Прокурор Муродхон Аҳмедовнинг ОАВга муносабати – биринчиси эмас

Айни пайтда жамоатчиликнинг кескин танқидларига сабаб бўлаётган воқеа – Хоразм вилояти прокурори Муродхон Аҳмедов билан боғлиқ биринчи баҳсли ҳолат эмас. Аввалроқ у Effect.uz таҳририяти раҳбари Акмал Эшонхонов билан ҳам тадбиркорнинг мурожаатини кўриб чиқиш жараёнида тортишиб қолган.

Ўшанда Аҳмедов Эшонхоновга қарата «Оғайни, сиз бунга адвокатмисиз?» мазмунида савол берган. Эшонхонов эса қонунлар ҳамма учун бир хил ишлаши кераклигини таъкидлаб, баҳсдан кўра, қонуний кучга кирган суд қарорининг ижросини таъминлаш муҳимлигини билдирган.

Қизиғи, ушбу суҳбат акс этган видеолавҳа эълон қилингач, тадбиркорнинг масаласи тез орада ҳал этилган. Бироқ шундан сўнг материални ўчириш бўйича «норасмий илтимос» билдирилгани айтилган. Бу илтимос қабул қилинмаган.

Албатта, прокурорнинг фуқароларни қабул қилиши, уларнинг мурожаатларини эшитиб, қонуний ечим топишга кўмаклашиши — унинг бевосита хизмат вазифаси. Муродхон Аҳмедов ҳам шахсий қабулларда фуқароларнинг муаммоларини ҳал этишга ёрдам бераётган бўлиши мумкин.

Аммо савол бошқача:

Прокурорнинг очиқ қабул жараёнларини ОАВ ёритишидан ким зарар кўради?

Ахир биз очиқлик ва ошкоралик сиёсатига таянаётган мамлакатда яшаяпмиз. Жамоатчилик учун аҳамиятли жараёнларни ёритиш — журналистнинг вазифаси. Расмий ОАВ ходимига микрофони борлиги учун босим ўтказиш ёки уни қабулдан четлатиш эса мутлақо бошқа масала.

Аҳмедовни қўллаб-қувватлаётганлар ҳам бир нарсани унутмаслиги керак: прокурор фуқаролар муаммосини қонуний ҳал этишга кўмаклашиши учун давлатдан маош олади. Бу имтиёз эмас, унинг хизмат вазифаси.

Жамоатчиликнинг кутгани эса оддий: прокуратура тизими ва унинг раҳбарлари Халқ учун хизмат қилиши, қонун устуворлиги ва жазо муқаррарлигини таъминлаши керак.

ОАВ эса бу жараённи кузатади. Савол беради. Ёритади. Чунки микрофон — босим ўтказиш учун эмас, жамоатчиликка ҳақиқатни етказиш учун берилган.

Telegram I Facebook I YouTube I Instagram

Ўзбекистонда болага зўравонлик қилган педагоглар учун жазо чоралари кучайтирилмоқда
 
11 сентябрь куни қабул қилинган ЎРҚ–1174-сонли қонун билан болаларга нисбатан зўравонлик содир этган педагоглар учун янги жавобгарлик белгиланди.
 
Унга кўра, таълим ташкилотида болаларни тарбиялаш ва ўқитиш мажбурияти юклатилган шахс томонидан жисмоний зўравонлик содир этиш, болани камситиш ёки хўрлаш учун, жиноят аломатлари бўлмаган тақдирда, 1 БҲМдан 5 БҲМгача жарима қўлланади.
 
Бундан ташқари, вояга етмаганларга нисбатан жисмоний ёки руҳий зўравонлик билан боғлиқ ҳуқуқбузарлик учун маъмурий жавобгарликка тортилган шахс 1 йил давомида педагогик фаолият билан шуғуллана олмайди.
 
Ушбу чеклов мактабгача, умумий ўрта, ўрта махсус, профессионал ва болаларга қўшимча таълим берувчи ташкилотларга татбиқ этилади.
 
