Боғдодда ҳоким ўринбосари ва Наманганда икки нафар ҳоким ёрдамчиси пора билан ушланди

Давлат Хавфсизлик Хизмати ва Иқтисодий жиноятларга қарши курашиш департаменти Фарғона ҳамда Наманганда ҳокимлик тизимидаги коррупция ҳолатларига чек қўйди.

Фарғона вилояти Боғдод тумани

Ҳоким ўринбосари 2,4 сотих ер майдонини бошқа шахс номига расмийлаштириб беришни ваъда қилиб, 8 000 АҚШ доллар олаётганвақтида қўлга олинди. Ер аслида онлайн аукцион орқали бошқа шахсга бириктирилган бўлган.

Наманган шаҳрида Маҳалла ҳоким ёрдамчиси «Яшил макон» лойиҳасидаги 8 сотих ерни расмийлаштириб, кейин турар-жойга ўтказишни ваъда қилиб, 6 000 доллар олганида ушланади.

Яна бир Наманган шаҳар ҳоким ёрдамчиси давлат захирасидаги 12 сотих ерни танишлари орқали расмийлаштириб бериш учун 16 минг доллар талаб қилиб, олдиндан 6 000 доллар олган пайтда ушланди.

Ҳозирда барча шахсларга нисбатан жиноий иш қўзғатилган, тергов давом этмоқда.

Telegram I Facebook I YouTube I Instagram

Ўзбекистонда энергетикада янги босқич: 42 та қувват ишга туширилди, 21 та лойиҳа бошланди

Президент Шавкат Мирзиёев энергетика соҳасидаги янги объектлар ва истиқболли лойиҳаларни ишга тушириш ҳамда қурилишини бошлаш маросимида иштирок этиб, соҳа ривожига доир муҳим вазифаларни белгилаб берди.

Маълум қилинишича, бугун 42 та янги энергетика қувватлари расман ишга туширилди ва яна 21 та йирик лойиҳа қурилишига старт берилди. Бу эса мамлакатнинг энергетик салоҳиятини янада мустаҳкамлашга хизмат қилади.

Давлат раҳбари ўз нутқида жадал суръатларда ўсиб бораётган иқтисодиёт ва аҳоли эҳтиёжларини ҳисобга олган ҳолда энергетика тизимида кенг кўламли ислоҳотлар амалга оширилаётганини таъкидлади.

— Биз бу йўналишда иккита муҳим мақсадни олдимизга қўйганмиз. Биринчисы — барча тармоқ ва ҳудудлар учун ишончли ҳамда узлуксиз энергия таъминотини таъминлаш. Иккинчиси — энергия манбаларини замонавий, экологик тоза ва қайта тикланувчи муқобил ресурслар асосида кенгайтириш, — деди президент.

Сўнгги йилларда энергетика соҳасига 35 миллиард доллар миқдорида хорижий инвестиция жалб қилиниб, 9 минг мегаватт янги қувватлар ишга туширилди.

Натижада мамлакатда электр энергияси ишлаб чиқариш ҳажми 2017 йилдаги 60 миллиард киловатт-соатдан жорий йилда 85 миллиард киловатт-соатга етди.

Айниқса, “яшил” энергияни ривожлантириш борасидаги ишларга алоҳида эътибор қаратилмоқда. Салькам 5 минг мегаватт қувватга эга қуёш ва шамол электр станциялари, 400 мегаваттли гидроэлектр станциялари ишга туширилди. Жорий йил якунига қадар умумий генерация қувватларида қайта тикланувчи манбалар улушини 30 фоизга етказиш режалаштирилган.

Telegram I Facebook I YouTube I Instagram

Гулистондаги портлаш бўйича 3 нафар мансабдор шахс қамоққа олинди

2 декабр куни соат 10:50 да Гулистон шаҳридаги «Бек Фамилй Cафе» ошхонасида нотўғри уланган 50 литрли газ баллони сизиши оқибатида портлаш содир бўлган эди.

Оқибатда 29 киши турли даражада куйиш жароҳати олди, 3 киши вафот этди. 5 нафар бемор уйига жавоб берилди, қолганларга малакали ёрдам кўрсатилмоқда.

