Трамп Месси ва Роналдунинг ҳаётига ҳавас қилишини айтди

АҚШ Президенти Доналд Трамп футбол юлдузлари Лионел Месси ва Криштиану Роналдунинг ҳаётига ҳавас қилишини айтиб, улар билан қисқа муддатга бўлса ҳам ўрин алмашишни исташини билдирди. Бу ҳақда у Fox News нашрига берган интервюсида сўз очди.

“Яқинда Месси билан учрашдим, Криштиануни эса анчадан бери танийман. Уларнинг ҳаёти жуда яхши. Ҳатто меникидан ҳам анча осонроқ. Ростини айтсам, улар билан ўрин алмашган бўлардим. Ҳеч бўлмаганда бир ойга бўлса ҳам”, — деди Трамп.

Маълумот учун, 2026-йилги Жаҳон чемпионати АҚШ, Канада ва Мексикада бўлиб ўтди. Финал учрашуви Ню-Жерсидаги «MetLayf» стадионида ўтказилди. Унда Испания Аргентина терма жамоасини қўшимча вақтда 1:0 ҳисобида мағлуб этиб, тарихида иккинчи бор жаҳон чемпионига айланди.

Telegram I Facebook I YouTube I Instagram

Ямал Трамп билан саломлашгани билан ижтимоий тармоқларда муҳокамаларга сабаб бўлди

Жаҳон чемпионатида иштирок этган терма жамоалар футболчиларининг мезбон давлат раҳбарлари ва мусобақада қатнашган жамоалар президентлари билан саломлашиши протокол асосида амалга оширилади.

Тақдирлаш маросимида Испания терма жамоаси футболчиси Ламин Ямал АҚШ Президенти Доналд Трамп билан саломлашди. Уларнинг учрашуви акс этган лаҳза ижтимоий тармоқларда кенг муҳокама қилинди.

Айрим фойдаланувчилар футболчининг Трамп билан саломлашишини «ҳурматсизлик» ва «қўрқмаслик» сифатида баҳолаган. Муҳокамаларда «Фаластинга озодлик» хештеги ҳам қўлланган.

Маълумот учун, Ламин Ямал Жаҳон чемпионатида Испания терма жамоаси сафида иштирок этган

Telegram I Facebook I YouTube I Instagram

Нетаняху Нью-Йоркда ҳибсга олиниши мумкинми?

Нью-Йорк мери Зоҳран Мамдани бу борада ҳуқуқий департамент билан маслаҳатлашувлар давом этаётганини билдирди.

Мамдани The New York Times нашрига берган интервюсида Нетаняхунинг эҳтимолий ҳибсга олиниши юзасидан махсус қонунлар ишлаб чиқилмаслигини, барча ҳаракатлар амалдаги қонунчилик доирасида амалга оширилишини таъкидлади.

Унинг сўзларига кўра, бу масала Нетаняху БМТ Бош Ассамблеяси тадбирларида иштирок этиш учун Нью-Йоркка келган тақдирда юзага келиши мумкин.

Мамдани, шунингдек, бу борада Халқаро жиноий суд томонидан Нетаняхуга нисбатан илгари сурилган айбловларни ҳам эслатди. Эслатиб ўтамиз, у сайловолди кампанияси даврида мер этиб сайланса, Исроил Бош вазири шаҳарга келган тақдирда уни ҳибсга олиш бўйича чоралар кўришини айтган эди.

Telegram I Facebook I YouTube I Instagram

Жиззахда сунъий ҳовузда уч нафар вояга етмаган қиз чўкиб вафот этди

17 июль куни соат 13:00 атрофида Мирзачўл тумани «Пахтазор» маҳалласи ҳудудида жойлашган фермер хўжалиги ер майдонидаги сунъий ҳовузда бахтсиз ҳодиса юз берди.

Маълум қилинишича, томчилатиб суғориш тизими учун қазилган сунъий ҳовузга чўмилиш учун тушган уч нафар вояга етмаган қиз чўкиб, вафот этган. Қурбонларнинг икки нафари 17 ёшда, яна бири эса 15 ёшда бўлган.

