Milliy sertifikat imtihonlariga joylar cheklab qo‘yildi

2026-yil sentabr–dekabr oylarida milliy sertifikat imtihonlari uchun jami 496 303 ta o‘rin ajratildi.

Oylar kesimida:
— sentabr — 125 753 ta;
— oktabr — 129 535 ta;
— noyabr — 112 335 ta;
— dekabr — 128 680 ta.

Shuningdek, imtihonlar soni ham oshiriladi. Bu davrda 15 ta imtihon o‘tkazilishi rejalashtirilgan. O‘tgan yilning shu davrida esa 11 ta imtihon o‘tkazilgan.

Agentlikka ko‘ra, o‘rinlarning cheklanishi infratuzilmaga tushadigan yuklamani kamaytirish hamda imtihon natijalarini o‘z vaqtida e’lon qilishni ta’minlash bilan bog‘liq.

Telegram I Facebook I YouTube I Instagram

«Erkini anglagan elni hech kim oyoqosti qilolmaydi» — Abdurahmon Tashanov

«Ezgulik» inson huquqlari jamiyati raisi Abdurahmon Tashanov Telegram-kanalida Harbiy prokuratura, sobiq prokuror Xolboyev va tergovchi Muhitdinovlarga qarshi sud jarayoni yakunlanganini ma'lum qildi.

Mirobod sudi uning da'vosini qisman qanoatlantirib, Harbiy prokuraturadan Tashanov foydasiga 5 mln so'm ma'naviy va 10 mln so'm moddiy zarar undirish qarorini chiqardi. Bunga bahorda huquq himoyachisining nohaq ayblanib, jinoyat sudida oqlangani sabab bo'lgan.

«Harbiy prokuratura meni internetda yolg'on xabar tarqatishda ayblab, nohaq javobgarlikka tortgandi. Menga ma'naviy zarar qiymatidan ko'ra adolat qaror topishi muhimroq. Kim bo'lishidan qat'i nazar qonun va Konstitutsiyaga amal qilishi zarur»,

— deydi u.

Huquq himoyachisi asosiy vazifa jamiyatda qonun ustuvorligi va adolat tantanasiga bo'lgan ishonchni mustahkamlash ekanini ta'kidlagan.

Telegram I Facebook I YouTube I Instagram

«Yarim litr suv 3 ming so‘m, ming litri esa 3,5 ming so‘m»: hokim suvning qadriga yetishga chaqirdi

Qashqadaryo viloyati hokimi Murodjon Azimov bugun Muborak tumanidagi o‘rganishlar davomida fuqarolar bilan uchrashdi. Uchrashuvda ichimlik suvidan foydalanish uchun to‘lovlarni o‘z vaqtida amalga oshirish masalasiga ham e’tibor qaratildi.

«Yarim litr suv uch ming so‘m turadi. Davlat esa ming litr suv uchun uch yarim ming so‘m olyapti. Suvning qadriga yetishimiz kerak», — dedi Murodjon Azimov.

Telegram I Facebook I YouTube I Instagram

O‘zbekiston Respublikasi Мudofaa vaziriga yangi o‘rinbosarlar tayinlandi

Adliya polkovnigi Muratov Jahongir Dilshatovich mudofaa vazirining komplayens va korrupsiyaga qarshi ichki nazorat bo‘yicha o‘rinbosari lavozimiga tayinlandi.

Shuningdek, Zoidov Qahramonjon Obidjonovich mudofaa vazirining qurollanish va qurollantirish bo‘yicha o‘rinbosari etib tayinlandi.

Telegram I Facebook I YouTube I Instagram

Toshkent havosi yana yomonlashishi mumkin

Bugun kechqurun Toshkentning aksariyat hududlarida havo sifati yomonlashishi mumkin.
Ma’lum qilinishicha, soat 22:00 dan 01:00 gacha havo sifati AQI standarti bo‘yicha «sezgir guruhlar uchun nosog‘lom» darajaga yetishi ehtimoli bor.