Ҳолат юзасидан Жиноят кодексининг тегишли моддалари билан иш қўзғатилди. «Бек Фамилй Cафе»нинг 3 нафар мансабдори қамоққа олинди.

Терговда ички ишлар вазирининг ўринбосари Рамазон Ашропов бошчилигидаги гуруҳ томонидан тергов ишлари олиб борилмоқда. Якунида жамоатчиликка қўшимча ахборот берилади.

Якунига кўра қонуний қарор қабул қилинади ва жамоатчиликка қўшимча маълумот берилади.

Telegram I Facebook I YouTube I Instagram

Йўлларда тирбандликларнинг олди олинади

“Тошкент шаҳрида транспорт тизими бошқарувини такомиллаштириш ҳамда тирбандликларнинг олдини олишга қаратилган қўшимча чора-тадбирлар тўғрисида”ги Президент қарори (ПҚ–368-сон, 04.12.2025 й.) қабул қилинди.

Қарор билан Тошкент шаҳри транспорт тизимини 2030 йилгача ривожлантиришнинг мақсадли кўрсаткичлари тасдиқланди. Унда қуйидагилар назарда тутилди, жумладан:

🔹 аҳолининг жамоат транспортидан фойдаланиш даражасини 60 фоизга етказиш;

🔹 автобуснинг ўртача ҳаракат тезлигини 18 км соатдан 24 км соатга етказиш;

🔹 транспорт воситалари учун 150 минг ўринли тўхтаб туриш жойларини ташкил этиш;

🔹 метрополитен тармоғи узунлигини 103 кмга етказиш.

Тошкент шаҳрида йўл ҳаракатини ташкил этиш маркази ташкил этилади.

Қуйидагилар Марказнинг асосий вазифалари этиб белгиланди, жумладан:

🔸 замонавий рақамли ва “яшил” технологияларни қўллаш орқали Тошкент шаҳрида транспорт, йўловчи ва пиёдалар оқимларини узлуксиз мониторинг қилиш асосида йўл ҳаракатини ташкил этиш,

🔸 Тошкент шаҳрининг транспорт мастер режасини яратиш;

🔸 ҳудудлардан кириб келадиган асосий автомобиль йўлларидаги жамоат транспорти бош бекатлари (автобус ва метро) кесишмаларида транспорт воситаларининг кўп қаватли тўхтаб туриш жойларини ташкил қилиш;

🔸 Тошкент шаҳри ерусти метро линиялари ҳамда йўл ўтказгичлари остида, хавфсизлик талабларига риоя қилган ҳолда, транспорт воситаларининг тўхтаб туриш жойларини ташкил қилиш.

Telegram I Facebook I YouTube I Instagram

Президент администрациясида ахборот сиёсати йўналишида кадрлар ўзгарди

Президент администрациясида бир неча ойдан бери давом этаётган кадрлар ислоҳотлари доирасида ахборот сиёсати ва ОАВ билан ишлашга масъул бўлган бир қатор ходимлар лавозимини тарк этди ёки бошқа тузилмаларга ўтказилди.

Nigoh.uz манбаларига кўра, спичрайтер хизмати маслаҳатчиси Хайриддин Султоновга қарашли бир неча ходимлар қисқартириш ва бошқа иш жойларига ўтказиш асосида хизматдан озод этилган.

Жумладан, 2023 йилдан буён Президент администрацияси спичрайтер хизматида етакчи консультант сифатида фаолият юритиб келган Улуғбек Алишерович Ибодинов бошқа лавозимга ўтказилди. Ушбу вазифагача у «Маҳалла» газетасида бўлим мудири сифатида ишлаган.

Шунингдек, Президент администрациясининг оммавий ахборот воситалари, телевидение ва матбуотни ривожлантириш шуъбаси консультанти Элбек Улуғбекович Долимов ҳам фаолиятини якунлади. У бошқа ишга ўтган бўлиб, эндиликда Миллий контент марказида ишини давом эттираётгани маълум қилинди. Элбек Долимов 2018 йилда президент фармойиши билан мазкур шўъбага тайинланган, унгача эса АКТ вазирлиги матбуот котиби лавозимида ишлаган.

