أغلب الناس مستمعين سيئين، وبالنتيجة أغلب الناس بحاجة (لاشعورية) لمن يسمعهم ويفهم قصدهم ونظرتهم للأُمور والعالم حتى وإنْ لم يتفق وياهم. بمجرد أنْ تفترض بينك وبين نفسك أنّه الآخر عنده شي مهم أو مثير للاهتمام حتى يكوله وتبذل الجهد الكافي للإستماع ومحاولة الفهم بشكل صادق، هالشي يخليك مستمع جيد ويخلي الناس ترغب بالكلام وياك والفضفضة الك، وبالنهاية بالإستماع لكلامك.

هواي حوارات إذا تنتبهلها رح تشوفها عبارة عن مباراة ملاكمة لغوية، كل طرف يحاول يثبت وجهة نظره (وإنْ كانت صحيحة) ويجذب الإنتباه لنفسه بدون محاولة فهم وجهة نظر الآخر. هواي حوارات إذا تنتبهلها هي عبارة عن شخصين كل واحد منهم يسمع صداه. هي مو حوارات بقدر ما هي مرايا صوتية يسمع بيها الشخص نفسه وما يهتم بشكل جدي أنّه يسمع المقابل إلا في سياق دحضه وتفنيده. هدفها ليس "إستكشاف الآخر" بل "التصريح بالأنا."

بالطب لما تحاول تاخذ تاريخ طبي history من المريض رح تشوفه يحجي عن أشياء هي غير ذات صلة طبيًا ولا مهمة بالنسبة إلك بصفتك طبيب، لكنها مهمة جدًا بالنسبة للمريض. لما يسولفلك عن شلون تعارك وية أُم زوجته، هالحدث أساسي بالنسبة لحياته الشخصية ومنظوره الذاتي وإن كان غير مهم طبيًا.

اليوم سولفت وية مريض عاف شكو شغلة ذات صلة طبيًا وكعد يسولفلي نص ساعة عن سد الطبقة بسوريا وشلون ديلوث مي الفرات اللي همّ يشربوه. وكعد يسولفلي عن إزعاج المستشفيات الحكومية وشلون هو ميكدر يروح للأهليات لأن ما عنده فلوس وعن عدم تفاهم الأطباء وهالسوالف. هن غير مهمات بالنسبة إلي، لكن بالنهاية هنّ الأُمور اللي شاغلة باله وزاعجة تفكيره. جزء مو صغير من التعامل الطبي يتعلق بفهم أعراض المريض وحياته ومحاولة إفهامه مرضه ومساعدته لصنع معنى وقصة وسياق لمرضه ومشكلته ضمن المعنى والقصة والسياق الأكبر لحياته. لأن المرض—وإن كان بيولوجي—لكنه يؤذي كل جوانب الحياة الشخصية للمريض.

.

إنّ لنا لسانًا واحدًا وأُذنين، فلنتعلم أنْ نُنصت أكثر مما نتكلم.

— زينو، فيلسوف يوناني من المدرسة الرواقية

آية عامر صارت مجمع حوار أديان متنقل، لأن بهذا الپوست دمجت العقائد الوثنية مال البوذيين والهندوس مع الإسلام.

الكارما هذه أني شرحتها بالماضي وهي ركن أساسي من دين وثني.
https://t.me/chosenibrahim/5442

هو اللي يصدك بسوالف آية عامر لو الطاقة والأبراج ما يفيد تكعد تقنعه مثل الاوادم... هيج اشخاص تغسل ايدك منهم ببساطة، لأن إذا هو نفسه ما شغل عقله وعرف أنّ هالسوالف خريط، تريد انت تشغلله إياه؟ هي مو مولدة وتضربها هندر

هالشي يخليك تدرك حدود الإقناع والجدال، الجدال ما يتم إلا وية شخص تتشارك وياه نفس الأرضية الفكرية. إذا الشخص أرضيته الفكرية ربها كامز، لو يجي ربك ما تقنعه... وإن قنعته بفكرة صحيحة فإنت مجرد إستبدلت فكرة بأُخرى، لكن طريقة التفكير الطايح حظها رح تبقى نفسها، ورح يلوث بطريقة تفكيره حتى هالفكرة الصحيحة.