Суд-тиббий экспертизаси туман филиалининг дастлабки хулосасига кўра, қизларнинг ўлимига юқори нафас йўлларининг сув билан тўсилиши оқибатида келиб чиққан механик асфиксия сабаб бўлган.

Telegram I Facebook I YouTube I Instagram

Бурсада 3-қаватдан йиқилган ўзбекистонлик аёл ватанга қайтарилди

Бурса шаҳрида учинчи қаватдан йиқилиб жароҳат олган ўзбекистонлик аёл Ўзбекистонга қайтарилди.

Ўзбекистоннинг Истанбул шаҳридаги Бош консулхонаси маълум қилишича, ишлаш мақсадида Туркияга борган фуқаро З.Н. бахтсиз ҳодиса оқибатида учинчи қаватдан йиқилиб, шифохонага ётқизилган.

Жабрланувчининг даволаниши давомида Бурса шаҳридаги ўзбекистонлик кўнгиллилар унга яқиндан ёрдам кўрсатган.

Бош консулхона ҳамда Миграция агентлиги ҳамкорлигида фуқаро Ўзбекистонга муваффақиятли қайтарилди. Консулхона ёрдам кўрсатган ҳамюртлар ва "Ўзбек хотин-қизларининг ҳуқуқларини ҳимоя қилиш жамияти"га миннатдорлик билдирди.

Telegram I Facebook I YouTube I Instagram

Трамп ЖЧ финалидан сўнг Эронга янги зарбаларни буюрди

АҚШ ва Эрон ўртасидаги кескинлик янги босқичга чиқди. Эронга қарши тўққизинчи зарбалар тўлқини амалга оширилди.

АҚШ Марказий қўмондонлиги (CЕНТCОМ) маълум қилишича, президент Доналд Трамп футбол бўйича 2026-йилги Жаҳон чемпионати финалидан сўнг Эронга қарши янги ҳаво ҳужумларини амалга оширишга буйруқ берган.

Тошкент вақти билан соат 04:00 да бошланган зарбалар давомида Табриз, Чобаҳор, Конарак ва Бандар-Имом Хомайний ҳудудларида портлашлар қайд этилди. Ҳозирча зарба берилган обектлар ҳақида расмий маълумот йўқ.

CЕНТCОМга кўра, ҳужумлар Эроннинг Ҳормуз бўғози орқали ҳарбий операцияларни амалга ошириш имкониятларини чеклашга қаратилган.

Ҳужумлар ортидан Брент маркали нефт нархи бир баррел учун 90 доллардан ошди. Шу билан бирга, АҚШ Баҳрайндаги фуқароларини эҳтиёткор бўлишга чақирди.

Telegram I Facebook I YouTube I Instagram

“Президент оиласига яқинман” деб 270 минг доллардан ортиқ пул олганлар қамалди

Сирдарёлик Ж.Н. бошчилигидаги уюшган гуруҳ фуқароларга турли масалаларни, жумладан, лавозимга тайинлаш, йирик шартномалар ва уй-жой масалаларини ҳал қилиб беришни ваъда қилиб, 270 минг доллардан ортиқ маблағни фирибгарлик йўли билан ўзлаштирган.

Гуруҳ аъзолари ўзларини юқори мартабали шахслар ва президент оиласига яқин инсонлар сифатида таништиргани айтилмоқда.

Суд ҳукмига кўра, гуруҳ раҳбари 10 йил 7 ойга, бошқа аъзолари эса турли муддатларга озодликдан маҳрум қилинган.

Telegram I Facebook I YouTube I Instagram

Умра визаси энди 1 йил муддатга берилади

Саудия Арабистони Ҳаж ва умра вазирлиги умра зиёратчилари учун 365 кун (1 йил) амал қиладиган кўп марталик умра визаси тартибини жорий этди.

Янги тартибга кўра, зиёратчилар визанинг амал қилиш муддати давомида мамлакатга бир неча бор кириш имкониятига эга бўлади. Бироқ Саудия Арабистони ҳудудида умумий бўлиш муддати 90 кундан ошмаслиги шарт.