Спичрайтер хизматида ишлаб келган Икром Искандарович Бўрибоев ҳам вазифасидан озод этилди. У ўз меҳнат фаолиятини «Жадид» газетасида давом эттиради. Икром Бўрибоев 1972 йилда Жиззах вилоятининг Ғаллаорол туманида туғилган, шоир ва Ўзбекистон Ёзувчилар уюшмаси аъзоси ҳисобланади.

Шунингдек, спичрайтер хизматида масъул лавозимда ишлаб келган Ғофур Шермуҳаммад ҳам лавозимидан озод қилиниб, Вазирлар Маҳкамасида фаолият бошлаган. У 1973 йил 12 апрелда Қашқадарё вилоятида туғилган бўлиб, 1992–2004 йиллар давомида “Халқ сўзи”, “Қишлоқ ҳаёти” газеталарида турли лавозимларда ишлаган, шунингдек, “Ўзбеккино” Миллий агентлигида бош муҳаррир сифатида фаолият олиб борган.

Манбаларга кўра, Бахтиёр Ёқубов ҳам Спичрайтер хизмати таркибидан кетгани айтилади.

Telegram I Facebook I YouTube I Instagram

Тошкент метроси 2030 йилгача 103 кмгача узайтирилади

Президентнинг “Тошкент шаҳрида транспорт тизими бошқарувини такомиллаштириш ҳамда тирбандликларнинг олдини олишга қаратилган қўшимча чора-тадбирлар тўғрисида”ги қарорига (ПҚ–368-сон, 4 декабрь 2025 йил) мувофиқ, пойтахт транспорт тизимини ривожлантириш бўйича 2030 йилгача мўлжалланган мақсадли кўрсаткичлар белгилаб олинди.

Қарорга кўра, Тошкент метрополитени тармоғи узунлиги 103 километргача етказилади. Шу билан бирга, жамоат транспортидан фойдаланиш даражасини 60 фоизга чиқариш, автобусларнинг ўртача ҳаракат тезлигини эса 18 км/соатдан 24 км/соатгача ошириш вазифаси қўйилган. Пойтахтда транспорт воситалари учун 150 мингта ўринга эга тўхтаб туриш (парковка) жойларини ташкил этиш ҳам режа асосида амалга оширилади.

Ҳужжатда кўзда тутилган тадбирларни мувофиқлаштириш ва назорат қилиш мақсадида Тошкент шаҳрида Йўл ҳаракатини ташкил этиш маркази тузилади. У замонавий рақамли ва “яшил” технологиялардан фойдаланиб, транспорт, йўловчи ва пиёдалар оқимини мунтазам мониторинг қилиш орқали йўл ҳаракатини самарали бошқариш билан шуғулланади.

Марказ шунингдек Тошкентнинг транспорт мастер режасини ишлаб чиқиш, ҳудудлардан кириб келадиган асосий автомобил йўллари, автобус ва метро бош бекатлари кесишмаларида кўп қаватли парковкалар барпо этиш, ер усти метро линиялари ва йўл ўтказгичлари остида хавфсиз тўхтаб туриш жойларини ташкил этиш вазифаларини ҳам бажаради.

Қарорда белгиланган чора-тадбирлар йўллардаги тирбандликларни камайтириш, жамоат транспорти улушини ошириш ҳамда пойтахт аҳолиси ва меҳмонлари учун ҳаракатланишни янада қулай ва самарали қилишга қаратилган.

Telegram I Facebook I YouTube I Instagram

"Ўзбекистонда ёмғир, қор ва кучли шамол бўлиши кутилмоқда" — Ўзгидромет

Ўзгидромет маълумотига кўра, 8–10 декабрь кунлари мамлакат ҳудудига нам ва совуқ ҳаво массалари кириб келади. Аҳоли об-ҳавога тайёр бўлиши лозим.

