የመንገድ ግንባታ ስራው በዛሬው እለት የተጀመረው የያአሌ - ደነን መንገድ ከዚህ ቀደም ምንም አይንት የመንገድ መሰረተ ልማት ያልነበረው አካባቢ ሲሆን በቀጣይ ሁሉም መንገዶች ደረጃቻቸውን ከፍ በማድረግ በአስፋልት የሚገነቡ ይሆናል።
የጎዴ ቀላፎ መንገድ ፕሮጀክት 94.8 ኪ ሜ እርዝማኔ አለው ፡፡

መንገዱን ለመገንባት ጨረታውን በብር አንድ ቢሊዮን አምስት መቶ ሰላሳ ሚሊዮን ብር (1 ,530,000 ,000.00 ) አሸንፎ ከባለስልጣን መስሪያ ቤቱ ጋር የውል ስምምነት የተፈራረመው ቻይና ሬል ዌይ ስቨን ግሩፕ ነው።

የምህንድስና እና የቁጥጥር ስራውን ደግሞ እስታድያ ኢንጅነሪንግ ስራዎች ከጂ እና ዋይ አማካሪ ድርጅት ጋር በጋራ ያከናውኑታል ፡፡
የጎዴ - ሀርገሌ ሎት 1 የመንገድ ግንባታ ፕሮጀክት 100 ኪ .ሜ እርዝማኔ አለው ፡፡

ለአጠቃላይ ግንባታው መንግስት አንድ ቢሊዮን ስምንት መቶ ዘጠና ሶስት ሚሊዮን ሰባት መቶ ሀምሳ ዘጠኝ ሺ ሶስት መቶ ሰማኒያ ስድስት .ከሰባ አራት ሳንቲም 1,893,759,386.74 ወጪ መድቦለታል፡፡
መንገዱን ለመገንባት ጨረታውን አሸንፎ ከባለስልጣን መስሪያ ቤቱ ጋር የውል ስምምነት የተፈራረመው አገር በቀሉ የሥራ ተቋራጭ ፋል ጀነራል ኮንትራክተር ነው፡፡

መንገዱ በውል ስምምነት መሰረት አራት ዓመት የግንባታ ግዜ ተሰጥቶታል፡፡

ሶስተኛው መንገድ ዮአሌ-ደናን ሎት 3 ሲሆን የፊቅ ሰገግ ገርቦ ደነን ፕሮጀክት አካል ነው፡፡

የመንገድ ፕሮጀክቱ 82.84 ኪሜ ርዝመት አለው ።
መንገዱን በአስፋልት ደረጃ የሚገነባው የሥራ ተቋራጭ አገር በቀሉ ክሮስ ላንድ ኮንስትራክሽን ድርጅት ነው፡፡

የኮንትራት ውሉ 1,119,417,453.44 አንድ ቢሊዮን አንድ መቶ አስራ ዘጠኝ ሚሊዮን አራት መቶ አስራ ሰባት ሺ አራት መቶ ሀምሳ ሶስት ከ አርባ አራት ሳንቲም ብር ነው ፡፡

የመንገዱ ስራ በ3 ዓመት ከ6 ወር ጊዜ ውስጥ ይጠናቀቃል፡
ሳባ ኢንጂነሪንግ መንገዱን በማማከር እና በመቆጣጠር ተሳታፊ ይሆናል፡፡

የሶስቱ መንገድ ፕሮጀክቶች የጎን ስፋት በገጠራማው ክፍል 10 ሜትር ፣በቀበሌ 12 ሜትር ፣ በወረዳ 19 ሜትር እንዲሁም በዞን 21.5 ሜትር ነው፡፡

መንገዶቹ ሲጠናቀቁ ሁለተናዊ ኢኮኖሚያዊ እና ማህበራዊ ፋይዳዎችን የሚያጎናፅፉ ናቸው።

አሜሪካ በቀጣይ በዓባይ ጉዳይ የአደራዳሪነት ሚና ሊኖራት እንደማይገባ ተገለፀ
******************
(ኢ ፕ ድ)

ኢትዮጵያ የምትሰራው ግድብ የጋራ ፕሮጀክት ካለመሆኑም በላይ በሀገሪቷ ክልል ውስጥ የሚገኝና በሕዝቦቿ ገንዘብ የሚገነባ በመሆኑ ወደ ውይይት የመግባት ግዴታ እንዳልነበረባት ተጠቆመ ።

የጂኦግራፊ ምሁር እንዲሁም በውሃ ፖለቲካና በህዳሴ ግድብ ዙሪያ ጥናት የሚያደርጉት አቶ ብርሃኑ በላቸው ፤ከሰሞኑ የአሜሪካ ፕሬዚዳንት ዶናልድ ትራምፕ የዓባይ ግድብን አስመልክተው የተናገሩት ያልተገባ ንግግር ፍፁም ስህተት ነው ብለዋል። አሜሪካ በቀጣይ በዓባይ ጉዳይ ላይ የአደራዳሪነት ሚና ሊኖራት እንደማይገባ አመልክተዋል ።

“አንዴ ሌባ ካሉት ቢቆርብም አያምኑት” ነው ተረቱ ያሉት አቶ ብርሃኑ፤ ከዚህ በኋላ አሜሪካንን ማመን አስቸጋሪ እንደሚሆን ተናግረዋል። አሜሪካ ኢትዮጵያ ላይ እያሳደረች ያለው ተፅዕኖ የቅኝ ገዥዎች መንፈስ የሚንጸባረቅበት እንደሆነም አስታውቀዋል ።

አካሄዱ በዚሁ ከቀጠለ ለቅኝ ግዛት የማይንበረከኩ ኢትዮጵያውያን እንዲህ አድርገናል የሚል ኃይል ይፈጠራል። ከዚህም ባለፈ ይህ አካሄድ ለሌሎች የአፍሪካ ሀገራት አደጋ ሊሆን እንደሚችል አመልክተው ፣ እና ኢትዮጵያውያን ለአፍሪካ ሀገራት መጥፎ አርአያ እንዳንሆን መጠንቀቅ እንደሚገባን አመልክተዋል።

ከጅምሩ አሜሪካ በዓባይ ጉዳይ ላይ ሶስተኛ ወገን ሆና መግባት አልነበረበትም ያሉት አቶ ብርሃኑ፤ በየደረጃው ያሉ ሰዎች ድርድር እያደረጉ ባሉበት ወቅት የአሜሪካ መንግስት በታዛቢነት እንዲገባ መፈቀዱ የመጀመሪያው ስህተት እንደነበር አስታውሰዋል። ታዛቢ ሆና የተሰየመችው አሜሪካ ማደራደር መጀመሯም ሌላው ስህተት ነበር ። ከማደራደር አልፋም ውሳኔ ሰጪ ስትሆን ማስቆም እንደሚገባ አስታውቀዋል።
https://www.press.et/Ama/?p=40679

የክብር ዶክተር ሎሬት አርቲስት ለማ ጉያ የቀብር ስነ ስርዓት ተፈፀመ
**********
(ኢ.ፕ.ድ)

የክብር ዶክተር ሎሬት ሰአሊ ሽምበል አርቲስት ለማ ጉያ የቀብር ስነ ስርዓት ተፈፀመ ዛሬ ተፈጽሟል።

በቢሾፍቱ ከተማ ስታዲየም ከፍተኛ የመንግስት የስራ ኃላፊዎች፣ ቤተሰቦቻቸው እና ወዳጅ ዘመዶቻቸው በተገኙበት የአስክሬን ሽኝት ተካሂዷል።

የክብር ዶክተር አርቲስት ለማ ጉያ በህክምና ሲረዱ ቆይተው በተወለዱ በ92 ዓመታቸው ከዚህ አለም በሞት መለየታቸው ይታወሳል።

የኢትዮጵያ ንግድ ባንክ ለገበታ ለሀገር ከአንድ ቢሊዮን ብር በላይ ድጋፍ አደረገ
*********************
(ኢ.ፕ.ድ)
የኢትዮጵያ ንግድ ባንክ ቦርድ፣ ፕሬዚደንት እና ሠራተኞች ለገበታ ለሀገር የሚሆን 1.1 ቢሊየን ብር አስተዋጽዖ አደረጉ።
የንግድ ባንክ ሰራተኞች እና አመራሮች ላደረጉት ድጋፍ ጠቅላይ ሚኒስትር ዶ/ር አብይ አህመድ አመስግነዋል።
"ወንጪን፣ ጎርጎራን እና ኮይሻን ለማልማት አንድ ተቋም ብቻውን ይህን ያህል መጠን ያለው ገንዘብ ለማሰባሰብ መቻሉ የሚደነቅ ነው። የልማት ፕሮጀክቶቹ በቶሎ ተጀምረው በታሰበላቸው ጊዜ እንዲጠናቀቁም ያስችላል" ሲሉም ነው ጠቅላይ ሚኒስትሩ ያስታወቁት።

