ودعتك الله وداع اللي ما يبي فرقاك
وداع اللي تمنّى يقضي وقته بـ ظلّك

و ياكثر المشاعر اللي خذيتها معاك
ولا خليت لي إلا دمع يسكب عليك

هذي سبايب عمايل أغلاطي معاك
و لكل خطأ درس يعدل لك خطاك

ما يموت الودّ لو مات الكلام
لك مكان و ذكريات و شعور

ما أنت عابر في حياتي و السلام
أنت حتى في غيابك لك حضور

عطيتك محبة صادقة ما بها تشويه
و جعلتك بقلبي منفرد فيه وحداني

و غيرك بغاني بالمحبة و أنا ما أبيه
دام أنت عندي وش أبي بواحدٍ ثاني

تراني ليّا شفتك أسجّ الفكر و أشقيه
و أشوف القمر و أقول عندي قمر ثاني

غلاتك بقلبي شي يطغى على التشبيه
كيف أوصفك و الوصف يعجز به لساني

كثّر الله خيرك يا قليل الكلام
ليت طبعك مثل وجهك سموح

المحبة ثلاث أرباعها .. إهتمام
و أنت لاجيتني؟ ما همّك إلا تروح

‏اذا قام الحنين يسوق قلبي قمت أسوق خطاي
‏أدوّر من دروبك درب قد جيناه .. و أضيعه

‏يا كثر صورك اللي ما نساها بالي النسّاي
‏لو إن عمري معك مرّت سنينه مثل أسابيعه

‏حبيبي كيف أمر بشارعك ما تدري إني جاي ؟
‏و أنا أعرف الصباح اللي يجيبك من ذعاذيعه

اصدّ عنه و كنّي مانيب باغيه
ولا الغلا أكثر من أول و تالي

يا خبلكم ياللي تقولون تغليه
حتى سميّه فالمخاليق .. غالي

ماعاد أشوفك ولا حتى أحاكيك
مشتاق لك و ماعاد باليد حيلة

كل ما جيت بنسى طرا لي طاريك
حتى الدقايق في غيابك طويلة

وينك ياللي كل ما فيني يبيك
يا نبض قلبي و هواه و دليله

تدري إني أحبك و من قلبي أبيك
لكن حظوظي بشوفك غدت بخيلة

خلت العين بشوقها تبكي عليك
والله حياتي بدونك ما هي جميلة

ودي إنك معي في بعض الأحيان
و ودي بعلومك إللي دايم تسلّيني

ياللي فقدك واضح و بالعيون يبان
ليتك حيّ بينهم و بالدنيا ما تخلّيني

والله إني على وصلك ميت و شفقان
و لو يطول عمري بذكرك في سنيني

خذاك الموت و العمر توّه و لو كان
تطرى لي بالسوالف و ذكرك يحييني

عساك في نعيم و فالجنّة لك مكان
ياللي دمعك في مفارقك دايم يعصيني

تطري علي و أشتاق لك و أتمناك
و ألقاك حلم من بعض ذكرياتي

أنا أدري إني صرت ماني بـ ويّاك
لكنك أجمل حلم مـر بـ حياتي

من عاشرك ما ظنتي بيوم ينساك
مهما تغيب تكون لي مثل ذاتي

و أصعب مواقف دنيتي يوم فرقاك
فيها عرفت إنك . . تساوي حياتي

عقب النظر ما عاد لي في الهوى أحباب
غاب . . و قطع عني المراسيل و الأخبار

بنيت من وصله أمل و أثر الأمل كذاب
أركض ورا طيفه و هو لـ غيري استدار

ما عاد يغري قلبي ظنون و لا سراب
من باع ناسه لجل هامل جنى ذل و مرار

يا ليتني قبل الغلا حطيت للرجع حساب
ولا سقت روحي لـ واحد بالهجر استخار

‏من متى كانت أجابتنا على قد السؤال
‏و من متى كانت سوالفنا سوالف باردة

‏و من متى الوعد يتأجل و يتأجل الإتصال
‏و من متى اسولف على عينك و عينك شاردة

‏و من متى كلمة أحبك شهر كامل ما تنقال
‏تكسر جناحي من عنادك و أنا اللي فارده

‏للأسف كنت الفراق أشوفه أقرب للخيال
‏صرت أشوفه واقعي جدًا و فكرة واردة

شرعت لك بيبان قلبي و رحبت
قلت الله الله بقلبٍ شافك أمانة

تركت كل الناس ما همني الا أنت
ضميتك لـ صدرٍ تباهى بحنانه

علي أنا بالذات و شلون ما لنت
هزمتني و قلبي ما يرضى الإهانة

غلطت إني بـ قلبك تعشمت
و أنا خسرت اليوم قلبي و رهانه

من قسوة أفعالك تراني تعلمت
كل الجروح تهون الا .. الخيانة

ما هقيت إن المواقف تاليها وداع
سامح الله صاحب حدّني لـ مفارقه

باعني عقب الغلا و الغلا ما هو يباع
من فراقه حجرة العين دايم غارقة

و ابتدأ فلم المفارقة و ضيقات الوساع
و الكرى لا هوّد الليل كنّي سارقه

ما دريت إن المحبة عواذلها جياع
لين شفت شمس هجرك علينا شارقة

عفى الله عن كلام في حنايا الصدر ما ينقال
تركته للزمن لو هو ثقيل و جمرته حيّة

و عفى الله عن هموم ما تخلّي مستريح البال
يعيش أيام عمره في صفا ذهن و صفا نيّة

و عفى الله عن هواجيس توقّف بي على الأطلال
تعيد الذكريات اللي مع الأيام . . منسيّة

وش ألومك عليه؟ و خاطري دون الملامة ما طاب
يا وجهٍ يوم أشوفه كنت أشوفه وجهي الثاني

كذا استكثرت الراحة على قلبي بدون أسباب
كذا ترضى لي عصف الشتات بعز خذلاني

ذخرتك طلقةٍ ترمى بصدر الصاحب الكذاب
لعل سلاحي موجه على صدري و شرياني!

ماني من اللي يتبع المقفّين يا نايف
طبعٍ ورثته من اللي مات ما خرّف

من صد صدّيت لو هو بالغلا كايف
و إن راح جعله مراح الطّير لا صرّف

لو بقى للهيل صبر على فوح الدلال
ما بقى للقلب صبر على شيٍ يجيه

كنت أحسب إن الغلا زال و أثره لا يُزال
في الحشى ما كنّه إلا دخيلٍ في الوجيه

و إن مر طيفي على بالك في ليلة ربوع
اسأل غرورك وش الدنيا بليّا متاع

ودعتك الله ولا ودّي تجف الدموع
ياللي وداعك ما بعده في حياتي وداع

ماهي عوايدك تبطي ما تكلمني
مدري من اللي خذاك وغير أسلوبك

عن كل حاجه بـ قلبك ما تعلمني
نسيت طيش الغلا وأيام محبوبك

أزريت لا أفهمك وأنت أزريت تفهمني
ما تدري إن القصايد كلها . . صوبك

‏ما علمك صمتي وش كثر فيني كلام
‏ولا أنا بس اللي أحسك و أسمعك؟

‏ما ذكرك مُر الجفا بحلو الغرام
‏ولا أنت بالثنتين ما تفرق معاك؟

توكل لا توادع رح عسى درب الجفا المسهوج
يصادف كل درب فرقى عقبها ما تلمحك عيني

سمحت من الهوى و من القصيد و من زراق الموج
و رميت أغلى مجاديف الغرام و جيت بيديني