— 8–9 декабрь кунлари айрим ҳудудларда ёмғир ёғиши кутиляпти. 10 декабргача тоғ олди ва тоғли ҳудудларда ёғингарчилик — ёмғир ва қор — кузатилади, баъзи пайтларда кучаяди. Шимолий ва чўл ҳудудларида шамол тезлиги секундига 15–18 метр, баъзи жойларда 20–22 м/с гача кучайиши мумкин.
— 10 декабрь куни об-ҳаво сезиларли совийди:
• марказий ҳудудларда кечаси 2–5° совуқ, кундузи 3–6° илиқ;
• шимолий ҳудудларда кечаси 7–10° совуқ, кундузи 0–3° совуқ бўлади.

Ўзгидромет мутахассислари ҳавода намлик ортиши экологик вазиятга ижобий таъсир кўрсатишини таъкидлади.

Telegram I Facebook I YouTube I Instagram

Самарқандда 14,3 млрд сўмлик гиёҳвандлик воситалари муомаласига чек қўйилди

Жорий йилнинг ноябрь ойида ИИВ ва ДХХ Самарқанд вилоят бошқармалари ҳамкорлигида гиёҳвандлик воситаларининг ноқонуний айланмасига қарши тезкор тадбирлар ўтказилди.

Натижада умумий баҳоси 14 миллиард 256 миллион сўмлик 90 кгдан ортиқ гиёҳвандлик воситалари, 954 дона психотроп моддалар ва 1 кг 993 грамм синтетик гиёҳвандлик воситалари муомаласига чек қўйилди.

Telegram I Facebook I YouTube I Instagram

Томорқасидан юқори даромад олган деҳқонларга ер солиғидан катта имтиёз берилиши мумкин

2026 йилдан бошлаб Наманган вилоятида деҳқонлар учун ер солиғидан катта имтиёз берувчи синов тартиби жорий қилинади.

Маълум қилинишича, томорқасидан юқори даромад олган деҳқонлар ўз участкалари учун тўлаган ер солиғининг бир қисмини қайтариб олишлари мумкин. Бунинг учун етиштирилган маҳсулотлардан олинган даромад миқдори 1 сотих учун базавий ҳисоблаш миқдорининг 25 бараваридан юқори бўлиши шарт. Шу шарти бажарилса, тўланган ер солиғининг 90 фоизи қайтариб берилади.

Тажриба натижалари эса кейинчалик республиканинг бошқа ҳудудларида ҳам қўлланилиши мумкин.

Telegram I Facebook I YouTube I Instagram

Давлат харидларида 1,4 млрд сўмлик қонунбузилишлар аниқланди

Коррупцияга қарши курашиш агентлиги 3 та давлат харидида умумий 1,4 млрд сўмлик қонунбузилишлар аниқланганини маълум қилди.

Шу жумладан:

🔷832 млн сўмлик тиббий тўпламлар хариди;

🔷298 млн сўмлик экотуризм бўйича мастер режа ишлаб чиқиш хизмати;

🔷253,5 млн сўмлик суд биноси учун музей жиҳозлари харидида танловларда рақобат ва холислик принциплари бузилган.

Агентлик текширувлари асосида харид комиссияларининг ғолибни аниқлаш баённомалари бекор қилинди ва қонунга зид тартибда ўтказилиши мумкин бўлган харидлар олди олинди.

Тўпланган ҳужжатлар қонуний чора кўриш мақсадида ҳуқуқни муҳофаза қилувчи органларга юборилди.

Telegram I Facebook I YouTube I Instagram

Жамоат тартибига таҳдид солган жанжал бўйича жиноят иши қўзғатилди

Ижтимоий тармоқларда ҳайдовчилар ўртасидаги жанжални акс эттирган видео тарқалди.

Ҳолат юзасидан шу куннинг ўзида Жиноят кодексининг 277-моддаси 2-қисми билан жиноят иши қўзғатилди ва воқеа иштирокчиларининг барчаси процессуал тартибда ушланди.

Эслатиб ўтамиз, жамоат тартиби ва фуқаролар хавфсизлигига таҳдид солувчи ҳар қандай ҳаракат қонун устуворлиги асосида жазоланади.

