Туркияда университет тадқиқотчиси отиб кетилди

16 апрель куни Туркиянинг Баликесир вилоятида қуролли ҳужум оқибатида Баликесир университети Ҳуқуқ факультети илмий ходими Семих Качмаз ҳалок бўлди. У дўкон ёнидаги ошхонада овқатланаётган пайтда ўққа учраган.

Ҳужумчилар мотоциклда келиб, алкоголь дўконига қарата ўт очган. Оғир яраланган Качмаз шифохонада вафот этган.

Полиция 60 дан ортиқ кузатув камераларини ўрганиб, гумонланувчиларни аниқлади. Улар Бандирма туманида қўлга олиниб, қурол билан ушланган. Ҳозирда тергов давом этмоқда.

Сўнгги вақтларда Туркияда таълим муассасаларида содир бўлаётган зўравонлик ҳолатлари ортиб бормоқда. Шу сабаб мактабларда хавфсизлик назорати кучайтирилди.

Telegram I Facebook I YouTube I Instagram

Афғон уруши қурбонлари оилаларига янги имтиёзлар берилади

Президентнинг 16 апрелдаги 62-сонли фармонига кўра, Афғонистондаги ҳарбий ҳаракатларда ҳалок бўлганлар оилаларига коммунал тўловларнинг бир қисми компенсация қилиб берилади. Ушбу ёрдам ҳалок бўлган ҳарбийларнинг ота-оналари ва беваларига тегишли.

Бу қарор қурбонлар оилаларини моддий қўллаб-қувватлашга қаратилган.

1979–1989 йиллардаги Афғон уруши 9 йилдан ортиқ давом этган. Унда Ўзбекистондан 64,5 мингдан зиёд йигит иштирок этган, 1500 дан ортиғи ҳалок бўлган, 2500 га яқини эса жароҳатланган.

Telegram I Facebook I YouTube I Instagram

Сирдарё бўйидан 50 кг “эгаси йўқ” наркотик топилди

ДХХ Чегара қўшинлари томонидан ўтказилган тадбирда Фарғона вилояти Бешариқ туманида, Сирдарё бўйидан 4 та полиэтилен қоп топилди.

Текширувда қоплар ичида 47 кгдан ортиқ гашиш, қарийб 8 кг опий, шунингдек минглаб дори воситалари аниқланиб, расмийлаштириб олинди.

Ҳолат юзасидан Жиноят кодексининг 246-моддаси (контрабанда) билан жиноят иши қўзғатилди.

Telegram I Facebook I YouTube I Instagram

Россия чегарачилари телефон ва гаджетларни текшириши мумкин

2026 йил апрель ойидан Россиянинг «Давлат чегараси тўғрисида»ги қонунига киритилган ўзгаришлар кучга кирди. Унга кўра, чегара хизмати ходимлари аэропорт ва вокзалларда Россияга кирувчи ёки чиқувчи шахсларнинг смартфон, планшет ва ноутбук каби электрон қурилмаларини текшириши мумкин.

Текширув фақат гумон ҳолатларида — контрабанда, экстремизм ёки қоидабузарлик шубҳаси бўлганда амалга оширилади. Оммавий текширув эмас, балки танлаб ўтказилади.

Қурилма беришдан бош тортилса, бу буйруққа бўйсунмаслик сифатида баҳоланиб, 5 минг–7 минг рубл жарима ёки 15 суткагача қамоқ жазоси қўлланилиши мумкин.

Шу каби амалиёт АҚШ, Канада ва Европа давлатларида ҳам мавжуд.

Telegram I Facebook I YouTube I Instagram

Россияга ишга юбориш баҳонаси ортида одам савдосига чек қўйилди

Фарғона вилоятида аёлни Москва шаҳрига ишлашга юборишни ваъда қилиб, одам савдоси билан шуғулланган шахслар фош этилди. Бу ҳақда вилоят ИИБ Ахборот хизмати хабар берди.

Маълум қилинишича, гумонланувчилар аёлга чет элда иш топиб беришни ваъда қилиб, уни алдаш йўли билан одам савдоси жиноятини содир этган.

Ҳуқуқни муҳофаза қилувчи органлар томонидан мазкур ҳолат фош этилиб, тегишли чоралар кўрилган. Ҳозирда ушбу ҳолат юзасидан қонуний тартибда тергов ҳаракатлари олиб борилмоқда.

Telegram I Facebook I YouTube I Instagram

Ҳўрмуз очилгандан сўнг нефть нархи кескин тушди

Жаҳон бозорида «Brent» нефти нархи 89–90 долларгача пасайди. «Yahoo Finance» маълумотига кўра, нарх бир кунда қарийб 10 фоизга тушган.

Бунга Эрон томонидан Ҳўрмуз бўғози барча тижорат кемалари учун қайта очилгани сабаб бўлди. Бу қарор нефть таъминоти барқарорлашиши кутилмаларини кучайтирди.

Аввалроқ можаро сабаб нархлар кескин ошиб, 120 долларгача етган эди. Ҳўрмуз орқали эса дунё нефтининг қарийб 20 фоизи ўтади.

Telegram I Facebook I YouTube I Instagram

Бухорода маст ҳайдовчи 5 ёшли болани уриб кетди

15 апрель куни Бухоро шаҳрида Chery ҳайдовчиси маст ҳолатда йўл-транспорт ҳодисаси содир этди.

