Жиззахдаги муаммолар ҳануз ижобий ечимини топгани йўқ

Сенатнинг суд-ҳуқуқ масалалари ва коррупцияга қарши курашиш қўмитаси раиси Абдулҳақим Эшмуротов бошчилигидаги ишчи гуруҳ Жиззах вилоятида хавфсиз муҳитни шакллантириш, криминоген вазиятни барқарорлаштириш, ижтимоий профилактика тизимини кучайтириш ҳамда коррупцияга, хусусан, маиший коррупцияга қарши курашиш йўналишида амалга оширилаётган ишлар ҳолатини ўрганди.

Ўрганишлар давомида ҳуқуқни муҳофаза қилувчи органлар, мутасадди ташкилотлар, “махалла еттилиги” вакиллари, маҳалла фаоллари ҳамда жамоатчилик иштирокида жойлардаги натижалар ва мавжуд камчиликлар таҳлил қилинди.

Шунингдек, ишчи гуруҳ аъзолари Жиззах шаҳридаги Марказий деҳқон бозори, Кимёгар маҳалласда жойлашган рақамлаштирилган жарима майдончаси ҳамда бир қатор савдо мажмуаларида бозор фаолиятини рақамлаштириш жараёнлари билан танишди.

Рақамлаштириш орқали шаффофликни таъминлаш, коррупцион хавфларни камайтириш ва тадбиркорлар учун қулай ишбилармонлик муҳитини яратиш бўйича тегишли таклиф ва тавсиялар берилди.

Сенатор Халқ депутатлари Жиззах вилояти Кенгашининг навбатдаги сессиясида ҳам иштирок этиб, ҳудудда ҳуқуқбузарликларнинг олдини олиш ва криминоген вазиятни барқарорлаштириш борасида амалга оширилган ижобий ишларини алоҳида қайд этди.

Бироқ EFFECT.UZ таҳририяти томонидан илгари ёритилган Дўстлик бозори ва Дўстлик тумани ҳокимлиги билан боғлиқ муаммолар ҳануз ижобий ечимини топгани йўқ. Бу ҳолат аҳоли ўртасида норозилик ва ишончсизлик кайфиятларини келтириб чиқармоқда.

Аҳолининг розилиги ва осойишталиги — ҳар қандай ислоҳотнинг асосидир. Жамиятда ишсизликни камайтириш бўйича чоралар кўрилаётган бир пайтда, фуқароларнинг моддий таъминотдан узилиши янги ижтимоий муаммоларни келтириб чиқариши мумкин.

EFFECT.UZ мазкур ҳолат юзасидан юқори турувчи органлардан расмий муносабат кутмоқда.

Telegram I Facebook I YouTube I Instagram

Бухорода стандарт талабларига жавоб бермайдиган маҳсулотлар аниқланди

Техник жиҳатдан тартибга солиш соҳасида назорат инспекцияси томонидан Бухоро шаҳридаги “Тўқимачи” ва “Ситора” бозорларида назорат харидлари ўтказилди.

Натижада, Хитойда ишлаб чиқарилган “BRAUN” бренди остидаги 2238-моделли соч қуритиш мосламаси ва маҳаллий “FORSAJ” савдо белгиси остидаги 4 литрлик музламайдиган ойна тозаловчи маҳсулотлар стандарт талабларига мос эмаслиги аниқланди.

Синов натижаларига кўра, соч қуритиш мосламасининг ток қаршилиги ошиши, ўтказгичларнинг қизиб кетиши, ёнғин хавфи ва хизмат муддати қисқариш эҳтимоли юқори экани маълум бўлди.

“FORSAJ” антифризи қиш фаслида музлаб, шиша ювиш тизимини ишдан чиқариши, кўриш майдонини торойтириши, суюқлик кенгайиши натижасида деталларни ёриши ҳамда таркибида соғлиққа зарарли моддалар бўлиши мумкинлиги билан хавф туғдиради.

Истеъмолчиларга маҳсулот сотиб олишда унинг ёрлиғи, ишлаб чиқарилган мамлакати, техник кўрсаткичлари ва сертификатларига эътибор қаратиш тавсия қилинади.

Агар савдо тармоқларида сифати паст ёки сохта маҳсулотларга дуч келсангиз, 1880 қисқа рақами орқали Техник жиҳатдан тартибга солиш инспекциясига мурожаат қилишингиз мумкин.

Telegram I Facebook I YouTube I Instagram

Ўзбекистон ЖСТга аъзолик сари яна бир қадам — Эквадор билан музокаралар якунланди

Ўзбекистон Жаҳон савдо ташкилотига (ЖСТ) аъзо бўлиш жараёнидаги навбатдаги муҳим босқични якунлади — мамлакат Эквадор билан икки томонлама музокараларни тугатди. Бу ҳақда Президентнинг ЖСТ масалалари бўйича махсус вакили Азизбек Урунов маълум қилди.

Шу тариқа, Ўзбекистонга ташкилотга тўлиқ аъзо бўлиш учун яна икки давлат билан музокараларни якунлаш қолди.

Маълумот учун, жорий йилда Ўзбекистон ЖСТ доирасидаги 31 та икки томонлама келишувдан 29 тасини имзолади. Қолган икки келишув бўйича музокаралар якунлангандан сўнг мамлакатнинг ташкилотга тўлиқ аъзолиги расман тасдиқланиши кутилмоқда.

Эслатиб ўтамиз, Ўзбекистон 1994 йилда ЖСТга аъзо бўлиш учун расман ариза берган бўлиб, 2020 йилдан музокара жараёнини фаол равишда қайта бошлаган.

Сўнгги йилларда мамлакатнинг ташқи савдо тизими ва қонунчилиги ЖСТ талабларига мослаштирилди. Бу доирада 20 дан ортиқ қонун ва меъёрий ҳужжатлар янгиланди.

ЖСТга аъзолик Ўзбекистон маҳсулотларига халқаро бозорларга кириш имкониятларини кенгайтириш, экспорт салоҳиятини ошириш ҳамда хорижий инвестицияларни жалб этишда муҳим аҳамият касб этади.

Telegram I Facebook I YouTube I Instagram