Зеленский депутатларни фронтга юбориш билан қўрқитди

Украина президенти Владимир Зеленский Олий рада депутатлари ўз вазифаларини қонун доирасида бажармаса, уларни фронтга юбориш имконияти кўриб чиқилиши мумкинлигини билдирди.

“Халқ депутатлари ё парламентда Украина қонунчилигига мувофиқ хизмат қилади, ёки мен парламент вакиллари билан мобилизация тўғрисидаги қонунга ўзгартиш киритиш масаласини муҳокама қилишга тайёрман. Бу ҳолда депутатлар ҳам фронтга бориши мумкин”, — деди Зеленский.

Бундан олдин Зеленский партияси — “Халқ хизматкори” фракцияси раҳбари ўринбосари Андрей Мотовиловец Forbes.ua нашрига берган интервьюсида Олий раданинг қарийб 40 нафар депутати мандатини топширишга тайёр эканини айтган.

Март ойида “Украинская правда” нашри ҳукмрон партия вакилларига таяниб, IX чақириқ Олий рада амалда ўз салоҳиятини тугатганини, қўмиталар иши издан чиқаётганини ва айрим депутатлар Зеленский билан ҳамкорлик қилишдан бош тортаётганини хабар қилган.

Telegram I Facebook I YouTube I Instagram

АҚШ “Шаҳид”га ўхшаш дрон ишлаб чиқиб, араб мамлакатларига қарши қўлламоқда — Эрон ТИВ раҳбари

Эрон ташқи ишлар вазири Аббос Арақчи АҚШ Эроннинг “Шаҳид” туридаги дронларига ўхшаш учувчисиз аппарат яратиб, уни араб мамлакатларидаги нишонларга қарши қўлламоқда.

“Америкаликлар бизнинг “Шаҳид”га ўхшаш дрон яратган. Уни “Лукас” деб аташмоқда.

Улар шу дрон орқали араб мамлакатларидаги нишонларга зарба бермоқда”, — деди Арақчи “Al Araby Al Jadeed” нашрига берган интервьюсида.

Эслатиб ўтамиз, 28 февраль куни АҚШ ва Исроил Эрон ҳудудидаги объектларга, жумладан Теҳрондаги нишонларга зарба берган. Бу ҳужумлар оқибатида вайроналар ва тинч аҳоли орасида қурбонлар борлиги хабар қилинган.

Шундан сўнг Эрон ҳам жавоб зарбалари бериб, Исроил ҳудудлари ва Яқин Шарқдаги АҚШ ҳарбий объектларига ҳужумлар уюштирмоқда.

Telegram I Facebook I YouTube I Instagram

Москвада икки трамвай тўқнашиши оқибатида 22 киши жабрланди

Москва шаҳрининг шимоли-ғарбида икки трамвай тўқнашиши оқибатида 22 киши жабрланган, улар орасида 5 нафар бола ҳам бор. Бу ҳақда шаҳар давлат автоинспекцияси маълум қилди.

Маълум қилинишича, барча жабрланганларга зарур тиббий ёрдам кўрсатилмоқда.

Ҳодиса 6-йўналишда ҳаракатланган икки трамвай ўртасида соат тахминан 09:30 атрофида Водников кўчасидаги 1-уй ёнида содир бўлган.

ЙТҲ сабабли “Свобода” кўчасидан Волоколамск шоссеси томон, шаҳар маркази йўналишидаги ҳаракат вақтинча тўхтатилган.

Telegram I Facebook I YouTube I Instagram

Яқин Шарқдаги можарони адолатли якунлайдиган ҳар қандай минтақавий ташаббус қўллаб-қувватланади — Эрон ТИВ раҳбари

Эрон ташқи ишлар вазири Аббос Арақчи Яқин Шарқдаги можарони Теҳрон учун адолатли тарзда якунлашга хизмат қиладиган ҳар қандай минтақавий ташаббусни мамлакат қўллаб-қувватлашини билдирди.

Унинг айтишича, ҳозирча урушни тўхтатиш бўйича аниқ ташаббуслар мавжуд эмас.

