Чорвоқда чўкиб кетган ота ва икки ўғилнинг жасади топилди

Чорвоқ сув омборида чўкиб кетган ота ва унинг икки ўғлининг жасади топилди. Қидирув операцияси бугун, 10 сентябрь куни якунланган.

Фавқулодда вазиятлар вазирлиги ғаввослари соат 13:35 да учинчи фуқаронинг ҳам жасадини топган.
Ҳодиса 2 сентябрь куни Тошкент вилояти Бўстонлиқ туманида содир бўлган. Катерда сайр қилаётган оила аъзоларидан бири чўмилиш учун сувга тушган.

Қутқарув нимчаси бўлмагани сабабли у чўкиб кетган. Унга ёрдам бериш мақсадида акаси ва отаси ҳам сувга тушган ва оқибатда учаласи ҳам чўкиб кетган.

Кичик ўғилнинг жасади 9 сентябрь куни, қолган икки фуқаронинг жасади эса бугун топилган.

Қидирув ишларига ФВВ штаби, Жиззах ва Сирдарё вилоятлари ФВБларининг қўшимча куч ва воситалари ҳамда замонавий қидирув ускуналари жалб этилган.

Telegram I Facebook I YouTube I Instagram

«Камроқ ухлаймиз, кўпроқ юрамиз» — Шуҳрат Абдураҳмонов

Президент Шавкат Мирзиёев ҳудудларда аҳоли бандлиги ва даромадларини ошириш бўйича амалга оширилаётган ишлар юзасидан кенгайтирилган йиғилиш ўтказди.

Йиғилишда ҳудудларда ишни кабинетдан туриб эмас, балки маҳаллаларга тушган ҳолда ташкил этиш, ҳар бир оила ва корхонадаги ҳақиқий ҳолатни ўрганиш зарурлиги таъкидланди.

Шунингдек, йиғилишда аҳоли бандлигини ошириш, бўш турган объектларни ишга тушириш, янги иш ўринлари яратиш ва маҳаллаларда аҳоли даромадларини кўпайтириш масалалари муҳокама қилинди.

Йиғилишда Андижон вилояти ҳокими Шуҳрат Абдураҳмонов ҳам ҳудуддаги ишларни ташкил этиш бўйича ўз ёндашувини билдириб ўтди ва Президентга натижа кўрсатишни ваъда берди.

Telegram I Facebook I YouTube I Instagram

“Қонун кучга кирса, давлатда битта алифбо амал қилади” — Нодир Жонузоқ

Ҳукумат департаменти бошлиғи Нодир Жонузоқнинг айтишича, янги қонун кучга кириши билан Ўзбекистонда икки хил алифбодан фойдаланишга чеклов қўйилиб, ягона алифбо амал қилади.

Унинг таъкидлашича, бу ўзгариш мамлакатда алифбодан фойдаланиш бўйича ягона тартибни шакллантиришга қаратилган.

Қонун кучга кирса, давлатда битта алифбо амал қилади, — деди Нодир Жонузоқ.

Эслатиб ўтамиз, Олий Мажлис Сенатининг 19-ялпи мажлисида лотин ёзувига асосланган ўзбек алифбосини такомиллаштиришга қаратилган қонун муҳокама қилиниб, сенаторлар томонидан маъқулланган.

Telegram I Facebook I YouTube I Instagram

Саида Мирзиёева Тошкент халқаро молия маркази бошқарувчиси этиб тайинланди

Президент фармони билан Президент Администрацияси раҳбари Саида Шавкатовна Мирзиёева ўриндошлик асосида Тошкент халқаро молия маркази бошқарувчиси лавозимига тайинланди.

Шу тариқа, Саида Мирзиёева Президент Администрацияси раҳбари сифатидаги фаолиятини давом эттирган ҳолда, Тошкент халқаро молия маркази фаолиятини йўлга қўйиш жараёнига ҳам раҳбарлик қилади.

Бошқарувчи зиммасига марказ фаолиятини ташкил этиш, зарур ҳужжатларни тайёрлаш, давлат органлари ҳамда марказ тузилмалари ўртасида ҳамкорликни йўлга қўйиш каби вазифалар юклатилган.

Тошкент халқаро молия марказини нолдан ташкил этиш ва унинг фаолиятини йўлга қўйиш марказ олдидаги асосий вазифалардан бири ҳисобланади.

Telegram I Facebook I YouTube I Instagram

“Расмий ОАВ янги алифбода фаолият юритади” — Нодиржон Холбўтаев

Ўзбекистонда ўзбек алифбосини янгилашга оид қонун кучга киргач, ОАВ ва расмий иш юритишни янги алифбога ўтказиш режалаштирилмоқда. Бу ҳақда 10 сентябрь куни Олий Мажлис Сенатининг ялпи мажлисида Вазирлар Маҳкамаси ҳузуридаги Давлат тилини ривожлантириш департаменти раҳбари Нодиржон Холбўтаев маълум қилди.

Холбўтаевнинг айтишича, қонун кучга киргач, барча ОАВ ягона, стандартлаштирилган ва тасдиқланган янги алифбода фаолият юритиши талаб этилади.
Бу тартиб давлат органлари ва расмий ҳужжат айланмасига ҳам татбиқ этилади.

Шу билан бирга, фуқаролар кундалик ва эркин ёзишмаларида ўзлари ўрганган алифбодан фойдаланиши мумкин. Бироқ расмий иш юритиш ва расмий ОАВда янги алифбодан фойдаланиш талаб этилади.

