Темирйўл хавфи ва фавқулодда хизматлар муаммоси: Олмалиқда маҳалла аҳолиси темирйўл орқали транспорт йўли ташкил этишни талаб қилмоқда

Олмалиқ шаҳри «Муқимий» маҳалла фуқаролар йиғини (МФЙ) аҳолиси яшаш ҳудудидан ўтган темирйўл йўналиши билан боғлиқ муаммога дуч келмоқда. Маҳалла фаоллари камерага ёзиб олган видеомурожаатида айниқса Муса Жалил ва Ипак йўли кўчаларини боғловчи темирйўл қисми орқали транспорт йўлини ташкил этишни сўрашган.

МФЙ фуқароси Сағдулла Отанинг айтишича, маҳалладаги айланма йўллар ноқулай ва тор бўлиб, темирйўл қисми орқали транспорт йўлини ташкил этиш тез ёрдам, ёнғин хизмати ва бошқа фавқулодда транспорт воситаларининг марказий йўлга тез чиқиши учун муҳим аҳамиятга эга.

Маҳалла фаоллари бу талабни МФЙ раҳбариятига оғзаки равишда билдиришган, аммо «мумкин эмас» деган жавоб олган.

Темирйўл қисми яқинида транспорт йўлининг мавжуд бўлмаслиги фавқулодда вазиятларда тез ёрдам ва ёнғин машиналарининг кечикишига сабаб бўлиши мумкин. Айланма йўлларнинг торлиги ва инфратузилма чекланганлиги маҳалланинг умумий транспорт алоқасига салбий таъсир кўрсатмоқда. Бу эса фуқароларда ўзларини эътибордан четда қолгандек ҳис қилиш ва маҳаллий ҳокимият органлари билан мулоқотда «мумкин эмас» жавобини эшитиш орқали ишончнинг пасайишига олиб келади.

EFFECT.uz таҳририяти масъул идораларни ушбу ҳолатни ўрганиб, муаммони ижобий ҳал этишга чақиради. Маҳалла аҳолисининг хавфсизлиги ва асосий ҳуқуқлари — транспортга, ёнғин ва тиббий хизматларга тез кириш имконияти таъминланиши зарур.

Telegram I Facebook I YouTube I Instagram

Ёпиқ суд мажлиси маълумотлари ошкор этилишининг олди олинади

Ўзбекистон Республикасининг 2025 йил 26 сентябрда қабул қилинган 1084-сонли қонунини билан айрим ҳужжатларига ўзгартириш ва қўшимчалар киритилди.

Telegram I Facebook I YouTube I Instagram

Иш вақтидан ташқари иш учун ҳақ тўлаш тизими такомиллаштирилади

Қонун билан Ўзбекистон Республикасининг айрим қонун ҳужжатларига ўзгартириш ва қўшимчалар киритилди.

Қонун билан қонун ҳужжатларига Миграция агентлигининг ваколатларини аниқлаштириш, хусусий бандлик агентликларининг ҳуқуқ ва мажбуриятларини кенгайтириш, шунингдек иш вақтидан ташқари иш учун ҳақ тўлаш тизимини такомиллаштиришга қаратилган ўзгартириш ва қўшимчалар киритилди.

Унга кўра, хусусий бандлик агентликларига қуйидаги ҳуқуқлар берилди:

🔹 иш қидираётган шахсларни касб-ҳунар ва чет тилларга ўқитиш бўйича ўқув курсларини белгиланган тартибда ташкил қилиш, шунингдек ушбу жараёнга чет эллик иш берувчиларни жалб этиш;

🔹 захира қилинадиган маблағларни тижорат банкларидаги депозитларга жойлаштириш ҳисобидан олинадиган фоиз даромадларини мустақил равишда тасарруф этиш.

Бундан ташқари, Меҳнат кодексига киритилган ўзгартиришларга кўра, иш вақтидан ташқари ишнинг давомийлиги йилига 120 соатдан ошмаслиги тўғрисидаги талаб чиқариб ташланди.

