Кулун тутар 4 күнэ - Аан дойдуга дорҕоонноохтук Ааҕыы күнэ.
Бу күн олохтоох библиотека ааҕыы угуттуур эйгэтигэр кыттыһан, хомоҕой хоһооннорунан бастакы биэриини бэлэмнээн нэһилиэк араадьыйатыгар таһаарда.

Горнай улууһун Солоҕон нэһилиэгин бочуоттаах олохтооҕо, Арассыыйа уонна Саха сирин суруйааччыларын, суруналыыстарын сойуустарын чилиэнэ, педагогическай үлэ бэтэрээнэ Александр Адамович Тарасов ийэ дойдуга, үлэҕэ, олоххо таптал туһунан хоһооннору иэйиилээхтик суруйар.
Бүгүн тапталлаах ийэтигэр анаабыт хоһоонун истиҥник аахта.

Ааҕыы угуттуур эйгэтигэр

Кулун тутар 4 күнэ - Аан дойдуга дорҕоонноохтук Ааҕыы күнэ.

Бу күн олохтоох библиотека ааҕыы угуттуур эйгэтигэр кыттыһан, хомоҕой хоһооннорунан олохтоох "Саҥа" араадьыйаҕа бастакы биэриини бэлэмнээн таһаарда.

https://t.me/ertlin/1795

📅 Кулун тутар 16 күнэ – тумус туттар киһибит Алексей Елисеевич Кулаковскай – Өксөкүлээх Өлөксөй төрөөбүт күнэ.


Саха буолан сандаарыҥ, киһи буолан килбэйиҥ!

“МӨККҮӨР ТҮҺҮЛГЭТИН” СОЛОҔОҤҤО ТЭРИЙИЭХХЭ!

Хаҥалас улууһугар Өктөмҥө “Кулаковскай ааҕыылара-2025” мөккүөр түһүлгэтигэр оскуолабыт “Пресс-кииниттэн” сорудахтанан, кыттар уолаттардыын барсар буоллуҥ диэбиттэригэр үөрэ-көтө сөбүлэспитим. Маҥнайгы Президеммит Михаил Ефимович Николаев төрөөбүт дойдутугар Өктөмҥө Николаев-Кииҥҥэ тэриллэрин ордук кэрэхсии-астына истибиппит. Өктөмҥө МАН ыытар тэрээһиннэригэр сылдьыбыт оҕо барыта астынан кэлээччи.

Кулун тутар 14 күнүгэр (2025 сыл) сарсыарда 5.45 чааска оскуолабытыгар мустубуппут. Администрация суоппара Иван Николаевич Дормидонтов эппит кэмиттэн эрдэ кэлэр диэн учууталбыт киэһэ тоһоҕолоон бэлиэтээбитин курдук, 6 иннигэр кэлбитэ, мин интернакка олорор буоламмын, киниэхэ айан сурунаалыгар илии баттата охсон, иитээччибэр туттарбытым. Утуйа айаннааммыт, суолу билбэккэ да хаалбыппыт. 10 чааһы ааһыыта тиийиэхтээх сирбитигэр тиийбиппит.

Киирээппитин кытта үөрэ көрсүбүттэрэ, сон ыйыыр хоско атаарбыттара. Сахалыы таҥаспытын кэтэн, Солоҕоммут уонна оскуолабыт бэлиэлэрин иилинэн, саалаҕа киирбиппитигэр: “Горнайтан кыттааччылар кэллилэр”, - диэбиттэрэ, бары таһыммыттара. Манна күрэс хайдах быһыылаахтык барарын быһаарбыттара.

