Трамп Нетаньяхуни огоҳлантирди: “Исроил Эронга қарши ёлғиз қолиши мумкин”

АҚШ президенти Дональд Трамп Исроил бош вазири Биньямин Нетаньяхуни Эронга нисбатан ҳаракатларда эҳтиёткор бўлишга чақирди. Унинг айтишича, вазият янада кескинлашса, Исроил АҚШ ёрдамисиз қолиши мумкин.

Трампнинг маълум қилишича, Эрон ва Исроил ўртасидаги кескинлик фонида бир қатор давлатлар Вашингтондан Тель-Авивга босим ўтказишни сўраган. Шундан сўнг у Нетаньяху билан боғланиб, ҳужумлар кўламини қисқартиришга эришганини билдирган.

АҚШ раҳбари Вашингтон ҳамон Теҳрон билан келишув тарафдори эканини таъкидлади. Трампнинг сўзларига кўра, Исроил Эрон ҳудудига зарбаларни тўхтатган, бироқ Ливандаги ҳарбий амалиётларини давом эттирмоқда.


Telegram I Facebook I YouTube I Instagram

Муддати 50 йилдан ошган кўп қаватли уйларда «планировка»ни ўзгартириш тақиқланди

Ўзбекистонда кўп квартирали уйлардан фойдаланишда назорат ва аҳоли хавфсизлиги кескин кучайтирилмоқда. Президентнинг тегишли фармонига асосан соҳада қатор муҳим тартиблар жорий этилмоқда.

Янги қоидаларга кўра, эксплуатация муддати 50 йилдан ошган кўп квартирали уйларда хонадонларни қайта режалаштириш (планировкасини ўзгартириш) ишларини амалга ошириш қатъиян ман этилади. Фақатгина бинонинг мустаҳкамлигини таъминлашга қаратилган махсус мустаҳкамлаш ишлари бундан мустасно ҳисобланади.

Бундан ташқари, сифатсиз қурилиш қилган ташкилотларга нисбатан ҳам чоралар қаттиқлаштирилади. Кўп қаватли уйларда кафолат муддати даврида аниқланган нуқсонларни ўз вақтида бартараф этмаган ва Инспекция кўрсатмаларини бажармаган пудратчиларга рейтинг тизимида жарима баллари қўллаб борилади.

Telegram I Facebook I YouTube I Instagram

Навоийда юк машинаси билан тўқнашган Tico ҳайдовчиси вафот этди

Навоий вилоятининг Нурота туманида Tico ва юк автомобили иштирокида йўл-транспорт ҳодисаси содир бўлди.

Маълум қилинишича, воқеа жорий йилнинг 3 июнь куни юз берган. Тўқнашув оқибатида енгил автомобиль ҳайдовчиси оғир тан жароҳатлари олиб, шифохонада вафот этган.

Telegram I Facebook I YouTube I Instagram

Андижонда уйида ноқонуний қиморхона ташкил қилган шахс қўлга олинди

Андижон вилоятининг Жалақудуқ туманида яшовчи шахс ўз хонадонида ноқонуний равишда қимор ва таваккалчиликка асосланган ўйинлар ташкил этгани аниқланди.

Маълумотларга кўра, у яшаш манзилида бир гуруҳ фуқароларни йиғиб, қонунчиликда тақиқланган қимор ўйинларини ўтказиб келган.

Ҳуқуқни муҳофаза қилувчи органлар томонидан ўтказилган тезкор тадбирлар давомида ҳолат фош этилган.

Мазкур ҳолат юзасидан жиноят иши қўзғатилиб, айни вақтда тергов ҳаракатлари олиб борилмоқда. Қонунбузарликка алоқадор шахсларнинг хатти-ҳаракатларига ҳуқуқий баҳо берилиши белгиланган.

Telegram I Facebook I YouTube I Instagram

Тошкентда 10 килограммдан ортиқ кумушни ноқонуний сотмоқчи бўлган шахс қўлга олинди

Тошкент вилоятининг Зангиота туманида қимматбаҳо металларнинг ноқонуний муомаласига чек қўйилди.

Давлат хавфсизлик хизмати, Иқтисодий жиноятларга қарши курашиш департаменти ҳамда Божхона органлари ҳамкорлигида ўтказилган тезкор тадбир давомида 1992 йилда туғилган Тошкент шаҳри фуқароси ушланган.

Аниқланишича, у умумий оғирлиги 10 килограмм 35 грамм бўлган 13 та кумуш қуймасини 20,8 минг АҚШ долларига сотишга уринган вақтида ашёвий далиллар билан қўлга олинган.

