Ўзбекистон терма жамоаси ЖЧ гуруҳ ўйинларини Мексика ва АҚШда ўтказади

2026 йил АҚШ, Мексика ва Канадада бўлиб ўтадиган футбол бўйича Жаҳон чемпионатининг гуруҳ босқичи тақвими эълон қилинди. Унга кўра, Ўзбекистон миллий терма жамоаси илк учрашувини Мексикада, қолган икки ўйинини эса АҚШда ўтказади.

Биринчи ўйин 17 июнь куни Мехико шаҳридаги “Ацтека” стадионида бўлиб ўтади. Ўзбекистон термаси бу ўйинда Колумбияга қарши майдонга тушади.

Иккинчи тур учрашуви 23 июнь куни АҚШнинг Ҳьюстон шаҳрида жойлашган “NRG” стадионида ташкил этилади. Бу баҳсда “оқ бўрилар” Португалия термасига қарши ўйнайди.

Гуруҳ босқичидаги сўнгги беллашув 27 июнь куни Атланта шаҳридаги “Мерседес Бенз” стадионида бўлиб ўтади. Унда Ўзбекистон жамоаси қитъалараро плей-офф ғолиби — Конго, Ямайка ёки Янги Каледония термалари билан куч синашади.

Эслатиб ўтамиз, 5 декабрь куни бўлиб ўтган қуръа натижаларига кўра, Ўзбекистон миллий терма жамоаси “К” гуруҳига жойлаштирилди. Фабио Каннаваро бошчилигидаги жамоага Португалия, Колумбия ҳамда плей-офф ғолиби рақиблик қилади.

Telegram I Facebook I YouTube I Instagram

Якасаройдаги муаммо қачон ҳал бўлади?

EFFECT.UZ таҳририяти орқали давомий равишда ёритиб келинаётган Якасарой тумани Чўпонота маҳалласидаги бузилиш билан боғлиқ муаммога ҳанузгача ҳеч қандай ижобий ечим берилгани йўқ. Аксинча, масалани ҳал этиш ўрнига кескин муносабатлар тобора кучайиб бормоқда.

EFFECT.UZ муаммога бефарқ қараётган мутасаддилардан адолатли ва қонуний ечим кутиб қолади.

ТЎЛИҚ ВИДЕО

Telegram I Facebook I YouTube I Instagram

Шаҳрихонда бузилган тандир пулини ҳокимнинг ўзи тўлаб берди

Андижон вилояти Шаҳрихон туманида ўтказилган экологик рейд давомида бузилган тандир пулини туман ҳокими шахсан ўз чўнтагидан қоплаб берди. Бу ҳақда туман ҳокимлигидаги манбалар маълум қилди.

Аввалроқ хабар берилганидек, экология ва ҳаво ифлосланишининг олдини олиш мақсадида рейд ташкил этилган бўлиб, унда умумий овқатланиш объектларидаги ноқонуний қурилмалар, жумладан, йўл четидаги 3 та тандир текширилган. Битта тандир бузиб ташланган, иккитаси эса объект ичкарисига олиб кирилган ва ҳозирда ишлатилмоқда. Бузилган тандир пулини ҳоким ўз ёнидан тўлаб берди.

Туман ҳокимлиги видеолар орқали рейдларни намойиш қилган, аммо баъзи тасвирлар ижтимоий тармоқларда тарқалиб, турли муҳокамаларга сабаб бўлган. Рейдлар Андижон вилояти ҳокими Шуҳрат Абдураҳмонов топшириғига асосан олиб борилган. Танқидлардан сўнг, туман ҳокимига интизомий жазо сифатида ҳайфсан берилган.

Президент ҳузуридаги бизнес омбудсман эса тадбиркорларнинг ҳуқуқлари ва қонуний манфаатларини ҳимоя қилишга чақирган, экорейдлар давомида мулкий ҳуқуқлар ҳимоя қилиниши лозимлигини таъкидлаган.

Маълумот учун, Шаҳрихон тумани ҳокими Ҳикматилло Дадахонов 2017 йилдан буён туманга раҳбарлик қилиб келмоқда.

Олдинроқ эса Бувайда тумани ҳокими ўринбосари экологик текширувда куч ишлатгани учун ишдан олинган эди.

Telegram I Facebook I YouTube I Instagram

Тошкентда ҳаво сифати яхшиланди: зарарли заррачалар меъёрдан ошмади

2025 йил 7 декабрь куни соат 09:00 ҳолатига кўра атмосфера ҳавоси ифлосланишини кузатувчи автоматик мониторинг станциялари маълумотларига асосан, Тошкент шаҳрида ҳаво сифати яхшилангани қайд этилди.

Хусусан, ҳаводаги PM10 туридаги майда дисперсли заррачалар миқдори 45,1 мкг/м³ ни ташкил этди. Бу кўрсаткич рухсат этилган меъёр — 300 мкг/м³ дан ошмаган.

Шунингдек, PM2,5 туридаги майда дисперсли заррачалар миқдори 27,4 мкг/м³ қайд этилди. Бу эса белгиланган нормалар (60 мкг/м³) доирасида эканини кўрсатади.