Шунингдек, ҳар бир сафар олдидан Nusuk платформаси орқали меҳмонхона, транспорт ва бошқа хизматларни танлаб, умра зиёрати учун рухсатнома (Permit) расмийлаштириш талаб этилади.

Telegram I Facebook I YouTube I Instagram

«Давактив»нинг собиқ раҳбари Акмалхон Ортиқов иши судга оширилди

«Давактив»нинг агентлигининг собиқ раҳбари Акмалхон Ортиқовга нисбатан қўзғатилган жиноят иши судга оширилди.

У Жиноят кодексининг ўзлаштириш ёки растрата йўли билан талон-торож қилиш, мансаб ваколатини суиистеъмол қилиш ҳамда мансаб сохтакорлигига оид моддалари бўйича айбланмоқда.

Маълум қилинишича, мазкур жиноят иши доирасида яна 5 нафар шахс ҳам судланмоқда.

Telegram I Facebook I YouTube I Instagram

Хусанов ЖЧ–2026нинг энг тезкор футболчилари қаторидан жой олди

Ўзбекистон терма жамоаси ва «Манчестер Сити» ҳимоячиси Абдуқодир Хусанов 2026 йилги Жаҳон чемпионатида энг юқори тезлик қайд этган футболчилар орасидан ўрин олди.

ФИФАнинг жисмоний кўрсаткичлар рейтингига кўра, Абдуқодир Хусанов умумий ҳисобда 6-ўринни, ҳимоячилар орасида эса 3-ўринни эгаллади. У мусобақада 36,5 км/соат тезликка эришган.

Хусановдан юқори натижа қайд этган футболчиларнинг барчаси ҳужум ва ярим ҳимоя чизиғи вакиллари ҳисобланади. Шу боис марказий ҳимоячи учун бу натижа жуда юқори баҳоланмоқда.

Бу кўрсаткич Абдуқодир Хусановнинг нафақат ишончли ҳимоячи, балки жаҳон футболидаги энг тезкор футболчилардан бири эканини ҳам яна бир бор тасдиқлади.

Telegram I Facebook I YouTube I Instagram

Тошкентда 1,4 млрд сўмлик кешбек талон-торож қилинди

Тошкент шаҳрининг Мирзо Улуғбек туманида фаолият юритувчи 3 та МЧЖ масъул шахслари сохта маълумотлар асосида ноқонуний равишда кешбек маблағларини қўлга киритгани аниқланди.

Тергов маълумотларига кўра, улар 322,4 млрд сўмлик маҳсулот етказиб берилгани ҳақида қалбаки ҳужжатлар расмийлаштириб, 3 363 та харид чекини шакллантирган. Ушбу чеклар асосида ижтимоий ҳимоя ягона реестрига киритилган фуқаролар номидан «Soliq Mobile» иловаси орқали жами 1,4 млрд сўм кешбек тўланган.

Мазкур ҳолат юзасидан Жиноят кодексининг тегишли моддалари билан жиноят иши қўзғатилган. Айни пайтда тергов ҳаракатлари давом этмоқда.

Telegram I Facebook I YouTube I Instagram

Тошкент вилояти шаҳарларида автобус йўлкираси ўзгаради

Тошкент вилоятининг қатор шаҳарларида жамоат транспорти учун янги йўлкира тарифлари тасдиқланди. Шунингдек, нақд пулсиз тўлов тизимини тўлиқ жорий этиш чоралари кўрилмоқда.

Халқ депутатлари Тошкент вилояти Кенгаши жамоат транспорти учун янги тарифларни тасдиқлади.

Янги тартибга кўра:
транспорт ёки банк картаси орқали тўлов — 2 000 сўм;
нақд пул орқали тўлов — 2 600 сўм;
юк ташиш хизмати — 2 600 сўм.

