“Крокус Сити Холл”даги теракт ижрочиларига умрбод қамоқ жазоси берилди

Москва шаҳридаги “Крокус Сити Холл” концерт залида содир этилган теракт бўйича ишни кўриб чиққан ҳарбий суд тўрт нафар айбланувчиларга нисбатан ҳукм ўқиди.

Иккинчи Ғарбий округ ҳарбий суди судлов ҳайъати Москва шаҳар судида ўтказилган сайёр судда терактнинг бевосита ижрочилари деб топилган Шамсидин Фаридуний, Далержон Мирзоев, Маҳаммадсобир Файзов ва Саидакрамий Рачаболизодага умрбод қамоқ жазоси тайинлади.

Суд қарорига кўра, маҳкумлар жазонинг бир қисмини қамоқхонада, қолган қисмини эса алоҳида режимдаги колонияда ўтайди.

Шунингдек, уларнинг ҳар бирига 990 минг рубль миқдорида жарима белгиланди.

Ҳукмга биноан:

Шамсидин Фаридуний дастлабки 18 йил;

Далержон Мирзоев ва Маҳаммадсобир Файзов — 17 йилдан;

Саидакрамий Рачаболизода — 16 йилни қамоқхонада ўтайди.

Шунингдек, теракт ижрочилари ижарага олган квартира эгаси Алишер Қосимов 22,5 йил муддатга озодликдан маҳрум этилди.

Террористларга автомобил сотган Диловар Исломов, унинг отаси Исроил Исломов ва акаси Аминжон Исломов 19 йил 11 ой муддатга қамоқ жазосига ҳукм қилинди.

Теракт бўйича жиноят ишини кўриб чиқиш етти ой давом этди. Суд жараёнида прокурор айбланувчиларга умрбод қамоқ жазоси тайинлашни сўраган эди.

Telegram I Facebook I YouTube I Instagram

Эроннинг янги Олий раҳбари яралангани тасдиқланди

Эроннинг янги Олий раҳбари Мужтабо Хоманаий яраланган, бироқ унинг аҳволи ҳозир барқарор.

Бу ҳақда республика Ташқи ишлар вазирлиги матбуот котиби Исмоил Бақоий Corriere della Sera нашрига берган интервьюсида маълум қилди.

“У яраланган, аммо аҳволи яхши. У қачон биринчи нутқини сўзлашини билмайман”, — деди Бақоий.

The Guardian нашри Эроннинг Кипрдаги элчиси Алирезо Солариёнга таяниб хабар беришича, Мужтабо Хоманаий 28 февраль куни АҚШ ва Исроил томонидан Эрон Олий раҳбари қароргоҳига берилган зарба вақтида яраланган.

Мазкур ҳужум оқибатида унинг отаси — Эроннинг собиқ Олий раҳбари Али Хоманаий ҳамда оиласининг яна олти нафар аъзоси ҳалок бўлган.

Шунингдек, қароргоҳ ҳам тўлиқ вайрон бўлган.

Дипломатнинг айтишича, Мужтабо Хоманаийнинг ҳозиргача омма олдида чиқиш қилмагани унинг саломатлиги билан боғлиқ.

“Бундай ҳолатда у нутқ сўзлашни маъқул кўрмаяпти, деб ўйлайман”, — деди элчи.

Telegram I Facebook I YouTube I Instagram

Бекободда 11-синф ўқувчиси пичоқлаб ўлдирилди

Бекобод шаҳрида вояга етмаганлар орасида юз берган жанжал фожиа билан якунланди.

5-март куни бир гуруҳ ўсмирлар орасида оғзаки тортишув чиқиб, можаро вақтида улардан бири ошхона пичоғи билан 11-синф ўқувчисининг кўкрак қисмига жароҳат етказган.

Жабрланувчи шифохонага олиб борилган, аммо кўрсатилган тиббий ёрдамга қарамай вафот этган.

Ҳолат юзасидан Ўзбекистон Бош прокуратураси томонидан Жиноят кодексининг 97-моддаси (қасддан одам ўлдириш) билан жиноят иши қўзғатилди. Гумонланувчи вояга етмаган шахс процессуал тартибда ушланган.