Қонун билан давлат ёки нодавлат муассасаларининг тўлиқ таъминотида бўлган болага алимент тўлаши шарт бўлган ота ёки онани алиментдан озод қилишга йўл қўйилмаслиги ҳам белгиланди.
 
Шунингдек, ота-она қарамоғидан маҳрум бўлган болалар фойдасига ундириладиган алимент миқдорини камайтиришга оид ишларга «Инсон» ижтимоий хизматлар марказлари ҳам жалб этилади. Қонун расмий эълон қилинган кундан бошлаб кучга киради.

Telegram I Facebook I YouTube I Instagram

«10 йил бўлибди, энди полковник олсангиз ҳам бўлади» — Президент аёл ЙПХ ходимига

Президент Шавкат Мирзиёев ЙПХда 10 йилдан буён хизмат қилаётган аёл ходим билан суҳбатлашди.

Ходимнинг хизмат стажи 10 йил эканини эшитган Президент:
— «10 йил бўлибди, энди полковник олсангиз ҳам бўлади», — деди.

Президент топшириғига кўра, Ички ишлар вазири томонидан ходимга полковник унвони топширилган.

Telegram I Facebook I YouTube I Instagram

Фермер хўжалиги раҳбарларига муҳим огоҳлантириш
 
Президент фармонига кўра, қишлоқ хўжалигига мўлжалланган ер участкаларига эгалик қилиш ва фойдаланиш ҳуқуқини 2027 йил 1 январга қадар ижара ҳуқуқига ўтказиш имконияти берилмоқда.
 
Бу ўзгариш, айниқса, аввал туман ҳокимлари қарорлари асосида ерни доимий ёки вақтинча фойдаланиш ҳуқуқи билан олган фуқаролар ва юридик шахсларга тааллуқли.
 
Шу сабабли ер эгалари ўзларидаги ҳоким қарори ва кадастр ҳужжатларини текшириб, ерга бўлган ҳуқуқ қайси шаклда расмийлаштирилганига эътибор қаратиши муҳим.
 
Агар ерга бўлган ҳуқуқ ижарадан бошқа шаклда расмийлаштирилган бўлса, уни белгиланган тартибда ижара ҳуқуқига ўтказиш масаласини кўриб чиқиш мумкин.
 
Ижара муддати қанча?
Ерга бўлган ҳуқуқ ижара ҳуқуқига ўтказилган тақдирда, ижара муддати шартнома тузилган санадан бошлаб:
Ўзбекистон фуқаролари ва улар муассислигидаги юридик шахслар учун — 30 йил;
чет эл инвестициялари иштирокидаги корхоналар учун — 25 йил.
 
Шунинг учун қишлоқ хўжалиги ерига эга фуқароларга 2027 йил 1 январь муддатини ўтказиб юбормасдан, ер ҳужжатларини ҳозирдан текшириб қўйиш тавсия этилади.

Telegram I Facebook I YouTube I Instagram

Виртуал муҳаббат ёки сохта фирибгарлик?

Интернетдаги танишувлар ортидан кимдир қалбдош топса, кимдир алдовга учрамоқда. Айрим кимсалар ўзгалар номига кредит олдириб ёки қимматбаҳо буюмларни бўлиб тўлашга сотиб олдириб, алдов йўли билан бойлик орттирмоқда.

Виртуаль оламдаги ширин ваъдаларга алданиб қолманг!

Telegram I Facebook I YouTube I Instagram

Наманган ва Фарғонада йирик гиёҳвандлик каналлари тўхтатилди

Наманган, Фарғона ва Андижон вилоятларида гиёҳвандлик воситаларини ноқонуний равишда сотиш билан шуғулланиб келган гуруҳ фаолиятига чек қўйилди.

Наманган ва Андижонда: Андижон вилоятидан бўлган фуқаро чегара ҳудудидаги Норин дарёси орқали сумкага жойланган 20 кг «гашиш»ни олиб ўтиб, дарахтлар тагига яшираётган пайтда қўлга олинди. Ушбу жиноятни давом эттирган ҳолда, унинг шериклари Анджонов ва Наманганда 10 кг «гашиш»ни қабул қилиб олаётган вақтида ашёвий далиллар билан ушланди.

