Бўзатов туманига прокурор тайинланди

Аширбаев Жанибек Аминбаевич Бўзатов тумани прокурори лавозимига тайинланди.

Маълум қилинишича, Ж.Аширбаев шу кунга қадар Ўзбекистон Республикаси Бош прокуратураси бошқарма прокурори лавозимида фаолият юритиб келган.

Янги тайинлов прокуратура органларида амалга оширилаётган кадрлар сиёсати доирасида амалга оширилгани қайд этилди.

Telegram I Facebook I YouTube I Instagram

Давлат компаниялари энди фақат президент рухсати бўлсагина ҳомийлик билан шуғулланади

Давлат корхоналарида самарадорликни ошириш бўйича президент фармойиши қабул қилинди. Унда давлат улуши 50 фоиз ва ундан юқори компанияларга фаолиятига янги талаблар белгиланган.

Ҳужжатга мувофиқ, “UzAssets” АЖ бошқарувидаги стратегик йирик давлат корхоналарининг 2026 йилги бизнес-режалари 2 ой муддатда танқидий қайта кўриб чиқилади. 2026 йил 1 мартдан бошлаб мазкур корхоналарда молиявий режалаштириш, харидлар, шартномалар ижроси, ғазначилик тўловлари, савдо операциялари ва комплаенс назоратини қамраб олувчи “Ягона ғазначилик” ахборот тизими жорий этилиб, барча даромад ва харажатлар марказлаштирилган ҳолда амалга оширилади.

Шунингдек, молиявий ва ишлаб чиқариш оқимларини онлайн таҳлил қилиш ҳамда бизнес-режа ижросини назорат қилувчи “Молиявий модел” дастури ишга туширилади. Ёрдамчи хизматларни марказлаштириш мақсадида Shared Service Centers фаолияти йўлга қўйилади. Бизнес жараёнларини автоматлаштириш учун божхона, солиқ, давлат харидлари тизимлари, банклар ва бошқа ташкилотлар ахборот тизимлари ўзаро интеграция қилинади.

“Давлат корхоналари Ўзбекистон Республикаси президенти қарорлари ва топшириқларидан ташқари бошқа ҳолларда ҳомийлик ёрдамларини кўрсатишни тўхтатсин”,

– дейилади фармойишнинг 9-бандида.

Маълумот учун, UzAssets портфелига НКМК, ОКМК, “Ўзбекнефтгаз”, “Ўзбекистон темир йўллари”, UzAuto Motors, “Ўзкимёсаноат”, Uzbekistan Airways, Uzbekistan Airports, “Ўзбектелеком” ва бошқа йирик давлат корхоналари ҳамда давлат банклари киради.


Telegram I Facebook I YouTube I Instagram

Трансплантация амалиёти учун тиббий хулосалар бериш тартиби белгиланди

Адлия вазирлиги Инсон аъзоларини трансплантация қилиш ҳақида реципиентлар ва донорларга тиббий хулосалар бериш бўйича низомни рўйхатдан ўтказди (рўйхат рақами: 3706, 21.11.2025 й.).

Мазкур Низомда реципиент ва донорларни тиббий текширувлардан ўтказиш ҳамда трансплантация амалиёти учун тиббий хулосалар бериш тартиби белгиланди.

Низомга кўра, реципиент ва тирик донор тиббиёт муассасаларида 3 ой ичида тиббий текширувлардан ўтиши керак.

Тиббий текширув хулосаларига кўра трансплантация амалиётига рухсат бериш фақат Ҳукуматнинг 2024 йил 13 июндаги 333-сон қарорида кўрсатилган давлат тиббиёт муассасаларининг тиббий консилиуми томонидан амалга оширилади.

Тиббий консилиум реципиентга инсон аъзолари ва (ёки) тўқималари трансплантацияси амалиётига муҳтожлиги, донорга эса трансплантация амалиётига лаёқатлилиги тўғрисида тиббий хулосани беради ёки беришни рад этади.

Трансплантация амалиёти инсоннинг кўриш, нутқ, эшитиш қобилиятининг йўқолиши ёки руҳиятнинг бузилиши, меҳнат қобилиятининг 33 фоиздан ортиқ барқарор йўқолишига сабаб бўладиган тарзда зиён етказишига олиб келса реципиент ва донорга тиббий хулосани бериш рад этилади.

Telegram I Facebook I YouTube I Instagram

Комил Алламжонов Президент Администрациясининг АҚШдаги вакили этиб тайинланди

Ўзбекистон Республикаси Президенти Администрацияси раҳбарининг фармойиши билан Комил Исмоилович Алламжонов маслаҳатчи-ваколатли вакил — Ўзбекистон Республикаси Президенти Администрациясининг АҚШдаги вакили лавозимига тайинланди.

Шу билан бирга, у Ўзбекистон Республикаси Президенти Администрацияси раҳбарининг маслаҳатчиси лавозимидаги фаолиятини ҳам давом эттириши маълум қилинди.

Telegram I Facebook I YouTube I Instagram

Давлат улуши мавжуд банкларда матбуот котиби лавозими тугатилади

Ўзбекистон Республикаси президентининг 2025 йил 18 ноябрдаги фармойишига асосан, давлат корхоналари, хусусан, банклар ҳам аутсорсинг тизимига ўтилади.

Шунга кўра, банклардаги матбуот хизмати (маркетинг, реклама, жамоатчилик билан алоқалар) хизмати хусусий секторга берилади.