Шунингдек, иш вақтидан ташқари ишнинг 1 кундаги биринчи 2 соати учун камида 1,5 ҳисса миқдорида, 2 соатдан ортиқ қисми учун камида 2 ҳисса миқдорида ҳақ тўланиши белгиланди.

Telegram I Facebook I YouTube I Instagram

ОТБ Ўзбекистонга 300 млн долларлик қарз ажратди

Осиё тараққиёт банки (ОТБ) Ўзбекистон ҳукуматининг 300 миллион АҚШ доллари миқдоридаги қарз сўровини маъқуллади, шу жумладан 100 миллион доллар имтиёзли шартларда ажратилади. Маблағлар асосан микрокредитлар ва кичик ҳамда ўрта корхоналар (КЎБК), айниқса аёллар томонидан бошқариладиган корхоналарни молиялаштириш имкониятларини кенгайтиришга йўналтирилади.

Қарз дастури инклюзив иқтисодий ўсишни рағбатлантириш ва тадбиркорликни ривожлантиришга қаратилган. Ушбу дастурда микрокредитларнинг максимал миқдорини ошириш, микромолиялаш соҳасида норматив ҳужжатларни такомиллаштириш, тадбиркор аёлларни молиялаштириш халқаро кодексига қўшилиш ва исломий микромолиялаш учун норматив базани ишлаб чиқиш каби чоралар белгиланган.

Шунингдек, депозитларни қабул қиладиган микромолиявий банклар ташкил этиш кўзда тутилган бўлиб, бу молиялаштириш имкониятларини сезиларли даражада кенгайтириши кутилмоқда. Бугунга қадар бундай банкларни ташкил этиш учун иккита дастлабки лицензия берилган.

Эслатиб ўтамиз, октябр ойида ОТБ Ўзбекистонга STEM соҳасида таълим сифатини ошириш учун 100 миллион доллар имтиёзли қарз ажратишни ҳам маъқуллаган эди. 1995 йилдан бери банк мамлакатга умумий қиймати 14,6 миллиард долларлик қарзлар, грантлар ва техник ёрдам кўрсатди. 2025 йилда ОТБ ва Ўзбекистон ўртасидаги шерикликнинг 30 йиллиги нишонланмоқда.

Telegram I Facebook I YouTube I Instagram

«Ишончимиз комилки, янги бош директори сайланиши билан ЮНЕСКО стратегик ривожланишнинг янги даврига қадам қўймоқда» – Саида Мирзиёева

Самарқандда бўлиб ўтаётган учрашув ва музокаралар доирасида Саида Мирзиёева ЮНЕСКО Котибиятига самарали ҳамкорлик учун ташаккур билдириб, доктор Холид Ал-Ананийни ташкилот бош директори лавозимига тайинлангани билан табриклади.

Мирзиёеванинг таъкидлашича, Ўзбекистон ЮНЕСКОнинг тинчлик, таълим ва маданиятлараро мулоқот йўлидаги ишончли ҳамкори бўлиб қолмоқда.

Шунингдек, Саида Мирзиёева Президент Шавкат Мирзиёевнинг ушбу тарихий тадбирни Буюк Ипак йўли марказида ўтказиш ташаббусини қўллаб-қувватлаган барча аъзо давлатларга миннатдорлик билдирди.

Telegram I Facebook I YouTube I Instagram

❗️Талаба ижара тўловининг бир қисмини қайтариб олиши мумкин

Энди ижарада яшайдиган талабалар ойлик ижара тўловининг бир қисмини онлайн тарзда қайтариб олишлари мумкин — университет ёки банкка бориш шарт эмас.

Бунда:
1️⃣ my.gov.uz порталига киринг;
2️⃣ “Давлат ОТМ талабаларига ойлик ижара тўловининг бир қисмини қоплаб бериш” хизматини танланг;
3️⃣ Ҳужжат талаб этилмайди — тизим автоматик текширувни амалга оширади.