Мутахассислар хулосасига кўра, мусодара қилинган кумушнинг бозор қиймати 235 миллион сўмдан ортиқни ташкил этади.

Терговга қадар текширувларда ушланган шахс заргарлик буюмлари ишлаб чиқариш билан шуғулланувчи корхона ходими экани маълум бўлган. Шунингдек, мазкур корхонада олтин ва кумуш маҳсулотларини қайта ишлаш ишлари амалга оширилгани, аммо қимматбаҳо металларни аффинаж қилиш учун зарур рухсатномага эга эмаслиги аниқланган.

Тезкор тадбирлар давомида ушбу манзилдан умумий қиймати қарийб 3,5 миллиард сўм бўлган 58 килограмм кумуш ҳамда 2,2 килограмм олтин борлиги ҳам маълум қилинди.

Ҳозирда мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.

Telegram I Facebook I YouTube I Instagram

Гулистонда чиябўри 4 нафар фуқарога ҳужум қилди, ёввойи ҳайвон зарарсизлантирилди

Ижтимоий тармоқларда Гулистон туманида чиябўри ҳужуми содир бўлгани ҳақида тарқалаётган хабарлар юзасидан расмий маълумот берилди.

Маълум қилинишича, жорий йилнинг 9 июнь куни соат тахминан 17:30 ларда Гулистон туманининг «Ишонч» маҳалласи дала четидаги ҳудудда бир дона чиябўри 4 нафар фуқарога ҳужум қилган.

Ҳодиса вақтида маҳаллада яшовчи фуқаро томонидан тезкор чоралар кўрилиб, ёввойи ҳайвон зарарсизлантирилган ва хавф бартараф этилган.

Ҳужум оқибатида жароҳат олган фуқароларга зудлик билан тиббий ёрдам кўрсатилган. Айни пайтда уларнинг саломатлиги тиббиёт ходимлари назоратида бўлиб, аҳволи қониқарли экани билдирилди.

Мазкур ҳолат юзасидан тегишли ташкилотлар томонидан ўрганиш ишлари ва профилактик тадбирлар олиб борилмоқда. Вазият мутасадди идоралар назоратида.

Telegram I Facebook I YouTube I Instagram

Жалолиддин Машариповга умуртқалараро диск чурраси ташхиси қўйилди: у жаҳон чемпионатида қатнашмаслиги мумкин

Ўзбекистон миллий терма жамоаси футболчиси Жалолиддин Машарипов бел қисмидаги жароҳати сабаб жамоанинг сўнгги машғулотлари ҳамда Канада ва Нидерландияга қарши ўртоқлик учрашувларида иштирок этмади.

Ўзбекистон футбол ассоциацияси маълумотига кўра, футболчининг белидаги оғриқлар бир неча ҳафтадан буён кузатилган бўлиб, аввал дори-дармон ва физиотерапия муолажалари орқали унинг аҳволи яхшиланган эди. Бироқ кейинчалик оғриқлар яна кучайган.

Ўтказилган МРТ текшируви натижаларига кўра, Машариповда умуртқалараро диск чурраси хуруж қилгани аниқланган. Айни пайтда унинг соғлиғини тиклаш бўйича миллий жамоа тиббий штаби томонидан зарур муолажалар олиб борилмоқда.

Якуний тиббий хулосалардан сўнг футболчининг кейинги ўйинларда иштирок этиши юзасидан қўшимча маълумот берилиши кутилмоқда. Айрим манбаларга кўра, мазкур жароҳат унинг жаҳон чемпионати баҳсларида қатнашишига ҳам таъсир кўрсатиши мумкин.

Telegram I Facebook I YouTube I Instagram

Жасжан Россияда қўлга олинди: блогер кечирим сўрашга мажбур бўлди

Москва метросида жанжалли контент тайёрлаб келган ўзбекистонлик блогер Жасжан қўлга олинди. Сўроқ жараёнида у қилган иши учун кечирим сўради.

Жасжан тахаллуси билан танилган ўзбекистонлик блогер Россияда қўлга олинди. Бу ҳақда Россия Ички ишлар вазирлигининг расмий вакили Ирина Волк маълум қилди.

Маълум қилинишича, блогер Москвага махсус равишда контент тайёрлаш мақсадида борган. У метро йўловчиларини турли провокацион ҳаракатлар орқали жанжалга ундаб, уларнинг реакцияларини видеога олган ва кейинчалик ушбу лавҳаларни ижтимоий тармоқларда тарқатиб келган.