የዲሞክራሲ ስርዓት ግንባታ በኢትዮጵያ በሚል የህዝብ ለህዝብ ጉባኤ በአዳማ እየተካሄደ ነው
***********************
(ኢ.ፕ.ድ)
አዳማ፡- የጋራ ብሄራዊ መግባባት ለመፍጠርና የውይይትን ባህል ለማዳበር ያለመ የህዝብ ለህዝብ ጉባኤ በአዳማ ከተማ እየተካሄደ ነው፡፡ጉባኤው ከኦሮሞና ከአማራ መድረክ ወደ አገራዊ መድረክ በመሸጋገሩ መሆኑ ተገልጿል፡፡
የህዝብ ለህዝብ መድረኩ አወያይ ዶክተር ዲማ ነጋዎ የዲሞክራሲን ስርዓት ግንባታ በኢትዮጵያ በሚል የህዝብ ለህዝብ ጉባኤ በአዳማ ዛሬ በመክፈቻ ስነ ስርዓቱ ሲካሄድ እንደገለጹት፤ የኦሮሞና የአማራ የፖለቲካ ድርጅቶች ውይይት የጀመሩት የዛሬ ዓመት አካባቢ በአማራና በኦሮሚያ ክልሎች በሚገኙ ከፍተኛ ተቋማት በሚገኙ ተማሪዎች የተነሳውን ውዝግብ ተከትሎ ችግሩን ለማርገብ በጠቅላይ ሚኒስትሩ በቀረበ አነስሽነት ነው፡፡
ይህ የውይይት መድረክ ብዙ ስምምነቶች የተደረሱበት ሲሆን በሁለቱ የፖለቲካ ፓርቲዎች፣ምሁራንና ሽማግሌዎች ተወስኖ የቆየው ወደ አገራዊ መድረክ እንዲሸጋጋር ተደርጓል፡፡
ይህም በአገራችንን ያለውን የፖለቲካ የውይይት ባህል ለማዳበርና ብሄራዊ መግባባት ለመፍጠር ይረዳል ብለዋል፡፡
ሌላው የመድረኩ አወያይ ዶክተር ገበያው ጥሩነህ በበኩላቸው የአሮሞና የአማራ የፖለቲካ ፓርቲዎች የጀመሩት ውይይት ፍሬ አፍርቶ በተለያዩ ጉዳዮች ላይ ስምምነት ደርሰዋል ብለዋል፡፡የዚህ ፍሬ አንዱ ውጤትም በሁለቱ ተወስኖ የነበረው ውይይት ወደ አገራዊ ውይይት ማደጉን በአብነት ጠቅሰዋል፡፡
በኢትዮጵያ ባለፉት ሁለት ዓመታት በመካሄድ ላይ ያለው አገራዊ የፖለቲካ ሽግግርና የለውጥ ሂደት መልካም አጋጣሚዎች በመጠቀም የተለያዩ ባለድርሻ አካላት በአገራዊ የፖለቲካ የኢኮኖሚና ማህበራዊ ጉዳዮች የምክክር መድረኮች በመካሄድ ላይ መሆናቸው ይታወቃል፡፡
በአማራና በኦሮሞ ማህበረሰቦች የተደራጁ የፖለቲካ ፓርቲዎች የሁለቱ ብሄሮች ምሁራንና ተጋባዥ እንግዶች፣ገዥውን ፓርቲ ጨምሮ የሁለቱ ህዝቦች ሁሉን አቀፍ ግንኙነቶች የበለጠ ለማጠናከር የሚያስችሉ ጉዳዮች ዙሪያ ከታህሳስ 2012 ዓ.ም ጀምሮ ተደጋጋሚ ውይይቶችና ጉባኤዎችን አካሄደዋል፡፡
በተለይም የፖለቲካ ፓርቲዎች መሪዎች በክልላዊና አገራዊ ነባራዊና ወቅታዊ ጉዳዮች ላይ ጥልቅ ምክክር ሲያደርጉ ቆይተው በበርካታ ፖለቲካዊ አቋሞች ላይ የጋራ መግባባት በመድረስ መስከረም 23 ቀን 2013 ዓ.ም ታሪካዊ ስምምነት መፈራረማቸው ይታወሳል፡፡
በመድረኩ ከፖለቲካ ፓርቲዎች ምሁራን ታዋቂ ሰዎች፣የሲቪል ማህበራት፣ወጣቶች፣ሴቶችና የብሄር ብሄረሰቦች ተወካዮች እንደታሰተፉ ታውቋል፡፡
በጌትነት ምህረቴ

የፕሬዝዳንት ዶናልድ ትራምፕ ንግግር ፍጹም የተሳሳተና በዓለም ዙሪያ መወገዝ ያለበት ነው ሲሉ የጥቁር መብት ተሟጋቹ ጄሲ ጃክሰን ገለጹ
***********************
(ኢ ፕ ድ)
የአሜሪካው ፕሬዝዳንት ታላቁ የኢትዮጵያ ህዳሴ ግድብን በማስመልከት የተናገሩት ንግግር ፍጹም የተሳሳተና በዓለም ዙሪያ መወገዝ ያለበት ነው ሲሉ የጥቁር መብት ተሟጋቹ ጄሲ ጃክሰን አስታወቁ።
ፕሬዝዳንት ትራምፕ በእየእለቱ በሚሰጧቸው ሃላፊነት የጎደለው ንግግሮች ማንም ሊገረም አይገባም ያሉት ጄሲ ጃክሰን፤ ፕሬዝዳንቱ በግድቡ ዙሪያ ሙሉ በሙሉ ድጋፋቸውን ለግብጽ እንደሰጡ ሁላችንም እናውቃለን ሲሉ የፕሬዝዳንቱን ሚዛን የሳተ ንግግርና ድጋፍ ተችተዋል።
ከሰሞኑም ግብጽ ግድቡን ማፈንዳት አለባት በሚል የተናገሩት ንግግር ሃላፊነት የጎደለውና እንኳንስ ለአሜሪካና ለየትኛውም የዓለም አገር መሪ የማይመጥን ሃላፊነት የጎደለው ንግግር ነው ብለዋል።
በተቃራኒው ዶክተር አብይ አህመድ "ኢትዮጵያ ለየትኛውምአ ይነት ወረራ የምትሸበር አይደለችም" በማለት ምላሽ መስጠታቸውን የጠቀሱት ጄሲ ጃክሰን፤ የኢትዮጵያ ወዳጆች ከጠቅላይ ሚኒስትሩ ጎን መቆማችንን እንቀጥላል ሲሉ አስታውቀዋል።
ሞራል ያለውና ሃለፊነት የሚሰማው መሪ ውይይትን በማበረታታት ግጭትን ማስወገድ እንጂ ጦርነትን ማበረታታት የለበትም ሱሉም አክለዋል።
የአሜሪካ ኮንግረንስ፣ የተባበሩት መንግስታት፣ የአፍሪካ ህብረት ፣ የአውሮፓ ህብረት እና ሁሉም ሰላም ወዳድ መሪዎች ይሄን ሀላፊነት የጎደለውን የፕሬዝዳንቱን ንግግር አውግዘው በአፍሪካ ህብረት በኩል በደቡብ አፍሪካው ፕሬዝዳንት ራማ ፎዛ አማካይነት የተጀመረውን ድርድር ከግብ እንዲደርስ ጥሪያቸውን አቅርበዋል።
በሀይማኖት ከበደ

የመምህራንና የትምህርት ቤት አመራሮች የሙያ ፈቃድ አሰጣጥና ዕድሳት በቴክኖሎጂ የተደገፋ እንደሚሆን ተገለፀ።
----------------------------
የትምህርት ሚኒስቴር ከሁሉም ክልሎች ከተወጣጡ የመምህራንና ትምህርት ቤት አመራሮች የሙያ ፈቃድ ባለሙያዎች ጋር እየተወያየ ነው።
በውይይቱም የ 2012 ዓ.ም እቅድ አፈፃፀም እና የ 2013ዓ.ም እቅድ ይቀርባል።።
በትምህርት ሚኒስቴር የመምህራንና የትምህርት ቤት አመራሮች ሙያ ፈቃድ አሰጣጥና ዕድሳት ዳይሬክተር ወ/ሮ ካሳነሽ አለሙ የትምህርት ዘርፉን ጥራት የሚለካበት አንዱ መንገድ የሙያ ፈቃድ አሰጣጥና እድሳት በመሆኑ በሚኒስቴር መስሪያ ቤቱ ትኩረት ሰጥቶ እየተሰራበት መሆኑን ገልፀዋል።
በውይይት መድረኩ የተመዛኞችን የምዘና ውጤትና ትንተናን ጨምሮ ከምዝገባ እስከ ሰርቲፊክሽን ድረስ ያለውን ሂደት የሚያሳይ በቴክኖሎጅ የተደገፈ ዳታ ቤዝ ትውውቅ ይደረጋል፡፡
በመድረኩም የሁሉም ክልሎችና ከተማ አስተዳድሮች የመምህራንና ትምህርት ቤት አመራሮች የሙያ ፈቃድ የ2012 በጀት ዓመት ሪፖርት ይቀርባል።
በቀጣይም የመምህራንና የትምህርት ቤት አመራሮች ምዘና የጥናት ሰነድ ላይና ከመምህራን ትምህርት ኮሌጅ ተመርቀው በሚወጡ መምህራን የሙያ ብቃትና ሌሎች የትኩረት አቅጣጫዎች ዘሪያ ውይይት የሚደረግ ይሆናል።

