2026 сыл – Культура сылынан биллэриллибитэ. Бу дьоро күн чэрчитинэн, бүгүн үрдүкү кылаас оҕолоругар анаан, "Бэлэмнэнэн кэллибит" диэн олус интэриэһинэй уонна бэрт үчүгэй оонньуу тэрилиннэ. Бу тэрээһин сүрүн сыала-соруга – ыччаппыт дойдутун, төрөөбүт буорун билэр-көрөр билиилэрин дириҥэтии.
Оонньуу сүрүн ис хоһоонун Саха сирин биллэр суруйааччыларын, ону тэҥэ улууспут ааттаах-суоллаах дьоно, кэрэхсэбиллээх сирдэрэ-уоттара хабар. Оҕолор оҥоһуллубут тургутууларга хоруйдаан, бэйэлэрин билиилэрин-көрүүлэрин көрдөрдүлэр.
Күрэхтэһии түмүгэр, күүстээх уонна саталлаах билиилэрин көрдөрөн, 10-с кылаас кыргыттара чаҕылхай кыайыыны ситистилэр. Кинилэр бу оонньууга анаан олус үчүгэйдик бэлэмнэммиттэрин уонна төрөөбүт төрүт культураларыгар, литератураларыгар дириҥник интэриэстэрин бигэргэттилэр.
Маннык тэрээһиннэр оҕолор өй-санаа да өттүнэн, духуобунас да өттүнэн сайдалларыгар улахан оруолу оонньууллар.
Баһыыба үрдүкү кылаас оҕолоругар көхтөөх кыттыыгыт иһин !

Бүгүн, олохтоох библиотекаҕа, остуол оонньууларыгар анаммыт кэрэхсэбиллээх тэрээһин ыытылынна. Бу дьикти түгэҥҥэ мустубут дьон Айар кинигэ кыһатын бэчээттээн таһаарбыт араас остуол оонньууларын, ону тэҥэ саха төрөппүт мас оонньууларын кытта чугастык билистилэр.

Тэрээһин биир сүрүн чааһынан Павлова Мария Юрьевна бэйэтин илиитинэн айан оҥорбут "Муҥха" уонна "Тылы быһаар" диэн оонньууларын сүрэхтэниитэ буолла. Кини бу оонньуулара бэйэлэрин уратытынан, сахалыы тыыннаахтарынан дьону олус сэҥээртилэр.

Түмүгэр, кыттааччылар бары оонньуулары боруобалаан көрөн баран, "санаабыттан тахсыбыт олус туһалаах оонньуулар баар буолбуттар!" диэн астыныыларын биллэрдилэр. Кэпсэтии түмүгэр итинник оонньуулар дьиэ кэргэҥҥэ оҕо толкуйдуур, айымньылаахтык сыһыаннаһар дьоҕурун, уонна саҥарар сатабылын сайыннарарга олус суолталаах эбиттэрин бигэргэттилэр.