“Ҳозирги пайтда урушни тўхтатишга қаратилган аниқ ташаббус йўқ.

Бироқ можарони адолатли якунлашга олиб келадиган ҳар қандай минтақавий ташаббусни биз мамнуният билан қўллаб-қувватлаймиз”, — деди Арақчи “Al-Araby Al-Jadeed” нашрига берган интервьюсида.

Бундан аввал Эрон президенти Масъуд Пезешкиан ҳам Ислом мамлакатлари томонидан илгари сурилган, минтақада бирдамликни мустаҳкамлаш ва Яқин Шарқда тинчлик ҳамда барқарорликни тиклашга қаратилган ҳар қандай ташаббус Теҳрон томонидан қўллаб-қувватланишини маълум қилган.

Telegram I Facebook I YouTube I Instagram

Департамент ходими пора билан қўлга олинди

Бош прокуратура ҳамда Департаментнинг Шахсий хавфсизлик бошқармаси томонидан ДХХ билан ҳамкорликда тезкор тадбир ўтказилди.

Бош прокуратуранинг маълум қилишича, 2026 йил 14 март куни “Ozod U” МЧЖ иш юритувчиси Д.З. ариза билан мурожаат қилиб, таниши О.Х. томонидан Жиззах шаҳар мактабгача таълим бўлими томонидан харид қилинаётган электрон доскалар бўйича ўтказилаётган тендерда мазкур жамиятнинг ғолиб бўлиши учун шароит яратиб бериш эвазига 85 млн сўм пул талаб қилинаётганини маълум қилган.

2026 йил 15 март куни ўтказилган тезкор тадбир давомида О.Х. аризачи Д.З.дан 85 млн сўм пул маблағини олган вақтида ушланган.

Шунингдек, ушбу маблағнинг 30 млн сўми Департаментнинг Пахтакор тумани бўлими ходими Б.П.га берилиши белгилангани аниқланган.

Тадбир давомида Департаментнинг Пахтакор тумани бўлими ходими Б.П. фуқаро О.Х.дан 30 млн сўм пул маблағини олган вақтида ушланган.

Мазкур ҳолат юзасидан Жиноят кодексининг 168-моддаси (Фирибгарлик) 3-қисми “в” банди билан жиноят иши қўзғатилиб, гумонланувчи шахс процессуал тартибда ушланган.

Telegram I Facebook I YouTube I Instagram

Муҳаммад ал-Хоразмий номидаги ихтисослаштирилган мактабида Наврўзни катта сайл билан кутиб олинди

Ихтисослаштирилган таълим муассасалари агентлиги тизимидаги мактабда - Наврўз байрами муносабати билан ташкил этилган байрам сайли доирасида миллий қадриятларимиз ва баҳорий анъаналаримизни ўзида мужассам этган сумалак ва ҳалим сайли, халқ ўйинлари, миллий урф-одатлар намойиши ҳамда турли маданий ва кўнгилочар чиқишлар ташкил этилди. Тадбир давомида меҳмонлар учун байрамона муҳит яратилиб, дўстона суҳбат ва самимий мулоқотлар учун кенг имкониятлар яратилди.

Шу билан бирга “Юрт ободлиги, аввало, маҳалладдан бошланади!” шиори остида Агентлик тизимидаги барча таълим ташкилотларида умумхалқ хайрия хашари  ҳам ўтказилди.

Telegram I Facebook I YouTube I Instagram

Музаффар Камилов янги лавозимга тайинланди

Президент фармони билан Музаффар Камилов Президент Администрацияси Диний-маърифий масалалар бўйича департаментининг бошлиғи лавозимига тайинланди.

Шу муносабат билан Президентнинг вакиллик органлари, нодавлат нотижорат ташкилотлар, дин ва ёшлар масалалари бўйича маслаҳатчиси ўринбосари лавозимидан озод этилди.

Telegram I Facebook I YouTube I Instagram

Нефть нархи баррели 104 долларгача кўтарилди

Ҳафта бошида жаҳон нефть бозорида нархлар ўсишни кўрсатди. Савдо маълумотларига кўра, Brent маркаси нефти баррели 104 доллардан юқори нархда савдоланмоқда.

