Саха норуодунай бэйиэтэ Савва Тарасов

ТӨРӨӨБҮТ ИЙЭ БУОР ДОЙДУБУН

Хаһан да киһиэхэ баар буолар

Хаан хабан, эт тардан сылдьыһар

Аргыһыҥ — айанныыр суолларгар,

Алгыһыҥ — оттуохтаах аал уоккар…

Төрөөбүт Ийэ буор дойдубун

Мин сүрбэр, мин куппар холбуубун.

Күн уотун ытыспар түһэрэн

Көөчүктүү, дьоллонон күлбүппэр,

Долгуйан, күөх сааһын эргитэн

Тоҥсуйта түннүкпэр-үөлэспэр…

Төрөөбүт Ийэ буор дойдубун

Мин талах биһикпэр холуубун.

Күөгэйэр күннэрбэр сүһүөхпүн

Булларан бу улуу үйэҕэ

Көтүппүт өркөннөөх өҥөтүн

Хос сиэним кытары билиэҕэ.

Төлөммөт иэстээхпин ол туһар

Төрөөбүт Ийэ буор дойдубар.

Кэлин да маҥхайбыт төбөбүн

Төҥкөтөн кэс тылбын этиэҕим:

Ким кэлбит күн сирин үөрүүтүн

Киниттэн хайаан да билиэхтин

Төлөннөөх тапталым, сылдьыһаар

Төрөөбүт Ийэ буор дойдубар

Үйэ-саас, күн сыдьаай сырдыгын

Көрүөхтэн төннүөхпэр диэритин

Мин манна олорон ааспыппын

Дьолум диэн киэн тутта этиэҕим

Төрөөбүт Ийэ буор дойдубун.

Соргулаах Солоҕоммут төрөөбүт күнүнэн Татьяна Алексеевна Василтева бэйэтин устуутун бэлэх уунар...

“Уоланнар ааҕыылара” - кэскиллээх бырайыак!
Солоҕоммут 115 сааһын туолбут дьоро күнүгэр сарсыардаттан араадьыйабыт анал бырагыраамата ньиргийдэ, тэрээһиннэр ыытылыннылар.
Бу күн биир бэлиэ тэрээһинэ - үгэс буолбут “Уоланнар ааҕыылара”. Улуу Кыайыы 80 сылын көрсө Николай Романович Степанов сырдык аатыгар аналлаах нэһилиэк хоһоон ааҕар уолаттарын түмтэ. Тэрээһин саҕаланыытыгар Анна Ивановна Н.Р.Степанов туһунан сырдаппытын иһиттибит. Ааҕыы кыайыылаахтара уһуйаан оҕолоругар Артем Павлов, алын сүһүөх оскуола оҕолоругар Айсан Захаров , 5-8 кылаас уолаттарыгар Дуолан Пахомов , 9-11 кылаас уолаттарыгар Ньургун Семенов. «Солоҕон нэһилиэгэ» МТ уонна Т.П.Саввинова аатынан бибилэтиэкэ анаабыт бириистэринэн, кыайыылаахтарга Н.Р.Степанов оҕолоро харчынан бириэмийэ анаабыттар.
Маннык тэрээһин үгэс быһыытынан сыл аайы ыытыллара олус туһалаах, уолаттар уус-уран ааҕыыларын сайыннарар.
Туйара Александровна Тарасова,
С.И.Тарасов аатынан Өрт орто оскуолатын
төрөөбүт тылын, литэрэтиирэтин учуутала