«Мина» устида яшаётган Зарафшон маҳалласи: очиқ қолган электр шитлари, кўлга айланаётган кўчалар ва хизмати «нол» бўлган ширкат

Навоий шаҳрининг Зарафшон маҳалласи Ибн Сино кўчасида жойлашган кўп қаватли — 8, 9, 10, 11, 12 ва 13-уйлар атрофида яшовчи аҳоли томонидан сўнгги йилларда инфратузилма ва коммунал хизматлар билан боғлиқ жиддий муаммолар кўтарилмоқда. Аҳолининг айтишича, бу ҳолат узоқ йиллардан бери давом этиб келмоқда ва босқичма-босқич эмас, балки узлуксиз равишда ёмонлашиб бормоқда. Энг ачинарлиси, ушбу тизимли муаммолар маҳалланинг нафақат тилга олинган мана шу домларида, балки деярли барча кўп қаватли уйларида сурункали тарзда учраб келмоқда.

Маҳалла аҳолиси энг асосий муаммолардан бири сифатида ёмғирли кунларда кўчаларда ва уйлар атрофида сув тўпланиб қолишини таъкидламоқда. Дренаж тизимининг етарли даражада ишламаслиги ёки умуман йўқлиги сабабли, йўллар сув остида қолиб, пиёдалар ва транспорт воситаларининг ҳаракатланиши жуда қийинлашади. Машиналар кириб-чиқишда катта тўсиқларга дуч келмоқда. Аҳолининг фикрича, айрим ҳолларда ҳатто полив (суғориш) тизими сувлари ҳам кўчага оқизилиши вазиятни янада оғирлаштирмоқда.

Уйлар олдида илгари амалга оширилган асфалт ишлари ҳам маҳалла аҳлининг ҳақли норозилигига сабаб бўлмоқда. Уларнинг таъкидлашича, иссиқлик таъминоти ёки қувурлар билан боғлиқ таъмирлаш ишлари давомида асфалт қопламаси бузилган ва кейинчалик шунчаки сифатсиз тарзда «ямаб» қўйилган. Бу эса йўлнинг тез фурсатда қайта емирилишига олиб келган. Бу носозликлар бир неча йилдан бери бартараф этилмай келаётгани, аниқ ва тўлиқ таъмирлаш ишлари амалга оширилмаётгани айтилади.

Бундан ташқари, инфратузилмадаги камчиликлар қаторига аҳоли, айниқса ёш болалар ҳаёти ва соғлиғи учун тўғридан-тўғри хавф туғдираётган яна бир жиддий муаммо қўшилди. Кўп қаватли уйлар йўлакларидаги (подъездлардаги) электр шитларининг эшиклари очиқ, ичидаги юқори кучланишли симлар эса ҳеч қандай ҳимоясиз, тартибсиз равишда ташқарига чиқиб ётибди. Уйларда ёш болалар яшайди, улар билиб-билмай бу очиқ шитларга ва очиқдаги симларга тегиб кетиши ҳеч гап эмас. Кўнгилсиз ҳодиса юз берса, бунинг хавфсизлиги учун ким жавоб беради? Маҳаллий электр тармоқлари корхонасими ёки уйларга хизмат кўрсатувчи «Gulobod city 2020 professional» бошқарув компаниясими? Бу савол ҳозирча очиқ қолмоқда.

Маҳалла аҳолиси уйларга хизмат кўрсатувчи «Gulobod city 2020 professional» компанияси, ободонлаштириш хизмати ҳамда маҳаллий масъул ташкилотлар фаолиятидан ҳам мутлақо норози. Аҳолига кўра, мазкур ширкат ўз тасарруфига шаҳардаги 60 дан ортиқ кўп қаватли уйларни (домларни) олиб олган, бироқ уларга кўрсатилаётган хизмат сифати мутлақо нол даражада. Уларнинг айтишича, уй олдидаги яшил ҳудудлар мунтазам суғорилмайди, подъездлар таъмири мутлақо етарли даражада эмас. Уй ертўлалари ўз вақтида тозаланмагани сабабли улардан атрофга нохуш ҳид тарқалади. Шунингдек, кўча ва йўлакларни ёритиш тизимлари (LED чироқлар) ишламайди, умумий санитария ва тозалик ҳолати ёмонлашган.

Аҳоли ўз вақтида коммунал хизмат ҳақларини тўлаб келаётганига қарамай, эвазига сифатли хизмат кўрсатилмаётганини куйиниб таъкидламоқда.
Таъкидланишича, ушбу муаммолар бир неча бор турли масъул ташкилотлар ва ҳатто юқори инстанцияларга ҳам ёзма ва оғзаки шаклда етказилган. Бироқ шу кунгача ҳеч қандай амалий натижа сезилмаган.

Ажабланарлиси, бунга на ҳокимлик, на маҳалла, на ширкат ва на ободонлаштириш бошқармаси жон куйдиради. Ушбу камчиликлар шаҳар ҳокимлигининг муаммолар ёритиладиган телеграм каналига бир неча бор юборилган бўлса-да, натижасиз қолмоқда. Хўш, муаммо ижтимоий тармоқларда бонг уриб чиқмагунча, мутасаддилар иссиқ ўринларидан қўзғалишмайдими? Нега аҳоли эътирозлари эътиборсиз қолмоқда? Аҳоли оддий ва ҳақли талабларни илгари сурмоқда: хавфсиз йўллар, ишлайдиган дренаж тизими, соз ва хавфсиз электр тармоқлари, сифатли таъмир ва мунтазам хизмат.

Қиссадан ҳисса шуки, мутасадди ташкилотлар ушбу мурожаатга зудлик билан эътибор қаратиб, айниқса инсон ҳаётига таҳдид солаётган очиқ электр шитлари ва йўл муаммолари тезкорлик билан ҳал этилиши зарур.

Telegram I Facebook I YouTube I Instagram

Саида Мирзиёева АҚШ савдо вазири ўринбосари билан учрашди

Президент Администрацияси раҳбари Саида Мирзиёева АҚШ савдо вазири ўринбосари Дэвид Фогель билан учрашув ўтказди.

Мулоқотда Ўзбекистон ва АҚШ ўртасидаги савдо-иқтисодий ҳамкорлик, инвестициялар ҳамда шерикликнинг янги йўналишлари муҳокама қилинди.

Томонлар Америка бизнес доираларининг Ўзбекистондаги инвестициявий ва инфратузилмавий лойиҳаларга қизиқиши ортиб бораётганини таъкидлаб, бу эътиборни аниқ келишувлар ва янги иш ўринларига айлантириш муҳимлигини қайд этди.

Шунингдек, учрашувда икки мамлакат тадбиркорлари ўртасидаги амалий ҳамкорликни ривожлантиришда муҳим ўрин тутаётган Америка–Ўзбекистон ишбилармонлик ва инвестиция кенгаши фаолияти ҳам кўриб чиқилди.

Telegram I Facebook I YouTube I Instagram