Төрөөбүт тылга болҕомтону ууран, айар дьоҕуру сайыннаран, үтүө сиэргэ-майгыга иитэр-үөрэтэр сыаллаах-соруктаах, Т.П. Саввинова аатынан модельнай библиотекаҕа Төрөөбүт тыл уонна сурук-бичик күнүн чэрчитинэн, "Аман өс" тыл этии күрэҕэ ыытылынна.
Маҥнайгы түһүмэххэ, Өрт орто оскуолатын 21 үөрэнээччитэ бэйэлэрэ бэлэмнэммит тиэмэлэрин сэһэргээн кыттыыны ыллылар. Онтон иккис түһүмэххэ, билэти талан, бэлэмнэнэн баран, сөптөөх өйдүккэ олоҕуран, тиэмэлэрин төһө кыалларынан арыйан, кэпсээн күрэхтэстилэр.

Күрэх түмүгэр кыттааччыларга барыларыгар Туоһу сурук, оттон кыайыылаахтарга Мэҥэ сурук туттарылынна, уонна бу кэрэ түгэн күлүккэ (хаартыскаҕа) түһэрилиннэ.

Кыайыылаахтарынан алын кылаастарга Тарасова Айталыына, орто бөлөххө Дархан Тимофеев уонна улахан кылаастарга Семенова Виолетта буоллулар.

2026 сыл – Культура сылынан биллэриллибитэ. Бу дьоро күн чэрчитинэн, бүгүн үрдүкү кылаас оҕолоругар анаан, "Бэлэмнэнэн кэллибит" диэн олус интэриэһинэй уонна бэрт үчүгэй оонньуу тэрилиннэ. Бу тэрээһин сүрүн сыала-соруга – ыччаппыт дойдутун, төрөөбүт буорун билэр-көрөр билиилэрин дириҥэтии.
Оонньуу сүрүн ис хоһоонун Саха сирин биллэр суруйааччыларын, ону тэҥэ улууспут ааттаах-суоллаах дьоно, кэрэхсэбиллээх сирдэрэ-уоттара хабар. Оҕолор оҥоһуллубут тургутууларга хоруйдаан, бэйэлэрин билиилэрин-көрүүлэрин көрдөрдүлэр.
Күрэхтэһии түмүгэр, күүстээх уонна саталлаах билиилэрин көрдөрөн, 10-с кылаас кыргыттара чаҕылхай кыайыыны ситистилэр. Кинилэр бу оонньууга анаан олус үчүгэйдик бэлэмнэммиттэрин уонна төрөөбүт төрүт культураларыгар, литератураларыгар дириҥник интэриэстэрин бигэргэттилэр.
Маннык тэрээһиннэр оҕолор өй-санаа да өттүнэн, духуобунас да өттүнэн сайдалларыгар улахан оруолу оонньууллар.
Баһыыба үрдүкү кылаас оҕолоругар көхтөөх кыттыыгыт иһин !