Агар ариза маъқулланса:
➖ Тошкентдаги талабалар — БҲМнинг 1 баравари;
➖ Вилоятдаги талабалар — БҲМнинг 0.5 баравари миқдорда тўловни қайта олади.

🗓 Аризалар ҳар ойнинг 1–7 кунлари қабул қилинади.

Telegram I Facebook I YouTube I Instagram

“Ижтимоий ҳимоя фидойиси” кўкрак нишони билан тақдирлаш тартиби белгиланди

Ҳукумат қарори билан “Ижтимоий ҳимоя фидойиси” кўкрак нишони тўғрисида”ги низом тасдиқланди.

Низом “Ижтимоий ҳимоя фидойиси” кўкрак нишони билан тақдирлаш тартибини белгилайди.

Кўкрак нишони билан тақдирлаш бўйича таклифлар ҳар йили 20 апрелга қадар Ўзбекистон Республикаси Президенти ҳузуридаги Ижтимоий ҳимоя миллий агентлигига тақдим этилади.

Комиссия хулосаси асосида ҳар йили 20 майга қадар Агентлик директорининг кўкрак нишони билан тақдирлаш тўғрисидаги буйруғи чиқарилади.

Кўкрак нишони билан тақдирланадиган шахсларга ҳар йили 1 июнь – Агентлик ташкил этилган кун арафасида агентлик директори томонидан кўкрак нишони тантанали равишда топширилади.

Кўкрак нишони билан тақдирланган шахсларга базавий ҳисоблаш миқдорининг тўрт баравари миқдорида бир йўла тўланадиган пул мукофоти берилади.

Бир йўла тўланадиган пул мукофотлари билан боғлиқ харажатлар Ижтимоий ҳимоя давлат жамғармаси маблағлари ҳисобидан амалга оширилади.

Кўкрак нишони билан тақдирлаш, истисно тариқасида, Агентлик директорининг буйруғига асосан алоҳида ҳолатларда ҳам амалга оширилиши мумкин.

Telegram I Facebook I YouTube I Instagram

❗️Хусусий тиббиёт учун янги имкониятлар яратилади

Президент Шавкат Мирзиёевнинг тиббиёт ходимлари билан учрашувида
Тиббиёт ташкилотлари ассоциацияси раиси соҳа ривожига оид бир қатор таклифларни илгари сурди.

Асосий таклифлар:
– Тиббий суғурта тизимида тенг тўловни жорий этиш (хусусий ва давлат клиникаларига 100 фоиз миқдорда);
– Хизмат турларини кенгайтириш, яъни хусусий клиникаларга тиббий суғурта тизими орқали барча нозологиялар бўйича хизмат кўрсатиш имконини бериш;
– Жавобгарлик тизимини такомиллаштириш, яъни камчилик аниқланганда фақат ўша йўналиш фаолиятини вақтинча тўхтатиш.

Учрашувда президент Шавкат Мирзиёев ушбу таклифларни маъқуллади.

Telegram I Facebook I YouTube I Instagram

Обуна — ихтиёрий, мажбурий эмас!

Самарқанд вилояти Қўшработ туманидаги таълим тизимида ҳайратомуз ҳолат кузатилмоқда. Туман мактаблари раҳбарлари ва ўқитувчилари маълум қилишича, ММТБ (мактабгача ва мактаб таълими бўлими) бошлиғи Жамилов Элёр Фарҳодович мактаб директори ва ўринбосарларига топшириқ бериб, барча ўқитувчи ходимларни туман ҳокимлиги газетаcига мажбурий обуна бўлишга чорламоқда. Туман ҳокими Шакарбоев Дилшод Давронович ташаббуси бўлиши мумкин. Бу эса наинки педагогларнинг ҳуқуқларини, балки мамлакатда амал қилаётган қонунчилик нормаларини ҳам бузиш ҳисобланади.