Қўқон шаҳрида: «Гашиш» гиёҳвандлик моддасини 24 минг долларга сотган шахс қўлга олинди.

Бешариқ туманида: Яна бир фуқаро 4 кг «гашиш»ни сотаётган пайтида ушланди. Мазкур ҳолатлар юзасидан жиноят иши қўзғатилган.

Telegram I Facebook I YouTube I Instagram

«Барибир бузилади» — аммо қонун нима дейди? Бекободдаги гаражлар масаласи

Бекобод шаҳри Фарғона маҳалласида аҳолига тегишли гаражлар бузилаётгани ҳақида маълумотлар тарқалди. Аҳоли вакилларининг айтишича, айрим гаражлар суд қарори мавжуд бўлмаган ҳолда
бузилмоқда.

Шаҳар ҳокими Наримон Исмоиловнинг аҳоли билан учрашуви вақтида гаражлар жойлашган ҳудуд керак бўлаётганига ишора қилиб, «барибир бузилади» мазмунида фикр билдиргани ҳам айтилмоқда.

Effect.uz ходимлари воқеа жойида журналистик суриштирув олиб бормоқда.

Telegram I Facebook I YouTube I Instagram

24 ёшида 18 йилга қамалган инсон: ҳаётни қайта бошлашга уриниш

18 йил — инсон ҳаётининг катта қисми. У қамоқда бўлган йиллар давомида ота-онаси ва яқинларидан айрилди. Энг оғири эса — уларнинг сўнгги манзилга кузатишда ҳам иштирок эта олмади.

Озодликка чиққан пайтида уни яна бир оғир синов кутарди — у ногирон бўлиб қолган эди.
18 йилдан сўнг оддий ҳаётга қайтиш эса осон кечмади. Олдида битта савол бор эди:

«Энди ҳаётни қаердан бошлайман?»

Бугун унга ижтимоий хизматлар кўрсатилмоқда. Соғлиғида ҳам ижобий ўзгаришлар бор. У аста-секин оддий ҳаётга қайтиш, ўз ўрнини топиш ва янги саҳифадан бошлашга ҳаракат қилмоқда.

18 йил йўқотилган вақт бўлиши мумкин. Аммо инсон учун ҳаётни қайта бошлаш имконияти ҳар доим бор.

Telegram I Facebook I YouTube I Instagram

Болага қўл кўтарган педагог бир йил дарс бера олмайди

Болаларга нисбатан зўравонлик содир этган педагоглар учун жавобгарлик кучайтирилди.

Яъни таълим ташкилотида болани тарбиялаш ва унга таълим бериш мажбурияти юклатилган шахс томонидан вояга етмаганга нисбатан жисмоний зўравонлик ишлатиш, уни камситиш ёки хўрлаш учун, агар қилмишда жиноят ёки бошқа ҳуқуқбузарлик аломатлари бўлмаса, БҲМнинг 1 бараваридан 5 бараваригача жарима солинади.

Telegram I Facebook I YouTube I Instagram

Тошкентнинг икки туманида электр таъминоти вақтинча тўхтатилади

13 сентябр куни соат 01:00 дан 04:00 гача Тошкент шаҳрининг Олмазор ва Юнусобод туманларидаги айрим ҳудудларда электр таъминотида вақтинчалик узилишлар кузатилади. Бу ҳақда “Тошкент шаҳар электр тармоқлари” МЧЖ Матбуот хизмати хабар бермоқда.

Маълум қилинишича, бу вақтда «Л-ДОК-1» 110 кВ электр узатиш тармоғининг 36-таянчида кабель тармоғини таъмирлаш ишлари олиб борилади.

Олмазор туманида «Иброҳим Ота», «Гулзор», «Мояриқ», «Гулсарой», «Элпарвар», «Мискин» ва «Аҳил» МФЙларининг айрим ҳудудлари;

Юнусобод туманида эса «Астробод», «Туркистон», «Мингчинор», «Нурмакон», «Собиробод», «Ҳамкоробод», «Катта Ҳасанбой», «Шарқ Ҳақиқати», «Регистон», «Йўлайриқ» ҳамда «Уч Қаҳрамон» МФЙларининг айрим ҳудудларида электр таъминоти вақтинча тўхтатилади.

