ОАВ ва ноширлик соҳалари устидан назорат ваколатлари янги Инспекцияга ўтказилди

Ўзбекистонда оммавий ахборот воситалари, ноширлик ҳамда рақамли ахборот соҳаларига оид барча мониторинг ва назорат функциялари энди Рақамли технологиялар вазирлиги ҳузурида ташкил этилган махсус Инспекция томонидан амалга оширилади. Бу президентнинг 2025 йил 11 декабрдаги ПҚ–371-сонли қарорида белгиланди.

✔️ Ахборотлаштириш, телекоммуникациялар, почта алоқаси ва рақамли хизматлар соҳаларида давлат назорати кучайтирилади.

✔️ Сунъий интеллект, маълумотлар базалари, дастурий таъминот ҳамда турли рақамли ресурслар фаолияти Инспекция назоратига олинади.

✔️ Оммавий ахборот воситаларини рўйхатдан ўтказиш ва уларнинг қонунчиликка риоя этишини мониторинг қилиш ваколати ҳам янги Инспекцияга ўтказилди.

✔️ Ноширлик ва матбаа фаолияти устидан назорат қилиш вазифалари ҳам мазкур тузилма ихтиёрига берилди.

✔️ Болаларни зарарли ва тақиқланган ахборотдан ҳимоя қилиш бўйича механизмлар янада кучайтирилади.

✔️ Онлайн платформалар орқали тақиқланган ахборот тарқалишининг олдини олиш Инспекциянинг асосий вазифаларидан бири этиб белгиланди.

✔️ «Хабар» газетаси муассислиги ўзгарди. Газетага тегишли акцияларни бошқариш Президент Администрацияси ҳузуридаги контент тайёрлаш марказига топширилди.

✔️ Тугатилган Ахборот ва оммавий коммуникациялар агентлигининг (АОКА) барча назорат ваколатлари тўлиқ равишда янги Инспекцияга ўтказилди.

✔️Шу муносабат билан Инспекцияга қўшимча 54 та штат бирлиги ажратилиб, умумий ходимлар сони 172 нафар этиб белгиланди.

✔️Инспекцияга 2027 йил 1 январга қадар «Рақамли назорат» платформасини ишга тушириш вазифаси юкланди. Ушбу платформа орқали республика ҳудудлари, жумладан чекка ҳудудларда ҳам рақамли хизматлар сифати доимий равишда мониторинг қилиб борилади.

Telegram I Facebook I YouTube I Instagram

Мактаб директори ўқувчининг телефонини болға билан синдирди

Самарқанддаги мактаблардан бирида директор ўқувчининг мобил телефонини болға билан синдириб, бошқаларга ибрат сифатида кўрсатди.

Маълум қилинишича, директор телефонни мих билан синф тахтасига қадаб, дарс пайтида гаджетлардан фойдаланиш мумкин эмаслигини намойиш этган. Ҳодиса бутун синф кўз ўнгида содир бўлган.

Ушбу ҳолат жамоатчилик орасида кескин мунозараларга сабаб бўлди. Айримлар бундай ҳаракатни қаттиққўл интизом деб баҳолаган бўлса, бошқалар ўқувчининг шахсий мулкига зиён етказилганини таъкидламоқда.

Ҳодиса бўйича ҳозирча расмий изоҳ берилмаган.

Telegram I Facebook I YouTube I Instagram

Божхона бошқармаси катта тезкор ходими ва туман кадастр бўлими раҳбари қўлга олинди

Республика ҳудудларида ўтказилган тезкор тадбирлар натижасида бир қатор коррупция ва фирибгарлик ҳолатлари фош этилди:
1️⃣ Сурхондарёда — божхона органи ходими фуқародан 400 АҚШ доллари олган вақтида ашёвий далиллар билан қўлга олинди. У катта миқдордаги пул маблағини ноқонуний ўтказиб беришни ваъда қилган;
2️⃣ Наманганда — туман Кадастр бўлими раҳбари ҳужжатларни расмийлаштириб бериш баҳонасида 3 млн сўм пора олган пайтда ушланди;
3️⃣ Косонсой туманида — электр тармоқлари корхонаси юрисконсульти 2 минг АҚШ доллари эвазига катта жаримани “йўқ қилиш”ни ваъда қилган.

Барча ҳолатлар юзасидан жиноят ишлари қўзғатилди.

Telegram I Facebook I YouTube I Instagram

Тошкентда автобусларда чиптасиз юрган қарийб 3 минг йўловчи жаримага тортилди

Тошкент шаҳрида жамоат транспортида йўл ҳақини тўламаслик ҳолатларига қарши кучайтирилган назорат тадбирлари ўтказилмоқда. Транспорт вазирлиги маълумотига кўра, жорий йилнинг 1–10 декабрь кунлари давомида автобусларда чиптасиз юрган 2 966 нафар йўловчи аниқланиб, уларга нисбатан маъмурий жарималар қўлланилди.