የኢትዮጵያ ከንቲባዎች ፎረም ተመሠረተ
***********
(ኢ.ፕ.ድ)

የኢትዮጵያ ከተሞች የከንቲባዎች ፎረም ዛሬ ተመስርቷል።
በፎረሙ ምሥረታ ላይ የከተማ ልማት እና ኮንስትራክሽን ሚኒስትሯ ኢ/ር አይሻ መሐመድ እንደገለፁት ፎረሙ የከተማ ከንቲባዎች እና አመራሮች የነዋሪዎቻቸውን ችግሮች ለመፍታት በጋራ እንዲመክሩ እድል ይፈጥራል ብለዋል።

ከንቲባዎች በሚመሯቸው ከተሞች በስራ ዕድል ፈጠራ፣ በመኖሪያ ቤት ግንባታ እና በመሠረተ ልማት አቅርቦት ባለሀብቱን እና ኅብረተሰቡን በማሳተፍ እና ባለቤት በማድረግ ከተሞች ላይ ውጤት ለማምጣት በማሰብ የተመሠረተ ነው ተብሏል ።
በተጨማሪም ፎረሙ ከተሞችን ውብ፣ ጽዱ እና አረንጓዴ በማድረግ ለነዋሪዎች ማመቻቸት ላይ የሚሠራ ሲሆን ድህነት ቅነሳ እና ዘላቂ ልማት ማረጋገጥ ላይም አተኩሮ እንደሚሠራ ተገልጿል። ከዚህም ባለፈ ፎረሙ በከንቲባዎች መካከል የእርስ በእርስ ትብብር እና የተሞክሮ ልውውጥ እንዲኖር ያስችላል ተብሏል።
የከተማ ከንቲባዎች በበኩላቸው ፎረሙ በከተሞች ለሚታዩ ችግሮች የተናጠል ሳይሆን የጋራ መፍትሔ ለማምጣትና የልምድ ልውውጦችን ለማድረግ ያስችላል ብለዋል።

ፎረሙ የከተማ ከንቲባዎች ተገናኝተው በወቅታዊ የከተሞች የትኩረት አጀንዳ ላይ ጽሁፍ ቀርቦ የሚወያዩበት፣ የተሻለ አሰራር ካላቸው ከንቲባዎች ልምድ የሚለዋወጡበት፣ ያጋጠማቸው ፈተና ካለም መፍትሔ በጋራ የሚያፈላልጉበት እና የተሻለ አፈጻጸም ላከናወኑ ከንቲባዎች ዕውቅና የሚሰጥበት ነው ተብሏል፡፡

በተጨማሪም ሀገር በቀል የሆነ እውቀት እንዲጎለብት ማበረታታትና ከተሞች ከከተሞች ጋር የሚኖራቸውን ትብብርና ትስስር ማመቻቸት የፎረሙ አንዱ አላማ መሆኑን በምስረታ ላይ ተገልጿል ።

በሀገር አቀፍ ደረጃ የኢትዮጵያ ከንቲባዎች ፎረም “የተሻለ ከተማ ለተሻለ ህይወት” በሚል መሪ ቃል የከተሞች ፎረም የመመስረቻ ስነ ስርዓት ላይ የአዲስ አበባ ከተማ ምክትል ከንቲባ ወ/ሮ አዳነች አቤቤ ፣የከተማ ልማት እና ኮንስትራክሽን ሚንስትር ኢ/ር አይሻ መሀመድ እና የክልል ከተሞች ከንቲባዎች ተሳትፈዋል ።

በኢትዮጵያ የከተሜነት ሂደት ረጅም ዘመን ከማስቆጠሩ አንፃር ዕድገቱን የሚመጥኑ ስራዎችን ማጠናከር እንደሚገባ ምክትል ጠቅላይ ሚኒስትሩ አሳሰቡ
*************
(ኢ.ፕ.ድ)

በኢትዮጵያ የከተሜነት ሂደት ረጅም ዘመን ከማስቆጠሩ አንፃር ዕድገቱን የሚመጥኑ ስራዎች በፍጥነት ማጠናከር እንደሚገባ ምክትል ጠቅላይ ሚኒስትሩ አቶ ደመቀ መኮንን አሳሰቡ።

የከተማ ልማት እና ኮንስትራክሽን ሚኒስቴር አዘጋጅነት "ክልላዊ ስፓሻል ልማት ፕላን ለተመጣጣኝ ሀገራዊ እድገት እና ብልፅግና" በሚል መሪ ቃል ሃገር-አቀፍ መድረክ በሸራተን አዲስ ሆቴል ተካሂዷል።

በመድረኩ ላይ ምክትል ጠቅላይ ሚኒስትር አቶ ደመቀ ባስተላለፉት መልዕክት፤ በሃገሪቱ የከተሜነት ሂደት ረጅም ዘመን ከማስቆጠሩ አንፃር ዕድገቱን የሚመጥኑ ስራዎች በፍጥነት ማጠናከር ይገባል ~ ብለዋል።

የክልላዊ ስፓሻል የልማት ፕላን ዝግጅት እና የከተማ ሙከራ ማዕከል ምስረታ ከሃገራዊ ለውጥ ጉዞ ጋር አጣጥሞ ተግባራዊ ማድረግ እንደሚገባ ተናግረዋል።

ከህዝብ ብዛት ፈጣን ዕድገት ጋር ተያይዞ ከተሞች ሊሸከሙ የሚችሉበትን ኢኮኖሚያዊ አቅም አስቀድመው በመገንባት ሚናቸውን እንዲወጡ አስገንዝበዋል።

በቀጣይ ተግባራዊ በሚደረገው ዕቅድ መሰረት በተለያየ ደረጃ በከተሞች እና አጎራባች የገጠር ቀበሌዎች የሚስተዋሉ ህገ-ወጥነት እና የከተሞች ዘፈቀዳዊ መስፋፋት በዘላቂነት ለመፍታት ርብርብ እንደሚደረግ ጠቁመዋል።

በተጨማሪ የክልላዊ ስፓሻል ልማት እና ክላሰተር ፕላን ማዘጋጀትና የከተማ መሬት አሰተዳደር ስርዓቱን ማዘመን በዕቅዱ ልዩ ትኩረት እንደተሰጠው የምክትል ጠቅላይ ሚኒስቴር ጽህፈት ቤት መረጃ ግልጿል።

የከተሜነት እድገት ስርዓት ተመጋጋቢ፣ የተመጣጠነ እና ዘላቂ ልማትን ለማረጋገጥ በሚያስችል መልኩ በውጤታማነት ለመምራት በየደረጃው የሚገኙ አመራር አካላት በትኩረት እንዲረባረቡ ጥሪ አቅርበዋል።

በመጨረሻም የክልላዊ ስፓሻል የልማት ፕላን ዝግጅት እና የከተማ ላብራቶሪ ምስረታ ለዚህ ደረጃ እንዲበቃ አስተዋጽኦ ያበረከቱ አካላትን አመስግነዋል።

በሕገ መንግሥቱ የተሰጠውን ኃላፊነት በተሻለ መልኩ ለመወጣት ማሻሻያዎችን ሊያደርግ መሆኑን የፌዴሬሽን ምክር ቤት አስታወቀ
*******************
(ኢ.ፕ.ድ)

በሕገ መንግሥቱ የተሰጠውን ኃላፊነት በተሻለ መልኩ ለመወጣት የሚያስችለውን አቅም ለመፍጠር ሪፎርም ለማድረግ በሂደት ላይ መሆኑን የፌዴሬሽን ምክር ቤት አስታወቀ።

ምክር ቤቱ ተቋማዊ ማሻሻያ ለማድረግ ይቻል ዘንድ በአዲስ አበበ ዩኒቨርሲቲ አጥኚ ቡድን በተዘጋጀው መነሻ ሪፖርት ላይ ከሚመለከታቸው አካላት ጋር ውይይት አድርጓል።

