وجهة نظر بس مو بسبب الشرب... بسبب النوم

أغلب المذكور سوالف طبيعي أن تواجهها دولة ناشئة من بعد 400 عام من الخرب العثماني، والحكومات الملكية جانت بطريقها بمعالجة أغلب هالملفات بالأخص بآخر سنين ونجحت بهواي منهن، الاحصائيات وشغل مجلس الاعمار وآثاره لليوم يناقض سالفة " كم مدرسة "، جزء من الاشياء المذكورة مو إنصاف نحاسب العهد الملكي عليها.. شلون نحاسبهم على تمردات؟ وليش نعتبر معالجتهم الها " إبادات "؟ مجازر كركوك والموصل قامت بيها مليشيات اللجان الشعبية النشأت بعد إنقلاب تموز وصارت الاحداث 1959 شعليه العهد الملكي؟
مجلس الأعيان طبيعي تحكمه عشائر، الناس المّن تصوت هذاك الوكت؟

الإرتباط ببريطانيا تفكك آخر سنين نسبياً، وهذا يفسر عدم دفاعها عن الحكم مثل بكل انقلاب

السلبيات موجودة وهواي.. بس مو المذكور هنا

رفع السلاح ضد الدولة وجيشها بحجة المطالبة بالإنفصال إله تبعاته بكل زمن وظروف، بالأخص بدولة صارلها سنين تريد تلّم شتاتها وتخلق هوية وطنية موحدة وتفرض سلطتها وتحتكر العنف، هيج صراعات موجودة بكل زمن بعمر الدولة العراقية وآخرها أحداث كركوك 2017

واذا ناخذ التمرد الكردي إنموذجاً؛ ما ننسى انو عبد الكريم قاسم دز على ملا مصطفى برزاني النفته الحكومة الملكية بسبب خطره، من باب التسامح والحب والتعايش، وانطاه حكم ذاتي سنين.. تاليها ملا مصطفى وربعه طمعوا بالانفصال من جديد ورفعوا سلاح ضد الدولة بحرب استنزاف جانت نتيجتها آلاف الضحايا من الجيش العراقي ومجازر اضافية، معارك الجبال الكل يعرفها..

محد جاب طاري قاسم، وما اعتقد تلگه هنا احد يدافعله عن أخطائه ويجملها بحجة عصر قديم مثل الملكيين، الطرفين عدهم ايجابيات وسلبيات ماكو داعي للصبغ والتجميل لطرف

المجزرة ضمن صراعات فتحت الدولة عيونها عليها من تركة بريطانيا، آني ذكرت " رفع السلاح ضد الدولة إله تبعاته بكل زمن وظروف "
هذا مو تبرير، بس القصد أنو لو جانت دولة بوضع طبيعي جان إحتمال صارت مجزرة هم، إنوب دولة صارلها خمس سنين؟ جان صراع بين أهالي قرى مسلحين والجيش وبالأخير اخذ هيج منحى، ويبقى خطأ وما يتبرر بس لازم نقره ظروفه

والأخطاء هواي، مثل تعامل الحكومة وية المحتجين وقتلهم على الجسور برفض معاهدة بروتسموث، ورغم إستقالة الحكومة ومحاسبة القتلة والاستجابة للمطالب يبقى خطأ ما يغتفر

ذكري إله للإستدلال إن التمردات بوكتها مجانت سهلة وممكن التعامل وياها دبلوماسياً، ولما الدولة تتخذ قرار بأستعمال العنف للدفاع عن نفسها تصير هواي أشياء خطأ، بالاخص بظروف دولة ناشئة

نهاية كل نقاش حول تاريخ العراق:

هو حتى ابو الحسنين من حكمه كتلوه

بس فؤاد معصوم كدر يحكمنا صح عمي

بسنة 1914 المنطقة اللي نسميها العراق جانت بعدها عايشة بظروف وعقلية القرن ال17 نتيجة لسياسات -أو انعدام سياسات- الإمبراطورية العثمانية المدمرة للمنطقة.
لما البريطانيين احتلّوا العراق سنة 1914، اللي شافوه جان مشهد حي لقصص ألف ليلة وليلة والمستشرقين؛ منطقة توقّف بيها الوقت بالقرون الوسطىٰ. البريطانيين أخذوا على عاتقهم مسؤولية "زيادة تحضّر" العراق (civilising/westernising Iraq) ونقله للقرن ال20 بطفرة غير محسوبة العواقب حتى يسهل لهم استعماره. بالنتيجة قرروا أنّ نظام الحكم بالعراق ملكي دستوري، وهو نظام حُكم غير مُستَمد ولا توجد له سابقة في تاريخ العراق، لكنه مُستَنسخ من النظام البريطاني. وبالنتيجة صارت عدنا طبقتين. طبقة حاكِمة تمثل الملك وحاشيته، متحضّرة ومثقفة إلى حد ما، طبقة هي إبنة زمنها (النصف الأول من القرن ال20).
وطبقة ثانية هي غالبية الشعب اللي بعده عايش بنفس القيم وطرق العيش اللي جان يعيشها بظل الدولة العثمانية، شعب يسيطر عليه ويخنقه نفس شيخ العشيرة ورجل الدين والإقطاعي اللي جانوا يخنقوه ويحكمون قبضتهم عليه بزمن العثمانيين. المجتمع العراقي جان ممسوخ وعايش حالة إنفصام بحيث تشوف الملك ببغداد يزور بريطانيا بشكل متكرر ويعرف انكليزي وعمومًا عايش حياة شبيهة بحياة مواطن بريطاني عادي بأول نصف من القرن ال20... بالمقابل تشوف المواطن العراقي العادي (ال average) بعده بنفس الظروف اللي عاشها بظل العثمانيين؛ يستخدم الرحىٰ حتى يطحن الحبوب وإذا إبنه صار معلم ابتدائية يحسه ماخذ دكتوراه من هارفارد... ولسان حاله هو: إن شرّقت وإن غرّبت... خوجه علي، ملا علي.

لهذا الناس بوقتها جانوا يحبون عبد الكريم قاسم، مو بسبب سياساته أو انجازاته أو نظرته للاقتصاد... ببساطة لأنه جان ابن الشعب ويعرف ظروفه، ولهذا اعتبروه مُخلص الهم وبعضهم أُعجبوا بيه حد التقديس. وبنفس الوقت خلّص الشعب (الطبقة الفقيرة) ممّا اعتبروه تسلط الطبقة الحاكمة اللي ما جانت شعبيتها جبيرة اصلًا.

اللي يجهله المطبّلين لعبد الكريم قاسم، والباكين على أمجاد الملوك الهاشميين هو أنّ لا الملكية ولا الجمهورية جانت رح تكدر تحل مشاكل العراق بجذورها الضاربة بقرون طويلة من تاريخه. الحل لمشكلة العراق الأزلية ما يتحقق بيوم وليلة، ولا حتى ب50 سنة. والمسألة أكبر من أن نحلها بالعلمانية، أو بتغيير نظام الحكم، أو التخلص من النفوذ الخارجي بالبلد... هاي كلها أعراض لمرض أكبر. والعلاج أكيد مو شريط براسيتول تخلصه بيومين... هو عبارة عن أشهر طويلة من العلاج الطبيعي والمؤلم.

ما نحتاج نستورد إيديولوجيات وشعارات... نحتاج تخطيط بعيد المدى

.

ملاحظة أخيرة:

بالأحداث التاريخية الممتدة على فترة زمنية طويلة مثل تاريخ الجمهورية العراقية الممتد على قرن من الزمن، غالبًا رح تلكى أصل المشكلة بفترة زمنية أقدم (مثل زمن العثمانيين) لهذا من غير المنطقي ولا المفيد أن نلتهي بالأعراض مثل الملكية وانقلاب 14 تموز، وننسى المسبب الأساسي للمرض اللي هو القرون المظلمة اللي عاشها العراق في ظل الدولة العثمانية العَلية.

شباب هاي ليش ناكحين أم التاريخ من وراية ؟

ال irony انه اغلب هاي المشاكل حلهة عبد الكريم ب5 سنين

3 وشوية*

الرجال اصلًا بالكاد وصل لل4 سنوات