Таъмирлаш ишлари белгиланган вақтдан ҳам олдин якунланиши мумкин.

Telegram I Facebook I YouTube I Instagram

Қаршида мактаб ўқувчилари ўртасида жанжал: қиз бола калтакланган

Қарши шаҳридаги 1-сонли мактаб ўқувчилари ўртасида жанжал юз берди. Ижтимоий тармоқларда тарқалган видеода бир қиз ўзидан бир ёш кичик бўлган ўқувчини ҳақорат қилиб, калтаклагани акс этган.

Ҳолат юзасидан ўрганиш олиб борилиб, воқеа иштирокчилари ва уларнинг ота-оналаридан тушунтиришлар олинган. Ҳолатга ҳуқуқий баҳо бериш учун ҳужжатлар Қарши шаҳар ИИБга юборилган.

Айни пайтда суриштирув ишлари давом этмоқда.

Telegram I Facebook I YouTube I Instagram

«Фоизсиз кредит» бу тузоқ! 400 нафар фуқародан 17 миллиард сўм ўзлаштирган гуруҳ фош этилди

Тошкент вилояти ИИББ тезкор ходимлари интернетда «фоизсиз кредит олиб берамиз» мазмунида жойлаштирилаётган эълонларни кузатувга олди.

Тезкор тадбирлар давомида ушбу эълонлар орқали фуқароларни алдаб, улардан пул олган жиноий гуруҳ фаолияти фош этилган.

Дастлабки маълумотларга кўра, гуруҳ 400 нафар фуқародан 17 миллиард сўм ўзлаштирган.
Ҳолат юзасидан тергов ҳаракатлари олиб борилмоқда.

Фоизсиз кредит ваъдасига ишонишдан олдин, эълон ортида ким турганини текшириб кўринг.

Telegram I Facebook I YouTube I Instagram

Шавкат Мирзиёев Кореяда муҳим учрашувлар ўтказади

Ўзбекистон Президенти Шавкат Мирзиёев давлат ташрифи билан Корея Республикасига боради.

Сеулда давлат раҳбари Корея президенти Ли Чжэ Мён билан тор ва кенгайтирилган таркибда музокаралар ўтказади.

Шунингдек, Ўзбекистон Президенти Корея Миллий Ассамблеяси спикери Чо Чжон Шик, бош вазир Хан Сон Сук, шунингдек, мамлакатнинг йирик компаниялари ва молия институтлари раҳбарлари билан учрашади.

Ташриф доирасида Ўзбекистон–Корея стратегик шериклигини янада ривожлантиришга қаратилган масалалар муҳокама қилиниши кутилмоқда.

Telegram I Facebook I YouTube I Instagram

Афғонистонга кучли сел келди

Ижтимоий тармоқларда Афғонистон шимолида кучли сел оқимлари акс этган видеолар тарқалмоқда.

Метеорология хизмати 17 август куни куз мавсуми учун прогнозини ҳам эълон қилган. Унга кўра, Афғонистоннинг шимоли ва шимоли-шарқида октябрь–ноябрь ойларида ёғингарчилик миқдори юқори бўлиши, мавсумий ҳарорат эса кўп йиллик меъёрдан тахминан 2 даража юқори бўлиши кутилмоқда.

Telegram I Facebook I YouTube I Instagram

4 метрлик қудуқдаги 66 ёшли онахон қутқарилди

Наманган вилояти Чуст туманидаги хонадонлардан бирида 66 ёшли аёл 4 метр чуқурликдаги қудуққа тушиб кетди.

Ҳодиса жойига ФВВ қутқарувчилари зудлик билан етиб бориб, онахонни қудуқдан олиб чиқишган.

Фуқаро шифокорлар назоратига топширилган ва аҳволи яхши экани айтилмоқда.

Telegram I Facebook I YouTube I Instagram