Love draws one out of oneself, prompting one to find joy in sharing the beloved’s world with the beloved. As one continues to learn to see the world through the beloved’s eyes, one acquires new modes of insight.

— Phenomenology, by Chad Engelland

.

.

ذكر الفيروزبادي موانع العلم في تفسيره فقال:

"ومنها الوثوق بالذكاء، وأنّه سيحصّل الكثير من العلم في القليل من الزمان متى شاء، فتحرمه الشواغل والموانع، وكثير من الأذكياء فاتهم العلم بهذا السبب"

بصائر ذوي التمييز [١ / ٥٣ ]

يكلك الذكاء يسهّل عليك اكتساب المعرفة والمهارات المختلفة ويخلي عملية التعلم أسرع؛ اللي تتعلمه باسبوع، شخص أذكى منك رح يتعلمه بـ 5 أيام.
بالمقابل، حتى توصل لمستوى عالي بأي مهارة أو حقل معرفي، فالأمر يتطلب ما هو أكثر بهواي من الذكاء: يتطلب القدرة على بذل الكثير من الجهد وبشكل مستمر نسبيًا. باختصار، القدرة على تحمّل العمل الشاق سواءً كان عقلي أو جسدي.

لهذا مثلًا بالشطرنج، تشوف عدد ساعات التدريب ونوعه يتناسبن طرديًا وية مستوى اللاعب، بدرجة أكبر من ذكاءه. تأثير الذكاء يكون أكبر باللاعبين الصغار، لأن ذكاءهم يساعدهم يتعلمون أساسيات اللعبة أسرع من أقرانهم وبالنتيجة يكونون أعلى منهم. بس كلما يتقدمون بالعمر، كلما أقرانهم يلحكوهم وتأثير التدريب يزيد والذكاء يقل.
For more info about this, you can check "Peak, by Anders Ericsson"

.

Research has also shown that skilled adult chess players—even grandmasters— do not have systematically higher IQs than other adults with similar levels of education. Nor is there any correlation between the IQs of highly skilled chess players and their chess ratings.

— Peak, by Anders Ericsson

كل فترة يطلع خبر عن طفل ذكاءه 200 ودخل لهارفارد لو كامبردج بعمر الـ 12 وديشتغل على نظرية جديدة بالرياضيات لو الفيزياء لو البيولوجيا... وأغلبهم (إذا مو كلهم) ورة فترة يختفون تمامًا من الأخبار وإنجازاتهم الموعودة ولا وحدة منهن تتحقق، فَلا خَبَرٌ جاءَ ولا وحيٌ نزل...
وغالبًا انت جنت تعرف طفل (أو انت الطفل نفسه) بسنوات دراستك جان الكل يكول عليه ذكي ودرجاته كلها عشرات، وبعدين ميّات، ويجوز سوة تسريع أو راح لمدرسة متميزين أو شي من هالسوالف وكلها تكله "ان شاء الله تصير احسن دكتور"... وراها بسنين تلكاه هو نفسه الطالب الجامعي العراقي اللي بالميم...

أكو كتاب¹ قريته قبل فترة، الكاتب يسولف عن هالظاهرة بأميركا ويسميها the cult of head start اللي تصير لما الأهل يكونون مهووسين بـ "تدريب" طفلهم وإعطاءه دَفعة يسبق بيها أقرانه سواءً بالدراسة أو الرياضة أو الهوايات المختلفة. مثلًا يعلموهم عالبيانو من عمر 3 سنوات، أو يعلموهم القراية والكتابة بعمر 4 سنوات، وما إلى ذلك... وبالنهاية الأطفال ورة ما جانوا متفوقين بطفولتهم ويجوز بمراهقتهم، أغلبهم يكبرون ويصيرون أفراد "عاديين."
الكاتب يكلك أنّ ذولة الناس بدل ما يعلمون الأطفال طرق مختلفة للتفكير والتعامل مع العالَم والآخرين، همة ديعلموهم مهارات فردية، يكدر يتعلمها أي أحد عمومًا، وفائدتها قد لا تتعدى الإختصاص اللي هالمهارة تنتمي الة. المسألة أشبه بأن تتعلم تفشر بالانكليزي بس انت ما تعرف انكليزي؛ انت عندك مهارة الفشار باللغة هاي، بس ما تكدر تفكر وتسولف وتفتهم اللغة أصلًا.