ምክር ቤቱ በሕግ በተሰጠው ሥልጣንና ተግባራት መሠረት በሕዝቦች መካከል በፍትሕ እና በእኩልነት ላይ የተመሠረተ ዴሞክራሲያዊ ሕብረ ብሔራዊነት አንድነት ስር እንዲሰድድ እና እንዲዳብር በማድረግ ጠንካራ ሀገረ መንግሥት በመገንባት፣ ተቋማትን በመገንባት እንዲሁም ዴሞክራሲያዊ ባህል ግንባታ ሂደት ከፍተኛ ድርሻ ያለው ምክር ቤት መሆኑን በመድረኩ ላይ ለተሳታፊዎች ተብራርቷል።

ምክር ቤቱ የአሁን ቁመና ከላይ የተዘረዘሩትን ሚናዎች ለመወጣት በሚያስችለው ቁመና ላይ የማይገኝ በመሆኑ ተቋማዊ ሪፎርም ማድረግ አስፈላጊ መሆኑን የምክር ቤቱ አፈ ጉባኤ አቶ አደም ፋራህ ገልጸዋል።

በመሆኑም በሕገ መንግሥቱ የተሰጠውን ኃላፊነት በተሻለ መልኩ ለመፈጸም ሪፎርም ይደረጋል ብለዋል አፈ ጉባዔው።

ምክር ቤቱ የሚያካሄደው ሪፎርም አራት መሠረታዊ የትኩረት አቅጣጫዎች ማለትም ሕብረ ብሔራዊ አገራዊ አንድነት እና ዘላቂ ሰላም መገንባት፣ ውጤታማ የፊሲካል ሽግግር፣ ፍትሐዊ የሀብት ክፍፍል ማረጋገጥ፣ የሕገ መንግሥት የበላይነትን እና ሕገ መንግሥታዊነትን ማረጋገጥ እንዲሁም ተቋማዊ የማስፈጻም አቅም ግንባታ ይገኙበታል ሲሉ አፈ ጉባዔው አክለው ገለጻዋል።

በአዲስ አበባ ዩኒቨርሲቲ አጥኚ ቡድን የሚካሄደው ጥናትም በአራቱ መሠረታዊ የትኩረት አቅጣጫዎች ላይ አተኩሮ ምክር ቤቱን ያጠነክረዋል ተብሎ ይጠበቃልም ነው ያሉት።

ከጥናቶቹ አንዱ ‘ልዩ ዓላማ ያላቸው የበጀት ድጎማ ጥራት እና ስርጭት ዳሰሳ’ የሕገ መንግሥት የበላይነትን እና ሕገ መንግሥታዊነትን ማረጋገጥ ላይ ያተኩራል።

ጥናቱ የበጀት ድጎማ ስልት ክልሎችን ፍትሓዊ በሆነ መልኩ ለመጥቀም በቀጣይ በምን መልኩ እንደሚከናወን አጠቃላይ አቅጣጫን የሚያመለክት ይሆናል ተብሏል።

ጥናቱ ‘በክልሎች መካከል የሚደረገውን የመሠረተ ልማት ዝርጋታን’ እንደሚዳስስ ነው የተገለፀው።

መሠረተ ልማት ለኢኮኖሚ ዘርፍ ውጤታማነት አቻ የማይገኝለት ዘርፍ መሆኑን ዩኒቨርሲቲው ባቀረበው መነሻ ጥናት ተጠቆሟል።

በክልሎች መካከል የሚደረገው የመሠረተ ልማት ስርጭት ፍትሐዊነትን ማዕከል በማድረግ የማኅበረሰብ እና የፖለቲካ ብልጽግና እውን የሚያደርግ ሀገረ-መንግሥት ግንባታን የሚያግዝ በሚሆንበት መልኩ እንዲሆን አቅጣጫ ያስቀምጣል ነው የተባለው።

ሕብረ ብሔራዊነት እና ዘላቂ ሰላም ላይ አተኩሮ ስለሚካሄደው ጥናት እና የተቋሙን የማስፈጸም አቅም አስመልክቶ ስለሚካሄደው ጥናትም መነሻ ሪፖርት ቀርቧል።

የአዲስ አበባ ዩኒቨርሲቲ ፕሬዚዳንት ፕሮፌሰር ጣሰው ወልደሃና በበኩላቸው ጥናቱ ምክር ቤቱ በሚፈልገው መልኩ እንደሚካሄድ እና ዩኒቨርሲቲው ጥናቱን በሁለት ወራት ውስጥ አጠናቅቆ ለማስረከብ እንደሚሠራም መግለጻቸውን ከፌዴሬሽን ምክር ቤት ያገኘነው መረጃ ያመለክታል።

የጦር መሳሪያ አዋጁ የሚቀማ ሳይሆን የያዙትን ህጋዊ ለማድረግ እንደሚረዳ ተገለጸ
*************************
(ኢፕድ)
አዲስ አበባ: ኢትዮጵያ ያጸደቀችው የጦር መሳሪያ አስተዳደርና ቁጥጥር ረቂቅ አዋጅ በግለሰቦች እጅ የተያዙትን መሳሪያ ለመቀማት የወጣ ሳይሆን ህጋዊ ለማድረግ የሚረዳ መሆኑን የሰላም ሚኒስትር ሚኒስቴር አማካሪ አቶ ሚናስ ፍሰሃ ተናገሩ።

የሰላም ሚኒስቴር ሚኒስትር አማካሪ ሚናስ ፍሰሃ ለአዲስ ዘመን እንደገለጹት፤ የጦር መሳሪያ አስተዳደርና ቁጥጥር ረቂቅ አዋጅ ህብረሰተቡ ቀድሞ የያዘውን የጦር መሳሪያ የሚቀማ ሳይሆን ቀድሞ የያዙትም ህጋዊ ለማድረግ የሚረዳ ነው። ማስመዝገቡም ጥቅሙ ከፍተኛ ነው።

አዋጁ ከጸደቀ 10 ወራት ያስቆጠሩን ያስታወሱት አቶ ሚናስ ፣ ቀደም ብለው የታጠቁ የህብረተሰብ ክፍሎች የታጠቁት የጦር መሳሪያ በቀሪው ዓመት ከሁለት ወር የሽግግር ጊዜ በአካባቢያቸው በሚገኙ ተቆጣጣሪ ተቋም ተገኝቶ በሚያወጣው የጊዜ ሰሌዳ ህጋዊ ማድረግ እንደሚጠበቅባቸው አመልክተዋል።

እንደ አቶ ሚናስ ገለጻ፤ በጊዜው የጦር መሳሪያውን የሚያስመዘግብ ሰው ከዚህ ቀደም መሳሪያው በህገወጥ መንገድ የተገኘ ቢሆንም እንኳ እንደየወንጀሉ ሁኔታ ምህረት ይደረግለታል። ሆኖም በጊዜ ገደቡ ውስጥ ፍቃድ ያልወጣበት የጦር መሳሪያ በተቆጣጣሪው የሚወረስ ሲሆን፤ የጦር መሳሪያ ፍቃዱ ለግለሰብ በሁለት ዓመት ለድርጅት ደግሞ በ5 ዓመት መታደስ እንዳለበት ስለተደነገገ ቀድሞ ፍቃድ ማውጣት ይገባል።

ለመሳሪያቸው ፍቃድ ለማግኘት የሚፈልጉ ሰዎች የአደንዛዥ እጽ ወይም የመጠጥ ሱስ የሌለባቸው እና የአእምሮ ጤናቸው የተስተካከለ እንዲሁም በአካባቢያቸው የመልካም ስነ ምግባር መገለጫ ማረጋገጫ ማቅረብ ይኖርባቸዋል ያሉት አቶ ሚናስ፣ ለአብነት በመንደራቸው ከብዙ ሰዎች ጋር የሚጣሉ እና አምባጓሮ ውስጥ በተደጋጋሚ የሚሳተፉ ከሆነ ለደህንነታቸው ሲባል የጦር መሳሪያ እንዲይዙ ህጉ እንደማይፈቅድ አስታውቀዋል ።

እንደ አቶ ሚናስ ከሆነ፤ አዋጁ በተለምዶ የጦር መሳሪያ የሚጠቀሙ አርብቶ አደር እና አርሶአደሮችን አኗኗር ከግምት ውስጥ ያስገባ ነው። በባህል እና በደንባቸው መሰረት ሲወለድም ጭምር መሳሪያ የሚሰጥበት አካባቢ ቢኖርም ረጅም ጊዜያት ወንጀል ሳይፈጽሙ የሚኖሩ ማህበረሰቦችም አሉ።

ባህሉንምባገናዘበ መልኩ ለአካለ መጠን የደረሰ እና መሳሪያ ለመያዝ ብቁ የሆነ ሰው እንዲይዝ ህጋዊ እውቅና የሚሰጥ በመሆኑ አዋጁ መሳሪያዎቻችንን ይነጥቀናል የሚል እሳቤ ያላቸው ሰዎች በቂ ግንዛቤ እንዲኖራቸው መስራት ያስፈልጋል።