Хусусийлаштириладиган қатор функциялар қаторига, шунингдек, тозалаш, хавфсизлик, овқатланиш, автотранспорт, техник хизмат, IT қўллаб-қувватлаш, бухгалтерия, юридик хизмат кабилар ҳам киритилган.

Маълумот учун, бу ўзгаришлар фақат давлат улуши мавжуд банкларга киритилади. Масалан, Асакабанк (99,07%), “Микрокредитбанк” (давлат улуши 70.84%) ҳамда Миллий банк (59,3 %).

Telegram I Facebook I YouTube I Instagram

Ўзбекистон дипломлари 38 та мамлакатда расман тан олинади

Ўзбекистон Марказий Осиёда илк бор ЮНЕСКОнинг “Олий таълим соҳасида малакаларни тан олиш тўғрисидаги глобал конвенция”сини ратификация қилди. Натижада мамлакатда олинган дипломлар Япония, Корея, Буюк Британия, Франция, Австралия ва бошқа 38 та давлатда тўғридан-тўғри тан олинади.

Қайд этилишича, конвенцияга аъзо бўлмаган Россия, Тожикистон ва Қирғизистон дипломлари амалдаги тан олиш тартиби асосида кўриб чиқилади.

Ўзбекистон уч ой ичида конвенциянинг тўлақонли аъзосига айланади. Бу эса талабалар, ёш мутахассислар ва илмий ходимлар учун халқаро миқёсда янги имкониятлар яратади.

Telegram I Facebook I YouTube I Instagram

Боғча тарбиячилари яна трендда

Ижтимоий тармоқларда тарқалган видеода тарбиячи болаларга Ўзбекистон Республикаси Давлат байроғи ҳақида нотўғри маълумот бергани акс этган. Унга кўра, байроқдаги 12 та юлдуз гўёки 12 та давлатимиз борлигидан далолат беради, деган иддао айтилган.

Тарбиячи шу билан чекланмай, “13-қўшимча вилоятимиз номи Қирғизистон”, деб болаларга мутлақо асоссиз маълумот тақдим этгани видеода ёзиб олинган.

Афсуски, болалар айнан шундай “билимли” ва олий тоифали мутахассислардан дарс олаётган бир пайтда, келажак авлод таълим сифати ҳақидаги хавотирлар асоссиз эмас.

Telegram I Facebook I YouTube I Instagram

Зойир Мирзаев онкологик касалликлар кўпайишини турмуш тарзи билан боғлади

Тошкент вилояти ҳокими Зойир Мирзаев аёллар орасида онкологик касалликлар сони ортиб бораётгани ҳақида фикр билдириб, бу ҳолатга сабаблардан бири сифатида тандирда нон ёпиш каби анъанавий одатларнинг камайишини қайд этди.

Унинг таъкидлашича, жисмоний фаолликнинг пасайиши ва ҳаракатсиз турмуш тарзи саломатликка салбий таъсир кўрсатмоқда. Хоким бу борада шундай деди:

«Тандирда нон ёпган аёлда рак касали бўлмайди. Сабаби тандирнинг олдига борганда организм қизийди, кейин қон икки баробар тез айланаркан организмда. Шунинг тезлигида қон томирларни тозалаб ташларкан».

Мирзаевнинг сўзларига кўра, хорижий мутахассислар томонидан олиб борилган таҳлилларда ҳам камҳаракатлик онкологик касалликлар омиллари орасида илк ўринларда қайд этилган. Шу нуқтаи назардан, у миллий анъаналарга қайтиш ва фаол ҳаёт тарзини сақлаш муҳим эканини таъкидлади.

Telegram I Facebook I YouTube I Instagram

Фарғона: Водилда ота-оналар ва бемор болаларнинг кўз ёшлари оқяпти. Ҳокимлар бефарқми?

👉 https://youtu.be/L_RSi1A9usk

Суд тизимида кескин ўзгаришлар: рақамлаштириш, аёл судьялар ва янги ҳимоя кафолатлари

Президент томонидан “Суд тизимини такомиллаштириш тўғрисида”ги фармон имзоланди. Унга кўра, суд ҳокимиятини рақамлаштириш, судьялар мустақиллигини мустаҳкамлаш ва шаффофликни оширишга қаратилган қатор янгиликлар жорий этилмоқда.

Фармонда суд жараёнларига рақамли технологияларни кенг татбиқ этиш назарда тутилган. Электрон овоз бериш, рақамли протоколлар ва сунъий интеллект орқали судьялар фаолиятини баҳолаш тизими қарор қабул қилишда очиқликни таъминлаши кутилмоқда.

Шунингдек, аёл судьялар улушини камида 30 фоизга етказиш режалаштирилган. Одил судлов академиясига қабулда хотин-қизлар учун алоҳида квота жорий этилади.

Судьяларни интизомий жавобгарликка тортиш тартиби ҳам такомиллаштирилиб, уларга ҳимояланиш ҳуқуқи кафолатланмоқда. Янгича жазо тури сифатида қуйи лавозимга ўтказиш амалиёти киритилмоқда.

Беш йилдан ортиқ тажрибага эга судьяларга Одил судлов академиясида дарс бериш ва кейин яна ўз лавозимига қайтиш имконияти яратилади.

Мазкур ислоҳотлар суд-ҳуқуқ тизимини янада замонавий, мувозанатли ва одил қилишга қаратилган.

Telegram I Facebook I YouTube I Instagram