“Open budget”нинг биринчи мавсумига старт берилди

Бугун, 11 март кунидан бошлаб “Ташаббусли бюджет”нинг 2026 йилги 1-мавсуми доирасида овоз бериш босқичи бошланди.

Иқтисодиёт ва молия вазирлигининг қайд этишича, овоз бериш жараёнлари 20 март соат 23:59 га қадар давом этади.

Сиз ўзингизга қулай бўлган усуллардан бири орқали, жумладан:

1️⃣ “Очиқ бюджет” порталининг веб-саҳифаси;

2️⃣ порталнинг мобил иловаси (Android ва iOS);

3️⃣ Telegramдаги расмий бот ёрдамида овоз беришингиз мумкин.

Telegram I Facebook I YouTube I Instagram

Тошкент вилоятида яна бир потенциал автотеррорчи ушланди

Тошкент вилояти Бекобод шаҳрида “Хавфсиз ва соғлом юрт” кенг қамровли тезкор профилактик тадбирлари давомида ЙПХ инспекторининг тўхтатиш ишорасига амал қилмаган ҳайдовчи ҳали ҳайдовчилик гувоҳномасига эга эмаслиги маълум бўлди.

Telegram I Facebook I YouTube I Instagram

Наманганда қайнонасини ўлдирган эркакка суд ҳукми ўқилди

Наманган вилоятининг Косонсой туманида қайнонасини пичоқлаб ўлдирган шахсга нисбатан суд ҳукми чиқарилди. Бу ҳақда жиноят ишлари бўйича Косонсой туман судида кўриб чиқилган иш материалларида маълум қилинди.

Таъкидланишича, туманнинг “Тахтакўприк” маҳалласида яшовчи Ҳ.Обидов (исм-шарифлар ўзгартирилган) 2020 йилда турмуш қурган. У Азима билан оила қуриб, икки нафар фарзандли бўлган.

2023 йил апрель ойида Ҳ.Обидов ишлаш мақсадида Жанубий Кореяга кетган. Шу даврда эр-хотин ўртасида турли келишмовчиликлар келиб чиққан.

Келиннинг қариндошлар тўйига эридан рухсатсиз бориши сабабли улар ўртасида жанжал юзага келган ва муносабатлар совиб кетган.

Кейинчалик эр-хотин ўртасидаги тортишувлар телефон орқали давом этган.

Жанжаллардан бирида Ҳ.Обидов жаҳл устида рафиқасига “SMS” орқали талоқ берган.

Шундан сўнг аёл кичик фарзандини олиб, ота-онасиникига кўчиб кетган, катта фарзанд эса қайнонасида қолган.

Орадан маълум вақт ўтиб, Ҳ.Обидов Ўзбекистонга қайтиб келган. У оиласини тиклаш ниятида бўлганини билдирган. Бироқ рафиқасининг онаси Муаттар Камолхонова бу муносабатларга қарши чиққан.

2025 йил 25 июнь куни Муаттар Камолхонова куёвига қўнғироқ қилиб, уч кун аввал олиб кетган набираси Асилани қайтариб беришни талаб қилган.

Шу куни Ҳ.Обидов қизини боғчадан олиб, қайнонасиникига борган.

У ерда қайнонаси билан оилавий масала юзасидан яна жанжал келиб чиққан. Гап орасида аёл Асиланинг отаси бошқа эканлигини айтган.

Бу гапдан ғазабланган Ҳ.Обидов олдиндан сотиб олган ошхона пичоғи билан аёлга бир неча марта тан жароҳати етказган.

Ҳодисани эшитган қариндошлари ва қўшнилар зудлик билан тез ёрдам чақиришган. Бироқ туман тиббиёт бирлашмасининг жонлантириш бўлимида Муаттар Камолхонованинг ҳаётини сақлаб қолишнинг иложи бўлмаган.

Мазкур ҳолат юзасидан жиноят иши қўзғатилиб, иш жиноят ишлари бўйича Косонсой туман судида кўриб чиқилди.