Ахборот олиш кафолатлари ва эркинлиги тўғрисида

3-модда. Ахборот олиш кафолатлари
Ҳар бир фуқаронинг ахборот олиш ҳуқуқи кафолатланади.
Ҳар кимнинг ахборотни излаш, олиш, тадқиқ этиш, узатиш ва тарқатиш ҳуқуқи давлат томонидан ҳимоя қилинади. Фуқаролар ва ташкилотлар ҳар қандай нашрга ихтиёрий равишда обуна бўлиши мумкинлиги, ҳеч кимни мажбурий обуна қилиш мумкин эмаслиги аниқ кўрсатилган.

Қонунга мувофиқ, ходимни ўз хоҳишига зид равишда муайян ҳаракатларни амалга оширишга мажбурлаш, жумладан, мажбурий обуна ёки маблағ йиғиш, қонунга зиддир.

Аслида, мажбурий обуна амалиёти мустақилликнинг илк йиллариданоқ қатъий танқид қилинган ва таълим муассасаларида бу ҳолатни йўқотиш бўйича кўплаб қарорлар қабул қилинган. Аммо айрим раҳбарлар ҳали ҳам эски усуллардан воз кечмагани, “обуна”ни юқори ташкилотлар олдида ҳисобдорлик воситаси сифатида кўраётгани афсусланарли ҳолат.

Бундай ҳолатлар нафақат ҳуқуқий жиҳатдан хато, балки маънавий ва ижтимоий жиҳатдан ҳам номақбулдир. Мактаб раҳбарлари, директорлар ва ўринбосарлар таълим сифатини ошириш, ўқитувчиларни қўллаб-қувватлаш билан шуғулланиши лозим, мажбурий обуна ёки пул йиғиш билан эмас.

Хизмат ваколатларини суиистеъмол қилиш учун жавобгарлик белгиланган. Агар раҳбар шахс ўз лавозим ваколатидан фойдаланиб, ходимларни мажбурий обунага тортаётган бўлса, бу ҳолат тегишли ҳуқуқни муҳофаза қилувчи органлар томонидан текширилиши лозим.

Ҳозирги кунда мамлакатимизда эркин сўз, шаффофлик ва фуқаролик жамиятини ривожлантириш устувор вазифа қилиб белгиланган бир пайтда, мажбурий обуна амалиёти ана шу ислоҳотларга зид ҳолдир. Ҳар бир педагог ва раҳбар бундай ҳолатларга нисбатан бефарқ бўлмаслиги, ўз ҳуқуқини қонуний йўл билан ҳимоя қилиши зарур.

Обуна — фуқаролик ихтиёри, мажбурий талаб эмас. Ҳуқуқни ҳурмат қилган жамиятда мажбурлаш эмас, балки ишонч устувор бўлиши лозим.

Effect.uz ҳолатни кузатиб боради.

Журналист: Асомиддин Нур

Telegram I Facebook I YouTube I Instagram

Собиқ «Тоштурма» ҳудуди тадбиркорга берилгани маълум бўлди — у ер хиёбон бўлиши керак эди

2018 йилда Вазирлар Маҳкамаси фармойишига мувофиқ, Тошкент шаҳри ҳокимлигига Юнусобод туманида жойлашган собиқ 1-сонли тергов ҳибсхонаси («Тоштурма») ўрнида хиёбон барпо этиш вазифаси юклатилган эди.

Бироқ 2020 йилда шаҳарнинг ўша пайтдаги ҳокими Жаҳонгир Ортиқхўжаев қарори билан қарийб 3 гектарлик ер майдони мулки олиб қўйилган тадбиркорга компенсация сифатида берилгани маълум бўлди.

Маълумотларга кўра, тадбиркор мазкур ҳудудда меҳмонхона ёки кўп қаватли турар жой қуришни режалаштирган, аммо Тошкент шаҳри бош режасидаги тақиқ туфайли ҳозирча қурилишга рухсат ололмаяпти.

Аввалроқ ушбу ҳудуднинг OLX платформасида сотувга қўйилгани ҳақидаги эълонлар интернетда тарқалган эди.

Telegram I Facebook I YouTube I Instagram