بالنتيجة، هيج أطفال رغم أنهم بدأوا قبل أقرانهم، ومثلًا تعلموا المشي بعمر الـ 10 أشهر والقراءة بعمر السنتين، بس بالنهاية أقرانهم رح يلحكوهم والفارق يتقلص لحدما ينعدم أو يكاد. وفوكاها همة ما تربّوا تربية تنمي بيهم الإبداع أو حل المشاكل أو حب المعرفة، همة تربّوا تربية تجعلهم يحسون أنفسهم بمنافسة مع الباقين على أشياء أحيانًا ما لازم تكون بيها منافسة. لهذا هيج أطفال أغلبهم تشوف حياتهم بيها نمط مشترك يتمثل بتفوّقهم بسنين الطفولة وربما المراهقة، ومن ثم انحدارهم بالسنوات اللاحقة.

¹Range: Why Generalists Triumph in a Specialized World, by David Epstein

أتذكر مرحلة أُولى كلية جانت سهلة علية لأن أعرف انكليزي وكم معلومة بالبيولوجيا، بينما أغلب اللي وياي جانوا يعانون بسبب الانكليزي خاصةً

من وصلنا مرحلة خامسة، كلها تعرف انكليزي، وكلها صارلها 4 سنوات تدرس طب وسوالف بيولوجيا فالفارق مو بس تقلص، بدة ينعكس هم لأن جنت ما اقرة بينما زملائي يقرون (تعودت أعتمد عالمعلومات العندي وأنجح، بينما همة تعودوا يقرون ويلمّون معلومات جديدة حتى ينجحون)

وصلنا للسادسة واكتشفت هي مراجعة للرابعة والخامسة، فرجعت قريتهن كلهن واني الممنون

.

بورخيس عنده قصة قصيرة هي مكتبة بابل، يسولف بيها عن عالَم هو عبارة عن: «مكتبةٌ مِن غرفٍ لا تنتهي، كل غرفةٍ تغصُّ جدرانُها بالرفوفِ حتى السقف إلّا بابًا صغيرًا يَدخلُ منه المرء ويَخرج. يُروى أنّ في كُتُبِها كلُّ ترتيبٍ مُحتَمَلٍ لحروفِ الأبجدية؛ كلُّ نَصٍ ومؤلَّفٍ ورسالةٍ وحرفٍ كُتِب أو سيُكتَب أو يمكن أنْ يُكتَب موجودٌ بين كُتُبِها. تخيل الأمر: في المكتبةِ كلُّ ما تُريد معرفتَه أو لا تُريد. كلُّ سؤالٍ خَطَر لكَ أو لَمْ يَخطُر، كلُّ حدثٍ لَمْ تَعرِف حقيقتَه بَل حدوثَه أصلًا... كلُّها مُسَطَّرةٌ فوقَ تلك الرفوف تنتظر مَن يَجِدُها. لكن في المكتبةِ ما يُثيرُ الرعب: لأنّها تضمُّ كلَّ ترتيبٍ مُحتَمَلٍ للأبجدية، فهذا يعني أنّك إنْ أردتَ معرفةَ حدثٍ تاريخيٍ مثلًا، قد تجدُ كتابًا واحدًا يَصِفُ ما حدث، وآلافًا غيرَه تَرويه كذبًا وتَختَلِقُ تفاصيلَه. والأسوأ أنّك لَن تَعرِفَ بأيِّ كتابٍ تَثِق.»