Telegram I Facebook I YouTube I Instagram

Роналду Саудия Арабистонига қачон қайтиши маълум бўлди

“Ал Наср” ҳужумчиси Криштиану Роналду терма жамоалар ўйинларидан кейин Саудия Арабистонига қайтиши кутилмоқда. Бу ҳақда “Asharq Al-Awsat “нашри хабар берди.

Маълум қилинишича, футболчи 3 апрель куни бўлиб ўтадиган учрашувда “Ал Наср” жамоаси сафида “Ан-Нажма”га қарши майдонга тушиши мумкин.

Қайд этиш керак, айни вақтда португалиялик футболчи оиласи билан биргаликда Испаниянинг Мадрид шаҳрида бўлиб турибди.

У ерда Роналду “Ал Файҳа”га қарши кечган баҳсда олган жароҳатидан қутулиш учун реабилитация дастурини бошлаган.

Бироқ айрим кузатувчилар унинг кетишини Яқин шарқ давлатларида кузатилаётган кескин вазият билан ҳам боғлашмоқда.

Маълумот ўрнида, Яқин Шарқдаги кескинликка қарамай Саудия Арабистони чемпионати одатий тартибда давом этмоқда.

Ҳозирча “Ал Наср” Роналдусиз ҳам турнир жадвалида етакчиликни сақлаб турибди. Бироқ энг яқин таъқибчилар ундан атиги 2–3 очко орқада бормоқда.

Telegram I Facebook I YouTube I Instagram

“Бир соат ичида йўқ қилишимиз мумкин” — Трамп Эрон энергетика тизимини йўқ қилиш билан таҳдид қилди

АҚШ президенти Дональд Трамп Эронга қарши зарбалар янада кучайтирилиши мумкинлигини билдириб, мамлакатнинг энергетика инфратузилмаси тўлиқ йўқ қилиб юборилиши мумкинлигини айтди. Бу ҳақда CNN хабар берди.

“Биз Теҳроннинг айрим ҳудудларига ва бошқа жойларга шундай зарбалар беришимиз мумкинки, улар учун мамлакатни қайта тиклаш деярли имконсиз бўлиб қолади.

Лекин биз бундай бўлишини истамаймиз.

Агар хоҳласак, электр энергияси тизимига зарба бериб, уни бир соат ичида йўқ қилишимиз мумкин, уни тиклаш эса 25 йил вақт олади.

Шунинг учун идеал ҳолатда биз бундай қилмасликни хоҳлаймиз”, — деди Трамп.

Айни пайтда, Financial Times нашрининг ёзишича, АҚШнинг Эронга қарши ҳаракатлари ҳатто ҳукуматга мухолиф бўлган айрим эронликлар томонидан ҳам қўллаб-қувватланмаяпти.

Нашрга кўра, АҚШ ва Исроил зарбалари натижасида Эроннинг собиқ олий раҳбари Али Хоманаий ҳалок бўлганидан кейин айрим эронликлар бу воқеа ҳокимият алмашишига олиб келиши мумкин,
деб умид қилган. Бироқ кенг кўламли бомбардимонлар, инфратузилманинг вайрон бўлиши ва мингдан ортиқ тинч аҳоли ҳалок бўлгани жамоатчилик кайфиятини тезда ўзгартирган.

“Бизни бомбардимон қилишмаслиги керак эди”, — деган ёш эронлик аёл ўз уйи яқинидаги кучли портлашдан кейин.

Нашр таъкидлашича, уруш фонида жамиятнинг бир қисмида миллий бирлик ҳисси кучайган ва мамлакат парчаланиб кетишидан қўрқув ортган.

Шу боис, аввал ҳокимият алмашишини истаган айрим эронликлар ҳам энди энг муҳими тинчлик ва барқарорлик эканини таъкидламоқда.

Telegram I Facebook I YouTube I Instagram

Қозоғистонга алоқадор хакерлар Ўзбекистон идораларига ҳужум қилгани айтилмоқда

Киберхавфсизлик компанияси VieMRey хисоботига кўра, «Hydra Saiga» номли хакерлик гуруҳи Ўзбекистоннинг бир қатор давлат идораларига киберхужум уюштирган.