Суд жараёнида айбланувчи ўзини оқлашга уриниб, бир қатор важларни келтирган. Шунга қарамасдан, суд уни айбдор деб топиб, тегишли жазо тайинлади.

Telegram I Facebook I YouTube I Instagram

Нукусдаги “Корзинка” автотураргоҳида 5000 сўм талаб қилинмоқда

Қорақалпоғистон пойтахти Нукус шаҳридаги “Корзинка” савдо маркази автотураргоҳига кириш нархи 2000 сўм деб кўрсатилган.

Аммо тураргоҳдаги ходим айрим фуқаролардан 5000 сўм талаб қилаётгани айтилмоқда.

Фуқароларга берилган чекда эса 2000 сўм деб кўрсатилган. Бу ҳолат бўйича масъуллардан расмий тушунтириш кутиб қоламиз.

Telegram I Facebook I YouTube I Instagram

Сурхондарёда Nexia уриб юборган 6 ёшли қизалоқ вафот этди

Сурхондарё вилояти Узун туманида Nexia-2 автомашинаси уриб юборган 6 ёшли қизалоқ ҳалок бўлди. Вилоят Ички ишлар бошқармаси маълумотига кўра, ҳодиса 4-март куни “Сурхон” маҳалласи ҳудудида содир бўлган.

1998-йилда туғилган ҳайдовчи бошқарувидаги Nexia-2 йўлни югуриб кесиб ўтаётган 2020-йилда туғилган қизалоқни уриб юборган. Бола олган тан жароҳатлари сабаб вафот этган.

Шундан сўнг маҳалладаги мактабда йиғилиш ўтказилиб, ота-оналарга болаларнинг йўлларда ҳаракатланишида эҳтиёт бўлиш зарурлиги эслатилди. Ҳудудда пиёдалар ўтиш жойлари, огоҳлантирувчи белгилар ва тезликни назорат қилувчи радарлар ўрнатилгани ҳам маълум қилинди.

Telegram I Facebook I YouTube I Instagram

Жиззахда ҲЭТ АЖ муҳандиси пора билан қўлга тушди

Бош прокуратура ҳузуридаги иқтисодий жиноятларга қарши курашиш департаментининг Жиззах вилояти бошқармаси томонидан коррупция билан боғлиқ ҳолат фош этилди.

Унда сут маҳсулотларини ишлаб чиқариш билан шуғулланиб келаётган оилавий корхона раҳбари мурожаатига асосан тезкор тадбир ўтказилди.

Мурожаатга кўра, 1987 йилда туғилган ҲЭТ АЖ муҳандиси лавозимида фаолият юритиб келаётган шахс ўз мавқеидан фойдаланиб ўзганинг мулкини фирибгарлик йўли билан қўлга киритишни мақсад қилган.

Яъни ҲЭТ АЖ муҳандиси корхонани электр тармоғига ноқононуий ўланиб олганини важ қилиб, ушбу ҳолат бўйича далолатнома расмийлаштирмаслик эвазига тадбиркордан 10 млн сўм талаб қилган ва ушбу пулларни цех ҳудудида олган вақтида ашёвий далиллар билан қўлга олинган.

Ҳозирда мазкур ҳолат юзасидан ЖКнинг тегишли моддалари билан жиноят иши қўзғатилиб, дастлабки тергов ҳаракатлари олиб борилмоқда.

Telegram I Facebook I YouTube I Instagram

Эрон Олий раҳнамосининг яралангани ҳақидаги хабарлар рад этилди

Эрон президенти маслаҳатчиси ва ўғли Юсуф Пезешкиён Олий раҳнамо Мужтабо Хоманаий яралангани ҳақида тарқалган хабарлар ҳақиқатга тўғри келмаслигини билдирди. Бу ҳақда ISNA агентлиги хабар қилди.

Унинг айтишича, Хоманаийнинг соғлиғи ҳақида шахсан ўзи аниқлик киритган.