Шунингдек, Ангрен, Бекобод, Олмалиқ, Оҳангарон, Нурафшон, Чирчиқ ва Янгийўл шаҳарларида транспорт карталарини сотиш ҳамда тўлдириш учун инфокиосклар босқичма-босқич ўрнатилади.

Қарорга мувофиқ, брутто шартнома асосида фаолият юритаётган барча шаҳар автобусларида нақд пулсиз тўлов тизими тўлиқ жорий этилади.

Telegram I Facebook I YouTube I Instagram

Янги ўқув йили учун давлат стипендиялари квотаси тасдиқланди

2026/2027 ўқув йили учун олий таълим муассасаларида жами 776 та давлат стипендияси ажратилади. Улар республика бўйича 335 мингдан ортиқ юқори босқич талабалари орасидан энг муносиб номзодларга берилади.

Олий таълим, фан ва инновациялар вазирлигининг 2026 йил 15 июлдаги тегишли хатига мувофиқ, 2026/2027 ўқув йили учун давлат стипендиялари квоталари тасдиқланди.

Стипендиялар қуйидагича тақсимланди:

Президент стипендияси — 187 та;
Ислом Каримов стипендияси — 194 та;
Навоий стипендияси — 175 та;
Бобур стипендияси — 51 та;
Имом ал-Бухорий стипендияси — 44 та;
Беруний стипендияси — 38 та;
Ибн Сино стипендияси — 33 та;
Абдулла Авлоний стипендияси — 16 та;
Улуғбек стипендияси — 13 та;
Тўлепберген Қайипбергенов стипендияси — 11 та;
Ибройим Юсупов стипендияси — 11 та;
Паҳлавон Маҳмуд стипендияси — 3 та.
Жами 776 та давлат стипендияси республикадаги 335 471 нафар юқори босқич талабалари орасидан энг муносиб номзодларга ажратилади.

Telegram I Facebook I YouTube I Instagram

Термизда чанг бўрони кузатилди

Бугун кундузи республика бўйича айрим ҳудудларда шамол тезлиги 13–18 м/с гача кучайиши кутилмоқда.

Бухоро, Навоий, Қашқадарё, Сурхондарё ва Фарғона вилоятларининг айрим жойларида шамол тезлиги баъзида 20–22 м/с гача етиб, чанг-тўзонлар кузатилиши мумкин.

Айни пайтда Термиз шаҳрида чанг бўрони қайд этилди.
Шунингдек, Тошкент шаҳрида ҳам шамол тезлиги 12–14 м/с гача кучайиши ва айрим жойларда чанг-тўзонлар кузатилиши мумкин.

Telegram I Facebook I YouTube I Instagram

Тошкентда хонадонда газ чақнаши: икки киши жароҳатланди

20 июль куни соат 13:13 да Тошкент шаҳри Янгиҳаёт тумани Наврўз кўчасида жойлашган 16 қаватли уйнинг 8-қаватидаги хонадонлардан бирида ёнғин ҳақида хабар келиб тушган.

Воқеа жойига етиб борган қутқарувчилар текширув ўтказиб, хонадон ошхонасида ҳаво-газ аралашмасининг чақнаши содир бўлганини аниқлади.

Ҳодиса оқибатида хонадонда яшовчи икки нафар фуқаро енгил тан жароҳати олган. Уларга тиббий ёрдам кўрсатилган бўлиб, айни пайтда аҳволи қониқарли ва шифокорлар назоратида.

Дастлабки маълумотларга кўра, чақнашга фуқароларнинг носоз газ қурилмасидан фойдалангани сабаб бўлган. Ҳодиса юзасидан тегишли тартибда суриштирув ишлари олиб борилмоқда.

Telegram I Facebook I YouTube I Instagram

Бухорода банкнинг собиқ филиал раҳбари фуқаро номига яширинча кредит расмийлаштиргани аниқланди

Бош прокуратура ҳузуридаги Департаментнинг Бухоро вилояти бошқармаси ўтказган терговга қадар текширувда тижорат банкларидан бирининг Ромитан филиали собиқ раҳбари А.Ҳ., банк менежери Ф.С. ҳамда маҳаллада собиқ ҳоким ёрдамчиси вазифасини вақтинча бажарувчи С.Х. ўзаро тил бириктиргани аниқланган.