لذلك ببعض الأحيان الأفضل أنْ تبتعد عن النقاش ومحاولة دحض الفكرة الخاطئة أصلًا.

شغلة أخيرة:
هاي الـ syncretism أو التوفيق بين المعتقدات طاشة آخر فترة يمكن بسبب الإنفتاح الفكري للعالم كله على العالم كله... لهذا تلكة الواحد بس يقرة شوية رح يتوصل لنتيجة هي صحيحة نظريًا لكنها طايح حظها عمليًا: كل النظم الفكرية بيها شيء من الصحة

وهنا يبدي الخريط وتلكة آية عامر دامجة الكارما الهندوسية وية الأدعية الإسلامية

Bot:
آيه عامر تدري بروحها تضحك على الاوادم؟

شوكت الواحد يسأل هالسؤال: لما يشوف شخص دينشر أفكار غبية للنعال وبقناعة كلش جبيرة... هالشي يخليك تصفن وتكول: هو معقولة أكو ناس بهالدرجة من الغباء؟

قابل بس علي الوردي يكتب "دراسة في طبيعة المجتمع العراقي"؟
رح اكتب كتاب اسميه "دراسة في تمسلت آية عامر"

Bot:
الناس اللي تضحك عليهن آية عامر يستاهلون للأسف

يابة بالضبط
إذا الواحد ميشغل عقله اللي الله انطاه اياه، تريد اني اشغله؟ لهذا "مبادرات التوعية" وهالسوالف اشوفها غير نافعة بكل أشكالها (أو عالأقل ليست بالمنفعة التي تدّعيها)

بالعودة لهذا الموضوع
لهذا تلكة المذهب السائد حاليًا هو شي أشبه بالصوفية (من ناحية العقيدة وليس التطبيق) اللي تكلك "الطرق إلى الله بعدد نفوس الخلائق." تلكاه يمزج "الإنسانية" اللي هي فكرة غربية بحتة وية التشيع ووية التسنن ووية رشة ديمقراطية وعلمانية كلهن سوة. فجأة يطلعلك واحد سني يوصف عمر بن الخطاب (رض) على أنه "حاكم ديمقراطي وإنساني." أو بوست شيعي يوصف الإمام علي (ع) بنفس الوصف. هسة ربما الوصف ينطبق عليهم صحيح، لكن فكرة أنك تستخدم تبريرات غربية لتفسير تراث شرقي، بوية انت هنا كاعد ترتكب مجزرة فكرية. الأصل باتباع علي (ع) بالتراث الشيعي هو لأنه إمام منصوص عليه في الكتاب والسنة، مثلما الأصل باتباع عمر بالتراث السني هو أنه خليفة تم اختياره وفق الشورى وإجماع المسلمين، محد اتبعهم "بالأصل" لأنهم جانوا يطبقون مبادئ الإنسانية والديمقراطية. هذا تبرير حديث لقضية تاريخية قديمة.

مثلما ابن عربي قبل 800 سنة جان يكول أنّ حتى المشرك يعبد صفة من صفات الله، هسة تلكة واحدهم يكلك: اذا هو ما مسوي شي مو زين بحياته، هم يدخل للجنة حتى لو هندوسي. الصوفية قبل جانت هي المذهب الشائع عند الداخلين الجدد للإسلام، مثل الترك وغيرهم بشرق آسيا وغرب أفريقيا، ببساطة لأنها توفر القدرة على خبط المعتقدات الإسلامية وية العقائد القديمة قبل-الإسلامية لهاي الشعوب. هسة تشوف الشي نفسه: الفرد يؤمن وإن كان لاشعوريًا بالمبادئ الغربية لحقوق الإنسان والديمقراطية، وبنفس الوقت يؤمن بالعقائد الإسلامية اللي ورثها عن آباءه، لهذا أما أنْ يتبع أحدهما وينبذ الآخر، أو ينكلب صوفي (لاشعوريًا) ويوفّق بين الغرب والشرق.