Ekologiya qo‘mitasi kechki vaqtlarda ochiq havoda uzoq vaqt bo‘lmaslikni tavsiya qildi. Ayniqsa, havo sifatiga sezgir fuqarolarga ehtiyot choralariga amal qilish tavsiya etilmoqda.

Telegram I Facebook I YouTube I Instagram

Namangandagi dahshat: 5 yoshli qizchani kim zo‘rladi?

Hammadan ham ko‘proq himoya qilinishi kerak bo‘lgan bog‘cha devorlari ichida inson qiyofasidagi vaxshiy munosabat fosh bo‘ldi. Uchqo‘rg‘on tumanidagi davlat bog‘chasining ombor mudiri 5 yashar tarbiyalanuvchi qizchani jinsiy zo‘rlagani aniqlandi.

Telegram I Facebook I YouTube I Instagram

Buxoro sog‘liqni saqlash boshqarmasiga yangi matbuot kotibi tayinlandi

Behzod Tursunovich Adizov Buxoro viloyati sog‘liqni saqlash boshqarmasi boshlig‘ining axborot siyosati bo‘yicha maslahatchisi — matbuot kotibi etib tayinlandi.

Tayinlovga qadar u Abu Ali ibn Sino nomidagi Buxoro davlat tibbiyot institutida axborot siyosati bo‘yicha mas’ul lavozimda faoliyat yuritgan.

Yangi lavozimida u boshqarmaning axborot siyosati va media faoliyatini muvofiqlashtirish, OAV bilan hamkorlikni kuchaytirish hamda jamoatchilik bilan ochiq muloqotni ta’minlash bilan shug‘ullanadi.

Telegram I Facebook I YouTube I Instagram

Oltinsoydagi kutubxonachi ishi bo‘yicha rasmiy munosabat berildi. Ammo, ayrim savollar hanuz javobsiz

Avvalroq EFFECT.UZ Oltinsoy tumanidagi 60-maktabda kutubxona mudiri bo‘lib ishlayotgan, tarix yo‘nalishida ikkinchi mutaxassislik bo‘yicha 4-kursda tahsil olayotgan Alimardonov Nozimbekning murojaatini yoritgan edik.

Murojaatchi o‘z mahallasidagi maktabda tarix fanidan 5 soat dars berishni istayotgani, biroq unga bu imkoniyat berilmayotganini bildirgan.

Shundan so‘ng ijtimoiy tarmoqlarda maktab rahbariyati va boshqa mutasaddilar ishtirokidagi suhbatlar “rasmiy munosabat” sifatida e’lon qilindi.

Telegram I Facebook I YouTube I Instagram

Mudofaa sanoati qo‘mitasiga yangi rais tayinlandi

Akmal Ro‘ziqulovich Jumanazarov Vazirlar Mahkamasi huzuridagi Mudofaa sanoati qo‘mitasi raisi etib tayinlandi.

Shu munosabat bilan u Texnik jihatdan tartibga solish agentligi direktori lavozimidan ozod etildi.

Telegram I Facebook I YouTube I Instagram

Toshkentdagi kafelardan birida yong‘in chiqdi

Kechadan bugunga o‘tar kechasi soat 23:23 da Chilonzor tumanida joylashgan kafelardan birida yong‘in sodir bo‘lgani haqida xabar kelib tushgan.

Yong‘in soat 00:10 da to‘liq o‘chirilgan. Hodisa oqibatida tan jarohati olganlar yo‘q. Hozirda yong‘inning kelib chiqish sababi hamda moddiy zarar miqdori aniqlanmoqda.

Telegram I Facebook I YouTube I Instagram

Xorazm viloyati IIB va yangi tayinlangan rahbar — podpolkovnik O.A.Kaimxodjayev diqqatiga!

Fuqarolarning kuyib qolgan millionlari va Xiva shahar IIBning “passiv” kuzatuvi: Bu tizimli beparvolik faqat Xorazmdami?!

Alamli va oʻrinli savol: Fuqarolarimizning murojaatlariga shu qadar eʼtiborsiz va yuzaki munosabatda boʻlish faqat Xorazm viloyati IIB quyi tizimlariga xosmi yoki butun tizimdagi surunkali kasallikmi?!