Telegram I Facebook I YouTube I Instagram

Миллий гвардия фуқарога мурожаат қилганда ўзини таништириши шарт бўлади

Олий Мажлис Сенатининг 19-ялпи мажлисида “Ўзбекистон Республикаси Миллий гвардияси тўғрисида”ги қонунга ўзгартириш ва қўшимчалар киритиш ҳақида»ги қонун муҳокама қилинди.

Қонун билан Миллий гвардия органларининг асосий вазифалари қайта тизимлаштирилмоқда.

Жумладан, жамоат хавфсизлиги ва тартибини таъминлаш, қўриқлаш билан боғлиқ вазифалар оптималлаштирилиб, оммавий тартибсизликларга чек қўйиш янги вазифа сифатида белгиланмоқда.

Шунингдек, Миллий гвардия ҳарбий хизматчиларининг фуқаролар билан мулоқот қилиш тартиби аниқлаштирилмоқда.

Эндиликда ҳарбий хизматчи фуқарога мурожаат қилганда ўз лавозими, ҳарбий унвони, фамилияси, исми ва отасининг исмини айтиши, мурожаат сабаби ва мақсадини тушунтириши, фуқаронинг талабига кўра хизмат гувоҳномасини кўрсатиши шарт бўлади.

Telegram I Facebook I YouTube I Instagram

Ҳазораспда ҳамширалар ҳашарга мажбурланмоқда

Effect.uz таҳририятига Хоразм вилояти Ҳазорасп туманидаги тиббиёт муассасаларидан бирида ишловчи ходим мурожаат қилди.

Унинг таъкидлашича, тумандаги барча қишлоқ врачлик пунктлари ходимлари ободонлаштириш ишларига мажбуран жалб қилинмоқда.

Мурожаатда айтилишича, ҳар куни тумандаги қишлоқ врачлик пунктларидан 34 нафардан ҳамшира Урганч ва Хива шаҳарларига олиб борувчи йўллар бўйидаги ободонлаштириш ишларига чиқарилмоқда. Ходимлар йўл ҳақи ва овқатланиш харажатларини ҳам ўз ҳисобидан қоплаётгани билдирилган.

Шунингдек, мурожаатчи Ҳазорасп тумани ҳудудидан ўтувчи Урганч Ҳазорасп йўли бўйида жойлашган айрим хонадонлар олдида ҳам тиббиёт ходимлари раҳбарлар топшириғи асосида ҳашар ишларига жалб қилинаётганини айтган.

Ходимнинг сўзларига кўра, тиббиёт ходимларига бошқа турдаги молиявий босимлар ҳам мавжуд. Жумладан, санитария-эпидемиология хизмати текшируви натижасида қишлоқ врачлик пунктига жарима қўлланилса, ушбу маблағ ходимлардан йиғиб олинаётгани иддао қилинган.

Оладиган ойлигимиз оз. Ҳамма масъулият ҳам ҳамшираларнинг зиммасига тушмоқда, дейди мурожаатчи.

Effect.uz таҳририяти мазкур ҳолатлар юзасидан масъул ташкилотлардан муносабат берилишини кутиб қолади.

Telegram I Facebook I YouTube I Instagram

Меҳмонхона бизнеси учун янги енгилликлар белгиланди

Президентнинг ПФ–175-сонли фармони билан туризм соҳаси, хусусан, меҳмонхона бизнесини қўллаб-қувватлаш чоралари кенгайтирилди.

🔹 3, 4 ва 5 юлдузли меҳмонхоналар қурилиши учун субсидия бериш муддати 2029 йил 1 январгача узайтирилди.

🔹 Меҳмонхоналарга тоифа беришда “Катта тўртлик” (Big Four) аудиторлик компанияларидан бирининг хулосасини олиш талаби бекор қилинди.

Янги тартиб меҳмонхона инфратузилмасига инвестицияларни жалб қилиш ва соҳадаги бюрократик жараёнларни қисқартиришга қаратилган.

Telegram I Facebook I YouTube I Instagram

Сирдарёда экология инспектори рейд вақтида ҳалок бўлди

Экология ва иқлим ўзгариши миллий қўмитаси Давлат экологик назорат инспекциясининг Сирдарё сув ҳавзасини назорат қилиш бўлими ходими Мирзо Ботиров хизмат вазифасини бажариш вақтида ҳалок бўлди.

Маълумотларга кўра, у 9 сентябрь куни соат 23:00 атрофида Сирдарё дарёси ўзанида ўтказилган тезкор рейд давомида электр қармоқ ёрдамида ноқонуний балиқ овлаётган шахсларнинг қаршилигига учраган ва сувга тушиб кетган.

Тегишли ташкилотлар билан ҳамкорликда олиб борилган қидирув ишлари натижасида инспекторнинг жасади 10 сентябрь куни топилган.

Ҳозирда воқеанинг барча тафсилотларини ўрганиш, марҳумнинг оила аъзоларига моддий ва маънавий кўмак кўрсатиш бўйича чоралар кўрилмоқда.

Мирзо Ботиров атроф-муҳитни муҳофаза қилиш ва экологик қонунчилик талабларини таъминлаш йўлида хизмат қилган. Унинг фидокорона меҳнати ва жасорати муносиб баҳоланиб, инспектор «Табиат ҳимоячиси» кўкрак нишони билан тақдирланади.

Effect.uz марҳумнинг оила аъзолари ва яқинларига чуқур таъзия изҳор этди.

Telegram I Facebook I YouTube I Instagram