Тошкент вилоятида эркак хотинига қурол билан таҳдид қилди

Тошкент вилоятининг Кўксарой маҳалласида 33 ёшли эркак оилавий жанжал сабаб турмуш ўртоғига ов қуроли билан таҳдид қилиб, уни калтаклаган. Жабрланувчи олган енгил тан жароҳати тиббий экспертиза билан тасдиқланган.

Ҳодиса бўйича Жиноят кодексининг 109-моддаси 2-қисми билан жиноят иши қўзғатилди. Эркакнинг овчилик гувоҳномаси бекор қилинди, ТОЗ-34 русумли қуроли мусодара қилинди.

Тергов Оҳангарон тумани ички ишлар бўлими томонидан давом эттирилмоқда.

Telegram I Facebook I YouTube I Instagram

АҚШда янги қоида — семизлик виза олишга тўсиқ бўлиши мумкин

“The Washington Post”нинг ёзишича, АҚШ Давлат департаменти 2025 йил 6 ноябрда барча дипломатик ваколатхоналарга янги кўрсатма юборган. Унга кўра, аризачининг соғлиғи, ёши ва АҚШда давлат нафақасига муҳтож бўлиб қолиш эҳтимоли виза беришда ҳал қилувчи омилга айланади.

Ҳужжатда юрак-қон томир касалликлари, нафас йўллари муаммолари, саратон, диабет, метаболик ва руҳий касалликлар, шунингдек семизлик АҚШга эҳтимолий катта тиббий харажат юклаши мумкинлиги қайд этилган. Шу боис бундай ҳолатлар визани рад этишга асос бўлиши мумкин.

Трамп маъмурияти бу сиёсатни “америкаликларни биринчи ўринга қўйиш” дея изоҳлаган.

Telegram I Facebook I YouTube I Instagram

Тиббиёт муассасаларида пулли хизматлар тартиби белгиланди

Ўзбекистон ҳукумати қарорига кўра, эндиликда мижоз режали тиббий ёрдам учун йўлланмасиз мурожаат қилса, хизмат пулли асосда кўрсатилади. Давлат кафолати доирасида бепул хизматлардан ташқари қўшимча хизматлар пулли ҳисобланади.

Мижоз тиббий муассасага рўйхатга олинади ва тўловни олдиндан тўлайди. Куйидаги хизматлар тасдиқланган нархнома бўйича кўрсатилади: маслаҳат олиш, лаборатория ва ташхис ишлари, тор соҳа мутахассиси кўригидан ўтиш ва зарур бўлса амбулатор ёки стационар даволаниш.

Telegram I Facebook I YouTube I Instagram

240 минг долларлик уй можароси: Жамила Олимбоева “Real Sanjik” ва қочоқ куёв судда нималар деди?

14 ноябрь куни Жиноят ишлари бўйича Мирзо Улуғбек тумани судида “Real Sanjik” ва Жамила Алимова иши бўйича навбатдаги суд мажлиси бўлиб ўтди.

Мажлис очиқ тарзда ўтказилди ва унда ОАВ вакиллари иштирок этди.
Ҳозирча иш бўйича аниқ хулоса бериш учун эрта, жараён давом этмоқда.

Telegram I Facebook I YouTube I Instagram

Хитой–Қирғизистон–Ўзбекистон темирйўли режадан анча тез — 4 йилда якунланиши мумкин

Хитойни Ўзбекистон билан боғлайдиган Хитой–Қирғизистон–Ўзбекистон темирйўли лойиҳаси режада белгиланган муддатдан тезроқ амалга оширилмоқда. Олти йил деб белгиланган муддат ўрнига қурилиш тўрт йилда якунланиши мумкинлиги хабар қилинди. Бу ҳақда “Каспий Пост” нашри Қирғизистон ОАВига таяниб маълум қилди.

“Ўзбекистон темирйўллари” АЖ биринчи ўринбосари Ҳикматулла Раҳметовга кўра, қурилиш жадвали режадан илгарилаб кетган ва ишлар кутилганидан юқори суръатларда давом этмоқда.

Лойиҳа амалга оширилиши натижасида Хитой, Европа ва Марказий Осиё ўртасидаги масофа 1 000 километрдан ортиққа қисқаради. Бу эса минтақалар ўртасидаги савдо айланмаси, логистика ва транзит имкониятларини сезиларли даражада оширишга хизмат қилади.