Таҳлилчиларга кўра, ҳужумлар асосан Сув хўжалиги вазирлиги, айрим вилоят ҳокимликлари ҳамда сув ресурслари билан боғлиқ илмий институтларга қаратилган.

Мутахассислар хакерларнинг асосий мақсади Сирдарё ва Амударё ҳавзалари, сув омборлари ва гидроэнергетика объектларига оид маълумотларни қўлга киритиш бўлганини айтмоқда.

Хисоботда қайд этилишича, бу гуруҳ 2021 йилдан бери Марказий Осиёда фаол бўлиб, камида саккизта давлатдаги 34 та ташкилот киберхужумлардан зарар кўрган.

Таҳлилчилар айрим техник белгилар сабаб ҳужумлар Қозоғистон давлат манфаатлари билан боғлиқ бўлиши мумкинлигини ҳам истисно қилмайди.

Telegram I Facebook I YouTube I Instagram

Хитойда қарийб 1 километрлик эскалатор ишга тушди

Хитойнинг Ушан туманида қарийб 1 километрга яқин узунликдаги Wushan Goddess Escalator эскалаторлар мажмуаси ишга тушди.

Ушбу лойиҳа илгари тоғли ҳудуд сабаб бир соатга яқин вақт олувчи йўлни 20 дақиқагача қисқартирди. Эскалатор тизимининг умумий узунлиги 905 метр, баландлиги эса 242 метр бўлиб, бу тахминан 80 қаватли бино баландлигига тенг.

Муҳандислар иншоотни тоғ релефига мослаб қуриб, эскалаторлар, лифтлар ва пиёдалар йўлакларидан иборат мураккаб тизим яратган. Мажмуа шиша фасадлар билан жиҳозланган бўлиб, сайёҳларга панорамали манзараларни ҳам тақдим этади.

Янги мажмуа Chongqing шаҳридеги машҳур Crown Escalatorни ортда қолдириб, дунёдаги энг узун ташқи эскалатор тизимларидан бирига айланди.

Telegram I Facebook I YouTube I Instagram

Тошкентда “Буюк Турон” кўпригига олиб чиқувчи йўл ўпирилди

Тошкент шаҳри Мирзо Улуғбек туманида жойлашган “Буюк Турон” кўпригига олиб чиқувчи йўлнинг бир қисми ўпирилиб кетди.

Маълум қилинишича, мазкур кўприк “Темур Малик” кўчасини реконструкция қилиш лойиҳаси доирасида 128,6 млрд сўмга қайта қурилиб, 2024 йил август ойида фойдаланишга топширилган. Ҳодиса жойига Тошкент шаҳар ҳокими Шавкат Умурзоқов ишчи гуруҳ ва мутасадди идоралар раҳбарлари билан борди. Айни пайтда мутахассислар ҳудудни ўрганиб, вазиятга дастлабки баҳо бермоқда.

Дастлабки тахминларга кўра, ўпирилишга сўнгги кунлардаги кучли ёғингарчилик туфайли тупроқнинг ҳаддан ташқари намланиши сабаб бўлган бўлиши мумкин.

Telegram I Facebook I YouTube I Instagram

Сергелидаги қоидабузарлар 15 суткага қамалди

Аввалроқ ижтимоий тармоқларда Тошкент шаҳрининг Сергели туманида Гелик автомобилида жуда юқори тезликда ҳаракатланган шахслар ушлангани ҳақида хабарлар тарқалган эди.

Маълум қилинишича, ҳодиса 9 мартга отар кечаси содир бўлган. Қоидабузарлар Mercedes-Benz русумли автомобилга ноқонуний равишда мигалка ўрнатиб, бир ҳолатда соатига 210 км, яна бир ҳолатда эса 222 км тезликда ҳаракатланган.Ҳолат юзасидан ҳайдовчилар билан профилактик суҳбат ўтказилган.

Чилонзор тумани жиноят ишлари бойича суди қарорига кўра, қонунбузарлик содир этган ҳар икки шахсга 15 суткадан маъмурий қамоқ жазоси тайинланган.

Telegram I Facebook I YouTube I Instagram

Умра парвозларига рухсат берилди

Транспорт вазирлиги Ўзбекистон ҳудудидан БАА ва Саудия Арабистонига икки томонлама йўловчи ташишни 10 мартдан бошлаб ёлга қўйишга рухсат берди.