“Мужтабо Хоманаийнинг яралангани ҳақида хабарни эшитдим. Дўстларим билан боғланиб, бу ҳақда сўрадим. Алҳамдулиллоҳ, у соғ-саломат, ҳеч қандай муаммо йўқ", — деди Юсуф Пезешкиён.

Telegram I Facebook I YouTube I Instagram

АҚШ Эрон ракета учириш қурилмаларининг 90 фоиздан ортиғи йўқ қилинганини эълон қилди — Bloomberg

АҚШ амалдорлари Эроннинг баллистик ракеталарни учириш учун мўлжалланган қурилмаларининг 90 фоиздан ортиғи йўқ қилинганини маълум қилди. Бу ҳақда Bloomberg агентлиги манбаларига таяниб хабар берди.

Маълумотларга кўра, бу ҳолат Эроннинг баллистик ракета ҳужумларини амалга ошириш имкониятини жиддий равишда чеклаган.

Бироқ Эрон ҳарбийлари ҳозирча йўқотилган техника ёки ракета учириш қурилмалари сони ҳақида расмий маълумот бермаган.

Эрон Олий раҳномасининг маслаҳатчиси Яҳё Раҳим Сафавий Эрон ракеталари зарба берилаётган объектлардан кўчириб ўтказилган.

Унинг таъкидлашича, АҚШ ва Исроил ҳужумлари асосан бўш объектларга тўғри келмоқда.

Bloomberg маълумотига кўра, АҚШ ва Исроил ўтган йил ёзидаги Эронга қарши ҳарбий операциядан сабоқ чиқарган.

Манбанинг айтишича, минтақадаги америкалик ҳарбийлар март ойида Эроннинг эҳтимолий ракета зарбаларини кутиб, ҳаво кампанияси бошланишидан олдин шахсий таркиб ва техникани хавфли ҳудудлардан кўчирган.

Агентлик таҳлилига кўра, ҳарбий тўқнашувнинг дастлабки саккиз кунида Эрон 650 дан ортиқ баллистик ракета учирган.

Аммо уларнинг кўпчилиги бўш аэродромлар ва деярли бўшаб қолган АҚШ ҳарбий объектларига тушгани таъкидланмоқда.

Telegram I Facebook I YouTube I Instagram

АҚШдан яна 72 нафар ўзбек депортация қилинди

АҚШ мамлакат ҳудудида қонуний яшаш ҳуқуқига эга бўлмаган 72 нафар Ўзбекистон фуқаросини депортация қилгани тўғрисида эълон қилди.

Маълум қилинишича, ушбу чора АҚШнинг давлат чегаралари хавфсизлигини таъминлашга қаратилган сиёсати доирасида амалга оширилган навбатдаги тадбирлардан бири ҳисобланади.

Қайд этилишича, АҚШ президенти Доналд Трамп даврида ноқонуний миграцияга қарши чоралар кучайтирилган.

Шу давр мобайнида АҚШдан 1000 нафардан ортиқ Ўзбекистон фуқароси депортация қилинган.

Шунингдек, АҚШ ҳудудига ноқонуний равишда кирган шахслар қонуний жавобгарликка тортилиши, жумладан, қамоқ жазоси қўлланиши ва кейинчалик мамлакатдан чиқариб юборилиши қайд этилган.

Telegram I Facebook I YouTube I Instagram

Қорақалпоғистон солиқ бошқармасига янги раҳбар тайинланди

Қорақалпоғистон Республикаси солиқ бошқармасига янги бошлиқ тайинланди.

Мазкур лавозимга шу кунга қадар Сурхондарё вилояти солиқ бошқармаси бошлиғи лавозимида фаолият юритган Нарманов Эркин Абдуалимович тайинланди.

Telegram I Facebook I YouTube I Instagram

Миллий сертификат имтиҳони натижалари эълон қилинди

2026 йил 31 январь ҳамда 1–2, 7–8 февраль кунлари она тили ва адабиёт (ўзбек, қорақалпоқ, рус) фанларидан ўтказилган миллий сертификат имтиҳони натижалари эълон қилинди.