Fuqaro Ilxamova Surayyo oʻzining tanishi G.B.ning shirin vaʼdalari va aldovlariga ishonib, uy-joy qurib berishi uchun naqd 190 million soʻm pulini qoʻliga tutqazgan. Farzandlari rizqini qiyib yiqqan bu mablagʻ evaziga G.B. Qoʻshkoʻpir tumanida joylashgan oʻziga tegishli yer uchastkasida tayyor uy qurib topshirishni vaʼda qilgan.

Firibgarlikning “zamonaviy” usuli! G.B. vaqti-vaqti bilan S.Ilxamovaga internetdan koʻchirib olingan, qurilishi tugallanmagan uylarning suratlarini yuborib, “mana, sening uying qurilyapti, oz qoldi” deb aldab kelgan. Vaqt oʻtib maʼlum boʻlishicha, aslida hech qanday uy ham, qurilish ham mavjud emas! Suratlar esa shunchaki tarmoqdan oʻgʻrilangan “dekoratsiya” boʻlib chiqdi. Ammo pullarini oldirib qoʻygan fuqaroning haqiqiy sarsongarchiligi shundan keyin boshlandi.

Mana, 2026-yilning mart oyidan buyon (yarim yildan ortiq vaqt davomida) mazkur holat boʻyicha Xiva shahar IIBga murojaat qilib kelinmoqda. Biroq Xiva shahar IIB profilaktika inspektorlari va masʼullari ushbu aniq firibgarlik holatida “jinoyat alomatlari mavjud emas” degan vaj bilan, JPKning 83-moddasi 2-bandi asosida jinoyat ishi qoʻzgʻatishni muntazam ravishda rad qilib kelmoqda.

Eng qizigʻi, nazorat organi boʻlgan Prokuratura bir necha marotaba IIBning bu asossiz qarorlarini bekor qilib berdi. Ammo Xiva shahar IIB goʻyoki oʻz aybini tan olgisi kelmay, yana va yana oʻsha eski, koʻchirib bosilgan “jinoyat ishini qoʻzgʻatishni rad etish” haqidagi qarorlarni qabul qilishda davom etmoqda. Bu fuqaroning huquqlarini ochiqchasiga kamsitish va jinoyatchini himoya qilish emasmi?!

Yangi tayinlangan viloyat IIB rahbari, podpolkovnik Kaimxodjayev Oybek Abdukarimovichdan ushbu adolatsizlikka chek qoʻyishini soʻraymiz. Mana shunday aniq firibgarlik va jinoyat alomatlari yaqqol koʻrinib turgan materiallarni profilaktika inspektorlarining OLIB, tergov boʻlinmalariga topshirish boʻyicha qatʼiy topshiriq berishini kutib qolamiz.

Xorazm viloyati IIB rahbariyatidan ushbu vaziyat boʻyicha adolatli va qonuniy RASMIY MUNOSABAT kutamiz! Fuqaroning huquqlari tizim ichidagi sansalorlik qurboni boʻlmasligi kerak!

Shavkat Mirziyoyev bugun Andijonga boradi

Prezident Shavkat Mirziyoyev Andijon viloyatiga ikki kunlik tashrif bilan boradi.

Safar dasturidan hududning sanoat va investitsiya salohiyati, energetika, qishloq xo‘jaligi, transport, turizm hamda boshqa sohalardagi loyihalar bilan tanishish o‘rin olgan.

Davlatimiz rahbari mahallalardagi bunyodkorlik ishlarini ham ko‘zdan kechiradi. Tashrif davomida qator yangi quvvatlarni ishga tushirish va istiqbolli loyihalar qurilishini boshlash ko‘zda tutilgan.

Shuningdek, Andijon viloyatini yanada rivojlantirishning ustuvor yo‘nalishlariga bag‘ishlangan yig‘ilish o‘tkaziladi.

Telegram I Facebook I YouTube I Instagram