Текширувга кўра, улар фуқаро Ҳ.А.нинг хабардорлигисиз унинг номига 32,9 миллион сўм кредит расмийлаштириб, маблағни уч ғилдиракли мотоцикл хариди учун якка тартибдаги тадбиркор ҳисоб рақамига ўтказган. Кейин эса ушбу пулни нақдлаштириш орқали ўзлаштирган.

Шунингдек, банкнинг собиқ филиал раҳбари фуқародан кредит қарздорлигини ундириш бўйича ижро иши қўзғатилганидан сўнг, жиноий ҳаракатларини яшириш мақсадида қарз тўлиқ қоплангани ҳақида сохта хатни Мажбурий ижро бюросига тақдим этган ва ижро ишининг тугатилишига эришгани маълум қилинди.

Мазкур ҳолат юзасидан жиноят иши қўзғатилган. Айни пайтда тергов ҳаракатлари давом этмоқда.

Telegram I Facebook I YouTube I Instagram

Президент: Бандлик тизими масъуллари аҳолини ишга жойлаштириш учун ҳудудма-ҳудуд юради

Президент раислигида ўтказилган йиғилишда аҳоли бандлигини таъминлаш ва маҳаллалардаги муаммоларни ҳал этиш бўйича янги вазифалар белгиланди.

Маълум қилинганидек, бу йўналишда «Долзарб 40 кунлик» эълон қилиниб, 2 мингта энг оғир маҳаллада ишлар мутлақо янги тизим асосида ташкил этилмоқда.

Унга кўра, ушбу маҳаллаларда ҳоким, маҳалла раиси ва бандлик бўлими ўртасидаги уч томонлама шартномалар қайта кўриб чиқилди. Ҳокимлар электр, газ, ичимлик суви ва йўл билан боғлиқ муаммоларни ўз вақтида ҳал этиш учун шахсан жавобгар бўлади.

Шунингдек, бандлик тизими масъуллари эҳтиёжманд аҳолини касбга ўқитиш, ишга жойлаштириш ҳамда уларнинг даромадини ошириш мақсадида ҳудудма-ҳудуд юриб ишлайди.

Бундан ташқари, маҳалла тизими раҳбарларига мамлакатдаги 8 минг 992 та маҳаллада кўчалар ва уйларни обод қилиш, дарахт ва кўчат экиш, ариқларни тоза сақлаш бўйича аниқ вазифалар юклатилди.

Telegram I Facebook I YouTube I Instagram

Бухоро вилояти ҳокимининг биринчи ўринбосари лавозимидан озод этилди

Президент иштирокида ўтказилган йиғилишда Бухоро вилояти мисолида айланмаси 100 млн сўмдан юқори бўлган 162 та корхона кетма-кет уч йил фаолиятини зарар билан якунлагани ва шу боис бир сўм ҳам фойда солиғи тўламагани қайд этилди.

Шунингдек, 1,5 мингта корхона қўшилган қиймат солиғини тўламасдан, фақат ҚҚСни чегириш билан чеклангани танқид қилинди.

Ушбу камчиликлар сабаб Бухоро вилояти ҳокимининг молия-иқтисодиёт ва камбағалликни қисқартириш бўйича биринчи ўринбосари, вилоят иқтисодиёт ва молия бошқармаси бошлиғи Ахмедов Ботир Илҳомович эгаллаб турган лавозимидан озод этилди.

Telegram I Facebook I YouTube I Instagram

Банк раҳбарларига уч ой муҳлат: натижа бўлмаса, лавозимдан кетади

Давлат раҳбари банкларнинг маҳаллалардаги ишидан мутлақо норози эканини билдириб, Марказий банкнинг ҳудудий раҳбарлари ҳамда давлат банклари филиаллари бошлиқлари фаолиятига қатъий эътироз билдирди.