9-11 кылаастар саалаҕа хаалбыттара, 7-8 кылаастар, 5-6 кылаастар уонна 4 кылаастар эмиэ атын-атын сиргэ тарҕаспыттара. Мөккүөр түһүлгэтэ диэн нууччалыы Дебат оонньуу. Бу оонньууга бөлөх үстүү киһиттэн турар. Оскуолабытыттан кыттааччыларбыт: Валентин Стручков - 1 спикер, Иннокентий Андреев - 2 спикер, Сайдам Тарасов - 3 спикер буолалларын эрдэттэн быһаарсан, оруолларын үллэстэн, бэлэмнэнэн кэлбиттэр этэ. Мөккүспүт тиэмэлэрэ - “Интернет: киһи-аймах баайа уонна куһаҕан содула”. Уолаттарбыт нууччалыы тылы кыбыппакка, көнөтүк туттан туран, лоп-бааччы саҥаралларын, утары хамаанда этэрин эмиэ сиэрдээхтик олорон, болҕойон истэллэрин-суруналларын, ырыталларын киэн тутта көрбүтүм-истибитим.

Эбиэт кэнниттэн 9-11 кылаас уолаттарын оонньуутун көрбүтүм. Кинилэр мөккүспүт тиэмэлэрэ: Алааскын ааттат, дойдугун туругурт! (Где родился, там и пригодился) Бу тылбааһы социология билимин дуоктара, психолог, педагог Ульяна Алексеевна Винокурова көрдөһүүтүнэн Саха Өрөспүүбүлүкэтин, Арассыыйа, Норуоттар икки ардыларынааҕы сообществоларын суруйааччыларын сойуустарын чилиэнэ Наталья Владимировна Михалева - Сайа оҥорбутун сэргии истибиппит.

Түмүгү этии долгутуулаах түгэнэ буолбутугар, бары чуумпурбуппут. Биһиги оскуолабыт уолаттара үһүс миэстэҕэ тахсыбыттарыттан, саатар иккис буолбатыбыт диэн хомойбуттара да буоллар, наһаа биллэрбэтэхтэрэ. Салайааччыбыт Туйара Александровна Николаев-Киин библиотекатыгар кинигэлэрин бэлэхтээбитэ.

Тэрээһин туһунан Солоҕоммут уолаттара уонна учууталбыт маннык кэпсээтилэр:
Валентин Петрович Стручков: Урут мөккүөргэ даҕаны, Дебакка даҕаны кытта илик да буолларбыт, учууталбыт Туйара Александровна кыттыахха диэбитигэр, икки күн күүскэ бэлэмнэммиппит. Оскуолабытыгар сэттис кылааска икки эрэ, ахсыс кылааска үс эрэ уол баар буолан, кимиэхэ даҕаны найылыыр да кыах суох этэ. Дьиҥэ, бэлэмнэнэрбэр быыс булар уустук буолбута: бу күннэргэ хос эһэм Семен Григорьевич Алексеев - Уустарабыс “Дэбириэлдьин Бэргэн” олоҥхотун нэһилиэк олохтоохторугар көрдөрөөрү бэлэмнэнэ сылдьабыт. Мин Көтөр Көччөх оруолун толоруохтаахпын. Мөккүөр тутулун өйдөөн, бигэргэтиигэ даҕаны, утарыыга даҕаны кейс оҥостон, үчүгэйдик кыттарга эрэллээх тиийбиппит. Оонньуу саҕаламмыта. Мин маҥнайгы спикер буоламмын, оскуолабытын, уолаттарбын билиһиннэрбитим, туттуллар тыллары (дефинициялары), мөккүөр тиэмэтин тоҕооһун (актуальноһын) быһаарбытым, кэпсиир тутулбутун, былааны эппитим. Салгыы аргуменнарбын эппитим. Ол курдук оонньуу былаан быһыытынан саҕаламмыта, утарылаһааччыларбыт Павловскай орто оскуолатын уолаттара нууччалыы тыллары кыбытан саҥараллар эбит, тэҥнииллэрэ үчүгэй этэ. Аргуменнарын барытын Интернеттэн ылбыттар дии санаабытым, дьиҥэ, балаһыанньаҕа туттуллуохтаах литэрэтиирэ ыйыллыбыт этэ. Түмүккэ үһүс миэстэ буолбуппутуттан, Павловскайдар иккистээбиттэриттэн соһуйбуппут, ол да буоллар тэрийээччилэргэ махталбытын эппиппит.