Талабгорлар натижаларини my.gov.uz порталидаги “Менинг аризаларим” бўлими орқали кўришлари ҳамда сертификатни электрон шаклда юклаб олишлари мумкин.

Тест натижалари халқаро методика — Раш модели асосида ҳисобланди. Тўпланган баллга қараб қуйидаги даражадаги сертификатлар берилади:

🗄 70 баллдан юқори — А+ даража
🗄 65 – 69,9 балл — А даража
🗄 60 – 64,9 балл — B+ даража
🗄 55 – 59,9 балл — B даража
🗄 50 – 54,9 балл — C+ даража
🗄 46 – 49,9 балл — C даража

Сертификат абитуриентларга қандай имтиёз беради?

🔸 А+ ва А даража — тегишли мутахассислик фанидан максимал балл берилади

🔸 B+, B, C+, C даража — тегишли мутахассислик фанидан пропорционал балл берилади

🔸 А+, А, B+, B, C+, C даражалар — тегишли мажбурий фандан максимал балл берилади

Академик лицейларга кириш имтиҳонларида ҳам сертификати мавжуд ўқувчиларга тегишли фандан максимал балл тақдим этилади.

Telegram I Facebook I YouTube I Instagram

Фарғонада ноқонуний равишда олиб чиқилмоқчи бўлган олтин мусодара қилинди

Фарғона вилоятида Давлат хавфсизлик хизмати (ДХХ) ва божхона ходимлари томонидан ўтказилган тезкор тадбирда 2 миллиард сўмдан ортиқ қийматга эга олтин қуйма мусодара қилинди.

Маълум бўлишича, Фарғона туманида яшовчи 1996-йилда туғилган шахс бошқарувидаги “Damas” автомашинаси Қирғизистонга чиқиш учун “Водил-авто” чегара божхона постида текширувдан ўтказилган. Текширув давомида машина кузови ичига яширилган 4 дона ностандарт шаклдаги олтин қуйма аниқланган.

Экспертиза хулосасига кўра, олтинларнинг соф оғирлиги 1 кг 232 грамм бўлиб, умумий қиймати 2 млрд 182 млн сўмни ташкил этган.

Ҳолат юзасидан Жиноят кодексининг 182-моддаси билан жиноят иши қўзғатилиб, тергов ҳаракатлари олиб борилмоқда.

Telegram I Facebook I YouTube I Instagram

Рулда камар тақмаган Сардор Мамадалиев жаримага тортилди

Хонанда Сардор Мамадалиев машина бошқаруви пайтида хавфсизлик камарини тақмагани учун жаримага тортилиб, 206 минг сўм миқдорида тўлайди.

У асабий ҳолатда бўлгани сабабли камар тақишни унутиб қўйганини айтган ва қонунларга ҳурмат қилади, деб баён қилган. Йўл ҳаракати қоидаларини бузгани учун маъмурий баённома расмийлаштирилган.

Telegram I Facebook I YouTube I Instagram

Европа Россияга қарамликдан қутулиш учун Ўзбекистондан умид қиляпти

Франция президенти Эммануэль Макрон сешанба куни Европа Россия уранига қарамлигини тан олиб, етказиб беришни диверсификация қилишда Ўзбекистон, Қозоғистон, Монголия, Канада ва Австралия каби мамлакатлар муҳим аҳамиятга эга эканини маълум қилди.

“Биз яқинда Россияга бўлган қарамлигимиз сабабли бир қатор фаоллар танқидларига учрадик. Уран борасида бу ҳақиқат.

Аммо дунёда уни ишлаб чиқариш билан шуғулланадиган бошқа мамлакатлар ҳам бор ва биз халқаро ҳамкорликда иштирок этишимиз, етказиб беришни диверсификация қилиш ва хавфсизлигини таъминлашимиз керак”, — деди француз раҳбари Париждаги халқаро ядро энергетика саммити очилиш маросимида.

