Россия армияси сафида жанг қилган ўзбекистонлик украин қўшинларига қуролсиз таслим бўлди

Бухоро вилоятидан бўлган 31 ёшли Зухриддин Йўлдошев Россия армияси таркибида Украинадаги урушда иштирок этгач, украин ҳарбий дрони олдида қуролсиз ҳолда таслим бўлгани маълум қилинди.

Унинг сўзларига кўра, Россия полицияси уни “гиёҳвандлик”да айблаб, қамоқ ёки фронтга жўнаш ўртасида танлов қилишга мажбурлаган. Шу боис у жангга боришга рози бўлган.

Йўлдошев армияда интизом ва адолат йўқлигини, кўп ҳолларда ҳарбий жиҳозларни аскарлар ўз ҳисобидан сотиб олишига тўғри келаётганини маълум қилган.

У ҳозирда Ўзбекистон ҳукуматидан ватанга қайтишда ёрдам сўрамоқда.

Telegram I Facebook I YouTube I Instagram

Афғонистондан олиб келинган қарийб 50 кг “гашиш” моддаси мусодара қилинди

Давлат хавфсизлик хизмати ходимлари томонидан ўтказилган тезкор тадбир давомида Афғонистондан контрабанда йўли билан олиб кирилган гиёҳвандлик моддасининг ноқонуний айланмасига чек қўйилди.

Маълумотларга кўра, “Тошкент–Андижон” йўналишида ҳаракатланаётган «Cobalt» русумли автомашина Тошкент вилоятининг Оҳангарон туманидаги “Чинор” ЙПХ масканида тўхтатилиб текширилган.

Текширув жараёнида автомашинада бўлган Қирғизистон фуқаросининг ёнидан 4 кг 897 грамм “гашиш” моддаси топилган. Тергов ҳаракатлари давомида у ушбу моддани Бухоро туманидаги дала майдонидаги яширин жойдан олгани маълум бўлган. Ушбу ҳудуд кўздан кечирилганда яна 45 кг 52 грамм “гашиш” моддаси аниқланди.

Жами қарийб 50 килограмм гиёҳвандлик воситаси далил ашё сифатида расмийлаштириб олинган.

Ҳозирда фуқароларга нисбатан Давлат хавфсизлик хизматининг Бухоро вилояти бўйича бошқармаси томонидан Жиноят кодексининг 246 ва 273-моддалари билан жиноят иши қўзғатилиб, улар “қамоқ” эҳтиёт чораси билан ушлаб турилибди.

Терговга қадар текширув натижасида, мазкур гиёҳвандлик моддалари Афғонистондан контрабанда йўли билан олиб кирилиб, Ўзбекистон ҳудуди орқали транзит йўл билан олиб ўтилишини режалаштирилгани аниқланди.

Гиёҳвандлик воситаларининг зарари беқиёс. Тез бойиш умидида бундай жиноятга қўл урганлар эса қонун олдида жавоб беришлари муқаррар.

Озодликдан маҳрум бўлиш ва оилангиздан узоқда умрингизни ўтказишни истамасангиз — бундай қабиҳ ишлардан йироқ юринг.

Telegram I Facebook I YouTube I Instagram

Наманганда 7 ёшли қизалоққа зўравонлик қилган эркак аввал ҳам шундай жиноят учун жазо олган

Ижтимоий тармоқларда Наманган вилояти Янгиқўрғон туманида 38 ёшли эркак 7 ёшли қизалоққа нисбатан жинсий зўравонлик содир этгани ҳақидаги хабар жамоатчиликда катта резонанс уйғотди. Ҳолат юзасидан Олий суд матбуот хизмати расмий маълумот берди.

Маълумотларга кўра, жиноятни содир этганликда гумонланувчи Б.С. тезкор-қидирув тадбирлари натижасида қўлга олинган ва Янгиқўрғон туман судининг 2025 йил 16 октябрдаги ажрими билан унга нисбатан “қамоққа олиш” эҳтиёт чораси қўлланган.