Тошкент вақти билан 09:36 ҳолатига кўра, май ойи учун Brent фьючерслари 1,56 фоизга ошиб, баррели 104,75 долларга, WTI нефти эса 1,1 фоизга кўтарилиб, 97,91 долларга етган.

Шанба куни АҚШ президенти Дональд Трамп агар Ормуз бўғози орқали кемалар ҳаракатига тўсқинлик қилинса, Эроннинг асосий нефть экспорт марказларидан бири бўлган Харк ороли нефть инфратузилмасига зарба берилиши мумкинлигини билдирган.

Кейинчалик у оролдаги ҳарбий нишонларга ҳужум амалга оширилганини маълум қилган.

KCM Trade бозор таҳлилчиси Тим Уотерернинг фикрича, бозорлар бу воқеаларга сезиларли реакция билдирмоқда.

“Менимча, нефть бозори сўнгги воқеаларга ижобий муносабат билдирмайди. Харк оролининг тақдири ноаниқлигича қолмоқда, бу эса унинг жаҳон энергия таъминотидаги аҳамиятини ҳисобга олганда, ҳафта бошида бозорда яна хавотирли муҳит юзага келишига олиб келиши мумкин”, — деди у.

Telegram I Facebook I YouTube I Instagram

ТИВ матбуот котиби лавозимидан озод этилди

Аҳрор Бурхонов Ўзбекистоннинг Вашингтондаги Бош консули этиб тайинланди.

У бунга қадар Ўзбекистон Ташқи ишлар вазирлиги матбуот котиби сифатида ишлаб келаётган эди.

Telegram I Facebook I YouTube I Instagram

Макрон Эронни Яқин Шарқдаги ҳужумларни тўхтатишга чақирди

Франция президенти Эммануэль Макрон Эрон президенти Масъуд Пезешкиан билан телефон орқали мулоқот ўтказганини ва суҳбат давомида Теҳронни Яқин Шарқ мамлакатларига қарши ҳужумларни тўхтатишга чақирганини маълум қилди.

Макроннинг айтишича, Эрон минтақа давлатларига қарши ҳам тўғридан-тўғри, ҳам воситачилар орқали амалга оширилаётган ҳужумларни зудлик билан тўхтатиши керак.

“Мен Эрон президенти Масъуд Пезешкиан билан гаплашдим.

Уни минтақа мамлакатларига қарши, жумладан Ливан ва Ироқ орқали амалга оширилаётган қабул қилиб бўлмайдиган ҳужумларни дарҳол тўхтатишга чақирдим”, — деб ёзди Макрон X ижтимоий тармоғида.

Шунингдек, у Ормуз бўғозида кемалар ҳаракати эркинлигини тез орада тиклаш зарурлигини ҳам таъкидлади.

Telegram I Facebook I YouTube I Instagram

Лос-Анжелесда “Оскар” мукофоти ғолиблари тақдирланди

15 март куни АҚШнинг Лос-Анжелес шаҳрида Америка киносанъати ва фанлари академиясининг 98-маротаба ўтказилган “Оскар” мукофоти тақдирлаш маросими бўлиб ўтди.

👉 https://effect.uz/n/85

Telegram I Facebook I YouTube I Instagram

БАА ҳаво ҳудуди ёпилди. Тошкентдан Дубайга учган самолетлар орқага қайтарилди

БАА ҳаво ҳудудининг қисман ёпилиши муносабати билан Тошкентдан Дубайга учган рейслар жўнаш аэропортига қайтмоқда. Бу ҳақда Uzbekistan Airports хабар бермоқда.

Маълум қилинишича, “Centrum Air” авиакомпаниясининг Тошкент – Дубай йўналиши бўйича C6-351 рейси ҳамда “Uzbekistan Airways” авиакомпаниясининг Тошкент – Дубай йўналиши бўйича HY-333 рейси Тошкент халқаро аэропортига қайтмоқда.