ፍቃድ በሚሰጣቸው የጦር መሳሪያዎች ላይ መለያ ምልክት እንደሚደረግ የተናገሩት አቶ ሚናስ፤ ወንጀል ሲፈጸም ለይቶ ለምርመራ ለማቅረብ እና ወንጀለኛን ለመያዝ የሚረዳ አሰራር ተግባራዊ እንደሚደረግም ገልጸዋል። “አርኤስቲኤስ” የሚባል የህገወጥ ጦር መሳሪያን እና ፍቃድ ያላቸውን ለይቶ መመዝገብ እና ለትንተና ለማቅረብ የሚረዳ ቴክኖሎጂ በሀገር ውስጥ መገጠሙን ተናግረዋል።

ቴክኖሊጂው ልክ እንደመኪና ሻንሲ እና ሞተር ቁጥር የእያንዳንዱን መሳሪያ ቁጥር እና ይዘት ከሙሉ መስረጃው ጋር ይመዘገብበታል። በመሳሪያው ዙሪያ ለሚመለከታቸው ተቋማት ባለሙያዎች ስልጠና መሰጡትን አስረድተዋል። ቴክኖሎጂው ሙሉ በሙሉ ተግባራዊ ሲደረግ የሰዎችን ሰላም ደህንነት ውስጥ የከተተውን ህገወጥ የጦር መሳሪያ ዝውውርንም ለመከላከል እንደሚረዳ ገልጸዋል።

ወጥ የሆነ ቅንጅት ባለመኖሩ በኢትዮጵያ የሚገኝ የጦር መሳሪያ ብዛት እንደማይታወቅ የገለጹት አቶ ሚናስ፤ በተለይ የድንበር አካባቢዎች የህገወጥ የጦር መሳሪያ ዝውውር ይውሉ እንደነበር ገልጸዋል። አዋጁ ተፈጻሚ ከሆነ በኋላ ግን በቀጣይ ጊዜያት ማን ጋር ምን አይነት መሳሪያ እንዳለ እና ሀገር ውስጥ ምን ያክል መሳሪያዎች እንዳለ በማወቅ ለህገወጥነት እና ወንጀሎችን በብቃት ለመከላከል የሚያስችል አቅም እንደሚፈጠር አስረድተዋል።

የህዝብ ተወካዮች ምክር ቤት የጦር መሳሪያ አስተዳደርና ቁጥጥር አዋጅን በ2012 ዓ.ም ታህሳስ ወር መጨረሻ ላይ ማጽደቁ ይታወሳል ። በአዋጁ መሰረት አነስተኛ ወይም ቀላል መሳሪያን ለአንድ ሰው አንድ ብቻ እንዲይዝ የሚፈቅድ ነው። ከፍቃድ ውጪ የጦር መሳሪያ፣ የጉዳት ማድረሻ እቃ፣ የጦር ሜዳ መነጽር፣ በጦር መሳሪያ ላይ ሊገጠም የሚችል ማንኛውም አይነት መነጽር ወደ ሀገር ማስገባት፣ ከሀገር ማውጣት፣ መያዝ፣ ማስቀመጥ፣ ማከማቸት፣ መገልገል፣ ማሳየት፣ መደለል፣ መሸጥ፣ መግዛት፣ ማስተላለፍ፣ ማዘዋወር፣ ማጓጓዝ፣ ማምረት፣ ማሰልጠንና ማስወገድ ክልክል ሆኗል።
አዲስ ዘመን ጥቅምት 21/2013
ጌትነት ተስፋማርያም

የኦሮማራ መድረክ ወደ ብሄራዊ መድረክነት አደገ
****************************
(ኢፕድ)
አዳማ ፦ ከአንድ አመት በፊት የተጀመረው የኦሮ-ማራ መድረክ ወደ ብሄራዊ መድረክነት ማደጉ ተገለጸ ። መድረኩ ብሄራዊ መግባባት ለመፍጠርና የውይይትን ባህል ለማዳበር ትልቅ አስተዋጽኦ እንደሚኖረው ተጠቆመ።

በአዳማ ከተማ ትናንት መድረኩ ሲከፈት የመክፈቻ ንግግር ያደረጉት አንጋፋው ፖለቲከኛ አቶ ሊንጮ ለታ፣ ከዚህ ቀደም በአማራና በኦሮሚያ ክልሎች በሚገኙ ከፍተኛ የትምህርት ተቋማት የተነሳውን ውዝግብ ተከትሎ ችግሩን ለማርገብ መድረኩ በጠቅላይ ሚኒስትሩ አነሳሽነት የዛሬ ዓመት አካባቢ መጀመሩት አስታውሰዋል።

መድረኩ ወደ ብሄራዊ መድረክነት መሸጋገሩን አስታውቀው፣ መድረኩ ለኢትዮጵያ ፖለቲካ ትልቅ ተግዳሮት የሆነውን ልዩነቶችን በሰላማዊ መንገድ የመፍታት ችግር ለዘለቄታው ለመፍታት የሚያስችል እንደሚሆን አመልክተዋል ።

የችግሩ መሰረታዊ ምንጭ የዲሞክራሲ ባህላችን አለማደግ እንደሆነ የጠቆሙት አቶ ሌንጮ ፣ ለአንድ ዓመት ያህል የአማራና የኦሮሞ የፖለቲካ ድርጅቶች በአገራዊና በክልላዊ ጉዳዮች ሲወያዩ መቆየታቸው አስታውቀዋል። በዚህም በተለያዩ ጉዳይ ላይ መግባባት ላይ መድረሳቸውን ገልጸዋል ። ይህም በሰከነ መንፈስ የመነጋገር እና የዲሞክራሲን ባህልእየተለማመድን ለመሆናችን ማሳያ ነው ብለዋል።

አገር አቀፍና ሁሉንም ቡድኖች ያሳተፈው የውይይት መድረኩ ለፖለቲካ ችግሮችን ዘላቂ መፍትሄ ያስገኛል ተብሎ እንደሚታመን ገልጸው፣ በተለይ ምን አይነት ኢትዮጵያ ናት የምታግባባን እና ልታስማማን የምትችለው በሚለው ጉዳይ ላይ ስምምነት ይደረሳል ተብሎ እንደሚጠበቅም አመልክተዋል።

የመድረኩ አወያይ ዶክተር ዲማ ነጋዎ በበኩላቸው፤ የኦሮሞና የአማራ የፖለቲካ ድርጅቶች ከዚህ ቀደም በ10 ጉዳዮች ላይ ስምምነቶች መደረሳቸውን አመልክተው፣ በሁለቱ የፖለቲካ ፓርቲዎች፣ ምሁራንና ሽማግሌዎች ተወስኖ የቆየው የወይይት መድረክ ወደ አገራዊ መድረክነት እንዲሸጋገር መደረጉን አስታውቀዋል። ይህም በአገራችንን ያለውን የፖለቲካ የውይይት ባህል ለማዳበርና ብሄራዊ መግባባት ለመፍጠር ይረዳል ብለዋል።

የመድረኩ ሌላኛው አወያይ ዶክተር ገበያው ጥሩነህ በበኩላቸው፣ የአሮሞና የአማራ የፖለቲካ ፓርቲዎች የጀመሩት ውይይት ፍሬ አፍርቶ በተለያዩ ጉዳዮች ላይ ስምምነት ደርሰዋል ። የዚህ ፍሬ አንዱ ማሳያም በሁለቱ ወገኖች ተወስኖ የነበረው ውይይት ወደ አገራዊ ውይይት ማደግ መቻሉ እንደሆነም ጠቁመዋል።

በኢትዮጵያ ባለፉት ሁለት ዓመታት በመካሄድ ላይ ያለው አገራዊ የፖለቲካ ሽግግርና የለውጥ ሂደት መልካም አጋጣሚዎች በመጠቀም የተለያዩ ባለድርሻ አካላት በአገራዊ የፖለቲካ ፣ የኢኮኖሚና ማህበራዊ ጉዳዮች ዙሪያ የምክክር መድረኮች በመካሄድ ላይ መሆናቸውንም ጠቁመዋል።

በአማራና በኦሮሞ ብሄሮች ምሁራንና ተጋባዥ እንግዶች፣ ገዥውን ፓርቲ ጨምሮ የሁለቱ ህዝቦች ሁሉን አቀፍ ግንኙነቶች የበለጠ ለማጠናከር የሚያስችሉ ውይይቶችና ጉባኤዎችን ከታህሳስ 2012 ዓ.ም ጀምሮ በተደጋጋሚ ማካሄዳቸውን ጠቁመዋል።