Ўзбекистон транспорт вазири Илҳом Маҳкамов таъкидлашича, ушбу темирйўл келгусида Транс-Афғонистон йўлаги билан боғланиб, Марказий Осиёни тўғридан-тўғри Ҳинд океани портлари билан боғлайди. Бу минтақа учун янги стратегик имкониятлар яратиб, Транскаспий йўлагининг муҳим бўғинига айланади.

Қурилиш 2024 йил 27 декабрь куни Жалолободда бошланган. Темир йўлнинг умумий узунлиги 532,5 км бўлиб, шундан 312 км Қирғизистон ҳудудидан ўтади. Маршрут Қашғар — Торугарт — Макмал — Жалолобод — Андижон йўналишини қамраб олади. Лойиҳанинг умумий қиймати 4,7 миллиард долларга тенг.

Хитой–Қирғизистон–Ўзбекистон темир йўли келгусида Марказий ва Жанубий Осиёни боғловчи энг муҳим стратегик транспорт йўлакларидан бирига айланиши кутилмоқда.

Telegram I Facebook I YouTube I Instagram

Тўқаев: "Қозоғистон ва Ўзбекистон рақобатчи эмас, балки ишончли иттифоқчи"

Қозоғистон президенти Қосим-Жўмарт Тўқаев икки мамлакат муносабатларига оид турли тахминларга изоҳ берди.

Унинг таъкидлашича:

"Турли хил “экспертлар”нинг асоссиз гумонларига қарамай, Қозоғистон ва Ўзбекистон асло рақиб ҳам, ҳатто рақобатчи ҳам эмас. Аксинча, улар — тараққиёт ва ривожланиш йўлида бирга бораётган стратегик ҳамкорлар ва ишончли иттифоқчилардир".

Telegram I Facebook I YouTube I Instagram

Сурхондарёдаги 38,5 млрд сўмлик давлат харидида қонунбузарлик аниқланди

Сурхондарё QurilishInvest ДМ буюртмаси асосида ўтказилган давлат харидини Коррупцияга қарши курашиш агентлиги томонидан ўрганиш жараёнида қонунбузарлик ҳолати аниқланди.

Хусусан, давлат муассасаси томонидан Бойсун туманидаги “Хонғоронсой” сел сув омборидан насос станцияси ва сув узатиш қувурларини қуриш орқали экин майдонларининг сув таъминотини яхшилаш бўйича бошланғич қиймати 38,5 млрд сўм бўлган тендер эълон қилинган.

Харид комиссияси баённомасига кўра, мазкур давлат харидида 36,5 млрд сўмлик таклиф билан “Д.Й.Т.” МЧЖ ғолиб, 38,5 млрд сўмлик таклиф билан “М.И.Т.” ХК захирадаги ғолиб деб топилган.

Аниқланишича, тендернинг яна бир иштирокчиси — “Ф.” МЧЖнинг солиқ ҳисоб варағига ноқонуний аралашув орқали солиқдан қарздорлик мавжудлиги ҳақида сохта маълумот киритилган.

Натижада жамият “Шаффоф қурилиш” махсус ахборот платформаси орқали тендер жараёнидан асоссиз равишда четлатилган.

Агентлик томонидан кўрилган чоралар натижасида мазкур хариднинг бекор қилиниши таъминланди.

Шунингдек, ҳолат юзасидан тўпланган ҳужжатлар асосида ҳозирда ҳуқуқни муҳофаза қилиш органлари томонидан тегишли ҳуқуқий баҳо берилмоқда.

Коррупция ҳолатига дуч келган фуқаролар, агентликнинг “Колл-маркази” – 1253 орқали мурожаат қилиши мумкин.

Telegram I Facebook I YouTube I Instagram

Қозоғистон чегарасида коррупция иддаолари: ходим ўзбекистонликлардан пул талаб қилгани айтилмоқда

Қозоғистон–Ўзбекистон чегарасида коррупцион ҳолат юз бергани ҳақида ижтимоий тармоқларда тарқалган видеолар жамоатчилик эътиборини тортди. Айтишларича, чегара назоратида ишловчи аёл ходим турли баҳоналар орқали Ўзбекистон фуқароларидан пул талаб қилган.

