Бувайдада экология инспекторига нисбатан куч ишлатилди: ҳолат ўрганилмоқда

Фарғона вилояти Бувайда туманида хизмат вазифасини бажараётган экология инспекторига нисбатан ҳоким ўринбосари томонидан жисмоний куч ишлатилди. Бу ҳақда Экология қўмитаси раиси маслаҳатчиси Расул Кушербаев хабар берди.

Унинг сўзларига кўра, туман экология инспектори Аҳроржон Ниёзов фуқаролардан келиб тушган мурожаат асосида белгиланган манзилга бориб, у ерда дарахтларни қонунга зид равишда кесиш ҳолатини аниқлаган. Инспектор вазиятни тўхтатиб, ҳуқуқий тартибда баённома расмийлаштиришни бошлаган.

Шу вақтда воқеа жойига туман ҳокими ўринбосари Саидали Хидиров келиб, унинг ҳаракатларига аралашгани айтилади. Хабарларда унинг инспекторга нисбатан куч ишлатгани ва Миллий гвардия ходимлари ёрдамида ИИБга олиб боришга уриниш бўлгани қайд этилмоқда.

Ижтимоий тармоқларда тарқалган видеоёзувларда инспектор дарахт кесаётган шахс қўлидан аррани тортиб олгани акс этган. Фуқаро эса дарахт эмас, бута кесаётганини таъкидлаган. Бироқ тасвирларда дарахт шикастлангани кўринади. Кейинчалик ҳоким ўринбосари аррани қайтариб беришни талаб қилган, инспектор эса бундай босим қонуний эмаслигини билдирган. Шу орқали тортишув кучайиб, у судраб чиқарилгани ҳам лавҳаларда кўринади.

Ҳодиса вақтида ички ишлар органлари ходимлари ҳам воқеа жойида бўлган.

Фарғона вилояти ИИБ расмий муносабатида инспектор мажбуран ИИБга олиб кетилгани ҳақидаги маълумотни инкор қилди. Шунингдек, ҳодиса юзасидан вилоят ҳокимияти ва ҳуқуқни муҳофаза қилувчи органлар иштирокида махсус ишчи гуруҳ ташкил этилгани маълум қилинди. Мазкур гуруҳ туман ҳокимлиги мансабдор шахсларининг ҳаракатларига ҳуқуқий баҳо бериши билдирилган.

Вилоят ҳокимлиги ҳам ўз навбатида вилоят ҳокими ўринбосари Ҳ.Долимов раҳбарлигида алоҳида ишчи гуруҳ тузилганини ва ҳолат жойида ўрганув ишлари олиб борилаётганини маълум қилди. Натижаларга кўра расмий қарор қабул қилиниши айтилди.

Telegram I Facebook I YouTube I Instagram

Тошкент халқаро аэропортида фуқаро 95 та телефонни яширинча олиб ўтмоқчи бўлди

Божхона қўмитасининг Контрабандага қарши курашиш бошқармаси ҳамда “Тошкент-АЭРО” ИБК тезкор ходимлари мобил қурилмаларнинг ноқонуний олиб кирилишига қарши тезкор тадбир ўтказди.

Дубайдан учиб келган фуқарога тегишли қўл сумкалари текширилганда, унда ҳужжатлари йўқ 8 та “Iphone 17 Pro” ва 87 та “Iphone 17 Pro Max”, яъни умумий 95 та телефон топилди.

Ҳозирда мазкур мобил қурилмалар вақтинча сақловга олинган бўлиб, уларнинг дастлабки баҳоси 1 млрд. 913 млн сўмни ташкил қилади.

Божхона органлари ҳозирда ҳолат бўйича суриштирув ишларини олиб бормоқда.

Telegram I Facebook I YouTube I Instagram

Навоийда экологик ва тоза энергия лойиҳалари бўйича ҳамкорлик йўлга қўйилди

Бугун Навоий вилояти ҳокими Нормат Турсунов Хитойнинг “Sinoma Energy Conservation International Investment Co.,Ltd” компанияси раиси ва бош директори Зуо Даюн бошчилигидаги делегацияни қабул қилди. Бу ҳақда вилоят ҳокимлиги ахборот хизмати хабар берди.

Компания йирик саноат корхоналарида атмосферага чиқиндиларни камайтириш, чўлланишни олдини олиш ва чўл ҳудудларида яшилликни кўпайтириш бўйича замонавий лойиҳаларни амалга оширади. Учрашувда Навоий вилоятига замонавий ускуналар ва етакчи мутахассисларини юбориш бўйича дастлабки келишувларга эришилди.

Шунингдек, томонлар чиқиндини қайта ишлаш орқали қайта тикланадиган электр энергия ишлаб чиқариш, атроф-муҳитни муҳофаза қилиш, энергия тежовчи муҳандислик ва саноатда қайта ишланадиган маҳсулотлар ишлаб чиқариш лойиҳаларини ҳамкорликда амалга ошириш масалаларини муҳокама қилди.

Маълумот учун, компания Навоийда қуввати 300 МВт бўлган қуёш фотоэлектр станцияси, 75 МВт қувватли электр энергиясини сақлаш тизими ва ҳаво электр узатиш тармоқларини қуриш лойиҳасини амалга оширмоқда.

Telegram I Facebook I YouTube I Instagram