Аниқланишича, Б.С. аввал ҳам Жиноят кодексининг 118-моддаси 3-қисми “б” банди (номусга тегиш) билан айбдор деб топилиб, 2020 йил 26 февралдаги суд ҳукми билан 10 йил 2 ойга озодликдан маҳрум этилган. Суд ҳукми 2020 йил 8 май куни қонуний кучга кирган.

Жамоатчилик орасида “нега у жазони тўлиқ ўтамай озодликка чиққан?” деган саволлар пайдо бўлди.

Расмий маълумотга кўра, жорий йилнинг 19 февралида Чирчиқ шаҳар суди маҳкум Б.С.нинг илтимосномасини қаноатлантириб, жазонинг ўталмаган 5 йил 1 кунини ахлоқ тузатиш ишлари жазосига алмаштирган.

Бу қарор ўша вақтда амал қилган (эски таҳрирдаги) қонун асосида қабул қилинган бўлиб, унга кўра маҳкум суд белгилаган жазо муддатининг камида ярмини ўтаб бўлгач, жазо енгилроғи билан алмаштирилиши мумкин эди.

Бироқ, 2023 йил 23 мартда қабул қилинган янги қонунга мувофиқ, бу имтиёз фақат жазонинг камида учдан икки қисмини ўтаган маҳкумларга нисбатан қўлланади. Шунингдек, ушбу ўзгаришлар олдинги суд қарорларига нисбатан татбиқ этилмайди.

Амалдаги Жиноят кодексининг 74-моддаси 5-қисмига кўра, жазони енгилроғи билан алмаштириш айрим шахсларга нисбатан татбиқ этилмаслиги ҳам белгилаб қўйилган.

Telegram I Facebook I YouTube I Instagram

Оқдарё туманида ноқонуний қазиш ишлари натижасида табиатга 43 млрд сўм зарар етказилди

Самарқанд вилоятининг Оқдарё туманида жойлашган “М.М.М.Н” фермер хўжалигига тегишли экскаватор ва юк машинаси орқали Қорадарёдан ноқонуний равишда қум-шағал қазиб олингани аниқланди.

Экология, атроф муҳитни муҳофаза қилиш ва иқлим ўзгариши вазирлиги маълумотига кўра, мазкур ҳаракат натижасида табиатга 43 миллиард 12 миллион сўмдан ортиқ зарар етказилган.

Ҳозирда техникалар жарима майдонига жойлаштирилган бўлиб, тегишли ҳужжатлар вилоят прокуратурасига юборилган.

Telegram I Facebook I YouTube I Instagram

Кўп қаватли уйлар атрофини тозалаш харажатлари бошқарув органларидан талаб қилинмайди

Қурилиш ва уй-жой коммунал хўжалиги вазирлиги маълумотига кўра, кўп қаватли уйларга туташ ҳудудларни тозалаш жараёнида ҳосил бўлган чиқиндиларни олиб чиқиб кетиш харажатлари учун бошқарув органларидан пул талаб қилинмайди.

Батафсил маълумот вазирлик видеоролигида баён этилган.

Telegram I Facebook I YouTube I Instagram

Пулли автотураргоҳлар — қулайликми ёки адолатсизлик?

Йўллар ва автотураргоҳлар — жамоат мулки. Улардан фойдаланиш имконияти барча фуқаролар учун тенг бўлиши керак.

Бироқ сўнгги пайтларда бепул автотураргоҳлар сони қисқариб, пуллик тизимлар кўпаймоқда. Бу эса оддий ҳайдовчилар манфаатларига зид ҳолат сифатида баҳоланмоқда.

Агар мақсад шаҳар марказидаги ҳаракатни тартибга солиш бўлса, буни бошқа йўллар билан ҳам амалга ошириш мумкин эди — масалан, қулай жамоат транспортини йўлга қўйиш ёки резидентлар учун имтиёзли автотураргоҳ тизимини жорий этиш орқали.

Аммо фақат тўлов қилиш имконига эга бўлганлар учун қулайлик яратиш — бу адолат эмас. Бу, аслида, шаҳар фойдаланувчиларини “иқтисодий саралаш” дегани.