Telegram I Facebook I YouTube I Instagram

Гиёҳвандлик — инсон иродаси ва жамият келажагига таҳдид

Гиёҳвандлик — бу шунчаки соғлиқни йўқотиш эмас, балки инсон иродасининг синиши, оилаларнинг пароканда бўлиши ва жамият келажагига болта уриш демакдир. Статистикага кўра, дунёда ҳар йили ярим миллиондан ортиқ инсон шу иллат қурбони бўлмоқда, наркобизнес нишонида эса асосан 30 ёшгача бўлган ёшлар турибди. Айниқса, арзон ва тез ўргатиб қўювчи синтетик воситаларнинг тарқалиши инсонни нафақат жисмонан мажруҳ қилади, балки ижтимоий деградацияга ва муддатидан олдин ўлимга етаклайди.

Юртимизда ушбу «аср вабоси»га ва унинг манбаларига қарши кескин кураш давом этмоқда. Видеода кўриб турганингиздек, ҳуқуқни муҳофаза қилувчи органлар томонидан ўтказилган тезкор тадбирлар натижасида гиёҳвандлик воситаларини тарқатмоқчи бўлган уюшган жиноий гуруҳ фаолиятига чек қўйилди. Бу амалиёт орқали нафақат қора бозор занжири узилди, балки юзлаб, минглаб одамларнинг заҳарланиши олди олингани шубҳасиз.

Унутманг, гиёҳвандликка қарши кураш фақат ҳуқуқ тартибот идораларининг иши эмас, бу ҳар биримизга дахлдор масаладир. Ўзбекистонда наркотик савдоси учун қатъий жавобгарлик ва узоқ муддатли қамоқ жазоси белгиланган бўлса-да, энг муҳим ҳимоя — бу огоҳликдир. Атрофга бефарқ бўлманг, зеро соғлом ва хавфсиз жамиятни фақат биргаликда қура оламиз.

Telegram I Facebook I YouTube I Instagram

Талаба ва ўқувчилар учун қишки таътил 28 декабрдан бошланади

Олий таълим, фан ва инновациялар вазирлигининг тегишли буйруғига мувофиқ, олий, ўрта махсус ва касбий таълим ташкилотлари (давлат, нодавлат ҳамда хорижий) ва академик лицейлар талаба ҳамда ўқувчиларининг жорий ўқув йили учун  қишки таътил муддати белгиланди.

Унга кўра, қишки таътил 2025 йил 28 декабрдан бошланиб, 2026 йил 10 январига қадар (шу куни ҳам) давом этади.

Талаба ва ўқувчиларнинг қишки таътил даврида доимий яшаш ҳудудларига (Қорақалпоғистон Республикаси, вилоятлар ва Тошкент шаҳрига) бориб-келишларини қулайлаштириш мақсадида Транспорт вазирлиги, “Ўзбекистон темир йўллари” АЖ ҳамда “Uzbekistan Airways” АЖ билан ҳамкорликда қўшимча имкониятлар яратилади.

Шунга мувофиқ, 2025 йил 18 декабрдан 2026 йил 12 январига қадар (шу куни ҳам) талабалар ва ўқувчилар учун 50 фоиз чегирма асосида йўл чипталари сотуви йўлга қўйилади,

дейилади расмий хабарда.

Telegram I Facebook I YouTube I Instagram

Худога нола қилиб йиғлардим – Ёлғизлик, хиёнат ва қайта туғилиш: Мадина Комилованинг ҳаёт синови

Мадина Комилованинг ҳаёти — куч, ирода ва қайта тикланиш ҳақидаги аччиқ ҳақиқатдир.

У ёшлигида икки катта хатога йўл қўйди:

— ишонувчанлик билан нотўғри инсонни танлади,
— ҳаёт йўлини ўша одамнинг қўлига топширди.

Бугун у шу икки хатонинг оғир юкини йиллар давомида елкасида кўтарганини, бу жараён унинг ҳаётини бутунлай ўзгартириб юборганини эслайди.
Оғир дард уни тўшакка михлаб қўйганда, энг яқин деб билган инсон ундан юз ўгирди. Тушкунлик, ёлғизлик ва қўрқув бирлашиб, уни руҳий жиҳатдан синиш ёқасига олиб борди.

«Тунлари Худога нола қилиб йиғлардим… Ўзимни ҳеч кимга кераксиз, ташландиқдек ҳис қилганимдан даҳшатга тушардим», — дейди Мадина.

Telegram I Facebook I YouTube I Instagram