በተለይም የፖለቲካ ፓርቲዎች መሪዎች በክልላዊና አገራዊ ነባራዊና ወቅታዊ ጉዳዮች ላይ ጥልቅ ምክክር ሲያደርጉ ቆይተው፣ በበርካታ ፖለቲካዊ አቋሞች ላይ የጋራ መግባባት በመድረስ መስከረም 23 ቀን 2013 ዓ.ም ታሪካዊ ስምምነት መፈራረማቸውን አመልክተዋል ።

በአዳማ ከተማ በተካሄደው አገራዊ መድረክም በአገሪቱ ከሚገኙ የተለያዩ የፖለቲካ ፓርቲዎች፤ ምሁራን፤ ታዋቂ ሰዎች፣ የሲቪል ማህበራት፣ ወጣቶች፣ ሴቶችና የብሄር ብሄረሰቦች ተወካዮች ተሳትፈዋል። ይኸው አገራዊ የምክክር መድረክም በቀጣይ ባህር ዳር ከተማ እንደሚካሄድ ዕቅድ መያዙም በወቅቱ ተገልጿል።

በመድረኩ ተሳታፊ የሆኑት የአማራ ክልል የእስልምና ጉዳዮች ፕሬዚዳንት ሼህ ሰይድ ማህመድ የፖለቲካ ፓርቲዎች፣ የአገር ሽማግሌዎችና የሀይማኖት አባቶች የአገርን ችግር ለመፍታት ያለመ ውይይት ማድረጋቸው ጥሩ ጅምር መሆኑን ገልጸው፤ ይህ ወደ ህዝቡ ወርዶ ፍሬ እንዲያፈራ መስራት ያስፈልጋል ብለዋል።

ውይይቱ የሰላም መታጣት ባለባቸውና ግጭቶች በሚከሰቱባቸው አካባቢዎች ተወያይቶና ችግሩን ለይቶ መፍትሄ ለመስጠት መንገድ ይጠርጋል የሚል እምነት እንዳላቸው አመልክተው፣ በተለይ የፖለቲካ ፓርቲዎች ከራሳቸውን ፍላጎት ይልቅ ለህዝብ ጥቅም አስበው ህዝብ እንዳይጋጭ የማድረግ አላፊነት እንዳለባቸው አመልክተዋል። ውይይቱ ለዚህ ስንቅ እንደሚሆናቸው ጠቁመዋል።

የሀይማኖት አባቶች ግጭት እንዳይከሰት፤ ከተከሰተም በእርቅ እንዲፈታና በህዝቦች መካካል ወንድማማችንትን፣ መተባበርና አንድነትን በማስረጽ ረገድ ትልቅ ኃላፊነት እንዳለባቸው አመልክተዋል።

“ በእነዚህ እሴቶች ዙሪያ በቤተ ክርስቲያናት፣ በመስኪዶች ትምህርቶች ቢሰጡም ሰው የአምላኩን ቃል ሰምቶ ቢተገብር ኖሮ ሰዎች አይፈናቀሉም፣ የሰው ህይወት አይጠፋም ግጭቶችም አይኖርም። ይህም ሆኖ በአገሪቱ በስነ ምግባር የታነጸ መልካም ዜጋና አንድነትን በሚሸረሽሩ ጉዳዮች የማይሳተፍ አማኝ ለማፍራት የማስተማር ስራቸውን አጠና ከረው ሊቀጥሉ ይገባል”ብለዋል ።
አዲስ ዘመን ጥቅምት 21/2013
ጌትነት ምህረቴ

“ትራምፕ የሰነዘሩት ንግግር ለአፍሪካውያን ያላቸውን የተዛባ አመለካከት የሚያሳይ ነው” ፕሮፌሰር አደም ካሚል
***************************
(ኢፕድ)
አዲስ አበባ:- የአሜሪካው ፕሬዚዳንት ዶናልድ ትራምፕ በህዳሴ ግድብ ላይ የሰነዘሩት ንግግር ለአፍሪካውያን ያላቸውን የተዛባ አመለካከት የሚያሳይ ነው ሲሉ የታሪክ ምሁሩ ፕሮፌሰር አደም ካሚል ተናገሩ።

የታሪክ ምሁሩ ፕሮፌሰር አደም ካሚል ለአዲስ ዘመን እንደገለጹት፤ የአሜሪካው ፕሬዚዳንት ዶናልድ ትራምፕ በኢትዮጵያ እና በግብጽ መካከል ጦርነት ሊቀሰቅስ የሚችል ንግግር ከሰሞኑ ማድረጋቸው ከተመረጡ ጀምሮ ለአፍሪካ ሀገራት የነበራቸውን የተዛባ አመለካከት
የሚያሳይ ከመሆኑ በተጨማሪ ፕሬዚዳንቱ በንግድ ላይ ትርፋማ የሚያደርጋቸውን ጉዳይ እንጂ ፖለቲካው ላይ እምብዛም በሳል አለመሆናቸውን ያሳየ ነው።

እንደ ፕሮፌሰር አደም ገለጻ፤ ፕሬዚዳንቱ በሁለት ሀገራት መካከል በጦርነት መሃል ለሚፈጠረው ቀውስ ሳይሆን በዚሁ ቀውስ መካከል ለሚኖረው የመሳሪያ ውድድር ትኩረት እንዳላቸው በንግግራቸው አሳይተዋል። በምስራቅ አፍሪካ አካባቢ አዲስ የጦር መሳሪያ ገበያ ቀጣና ለማቋቋም ያሰቡ የሚያስመስል ጠብ ጫሪ ንግግር ማንሳታቸው በብዙዎች ዘንድ ለዲፕሎማሲ እና ፖለቲካዊአካሄድ ቁብ እንደማይሰጡ አመላካች ሆኗል።

ፕሬዚዳንት ትራምፕ በአብዛኛውን ጊዜ ከንግግራቸው መታዘብ እንደተቻለው ለአፍሪካ ያላቸው አመለካከት የተዛባ ነው ያሉት ፕሮፌሰር አደም፤ ከዚህ ቀደም የዘር ሃረጋቸው ከአፍሪካ በሚመዘዝ አሜሪካውያን ላይ አጸያፊ ንግግሮችን ሰንዝረው የነበረ መሆኑን አስታውሰዋል። ይህ ተግባራቸው እየተባባሰ ሄዶ አሁን ላይ ሀገራትን ወደጦርነት የሚጋብዝ ንግግር በህዳሴ ግድብ ላይ መሰንዘራቸው ደግሞ ፕሬዚዳንቱ በኢትዮጵያ እና በግብጽ በሚካሄድ ጦርነት ተጠቃሚ ሊያደርጋቸውን የሚችለውን ምክንያት እየፈለጉ መሆኑን እንደሚያመላክት ገልጸዋል።

ብዙውን ጊዜ አሜሪካ እና ሌሎች ኃያል ሀገራት ኢኮኖሚያቸውን ለማነሰራራት እና ገቢያቸውን ለማሳዳግ በሁለት ቡድኖች አሊያም ሀገራት ግጭት መካከል ገብተው የጦር መሳሪያ በገፍ እንደሚያቀርቡ ይታወቃል። በቅርቡ እንኳን ቱርክና ግሪክ ውዝግብ ውስጥ ሲገቡ ወደጦርነት ማምራታቸው አይቀርም በሚል በአውሮፓ የሚገኙ ኩባንያዎች በአንድ ጊዜ 80 አውሮፕላኖችን ለመሸጥ ዝግጅት ሲያደርጉ እንደነበር ታውቋል።

ይህ የሚያሳየው የአንዱ ጦርነት ለሌላው የገቢ ምንጭ መሆኑን ነውና ጉዳዩን ተገንዝቦ በጠንካራ ዲፕሎማሲያዊ ስራ ኢትዮጵያ፣ ሱዳንና፣ ግብጽ ጉዳያቸውን መፍታት ይጠበቅባቸዋል።

እንደ ፕሮፌሰር አደም ከሆነ፤ ግብጾችም በበኩላቸው የግድቡን ስራ ለማስተጓጎል ብዙ ስራ ከጣሩ በኋላ ነው አማራጭ ሲጠፋ ወደአፍሪካ ህብረት አደራዳሪዎች የተመለሱት። በኢትዮጵያ ላይ አንዳች አደጋ ቢሰነዘር ደግሞ በቀጣናው ብሎም በአፍሪካ አህጉር የሚከሰተው ችግር ከባድ መሆኑን ግብጾችም ይገነዘቡታል።

በመሆኑም ኢትዮጵያ የአፍሪካ ህብረት ማዕከል መሆኗ እና በአህጉሪቷ ያላት ተቀባይነቷ ከፍተኛ በመሆኑ ግብጾችም የትራምፕን ንግግር ተከትለው ወደግጭት ቢያመሩ ውጤቱ ይሰምርላቸዋል ተብሎ አይጠበቅም። ኢትዮጵያን በጦነት መድፈር ማለት አፍሪካን መድፈር በመሆኑ አፈሪካውያንም ጉዳዩን አይቀበሉትም።