Хусусан, 38- ва 46-автобус йўналишларида йўл ҳақи тўловини назорат қилиш ишлари кучайтирилган тартибда ташкил этилди. Натижада мазкур йўналишларда 238 нафар чиптасиз йўловчи аниқланиб, уларга нисбатан Маъмурий жавобгарлик тўғрисидаги кодекснинг 144-моддасига асосан баённомалар расмийлаштирилди.

“Тошшаҳартрансхизмат” АЖ ахборот хизмати маълумотларига кўра, жорий йилнинг 11 ойи мобайнида жамоат транспортида йўл ҳақини тўламаслик билан боғлиқ 19 500 дан ортиқ ҳолат қайд этилган.

Қайд этилишича, Тошкент шаҳрида жамоат транспортида йўл ҳақини ўз вақтида тўлашни таъминлаш мақсадида рейд тадбирлари изчил давом эттирилмоқда. Мазкур тадбирлар Транспорт назорати инспекцияси ҳамда Тошкент шаҳар йўловчи ташиш фаолиятини мониторинг ва назорат қилиш давлат муассасаси ходимлари томонидан амалга оширилмоқда.

Telegram I Facebook I YouTube I Instagram

Ўзбекистонликлар спорт ва дам олиш хизматларига 3,7 трлн сўм сарфлади

Миллий статистика қўмитаси маълумотларига кўра, 2025 йилнинг январь–октябрь ойларида республикада спорт, кўнгилочар ва дам олишни ташкил этиш соҳасида кўрсатилган хизматлар ҳажми 3,7 трлн сўмни ташкил этди. Ушбу кўрсаткич ўтган йилнинг мос даврига нисбатан 16 фоизга ошган.

Мазкур хизматлар ҳудудлар кесимида қуйидагича тақсимланган:

— Қорақалпоғистон Республикаси — 32,5 млрд сўм;
— Андижон вилояти — 97,3 млрд сўм;
— Бухоро вилояти — 76,6 млрд сўм;
— Жиззах вилояти — 93 млрд сўм;
— Қашқадарё вилояти — 147,9 млрд сўм;
— Навоий вилояти — 61,3 млрд сўм;
— Наманган вилояти — 112,1 млрд сўм;
— Самарқанд вилояти — 223,5 млрд сўм;
— Сурхондарё вилояти — 49,9 млрд сўм;
— Сирдарё вилояти — 35,6 млрд сўм;
— Тошкент вилояти — 547 млрд сўм;
— Фарғона вилояти — 469,5 млрд сўм;
— Хоразм вилояти — 149,3 млрд сўм;
— Тошкент шаҳри — 1 568,3 млрд сўм.

Қайд этилишича, энг юқори кўрсаткич Тошкент шаҳри ҳиссасига тўғри келган бўлиб, ҳудудлар бўйича спорт ва дам олиш хизматларига бўлган талабнинг изчил ортиб бораётгани кузатилмоқда.

Telegram I Facebook I YouTube I Instagram

Тошкентда нарколаборатория ташкил этган йигит ва қиз қўлга олинди

Тошкент шаҳрида ноқонуний равишда нарколаборатория ташкил этган йигит ва қиз ҳуқуқни муҳофаза қилувчи органлар томонидан қўлга олинди.

Маълум қилинишича, гумонланувчилар қўлбола усулда кучли таъсир қилувчи моддаларни тайёрлаб, уларни сотишни режалаштирган. Аммо улар жиноий фаолиятни амалга оширишга улгурмасдан, нарколаборатория фаолиятини йўлга қўйган заҳотиёқ фош этилган.

Текширув давомида сотиш мақсадида тайёрланган 208 минг дона бир марталик доза кучли таъсир қилувчи моддалар ашёвий далил сифатида олинган. Қайд этилишича, мазкур моддалар мижозларга тарқатиб юборилмаган.

Ҳозирда мазкур ҳолат юзасидан жиноят иши қўзғатилиб, гумонланувчиларга нисбатан қамоққа олиш эҳтиёт чораси қўлланган.

Тергов ҳаракатлари давом эттирилмоқда.

Telegram I Facebook I YouTube I Instagram

2025 йилда сартарошхона хизматлари нархи сезиларли даражада ўсди

Миллий статистика қўмитаси маълумотларига кўра, 2025 йил ноябрь ойида эркаклар сартарошхоналари хизматлари нархлари октябрь ойига нисбатан ўртача 0,5 фоизга қимматлашди. Йил бошидан буён ушбу хизматлар 8,9 фоизга, ўтган йилнинг шу даврига нисбатан эса 9,6 фоизга ўсган.

Аёллар сартарошхоналари хизматлари нархи ноябрь ойида 0,6 фоизга, йил бошидан 6,4 фоизга ва 2024 йилнинг мос даврига нисбатан 7,8 фоизга қимматлашган.

Маълумотларга кўра, сартарошхона хизматлари нархлари йил давомида барқарор равишда ўсиш тенденциясида бўлмоқда.

Telegram I Facebook I YouTube I Instagram