Telegram I Facebook I YouTube I Instagram

1 апрелдан ёқилғи қуйиш шохобчаларида тўловлар фақат нақдсиз шаклда амалга оширилади

Жорий йилнинг 1 апрелидан бошлаб бир қатор товар ва хизматлар учун тўловларни фақат нақдсиз тартибда амалга ошириш белгиланмоқда.

Жумладан, ёқилғи қуйиш шохобчаларида ҳам ҳисоб-китоблар эндиликда фақат банк карталари, QR-код ёхуд мобил иловалар ёрдамида қабул қилинади.

Бу ўзгаришдан кўзланган асосий мақсад — яширин иқтисодиёт улушини камайтириш ҳамда молиявий айланма шаффофлигини оширишдир.

Telegram I Facebook I YouTube I Instagram

Эрон Дубай ва Доҳадаги айрим ҳудудлар аҳолисини тарк этишга чақирди

Эълон қилинган огоҳлантиришда яқин соатларда ушбу нуқталарга ҳужумлар бўлиши мумкинлиги айтилган.

👉 https://effect.uz/n/86

Telegram I Facebook I YouTube I Instagram

Президент Олмалиқ кон-металлургия комбинатида 3-мис бойитиш фабрикасини ишга тушириш маросимида қатнашди

Президент Шавкат Мирзиёев иштирокида Олмалиқ кон-металлургия комбинатида 3-мис бойитиш фабрикасини ишга тушириш маросими бошланди.

“Бу ишларимизнинг барчаси бир мақсадга – иқтисодиётимизни янада ривожлантириш, янги иш ўринлари яратиш, маҳаллаларга Янги Ўзбекистон қиёфасини олиб кириш ва албатта халқимизнинг турмуш фаровонлигини янада оширишга қаратилган.

Бугун ишга тушаётган 3-мис бойитиш фабрикаси ҳам ана шу кенг кўламли ишларимиз ва бунёдкор халқимизнинг фидокорона меҳнати намунаси, десак айни ҳақиқатни айтган бўламиз”, – деди Президент.

Қиймати 2 миллиард 700 миллион долларлик ушбу лойиҳа шунчаки корхона эмас, балки мамлакатимиз саноат қудратини янада мустаҳкамлайдиган, табиий бойликларимизни чуқур қайта ишлашга хизмат қиладиган замонавий индустриал мажмуа экани таъкидланди.

Telegram I Facebook I YouTube I Instagram

“Ракеталар овозини эшитиб, жуда қаттиқ қўрқдим” — қорақалпоғистонлик қиз

Яқин Шарқдаги вазият туфайли Қувайтдан Ўзбекистонга эвакуация қилинган қорақалпоғистонлик қиз ўз кечинмалари ҳақида сўзлаб берди:

“Ракеталар овозини эшитиб, жуда қаттиқ қўрқдим. Сабаби бундай воқеаларни олдин кўзим билан кўрган эмасман. Ушбу воқеалардан кейин консул ходимлари билан боғландим, улар ёрдам беришди.

Саудия Арабистонида сайёҳлар кўп, чунки у ерга Умра зиёрати учун кўп одамлар ташриф буюришади, Қувайтда эса туристлар камчиликни ташкил қилади.

Шу сабаб “бу ерда қолиб кетаманми” деган ўйлар мени тинч қўймади. Бироқ Худога шукур ундай бўлмади, ватанимга қайтдим бу учун барчага ташаккур билдираман”, - деди эвакуация қилинган қиз.

Telegram I Facebook I YouTube I Instagram

Андижонда “судсиз жазо” қўллаб аёл сочини мажбуран олиш ҳолати муҳокамаларга сабаб бўлди

Ижтимоий тармоқларда тарқалган видеоларда Андижон вилоятида бир аёлнинг сочи мажбуран олиб ташланаётгани акс этгани жамоатчилик орасида кенг муҳокамаларга сабаб бўлмоқда.

Маълумотларга кўра, видеодаги шахс бу биринчи ҳолат эмаслигини, аввал ҳам шунга ўхшаш воқеа бўлганини айтган. Мутахассислар ҳар қандай шахсни суд қарорисиз жазолаш, уни таҳқирлаш ёки камситиш қонунга зид эканини таъкидламоқда.