У “Алпомиш” кўчасида аввал тўхтаб турган Onix’га урилган, сўнг бошқарувни йўқотиб Lacetti билан тўқнашган ва пиёдалар йўлакчасидан ўтаётган 2021 йилда туғилган болани уриб юборган.

Ҳайдовчи воқеа жойидан қочиб кетган. Кейинчалик унинг маст ҳолатда автомобиль бошқаргани тасдиқланган.

Ҳолат юзасидан унга нисбатан маъмурий баённома расмийлаштирилди. Ҳайдовчилик ҳуқуқидан камида 3 йилга маҳрум қилиш ва жарима қўлланиши мумкин.

Telegram I Facebook I YouTube I Instagram

Туркияда ғазолик шифокор учун ноодатий намойиш ўтказилди

Туркиянинг Ризе шаҳрида доктор Камол Соғлом фаластинлик шифокор Ҳоссам Абу Сафияни қўллаб-қувватлаб, ноодатий тарзда намойиш ўтказди.

У қўллари боғланган, бўйнига арқон солинган ҳолда туриб, Ғазода ишлаган ва 2024 йилдан бери қамоқда сақланаётган болалар шифокори тақдирига эътибор қаратди.

Намойишга талабалар ҳам қўшилиб, бирдамлик билдиришди.

Telegram I Facebook I YouTube I Instagram

Тошкентда наркосавдогар эр-хотин ушланди

Янги ҳаёт туманида ўтказилган тезкор тадбирда йирик миқдордаги гиёҳвандлик воситалари аниқланди.

Дастлаб илгари судланган шахс қўлга олиниб, ундан наркотик моддалар топилди. Кейинчалик яна икки гумонланувчи, жумладан эр-хотин ҳам ушланди.

Уларнинг уйидан ва яширин жойлардан жами 1 кг 777 грамм гиёҳвандлик воситалари мусодара қилинди. Моддалар қиймати қарийб 2,6 миллиард сўмни ташкил этади.

Ҳолат юзасидан жиноят иши қўзғатилиб, гумонланувчилар қамоққа олинди.

Telegram I Facebook I YouTube I Instagram

100 тонна қулупнай яроқсиз ҳолга келди

Ўзбекистондан экспорт қилинган 100 тоннадан ортиқ қулупнай манзилга етиб бормасдан бузилган. Ўсимликлар карантини ва ҳимояси агентлиги маълумотига кўра, бунга транспортда ташиш жараёнида ҳарорат режимига риоя қилинмагани сабаб бўлган.

Агентлик айрим тадбиркорларни ҳам танқид қилиб, сифатсиз маҳсулотларни яшириб экспорт қилиш ҳолатлари мамлакатнинг халқаро бозордаги обрўсига зарар етказаётганини таъкидлади.

Telegram I Facebook I YouTube I Instagram

Эрон ядровий дастурини тўхтатишга рози бўлди

АҚШ президенти Доналд Трамп Эрон ядровий дастурини номаълум муддатга тўхтатишга рози бўлганини айтди. У News Nation га берган интервьюсида бу саволга «Ҳа» деб жавоб берди.

Бироқ Эрон томони буни рад этиб, Reuters га Теҳрон ва Вашингтон ўртасида ҳали ҳам жиддий келишмовчиликлар борлигини ва ядровий масала бўйича келишувга
эришилмаганини билдирди.

Telegram I Facebook I YouTube I Instagram

“Ёрдам” ниқоби остидаги хайрия: ДХХ фуқароларни огоҳлантирди

Сўнгги вақтларда ижтимоий тармоқларда хайрия ниқоби остида пул йиғиш ҳолатлари кўпайгани маълум қилинди. Мазкур маблағлар аслида эҳтиёжмандларга эмас, балки террорчилик фаолиятига йўналтирилаётгани қайд этилмоқда.

Маълумотларга кўра, халқаро террористик ташкилотлар маблағ йиғишнинг янги усулларини қўллаб, инсонпарварлик туйғуларини суиистеъмол қилмоқда. Улар ижтимоий тармоқларда турли видеолар ва эълонлар тарқатиб, фуқароларни чет давлатлардаги нотинч ҳудудларда азият чекаётган инсонларга ёрдам беришга ундамоқда.

Telegram I Facebook I YouTube I Instagram

Педагоглар учун ипотека субсидиясига аризалар 20 апрелдан қабул қилинади

Олий малака тоифасига (бош ўқитувчи лавозимига) эга педагоглар учун ипотека кредити бўйича субсидияга аризалар қабул қилиш жорий йилнинг 20 апрель куни соат 14:00 да бошланади.

Субсидия ҳукуматнинг тегишли қарорига мувофиқ, ипотека кредити бўйича бошланғич бадалнинг 25 фоизи қоплаб берилади.

Ушбу дастур доирасида субсидия олиш учун ариза берувчи белгиланган ижтимоий мезонларга мос бўлиши ва кредит тарихи камида битта тижорат банкининг ички талабларига жавоб бериши керак.

Ариза берувчи ёки турмуш ўртоғи номида республика бўйича икки ва ундан ортиқ уй-жой бўлмаслиги, шунингдек камида 15 йиллик педагогик стажга ҳамда олий малака тоифаси ёки бош ўқитувчи лавозимига эга бўлиши талаб этилади.

Субсидия олиш учун Давлат хизматлари марказларига мурожаат қилиши, my.gov.uz портали ёки MyGov мобил иловаси орқали ариза топширишлари мумкин.

Telegram I Facebook I YouTube I Instagram