Қайд этилишича, жорий йил вилоят ва туман банклари ҳамда маҳалла уюшмалари учун синов ва амалий аттестация йили бўлади. Кейинги уч ой давомида самарали натижа кўрсатган раҳбарлар ўз лавозимида қолади, фаолиятида ўзгариш қилмаганлар эса лавозимини тарк этади.

Шунингдек, Бош прокуратура ва Ҳисоб палатасига ҳар бир маҳаллада амалга оширилаётган ишлар ва уларнинг натижаларини доимий назорат қилиш вазифаси юклатилди.

Йиғилишда маҳаллаларда озодалик, яшаш маданияти ва ҳовли уйлар билан ишлаш масалалари ҳам танқидий муҳокама қилиниб, ҳовли уйларни ҳам бошқарув компаниялари фаолияти билан қамраб олиш муҳимлиги таъкидланди.

Telegram I Facebook I YouTube I Instagram

Саноат ва экспорт режасини бажармаган 17 нафар ҳоким лавозимига мувофиқлиги кўриб чиқилади

Жорий йилнинг олти ойи якунлари бўйича саноат ва экспорт кўрсаткичлари танқидий таҳлил қилинди.
Қайд этилишича, биринчи чорак якунларида саноат режасини бажармаган 13 та ва экспорт кўрсаткичини пасайтирган 15 та туман ҳокими жазоланган эди. Шундан сўнг аксарият ҳокимлар хулоса чиқариб, олти ойлик прогноз кўрсаткичларини бажарган.

Бироқ айрим ҳудудларда саноат ўсиши суръати пасайган. Хусусан, Янгиобод туманида прогноз қилинган 5,7 фоиз ўрнига ўсиш атиги 1,8 фоизни ташкил этган. Шунингдек, Ғозғон шаҳри, Музработ, Қизириқ ва Олтиариқ туманларида ҳам ўсиш суръати пасайгани қайд этилди.

Экспорт йўналишида эса Касби, Денов, Тошкент тумани, Жиззах шаҳри, Пахтаобод, Навоий шаҳри, Жомбой, Тойлоқ, Бандихон, Мирзачўл, Ёзёвон ва Бектемир туманларида ишлар суст кечаётгани танқид қилинди.

Шу муносабат билан Бош вазирга мазкур 17 нафар ҳокимнинг лавозимига мувофиқлигини бугуннинг ўзида кўриб чиқиш топширилди.

Шунингдек, тўққиз ой якунларига қадар вазият яхшиланмаса, вилоят ҳокимларининг ўринбосарларига нисбатан ҳам қатъий чоралар кўрилиши белгиланди.

Telegram I Facebook I YouTube I Instagram

Президент: Банклар балансидаги 9,3 триллион сўмлик мол-мулк хатловдан ўтказилади

Қайд этилишича, ҳозир банклар балансида умумий қиймати 9 триллион 300 миллиард сўмлик 2 411 та мол-мулк сотилмай турибди.

Эндиликда ҳар бир объектнинг банк балансида қолиб кетиши асосли ёки асоссиз экани таҳлил қилинади. Харидори мавжуд бўла туриб, сунъий равишда ушлаб турилган объектлар бўйича қонун устуворлиги таъминланиши белгиланди.

Йиғилишда айрим ҳудудларда импорт ҳажми экспортга нисбатан тезроқ ўсиб бораётгани ҳам танқид қилинди.

Маълум қилинишича, ўтган йили импорт экспортдан:
Тошкент вилоятида — 1,9 миллиард долларга;
Самарқанд вилоятида — 1,4 миллиард долларга;
Андижон вилоятида — 866 миллион долларга;
Жиззах вилоятида — 792 миллион долларга;
Бухоро вилоятида — 662 миллион долларга кўп бўлган.

Президент ҳар бир ҳоким ушбу ҳолатни чуқур таҳлил қилиб, импорт ўрнини босувчи ва экспортбоп маҳсулотлар ишлаб чиқаришни кўпайтириш бўйича аниқ чоралар кўриши шартлигини таъкидлади.

Telegram I Facebook I YouTube I Instagram