Россия ИИВ томонидан эълон қилинган видеода блогер сўроқ жараёнида ўз хатосини тан олиб, шундай дейди:

«Бу ерда бундай қилиш мумкин эмаслигини билмагандим. Илтимос, мени кечиринг».

Ҳозирча блогерга нисбатан қандай чора кўрилгани ҳақида қўшимча маълумот берилмаган.

Telegram I Facebook I YouTube I Instagram

Ўзбекистонлик футбол мухлисларининг 50 фоиздан ортиғи АҚШ визасини ола олмаган

Жаҳон чемпионати ўйинларини стадиондан томоша қилишни истаган мухлислар, жумладан, Ўзбекистон фуқаролари ҳам АҚШ ва бошқа мезбон давлатлар визасини олишда қийинчиликларга дуч келмоқда.

BBC томонидан келтирилган таҳлилларга кўра, мундиалда иштирок этаётган давлатлар мухлисларининг катта қисмига виза рад этилган ёки турли саёҳат чекловлари сабаб рухсат берилмаган. Айрим маълумотларга кўра, бу кўрсаткич 50 фоиздан ҳам юқори бўлиши мумкин.

Ҳолат футбол мухлисларининг йирик мусобақани бевосита стадиондан кузатиш имкониятларини сезиларли даражада чекламоқда.

Telegram I Facebook I YouTube I Instagram

Туркияда 6 ёшли ўзбекистонлик бола трамвай остида қолиб ҳалок бўлди

Туркиянинг Истанбул шаҳрида 6 ёшли ўзбекистонлик бола билан боғлиқ мудҳиш бахтсиз ҳодиса юз берди.

Маълум қилинишича, 8-июн куни Истанбулнинг Фотиҳ туманидаги трамвай бекатларидан бирида оила аъзолари билан саёҳатда бўлган 6 ёшли ўзбекистонлик бола ҳалок бўлган.

Telegram I Facebook I YouTube I Instagram

Зангиотада 10 килограммдан ортиқ кумушни ноқонуний сотмоқчи бўлган шахс ушланди

Тошкент вилоятининг Зангиота туманида 10 килограммдан ортиқ кумуш қуймасини ноқонуний сотишга уринган шахс қўлга олинди.

ДХХ, Иқтисодий жиноятларга қарши курашиш департаменти ва Божхона органлари ҳамкорлигида ўтказилган тезкор тадбирда фуқаро 13 та кумуш қуймасини 20,8 минг АҚШ долларига сотаётган вақтида ушланди.

Telegram I Facebook I YouTube I Instagram

“Апаче” уриб туширилди: АҚШ ва Эрон ўзаро зарбалар алмашди

АҚШ армиясининг “Апаче” ҳужумкор вертолёти Эрон дрони томонидан уриб туширилгани маълум бўлди. Шундан сўнг АҚШ Эрон жанубидаги қарийб 20 та ҳарбий нишонга зарба берди.

АҚШ маълумотларига кўра, ҳужумларда Эроннинг ҳаво мудофааси тизимлари, радар ва бошқарув обектлари нишонга олинган. Операция тахминан тўрт соат давом этган.

Эрон эса бунга жавобан Иордания, Қувайт ва Баҳрайндаги АҚШ ҳарбий обектларига ракета ва дронлар билан ҳужум уюштирганини билдирди. Бироқ АҚШ ва минтақа давлатлари ракета ҳамда дронларнинг аксарияти уриб туширилганини маълум қилган.

Telegram I Facebook I YouTube I Instagram

Зеленский: “Путинга ёзган хатимдан керакли натижани олдим”

Украина президенти Владимир Зеленский Россия президенти Владимир Путинга йўллаган мактуби орқали ўзига керакли натижага эришганини маълум қилди.

Зеленский бу ҳақда Эстониянинг Таллинн шаҳрида Шимолий Европа ва Болтиқбўйи давлатлари етакчилари билан ўтказилган матбуот анжуманида сўз юритар экан, сўнгги бир ой ичида Европа Иттифоқи, АҚШ президенти, АҚШ Конгресси ҳамда Путинга бир нечта мактублар юборганини айтди.

Telegram I Facebook I YouTube I Instagram

147 оила 4 йилдан бери уй кутиб яшамоқда: жабрланганлар Саида Мирзиёевага мурожаат йўллаган
 
«6 йилдан бери эзилиб кетдик, қачонгача биз аёллар кўчада адолат излаб юрамиз?» — Тошкентда қурилиши тугалланмаган турар жой мажмуасига пул тўлаган фуқаролар яна ёрдам сўраб чиқиш қилди.
 