Мутахассислар қайд этишича, бу кўрсаткичлар шаҳар ҳавоси ҳолати барқарор ва нисбатан тоза эканидан далолат беради. Мониторинг жараёнлари доимий равишда давом эттирилади.

Telegram I Facebook I YouTube I Instagram

Ўзбекистонда 615 нафар шахс афв этилди

Ўзбекистон Республикаси Конституциясининг 109-моддаси 23-бандига асосан жазо муддатини ўтаётган ва тузалиш йўлига қатъий ўтган 615 нафар шахс афв этилди.

Афв қилинганлар орасида 220 нафар асосий жазодан тўлиқ озод этилган, 123 нафар муддатидан илгари шартли озод қилинган, 97 нафар жазоси енгилроқ жазо билан алмаштирилган ва 175 нафарнинг озодликдан маҳрум этиш муддатлари қисқартирилган. Улар орасида 9 нафар чет эл фуқароси, 29 нафар аёл, 23 нафар 60 ёшдан ошган эркак, 264 нафар ёшлар (шу жумладан 2 нафар вояга етмаган) ва 9 нафар тақиқланган ташкилотлар фаолиятида иштирок этган шахслар бор.

Ушбу афв шахсларнинг тузалиши ва жамиятга қайта интеграциясига йўналтирилган тадбир сифатида баҳоланмоқда.

Telegram I Facebook I YouTube I Instagram

Effect.uz таҳририяти Ўзбекистонда қонун устуворлиги, адолат ва тараққиёт тимсоли бўлган ушбу қутлуғ сана — Ўзбекистон Республикаси Конституцияси қабул қилинганининг 33 йиллиги муносабати билан барча юртдошларимизни самимий табриклайди.

Ватанимиз осмони мусаффо, юртимиз тинч бўлсин, хонадонингизга барака ва хотиржамлик, ўзингизга эса соғлик, бахт ва омад тилаймиз!

Telegram I Facebook I YouTube I Instagram

Оҳангаронда муқаддам судланган юрист иштирокидаги ер билан боғлиқ йирик қонунбузарлик аниқланди

ДХХ ҳамда Иқтисодий жиноятларга қарши курашиш департаменти томонидан ўтказилган тезкор тадбирлар давомида ер муносабатларига оид учта ноқонуний ҳолат аниқланди.

Оҳангарон туманида унитар корхона юристи, муқаддам судланган шахс Нурафшон шаҳрида паррандачилик корхонасига ажратилган 90 сотих ер майдонини 250 минг АҚШ долларига сотишини айтиб, кадастрдаги танишлари орқали коттежлар қурилишига рухсат олиб беришини ваъда қилган ва “хизмати” учун 30 минг доллар талаб қилган. У 40 минг доллар аванс олган вақтида қўлга олинган.

Қашқадарё вилояти Кўкдала туманида туман газ таъминоти бўлими ходими давлат захирасидаги 1 гектар ер майдонини 500 млн сўмга сотишга келишиб, олдиндан 20 минг доллар олган пайтида ушланган.

Бухоро шаҳрида эса маклерлик фаолияти билан шуғулланувчи, муқаддам судланган шахс 1 250 кв.м кўчмас мулк объекти тоифасини ўзгартириб, кадастр ҳужжатларини расмийлаштириш эвазига 14 минг доллар талаб қилиб, пулни олган вақтида қўлга олинди.

Барча ҳолатлар бўйича жиноят ишлари қўзғатилиб, тергов ва суриштирув ишлари давом этмоқда.

Telegram I Facebook I YouTube I Instagram

Телеграмда «овоз бериш» баҳонасидаги янги фирибгарликдан эҳтиёт бўлинг

Ўзбекистонда Telegram орқали амалга оширилаётган фирибгарликнинг янги тури кўпаймоқда. Жиноятчилар фойдаланувчининг аккаунтига ноқонуний кириб, унинг номидан яқинларига ва танишларига «сўровномада энг яхши ота-онага овоз бериш» ҳақидаги хабар ва ҳавола юборишмоқда.

Мазкур ҳаволага кирилган тақдирда, фойдаланувчи билган-билмаган ҳолда ўз Telegram аккаунти маълумотларини фирибгарларга тақдим этади. Натижада, улар шахсий маълумотларга эга бўлиши, ҳабарлар юбориши ҳамда ҳатто молиявий зарар етказиши мумкин.

Муҳими, хабар «она», «ота», «ака» ёки бошқа яқин инсон номидан келса ҳам, шубҳали хаволаларни очмаслик, аввало, ўша шахс билан бевосита боғланиб, маълумотни аниқлаш тавсия этилади.

Фуқаролардан шахсий хавфсизликни таъминлаш мақсадида бундай шубҳали ҳаволаларга кирмаслик, шахсий маълумотларни киритмаслик ва гумонли хабарлар ҳақида тегишли органларга хабар бериш сўралади.

Telegram I Facebook I YouTube I Instagram