Видео Instagram ижтимоий тармоғига юклангач, кўплаб фойдаланувчилар изоҳларда айнан шу ходим томонидан пул беришга мажбур бўлгани, акс ҳолда ҳужжат расмийлашуви чўзилиши ёки ўтказилмаслик хавфи бўлганини ёзиб қолдирган.

Ҳозирча расмий идоралар томонидан расмий изоҳ берилмаган. Жамоатчилик мазкур ҳолат бўйича текширув ўтказиб, қонуний чора кўрилишига умид билдирмоқда.

Telegram I Facebook I YouTube I Instagram

Шаҳноза Мирзиёева Урганч–Хива троллейбусида аҳоли билан мулоқот қилди

15 ноябрь куни Шаҳноза Мирзиёева Хоразм вилоятига ташрифи доирасида Урганч–Хива йўналишида ҳаракатланувчи троллейбусда сафар қилди.

Сафар давомида у йўловчилар билан самимий мулоқот қилиб, уларнинг фикрларини тинглади.

Telegram I Facebook I YouTube I Instagram

Чилонзорда тунги рейд..

Жорий йилнинг 13 ноябрь куни Вазирлар Маҳкамаси ҳузуридаги қурилиш инспекцияси ходимлари билан ҳамкорликда тунги рейд тадбирлари ўтказилди.

Бунда Чилонзор туманининг Қизил Шарқ ҳамда Чарх Комолан маҳаллаларидаги кўп қаватли уйлар ўрганилиб, ноқонуний ҳолатлар аниқланди ва тегишлича чоралар кўрилди.

Telegram I Facebook I YouTube I Instagram

Россиянинг бир қатор ҳудудларида симли интернетда йирик узилиш кузатилди

Россиянинг бир нечта вилоят ва ўлкаларидан симли интернетда катта миқёсли носозликлар юз бергани ҳақида хабарлар келмоқда. Энг кўп шикоятлар Кострома, Ярославль, Иваново, Владимир, Мурманск вилоятлари hamda Краснодар ўлкасидан қайд этилган.

Фуқароларнинг айтишича, кўплаб уйларда интернет деярли бир суткадан бери ишламаяпти, фақат «оқ рўйхат»даги айрим сайтларгина мавжуд бўлган.

«Ростелеком» компанияси носозликка “техникавий ишдан чиқиш” сабаб бўлганини маълум қилди. Айни вақтда мутахассислар томонидан хизмат тикиланмоқда ва интернетга уланиш аста-секин қайта йўлга қўйилаётгани айтилмоқда.

Telegram I Facebook I YouTube I Instagram

The Guardian: АҚШ ҳарбийлари Ғазони икки зонага ажратишни режалаштирмоқда

The Guardian нашрининг ёзишича, АҚШ ҳарбийлари Ғазо секторини икки асосий зонага бўлиш режасини ишлаб чиққан.

🟢 Режага кўра, «яшил зона» халқаро ва Исроил кучлари назоратида бўлади. Мазкур ҳудудда қайта қуриш ишлари бошланиши режалаштирилган.

🔴 Деярли бутун фаластинлик аҳоли кўчирилиши кўзда тутилган «қизил зона» эса вайрон ҳолда қолади. Иккала ҳудуд «сариқ чизиқ» билан ажратилади — у Исроил кучлари чекинган чизиғы сифатида белгиланади.

Маълумотларга кўра, келгусида АҚШ фаластинлик тинч аҳолини Исроил назоратидаги «яшил зона»га ихтиёрий равишда қайтишга ишонтиришни мақсад қилган.

Telegram I Facebook I YouTube I Instagram

Водийдаги метан заправкаларга газ етказиб беришнинг кўчма тизими ишга туширилди

Энергетика вазирлиги маълумотига кўра, Водий вилоятларидаги “метан заправка”ларни қиш мавсумида барқарор табиий газ билан таъминлаш мақсадида махсус кўчма контейнерлар (автоцистерналар) орқали газ етказиб бериш тизими йўлга қўйилади.

Ушбу тизим орқали заправкаларга табиий газ ўз вақтида етказилиб, уларнинг узлуксиз фаолияти таъминланади.