Макрон Европа ва Франция Россиядан қарамликни камайтириш учун уран етказиб берувчи мамлакатлар қаторида Қозоғистон, Монголия, Ўзбекистон, Канада ва Австралияни айтиб ўтди.

Француз президенти нутқида ядро энергетикасини мамлакатлар учун “энергетик мустақиллик ва суверенитет калити” деб таърифлади.

У шу билан бирга бу соҳанинг декарбонизация ва иқтисодиёт ўсишидаги аҳамиятига эътибор қаратди.

Макрон таъкидлаганидек, икки кундан сўнг Парижда ядро сиёсат кенгаши йиғилиши бўлиб ўтади ва бу йиғилишда февраль ойида қабул қилинган кўп йиллик давлат энергетика дастури асосида соҳани ривожлантириш бўйича янги қарорлар қабул қилинади.

Шунингдек, Макрон турли давлатлар ядро хавфсизлиги органлари ҳамкорлиги, шу жумладан стандартлаштириш зарурлигини ҳам таъкидлади.

Француз раҳбарининг сўзларига кўра, стандартлаштириш ва ҳамкорлик Европа мамлакатларида ядро энергетика соҳасида янги иш ўринларини яратишга хизмат қилади.

Telegram I Facebook I YouTube I Instagram

Танганинг иккинчи томони. Самарқанддаги шов-шувли воқеа юзасидан маълумот берилди

Самарқанд вилояти ИИБ йўл ҳаракати хавфсизлиги бошқармаси ижтимоий тармоқларда кенг муҳокамаларга сабаб бўлган воқеага расмий муносабат билдирди.

Маълум қилинишича, жорий йилнинг 6 март куни кундузи 7:40 лар атрофида Тойлоқ тумани ҳудудидан ўтувчи А-377 автомобил йўлида “Onix” русумли машина светофорнинг қизил чироғидан ўтиб кетгани сабабли ЙПХ ходими томонидан тўхташ ишораси кўрсатилган.

Лекин ҳайдовчи ходимнинг ишорасига бўйсинмасдан ҳаракатни давом эттирган.

Шундан сўнг, 3 нафар ЙПХ ходимлари томонидан яна тўхташ ишораси кўрсатилган, лекин ёш ҳайдовчи яна тўхтамаган.

Ушбу ҳолат юзасидан транспорт воситасини ушлаш чоралари кўрилиб, тўхтатилиб бир неча бор ЙПХ ҳамда воқеа жойидаги фуқароларнинг огоҳлантирилишига қарамасдан ҳайдовчи машинадан тушмаган.

Шундан кейин, фуқаро кийимидаги номаълум шахс томонидан машина ойналари қасддан синдирилган ва 19 ёшли ҳайдовчи машинадан тушган.

Ҳайдовчига нисбатан МЖТКнинг 194 моддаси, 135 модданинг 2 қисмига асосан маъмурий тартиб баённома расмийлаштирилиб, тўпланган ҳужжатлар Тойлоқ туман судига юборилган.

Telegram I Facebook I YouTube I Instagram

Ўзбекистон ва Афғонистон ўртасида имтиёзли савдо тўғрисидаги битим тасдиқланди

“Халқаро шартномани тасдиқлаш тўғрисида”ги Президент қарори (ПҚ-84-сон) қабул қилинди.

Қарорга кўра, Ўзбекистон Республикаси Ҳукумати ва Афғонистон ўртасида имтиёзли савдо тўғрисидаги битим тасдиқланди.

Инвестициялар, саноат ва савдо вазирлиги ва Иқтисодиёт ва молия Вазирлиги ҳузуридаги Божхона қўмитаси ушбу халқаро шартномани амалга ошириш учун масъул бўлган ваколатли органлар этиб белгиланди.

Ташқи ишлар вазирлиги мазкур халқаро шартноманинг кучга кириши учун Ўзбекистон томонидан зарур бўлган давлат ички тартиб-таомиллари бажарилганлиги тўғрисида афғон томонига тегишли билдиришнома юборади.

Telegram I Facebook I YouTube I Instagram