ሃበሾች እስካልነኳችሁ ድረስ እንዳትነኳቸው የሚለውን የነብዩ መሃመድን ትዕዛዝ መኖሩን ያስታወሱት ፕሮፌሰር አደም፤ ይህን ጥሰው ጥቃት ቢፈጽሙ የነብዩን ትዕዛዝ እንደመዳፈር የሚቆጠር በመሆኑ ግብጾች ከዕምነታቸውም አንጻር ሁኔታውን ግምት ውስጥ ማስገባታቸው እንደማይቀር ያላቸውን እምነት አስቀምጠዋል።

ግብጾች ኢትዮጵያ በሙስሊሙ ዓለም ያላትን ታሪካዊ ክብር ተጋፍተው እና የትራምፕን ንግግር ተከትለው ወደጦርነት ቢገቡ እንኳን የሚደርስባቸው ውርደት እና ኪሳራ ከፍተኛ መሆኑን ገልጸዋል። የዓረቡ ዓለምም የትራምፕ ጦርነት ቀስቃሽ ንግግር ቢኖር እንኳን ኢትዮጵያ ላይ አንድም ጥቃት እንዲፈጸም ለግብጽ ፍቃድ የሚሰጡበት ሁኔታ እንደሌለ ሀሳባቸውን ሰንዝረዋል።

ፕሮፌሰር አደም እንደገለጹት፤ ጦርነት ቢባል እንኳን ግብጾች ከእስራኤል ጋር በተደጋጋሚ ጊዜ የተሸነፉ መሆኑ ሲታወስ የጦር ሃይል ብዛት ሳይሆን ዋነኛው ነገር የአሸናፊነት ስሜቱ ነው። ኢትዮጵያውያንም ተለያይቶ ሀገርን ማዳን አይቻልምና ለውጭ ሃይል ክፍተት የማይሰጥ አንድነታቸውን አጠናክረው መቀጠል አለባቸው።
አዲስ ዘመን ጥቅምት 21/2013
ጌትነት ተስፋማርያም

በአቃቂ ቃሊቲ ክፍለ ከተማ በተደረገ የቤት ውሰጥ ብርበራ ህገወጥ መሣሪያ ከተጠርጣሪዎች ጋር ይዞ ምርመራ እያጣራ እንደሚገኝ ፖሊስ አሰታወቀ
*******************
(ኢ.ፕ.ድ)

በአቃቂ ቃሊቲ ክፍለ ከተማ በተለያየ ጊዜ በተደረገ የቤት ውሰጥ ብርበራ ህገ-ወጥ የሆኑ 5ሽጉጦች ፣ 102 የሽጉጥ ጥይቶች እና 8 የክላሽ ጥይቶች ከ7ተጠርጣሪዎች ጋር ይዞ ምርመራ እያጣራ እንደሚገኝ የአቃቂ ቃሊቲ ክፍለ ከተማ ፖሊስ መምሪያ አሰታወቀ።

በተለያየ ቦታ እና ጊዜ ፖሊስ ከህብረተሰቡ በደረሰው ጥቆማ መሰረት ከፍርድቤት የመበርበሪያ ትዕዛዝ በማውጣት ባደረገው ብርበራ ህገ-ወጥ ሽጉጦችን እና ጥይቶችን ሊይዝ መቻሉን አስታውቋል።

የአቃቂ ቃሊቲ ክፍለ ከተማ ፖሊሰ መምሪያ የወንጀል ምርመራ ማስተባበሪያ ሀላፊ ም/ኢንስፔክተር ተዘራ ከፍያለው ከአዲስ ፖሊስ ጋር በነበራቸው ቆይታ እንዳብራሩት፤ ከክፍለከተማው ተጨባጭ ሁኔታ አንጻር ከከተማው ዳር የሚገኝ እና የኬላ ፍተሻ በመኖሩ ቀደም ሲል በርካታ የጦር መሳሪያዎች በቁጥጥር ስር ውለዋል።

ባለፉት ሁለት ወራት ብቻ የህብረተሰቡ ጥቆማ መሰረት ባደረገው ብርበራ ህገ ወጥ የሆኑ 5ሽጉጦች፣102 የሽጉጥ ጥይቶች፣8የክላሽ ጥይቶች እና የሽጉጥ ካርታዎችን ከነ ተጠርጣሪዎች በመያዝ ምርመራ እየተጣራ እንደሚገኝም ተናግረዋል።

በህጋዊ ሽፋን ህገወጥ ጦር መሳሪያ ይዘው የሚቀሳቀሱ ግለሰቦች እንዳሉ ያስታወሱት መርማሪው ህገ ወጥ የጦር መሳሪያ ዝውውር ለሀገር ሰላም እጦት ከመሆኑም ባሻገር ለኢኮኖሚ ውድመት ትልቅ መንስኤ በመሆኑ ህገ ወጥ የጦር መሳሪያ ዝውውርን ለመከላከል ህብረተሰቡ እያደረገ ያለውን እገዛ አጠናክሮ መቀጠል ይኖርበታል ሲሉ ሓላፊው መልዕክታቸውን አስተላልፈዋል።

የትራምፕን ንግግር መቃወሚያ ዓለምአቀፍ የበይነመረብ ፊርማ የማሰባሰቢያ ንቅናቄ ተጀመረ
*********************************
(ኢፕድ)
አዲስ አበባ፡- በታላቁ ህዳሴ ግድብ ግንባታ ሕዝባዊ ተሳትፎ አስተባባሪ ብሔራዊ ምክርቤት ጽሕፈት ቤት እና በሌሎች አጋር አካላት አማካኝነት የዶናልድ ትራምፕ ንግግርን ለመቃወም ‹‹ፊርማችን ለህዳሴያችን›› በሚል የበይነ መረብ ዓለም አቀፍ የፊርማ ማሰባሰብ ንቅናቄ ተጀመረ።

የታላቁ ሕዳሴ ግድብ ግንባታ ሕዝባዊ ተሳትፎ ማስተባበሪያ ብሔራዊ ምክር ቤት ጽሕፈት ቤት ዋና ዳይሬክተር ዶክተር አረጋዊ በርሔ ፊርማ የማሰባሰቡ ንቅናቄ ይፋ በተደረገበት ወቅት እንደተናገሩት፤ የፊርማ ማሰባሰብ ሥራ ከባድና ለአገር ትልቅ አስተዋጽኦ የሚያበረክት ከመሆኑም በላይ ኢትዮጵያውያን እንዴት በጋራ መቆም እንደሚችሉ ማሳያ ነው። የተከፈተውን በር ተከትሎ መግባቱና ውጤቱን ማሳየቱ የእኛ ድርሻ ነውና እጃችንን ወደ ፊርማችን እናድርግ ብለዋል።

የታላቁ ሕዳሴ ግድብ ግንባታ ሕዝባዊ ተሳትፎ ማስተባበሪያ ብሔራዊ ምክር ቤት ጽሕፈት ቤት የሕዝብ ግንኙነት ዳይሬክተር አቶ ኃይሉ አብርሀም በበኩላቸው እንዳሉት፤ ግድቡ ለድርድር የሚቀርብና ፕሬዚዳንቱ እንደተናገሩት ለቦምብና ለጥይትም የሚታሰብ አይደለም።

በሰላማዊ መንገድ ጨርሰን በዓለምአቀፉ ሕግ መሠረት እኛም ጎረቤቶቻችንም ተካፍለን እንድንጠቀምበት እየሰራን እንገኛለን።ስለሆነም የበይነ መረብ የፊርማ ማሰባሰብ ተግባር ከምንም በላይ የሚያስፈልግ በመሆኑ በድል እንዲጠናቀቅ ሁላችንም የበኩላችንን እንወጣ ሲሉ ጥሪ አድርገዋል።

ኢትዮጵያውያን ጸብን ሳይሆን ወዳጅነትን አንግበን የምንንቀሳቀስ ሕዝብ ነን።ሆኖም ግን ከጥንት ጀምሮ ለነካን ምላሹን እናውቅበታለን።አሁንም በዴሞክራሲያዊ መንገድ ድምጻችን ለህዳሴያችን በሚል የተለያዩ እንቅስቃሴዎች አድርገን ውጤታማ እንደሆንነው ሁሉ አሁንም ፊርማችን ለህዳሴያችንም በሚለው ሪከርድ ሰባሪ መሆን ይጠበቅብናል።ለዚህም ሁሉም ኢትዮጵያዊ በይነ መረቡ በመግባት ፊርማውን እንዲያኖር ሲሉ አቶ ኃይሉ አሳስበዋል።