Маълум қилинишича, бир дона газ ташиш контейнери 6 минг куб метр газ сиғимига эга бўлиб, ўртача 300 та енгил автомобилга хизмат кўрсатиши мумкин. Бу эса бир суткада тахминан 15 мингта автомобилига газ қуйиш имконини беради.

Ҳукумат топшириғига биноан, Энергетика вазирлиги ва “Ўзбекнефтгаз” АЖ томонидан табиий газни (CNG) юқори босимдаги кўчма контейнерларда етказиб бериш бўйича пилот лойиҳа амалга оширила бошлади.

Telegram I Facebook I YouTube I Instagram

Мирзиёев Марказий Осиё саммитида интеграция, хавфсизлик ва инфратузилма бўйича янги ташаббусларини тақдим этди

Марказий Осиё давлатлари раҳбарларининг VII Маслаҳат учрашуви минтақавий ҳамкорликни янада кучайтиришга қаратилган муҳим сиёсий платформа сифатида ўтди. Бу йилги саммитнинг энг аҳамиятли янгилиги — Озарбайжоннинг форматга тўлақонли иштирокчи сифатида қўшилгани бўлди. Президент Шавкат Мирзиёев буни Марказий Осиё ва Жанубий Кавказ ўртасида янги стратегик ҳамкорлик фазосини очувчи муҳим қадам сифатида эътироф этди.

Учрашувда Мирзиёев минтақа учун стратегик аҳамият касб этувчи бир қатор таклифлар билан чиқди.

◆ Минтақавий интеграцияни янги босқичга олиб чиқиш
Президент таъкидлаганидек, охирги йилларда Марказий Осиёда ўзаро алоқалар сезиларли даражада фаоллашди. Савдо ҳажми 10,7 млрд долларга етди, инвестиция оқими эса 17 фоизга ошди. Ушбу жараённи давом эттириш учун давлатлар ўртасида ишонч ва очиқ мулоқотни мустахкамлаш муҳим эканлиги айтилди.

◆ Ҳамкорликни институционал асосда мустаҳкамлаш
Мирзиёев қуйидаги ташаббусларни илгари сурди:
— “Марказий Осиё ҳамжамияти” стратегик платформасини яратиш;
— доимий Котибият ва Оқсоқоллар кенгашини ташкил этиш;
— миллий мувофиқлаштирувчилар ваколатларини кенгайтириш.

◆ Иқтисодий ривожланиш ва сармоявий ҳамкорлик
Президент фикрича, минтақанинг иқтисодий салоҳияти ҳали тўлиқ ишга солинмаган. Унинг таклифларига кўра:
— 2035 йилгача мўлжалланган иқтисодий дастур қабул қилиниши;
— ягона инвестиция маконига оид декларация ишлаб чиқилиши;
— электрон тижоратни биргаликда ривожлантириш зарур.

◆ Транспорт ва инфратузилма йўналишидаги ўзаро ҳамкорлик
Мирзиёев минтақани боғлайдиган йирик инфратузилма лойиҳаларига алоҳида эътибор қаратди:
— “Хитой–Қирғизистон–Ўзбекистон” темир йўли;
— Трансафғон халқаро йўлаги;
— Транскаспий маршрутини кенгайтириш.
Шунингдек, инфратузилма соҳаси бўйича Минтақавий Кенгаш ташкил этиш таклифи берилди.

◆ Хавфсизлик: умумий ёндашув ва Афғонистон масаласи
Саммитда минтақавий хавфсизлик концепцияси ва “Таҳдидлар каталоги” тақдим этилди. Президент Афғонистонни минтақавий транспорт ва энергетика лойиҳаларига босқичма-босқич интеграция қилиш тарафдори эканини билдирди. “Фарғона тинчлик форуми”ни доимий анжуманга айлантириш таклифи ҳам янгради.

◆ Иқлим ўзгариши ва сув ресурсларини бошқариш
Ўзбекистон томонидан 2026–2036 йилларни “Сувдан оқилона фойдаланиш ўн йиллиги” деб эълон қилиш ташаббуси илгари сурилди. Шунингдек, сув хўжалиги бўйича компетенциялар марказини ташкил этиш таклиф этилди.