Шунингдек, авиакомпаниялар ва аэропортларга Умра мавсуми якунланаётгани ҳамда қироллик қонунчилигига кўра, барча зиёратчилар Ҳаж-2026 мавсуми бошланишидан олдин мамлакатни тарк этиши лозимлиги инобатга олиниши топширилди.

Telegram I Facebook I YouTube I Instagram

Метан заправкалар фақат жамоат транспортига хизмат кўрсатади

Магистраль газ қувурларида босимни меъёрига келтириш ишлари давом этаётгани сабабли бугун, 12 март куни, метан заправкалар вақтинча фақат жамоат транспорти ҳамда ижтимоий соҳа объектларига хизмат кўрсатувчи транспорт воситалари учун фаолият юритади.

Мазкур чоралар аҳоли хонадонлари ва ижтимоий объектларни табиий газ билан узлуксиз таъминлаш мақсадида жорий этилгани маълум қилинди.

Telegram I Facebook I YouTube I Instagram

Ўзбекистонда кибержиноят ва уюшган жиноятчиликка қарши кураш кескин кучайтирилмоқда

🔹 Фуқароларнинг ўз номидаги электрон тўлов воситаси, криптоҳамёни, SIM-картаси ва электрон аккаунтлардан кибержиноятни содир этишда фойдаланилишига йўл қўйганлик учун маъмурий ва жиноий жавобгарлик белгиланади.

🔹 Юридик шахслар томонидан ахборот хавфсизлиги ва киберхавфсизлик талабларига риоя этмаганлик учун оқибат келиб чиққан-чиқмаганидан қатъи назар, маъмурий жавобгарликни белгиланади.

🔹 Тижорат банклари, тўлов тизими операторлари ва тўлов ташкилотлари ахборот хавфсизлиги ва киберхавфсизлик талабларига риоя этмаганлиги натижасида содир этилган кибержиноят оқибатида юзага келган моддий зарар учун жавобгар бўлиши қонунан мустаҳкамланади.

🔹 Жиноий уюшма ташкил этганлик, уни молиялаштирганлик, улар томонидан содир этилган жиноятларни яширишга ҳомийлик қилганлик, жанговар спорт турлари бўйича мусобақаларни ноқонуний ташкил этганлик ва ўтказганлик учун жиноий жавобгарликни белгиловчи, безорилик жинояти учун жазо чоралари кучайтиришни назарда тутувчи, шунингдек, қонунга зид равишда ташкил этилган жанговар спорт турлари бўйича мусобақаларда иштирок этганлик учун маъмурий жавобгарликни белгиловчи нормалар киритилади.

Telegram I Facebook I YouTube I Instagram

«Маънавият чегарасини билмаяпмиз, қаерда у?» – Парламентда Озодбек Назарбековга кескин савол берилди

Олий Мажлис Қонунчилик палатасида депутат Қизилгул Қосимова Маданият вазири Озодбек Назарбековга айрим сериал ва фильмларда қайноналар ва келинлар ўртасидаги можаролар тасвирланаётгани ҳамда бундай лойиҳаларга давлат бюджетидан маблағ ажратилиши қанчалик тўғри экани юзасидан савол йўллади.

Депутат ўз мурожаатида оилавий низоларни марказга қўйган бундай сериалларнинг жамият маънавиятига қандай таъсир кўрсатиши масаласига аниқлик киритишни сўради.

Саволга жавобан маданият вазири Озодбек Назарбеков бу масалада жамиятда маънавий мезонлар аниқ белгилаб олинмаганини таъкидлади.

«Маънавият чегарасини билмаяпмиз, у қаерда?» — деди вазир.

Унинг таъкидлашича, кино ва сериаллар мазмуни, уларнинг жамиятга таъсири ҳамда давлат маблағлари ҳисобидан молиялаштириладиган лойиҳалар бўйича ёндашувларни янада такомиллаштириш зарур.

Telegram I Facebook I YouTube I Instagram

«Катта ойналар ортидаги соялар» ёки банкрот бўлаётган хусусий кадастр муҳандислари – EFFECT UZ репортажи

👉 https://youtu.be/-0CiQJgmEfY