ከአስተባባሪዎቹ መካከል አቶ ፍሬው በቀለ እንዳሉት በአንድ ወር ጊዜ ውስጥ ምላሽ ለማግኘት 100 ሺህ የፊርማ ስብስብ መደረግ እንዳለበት ተናግረዋል።እርሳቸው እንዳሉት፤ ይህ ዓለምአቀፍ ንቅናቄ በመቶ ሺህ ብቻ የሚገደብ መሆን የለበትም።እንዲያውም ታሪክ ሊሰራበት የሚገባውና ሪከርድ የምንሰብርበት ሊሆን ይገባል ብለዋል።

ፊርማው በኢትዮጵያውያን ብቻ ቢፈረም እንኳን በሚሊዮን ይቆጠራል።በዓለምአቀፍ ሲሆን ደግሞ ብዙ የኢትዮጵያ ወዳጆችና ሰላም ወዳዶች በመኖራቸው ይህንን ይቀላቀላሉ።

ስለሆነም በተለይ ሚዲያው ይህንን በማሳወቅ በኩል የድርሻውን እንዲወጣ ጥሪ አቅርበዋል።ፊርማው ተሰባስቦ ለአሜሪካ ምክርቤት ብቻ ሳይሆን ለተባበሩት መንግሥታት ድርጅት፣ ለአፍሪካ ህብረት፣ ለአውሮፓ ህብረት፣ ድርድሩን ለሚመሩት አካላት እንዲሁም ጉዳዩ ይመለከታቸዋል ለሚባሉት ሁሉ ገቢ ይደረጋል ብለዋል።

የኢትዮጵያ ኮንስትራክሽን ሥራ ተቋራጭ ማህበር ፕሬዚዳንትና የታላቁ ሕዳሴ ግድብ ግንባታ ሕዝባዊ ተሳትፎ ማስተባበሪያ ብሔራዊ ምክር ቤት አባል ኢንጅነር አመሀ ስሜ በበኩላቸው እንደተናገሩት፤ እስከዛሬ በሆኑት ሁሉ ኢትዮጵያን በአንድነት ከተነሱ ምንም የሚገታቸው ነገር እንደሌለ ማሳያ ነው።አሁን ደግሞ በአገር ሉአላዊነት ላይ ጣታቸውን የቀሰሩት ትራምፕ ያልተረዱት ነገር ካለ እንዲረዱትና ከተረዱም በኋላ የእኛ አጋር ሆነው አብረውን እንዲቆሙ ለማድረግ ይህን እንቅስቃሴ ማድረጉ እጅጉን ይጠቅማል።ዋጋው ጥቂት ቢመስልም በትሪሊዬን የሚገመት ዲፕሎማሲያዊ ምላሽን ያስገኛልና ፊርማችንን ለህዳሴያችን እንስጥ ሲሉ አሳስበዋል።

የፕሬዚዳንቱ ንግግር ሕዝቡን አንድ አድርጎታል። ይህንን በተለያዩ መንገዶች መደገፍ ያስፈልጋል ያሉት ኢንጅነሩ፤ በተለይ በውጭ ዲፕሎማሲው የተሻለ ሥራ መስራትና የፊርማ ማሰባሰቡን በታሪክ ማጠናቀቅ እንደሚገባ አስረድተዋል።በውጭም ሆነ በአገር ውስጥ መነጋገር፤ መደማመጥና መሸናነፍ መቻል ላይ ማተኮር ይገባል።

ይህ ሲሆን አንድነት መጥቶ ኃይል ይሆናል፤ ይህንን አጥብቆ መያዝና በአባይ ጉዳይ አምባሳደር መሆን መቻልይገባል ሲሉ ተናግረዋል።የፕሬዚዳንቱን ንግግር ለመቃወም change.org እና petition gard white house በማለት ድረ-ገጽ ላይ ገብቶ መፈረም እንደሚቻል ተገልጿል። በተመሳሳይ ከሰኞ ጀምሮ ሁሉም ሰው የፌስቡክ ፕሮፋይሉን በህዳሴው እንዲቀይርም ጥሪ ቀርቧል።
አዲስ ዘመን ጥቅምት 22/2013

ብሔራዊ መረጃና ደህንነት አገልግሎት ኢትዮ ቴሌኮምን በዓመት ከ200 ሚሊዮን ብር በላይ ሊያሳጣ በሚችል ወንጀል የተጠረጠሩ ግለሰቦች በቁጥጥር ስር ዋሉ
*****************
(ኢ.ፕ.ድ)
ብሔራዊ መረጃና ደህንነት አገልግሎት ኢትዮ ቴሌኮምን በዓመት ከ200 ሚሊዮን ብር በላይ ሊያሳጣ በሚችል ወንጀል የተጠረጠሩ ግለሰቦች በቁጥጥር ስር ማዋሉን አስታወቀ።

የብሄራዊ መረጃና ደህንነት አገልግሎት ከኢንፎርሜሽን  መረብ ደህንነት ኤጀንሲ ጋር በመተባበር በአዲስ አበባ ከተማ የቴሌኮም ማጭበርበር ወንጀል በሚፈፀምባቸው ቦታዎች ላይ ጥብቅ የመረጃና የክትትል ሥራዎች ሲሰሩ ቆይተዋል።

በዚህም ትናንት በአዲስ አበባ በኮልፌ ቀራኒዮ ክፍለ ከተማ ወረዳ 4 እና ልደታ ክፍለ ከተማ ወረዳ 8 በተካሄደ ኦፕሬሽን በህገ ወጥ መልኩ ዓለም አቀፍ የስልክ ጥሪዎችን በመጥለፍ በራሳቸው መስመሮች ለደንበኞች በማቅረብ ሕገወጥ ድርጊት ሲፈፅሙ የነበሩ ሦስት ተጠርጣሪዎች በፌደራል ፖሊስ ኮሚሽን አማካኝነት በህግ በቁጥጥር ሥር እንዲውሉ ማድረጉን አገልግሎት መስሪያ ቤቱ አስታውቋል።

ተጠርጣሪዎቹ ከኢትዮ ቴሌኮም አውቅና ውጪ በኢትዮጵያ ዓለም አቀፍ የስልክ ጥሪዎችን በማስተላለፍ የራሳቸውን ገቢ ሲሰበስቡ መቆየታቸውን የገለፀው ብሄራዊ መረጃና ደህንነት አገልግሎት፤ ሕገ ወጥ ድርጊቱ ባይከሽፍ ኖሮ፤ ኢትዮ ቴሌኮምን በዓመት ከ200 ሚሊዮን ብር በላይ ሊያሳጣው እንደሚችልም ጠቁሟል።

በወንጀል ድርጊቱ የተጠረጠሩት ግለሰቦች በቁጥጥር ሥር ሲውሉ፤ ሲገለገሉባቸው የነበሩ 10 ጌትዌይ (ሲምቦክስ)፣ 17 ቲፕሊንክ፣ 59 ሲዲኤምኤ፣ 3 ራውተር፣ 2 ሺህ ሲምካርድ፣ 3 ላፕቶፕ፣ የባንክ  ደብተሮች፣ ሲፒኦዎችና ሌሎች ሕገ ወጥ  መሳሪያዎች በኢግዚቢትነት  መያዛቸውን  ብሄራዊ  መረጃና ደህንነት አገልግሎት አስታውቋል።
 
ሕገ ወጦችን በቁጥጥር ሥር ለማዋል በነበረው ሂደት ህብረተሰቡ ላሳየው የላቀ ተሳትፎ አገልግሎት መስሪያ ቤቱ ምስጋና አቅርቧል።

በቀጣይም ህብረተሰቡ ሕገ ወጦችን በማጋለጥ ረገድ የተለመደ ትብብሩን አጠናክሮ እንዲቀጥል አገልግሎት መስሪያ ቤቱ ጥሪ አቅርቧል።

"የኢትዮጵያ እና የሱዳን ሕዝቦች በባህልና ታሪክ የተሳሰረ ጠንካራ ግንኙነት አላቸው"
ጠቅላይ ሚኒስትር  አቢይ አህመድ 
**************
(ኢ.ፕ.ድ)
የኢትዮጵያ እና የሱዳን ሕዝቦች በባህል እና በታሪክ የተሳሰረ ጠንካራ ግንኙነት እንዳላቸው ጠቅላይ ሚኒስትር ዶ/ር አቢይ አህመድ ገለጹ፡፡

ጠቅላይ ሚኒስትሩ ከጄነራል አልቡርሀን ጋር የአዳማ ከተማን የጎበኙ ሲሆን፤ በዚሁ ወቅት  አባ ገዳዎች ለጄነራል አልቡርሃን ፈረስ እና ጋሻ  ሸልመዋል።

ጠቅላይ ሚኒስር ዶ/ ር አብይ አህመድ በማህበራዊ ገጻቸው፤ "አባገዳዎች የሁለቱ ሕዝቦች ትስስር ይጠብቅ ዘንድ መርቀውናል። ለጄነራል አልቡርሃን ፈረስ እና ጋሻ በመሸለም አክብሮታችንን ገልጸንለታል" ሲሉም አስታውቀዋል።