◆ Гуманитар ва илмий соҳалардаги ҳамкорлик
Маданий ва илмий интеграцияни ривожлантириш мақсадида Президент қуйидаги ташаббусларни билдирди:
— маънавий меросга бағишланган халқаро конгрессни йил сайин ўтказиш;
— Минтақавий илмий тадқиқотлар жамғармасини ташкил этиш;
— БМТда минтақа олимлари илмий ғояларини акс эттирувчи резолюция илгари суриш.

Учрашув якунида Мирзиёев Туркманистонни “Марказий Осиё ва Озарбайжон” форматдаги янги раисликни қабул қилгани билан табриклади ва Ўзбекистоннинг ушбу жараённи қўллаб-қувватлашга тайёрлигини билдирди.

Telegram I Facebook I YouTube I Instagram

Озарбайжон Маслаҳат учрашувларининг тўлақонли аъзосига айланди

Марказий Осиё давлатлари раҳбарларининг 7-Маслаҳат учрашувида тарихий қарор қабул қилинди. Ўзбекистон президенти Шавкат Мирзиёев Озарбайжоннинг форматга тўлақонли иштирокчи сифатида қўшилгани ҳақида маълум қилди.

Давлатимиз раҳбари таъкидлаганидек, ушбу стратегик қадам умумий тарих, қардошлик ришталари, маънавий ва маданий яқинлик билан узвий боғланган халқларимиз манфаатларига тўлиқ жавоб беради.

Telegram I Facebook I YouTube I Instagram

Тошкентда қатор йирик Ўзбекистон–Қозоғистон лойиҳалари ишга туширилди

Тошкент шаҳрида “Марказий Осиё” халқаро саноат кооперацияси маркази ҳамда “Tenge Bank”нинг янги бош офиси расман ишга туширилди.

Шунингдек, “Silkway Central Asia” кўп тармоқли логистика маркази, чизиқли алкилбензол ишлаб чиқариш қувватлари, Янги Тошкентда “Остона” мавзеси, шу билан бирга Тошкент ва Остона пойтахтларидаги ҳамном меҳмонхона мажмуаларининг қурилиши бошланди.

Ўзбекистон ва Қозоғистон президентлари мазкур лойиҳалар икки давлат ўртасидаги ўзаро манфаатли савдо-иқтисодий ҳамкорликни янада мустаҳкамлашини таъкидлади.

Telegram I Facebook I YouTube I Instagram

Қонунлар фақат қоғозда қолди: дорисиз қолган беморлар дарди

Онкологик беморларга дори воситалари бепул етказиб берилиши қонунда белгиланган бўлса-да, Жиззах вилоятида июнь ойидан буён бу талаб амал қилмаётгани айтилмоқда.

Қоғоздаги қонунлар билан ҳаётни сақлаб қолиб бўлмайди. Дорисиз қолган беморларнинг дардига эса ҳеч ким қулоқ тутмаяпти — на масъуллар, на тизим.

👉 ТЎЛИҚ ВИДЕО

Telegram I Facebook I YouTube I Instagram

Каттақўрғонда ноқонуний олтин савдоси фош этилди

Қашқадарё вилояти ДХХ бошқармаси ва Иқтисодий жиноятларга қарши курашиш департаменти ходимлари томонидан Самарқанд вилоятининг Каттақўрғон туманида ўтказилган тезкор тадбир давомида Навоий ва Самарқанд вилоятларида яшовчи 1982, 1984 ва 1996 йилда туғилган уч нафар фуқаро қонунга хилоф равишда олтин савдоси билан шуғулланган ҳолда ушланди.

Улар оғирлиги 475 грамм бўлган, 994 асиллик даражасидаги икки бўлак олтин қуймани 737 миллион сўмга сотишга келишиб, аванс сифатида 500 миллион сўм олган пайтларида ашёвий далиллар билан қўлга олинган.

Давлат асиллик даражаси назорати инспекцияси хулосасига кўра, қуйманинг соф оғирлиги 472 грамм бўлиб, қиймати 740,4 миллион сўмни ташкил этган.

Ҳодиса юзасидан Ўзбекистон Республикаси Жиноят кодексининг 177-моддаси 4-қисми “а” банди билан жиноят иши қўзғатилиб, тергов ҳаракатлари олиб борилмоқда. Ушланган шахсларнинг иккитаси аввал судланган бўлиб, улардан бири ҳозирда ахлоқ тузатиш ишлари жазосини ўтаётгани аниқланган.

Telegram I Facebook I YouTube I Instagram