Жамоатчилик воқеа юзасидан ваколатли идоралар томонидан тезкор текширув ўтказилиб, ҳолатга ҳуқуқий баҳо берилишини кутмоқда.

Telegram I Facebook I YouTube I Instagram

Мартнинг иккинчи ярмида 50 куб метр газ 1000 сўмдан ҳисобланади

Ўзбекистонда газ истеъмоли бўйича қишки базавий меъёр муддати тугади. Бу ҳақда Энергетика вазирлиги хабар бермоқда.

Вазирликнинг эслатишича, март ойи бошида ҳаво ҳарорати кескин совигани сабабли иситиш мавсуми учун белгиланган 500 куб метрлик базавий меъёр 15 мартга қадар амал қилган.

“Ўзгидромет” маълумотига кўра, 16–20 март кунлари республика ҳудудларида ҳаво ҳарорати кундузи +22°С, кечаси эса +10°С гача кўтарилиши кутилмоқда.

Шу муносабат билан 16 мартдан 1 ноябргача аҳоли учун ойлик 100 куб метрлик базавий меъёр амал қилади (Қорақалпоғистон Республикаси ва Хоразм вилоятида 1 октябргача).

Март ойи ҳисоб-китобига кўра:

• 1–15 март кунлари учун базавий меъёр — 250 куб метр,

• 16–31 март кунлари учун — 50 куб метрни ташкил этади.

Шу сабабли ойнинг иккинчи ярмида истеъмол қилинган 50 куб метр газ ҳам базавий тариф — 1000 сўмдан ҳисобланади (1800 сўм эмас).

Барча ҳисоб-китоблар бўйича тушунтиришлар “Ҳудудгазтаъминот” АЖ ва унинг ҳудудий филиаллари томонидан берилади.

Telegram I Facebook I YouTube I Instagram

Ёнғиндан сўнг Park in Mall фаолияти вақтинча тўхтатилди

15 март куни Тошкентнинг Шайхонтоҳур туманида жойлашган Park in Mall савдо-кўнгилочар марказида ёнғин содир бўлди. Фавқулодда вазиятлар вазирлиги маълумотига кўра, марказ фаолияти ёнғин хавфсизлиги бўйича аниқланган камчиликлар бартараф этилгунча вақтинча тўхтатилди.

Ёнғин ҳақида хабар соат 13:18 да келиб тушган. Қутқарувчилар воқеа жойига бир дақиқада етиб бориб, соат 13:28 да ёнғинни ўчиришга муваффақ бўлган.

Ҳодиса оқибатида марказнинг 3-қаватида 25 квадрат метр майдон зарар кўрган. Жароҳатланганлар йўқ. Маълум қилинишича, ёнғин болалар ўйингоҳида эмас, бошқа ҳудудда юз берган.

Telegram I Facebook I YouTube I Instagram

“Ўзйўлкўприк” мансабдор шахси пора билан қўлга тушди

“Ўзйўлкўприк” кластери давлат муассаси Қорақалпоғистон Республикаси филиали мансабдор шахси хизмат мавқеидан фойдаланиб, қинғир ишга қўл урди.

Маълум бўлишича, у қурилиш фаолияти билан шуғулланувчи МЧЖга ўзининг юқори лавозимда ишловчи танишлари орқали “Беруний-Тўрткўл” А380-сонли магистрал йўл қурилиши лойиҳасининг 5 километрлик иш ҳажмини олиб бериш эвазига 10 минг доллар талаб қилган.

Давлат хавфсизлик хизматининг Қорақалпоғистон Республикаси бўйича бошқармаси ходимлари томонидан ўтказилган тезкор тадбирда ушбу мансабдор шахс сўралган пул маблағини МЧЖ раҳбаридан олган вақтида ушланган.

Ҳозирда унга нисбатан Жиноят Кодексининг 168-моддаси 3-қисми “в” банди ва 28,211-моддаси 1-қисми билан жиноят иши қўзғатилиб, тергов ҳаракатлари олиб борилмоқда.

Telegram I Facebook I YouTube I Instagram