የኢትዮጵያ አይሮፕላን ምዝገባ ኮድ ከ ET-A ወደ ET-B ተሸጋገረ።

ኢትዮጵያ በሲቪል አቪዬሽን ከ80 ዓመት በላይ ታሪክ ያላት ሀገር ስትሆን በዓለም ዓቀፉ የሲቪል አቪዬሽን ድርጅት (ICAO) የአይሮፕላን ምዝገባ (Aircraft Registration) ኮድ መሠረት የሀገሩን መለያ የሚገልጹት ሁለት ፊደላት "ET" የሚለው ሆኖ ተመዝግቦላታል።

እነዚህ የመለያ ፊደላት ወይም ቁጥሮች ለሁሉም ሀገራት የተለያየ የሚሰጥ ሲሆን ለአብነትም የኬንያ "5Y" ፤ የኡጋንዳ "5Y" ፤ ቻይና "B"፤ ግብጽ "SU" ፤ ጀርመን "D" መጥቀስ ይቻላል።

ኢትዮጵያ የተሰጣት መለያ ፊደላት ከስያሜዋ ጋር ተመሳሳይነት ባለው መልኩ "ET" መደረጉ አጋጣሚ ብቻ ሳይሆን በወቅቱ የነበረን የዲፕሎመሲ አቅም፣ የቴክኖክራቶቻችን ብቃት እና ለአቪዬሽን የሰጠነው ቦታ ትልቅ በመሆኑ ጭምር የተገኘ ይሆናል ተብሎ ይታመናል።

በዚህ ምክንያት በኢትዮጵያ ሲቪል አቪዬሽን በኩል የሚመዘገቡ ማናቸውም አይሮፕላኖች "ET" ን በማስቀደም፣ አንድ ጭረት (-) ካደረጉ በኋላ ባለ ሦስት አሐዝ ወይም ሆሄ ይጠቀማል።

በኢትዮጵያ የሲቪል አቪዬሽን ታሪክ አስካሁን ET-A ብሎ ጀምሮ ነበር ሁለቱ ፊደላት የሚቀጥሉት (ለምሳሌ፣ ET-ANY) ከዚህ በኋላ ግን ይህ የአይሮፕላን ምዝገባ ኮድ ወደ ET-B ተሸጋግሯል።

በ ET-B ፊደላት ዘር እና ብዜት ለመቀጠል፣ የመጀመርያው አይሮፕላን የኢትዮጵያ አየር መንገድ ንብረት የሆነው Boeing 777 ዕቃ ጫኝ አይሮፕላን ትናንት እኩለ-ሌሊት ላይ ከኤቨሬት ሲአትል ተነስቶ  በካፒቴን ዘላለም አንዳርጌ ዋና አብራሪነት እየተመራ የ16 ሰዓታት በረራ በማድረግ አዲስ አበባ ቦሌ ዓለም አቀፍ አየር ማረፊያ ደርሷል።

ለኢትዮጵያ አየር መንገድ 10ኛውን የቦይንግ (Boeing 777-200LR) የጭነት አውሮፕላን ሲሆን አውሮፕላኑ ዘመናዊ ባለሁለት ሞተር ያለው መሆኑንና ከመቶ ቶን በላይ ጭነት የመሸከም አቅም እንዳለውም ተጠቅሷል።

አየር መንገዱ Echo Tango Alpha (ET-A) እየተባለ ለ75 ዓመታት የተጠራበትን ስያሜ ከዚህ ቀን ጀምሮ በመተው Echo Tango Bravo (ET-B) እያለ የሚጠራ ይሆናል ማለት ነው።

ይህ የአይሮፕላን ምዝገባ ኮድ፣ የግሉን አየር መንገዶችንም የሚጨምር ሲሆን የኢትዮጵያ ሲቪል አቪዬሽን በኢትዮጵያ ለሚመዘገቡ የግል አየር መንገዶች፣ አገልግሎቱ፣ የቁጥጥር (Regulatory) እና ፈቃድ ሰጪነት (Certifying)  ተግባር የሚያከናውን ይሆናል።

Credit : ኤሮቶፒያ የአቪዬሽን ሚዲያ፤ ዮናታን መንክር፤ የኢትዮጵያ አየር መንገድ

👋  @TikvahethMagazine