Тошкент шаҳри Мирзо Улуғбек туманида жойлашган, “System Metal Story” МЧЖ томонидан амалга оширилган Prestige турар жой мажмуаси атрофидаги муаммо ҳалигача ўз ечимини топмаган.

Маълум қилинишича, лойиҳага маблағ киритган 147 оила тўрт йилдан буён ўз уйларига кўча олмаяпти. Қурилиш ишлари бир неча йил аввал бошланган бўлса-да, объект ҳозирга қадар фойдаланишга топширилмаган.

Шу вақт мобайнида кўплаб оилалар ижара уйларда яшашга мажбур бўлиб, ипотека ва бошқа кредит тўловлари билан қийин аҳволга тушганини билдирмоқда.

Қайд этилишича, лойиҳа учун масъул бўлган айрим шахслар жавобгарликка тортилиб, озодликдан маҳрум этилган.

Айни пайтда жабрланган фуқаролар Президент администрацияси раҳбари Саида Мирзиёевага мурожаат қилиб, муаммони ҳал этиш ва ўз ҳуқуқларини тиклашда амалий ёрдам кўрсатишни сўрамоқда.

Telegram I Facebook I YouTube I Instagram

“Чинор” метро бекати 50 кунга ёпилади

13 июндан бошлаб Тошкент метрополитенининг “Чинор” метро бекати реконструкция ишлари муносабати билан 50 кун муддатга йўловчилар учун вақтинча ёпилади.

Маълум қилинишича, лойиҳа доирасида бекатнинг кириш-чиқиш ҳудудлари кенгайтирилади, 4 та замонавий лифт ҳамда қўшимча 12 та турникет ўрнатилади. Бу эса йўловчилар учун янада қулай ва хавфсиз инфратузилмани яратишга хизмат қилади.

Шунингдек, йўловчилар ҳаракатида узилиш бўлмаслиги учун “Чинор” ва “Янгиҳаёт” бекатлари ўртасида махсус метробус қатнови йўлга қўйилади. Метробуслар белгиланган жадвал асосида ҳаракатланиши маълум қилинди.

Telegram I Facebook I YouTube I Instagram

Қамчиқ довонида жарликка ағдарилган автомобиль ҳайдовчиси қутқарилди

10 июнь куни эрталаб Қамчиқ довонида содир бўлган йўл-транспорт ҳодисасида жарликка тушиб кетган автомобиль ҳайдовчисига Фавқулодда вазиятлар вазирлиги қутқарувчилари тезкор ёрдам кўрсатди.

Маълум қилинишича, ҳодиса соат 07:25 атрофида халқаро аҳамиятга эга бўлган “Тошкент – Ўш” автомобиль йўлининг 163-километрида юз берган. “Spark” русумли автомобиль ҳайдовчиси бошқарувни йўқотиши оқибатида транспорт воситаси ағдарилиб, йўл четидаги жарликка тушиб кетган.

ЙТҲ натижасида ҳайдовчи жиддий тан жароҳати олмаган.

Ҳодиса жойига ФВВнинг “Қамчиқ” махсус қутқарув бошқармаси қутқарувчилари етиб келиб, махсус қутқарув крани ёрдамида автомобилни жарликдан олиб чиққан. Сўнг транспорт воситаси эвакуатор орқали белгиланган манзилга юборилган.

Telegram I Facebook I YouTube I Instagram

⚡️Ҳокимдан ноаниқ жавоб: «Иброҳим балиқчи» иши Бухорога кўчди, суд журналистларга аудиоёзувга рухсат берди

Қўшкўпир тумани ҳокими Шуҳрат Аҳмедов суд қарорларига эътироз қилиш ҳақида гапирган бир пайтда, «Иброҳим балиқчи» фермер хўжалигига оид баҳсли иш бўйича апелляция жараёни расман бошланганди.

3 июнь куни Бухоро вилояти судида Урганч туманлараро иқтисодий суди судьяси Э.Розумбетов томонидан «Иброҳим балиқчи» фермер хўжалигига нисбатан қабул қилинган ҳал қилув қарори апелляция тартибида кўрила бошланди.

Суд мажлисида раислик қилувчи судья оммавий ахборот воситалари вакилларига, жумладан, Effect.uz ходимларига суд жараёнини аудиоёзув орқали қайд этишга рухсат берди.

Шу тариқа, жамоатчилик 3 июньдаги суд мажлиси аудиоси билан танишиш имкониятига эга бўлади. Effect.uz таҳририяти мазкур иш бўйича кейинги суд жараёнларини ҳам кузатиб боради.

👉 https://youtu.be/ImNyWWPnUqg