Аҳоли фикри инобатга олинмаган ҳар бир “ташкил этилган қулайлик” эса амалда янги ноқулайликнинг бошланишига айланиши мумкин.

Telegram I Facebook I YouTube I Instagram

«Байрамга 20 та телевизор берасан, деган талабни рад этгандим» — Фурқат тумани ДСИ бошлиғи судда кўрсатма берди

Фарғона вилоятида ички ишлар бўлими ходимлари иши бўйича суд мажлисида янги ҳолатлар очиқланди.

Жиноят ишлари бўйича Қува туман судида бўлиб ўтган навбатдаги мажлисда “тезкор тадбир” видеолавҳаси намойиш этилди. Жабрланувчи Гулираъно Қосимова видеода уни таҳқирлаш ва калтаклаш акс этган лавҳалар қирқиб ташланганини билдирди.

Суд жараёнида Фурқат туман давлат солиқ инспекциясининг собиқ бошлиғи Қурбонали Абдураҳмонов ҳам кўрсатма берди. Унинг сўзларига кўра, туманда хизмат қилган ички ишлар бўлими бошлиғи Акмал Хўжаев унга “ИИБга қарши чиқиш қандай бўлишини кўрсатиб қўйиш” деб таҳдид қилган.

Абдураҳмоновнинг таъкидлашича, у байрам муносабати билан “20 та телевизор берасан” деган талабни рад этганидан сўнг, босим ва таҳдидлар бошланган.

Мазкур иш бўйича суд тергови ҳали давом этмоқда.

Telegram I Facebook I YouTube I Instagram

Финляндия президенти Александр Стубб Ўзбекистонга келади

Финландия президенти Александр Стубб 30–31 октябрь кунлари Ўзбекистонга расмий ташриф билан келади. Бу ҳақда президент матбуот хизмати хабар берди.

31 октябрь, жума куни Александр Стубб Ўзбекистон Республикаси президенти Шавкат Мирзиёев билан учрашади. Музокаралар чоғида икки давлат ўртасидаги икки томонлама муносабатлар ва долзарб геосиёсий масалалар муҳокама этилади.

Ташриф дастуридан бизнес анжуман, Жаҳон иқтисодиёти ва дипломатия университетида маъруза ҳамда ташқи сиёсат бўйича экспертлар билан учрашувлар ҳам ўрин олган.

Финландия делегацияси таркибида парламент депутати, парламентнинг Ўзбекистон билан дўстлик гуруҳи раиси Вилле Скиннари, шунингдек, Финландия савдо-саноат компаниялари вакиллари иштирок этади.

Маълумот учун, Финландия президентининг Ўзбекистонга охирги расмий ташрифи 1992 йилда — президент Мауно Койвисто даврида амалга оширилган эди.

Telegram I Facebook I YouTube I Instagram

Мусиқа ва жисмоний тарбия фанлари ўқитувчиларига электрон сертификат берилади

Билим ва малакаларни баҳолаш агентлиги маълумотига кўра, мусиқа маданияти ва жисмоний тарбия фанлари ўқитувчиларига сертификат бериш тартиби тасдиқланди.

Сертификатлар ўқитувчининг билим ва касбий маҳоратини баҳолаш асосида 3 йил муддатга электрон шаклда берилади.

Сертификат даражалари қуйидагича белгиланган: A+, A, B+, B, C+, C.

B+ ва ундан юқори даражадаги сертификатга эга бўлган ўқитувчиларга ойлик маошга устама тўланади.

Telegram I Facebook I YouTube I Instagram

«Бу фақат жиноят эмас, инсонийликка қарши қўзғолон» – депутат

Олий Мажлис Қонунчилик палатаси депутати, «Миллий тикланиш» партияси аъзоси Дилноза Азизова болаларга нисбатан ҳар қандай жинсий зўравонлик учун умрбод қамоқ жазосини жорий этишни таклиф қилди.

Депутат Наманган вилоятининг Янгиқўрғон туманида 7 ёшли қизалоқ ўз қариндоши томонидан зўрлангани ҳақидаги воқеага муносабат билдириб, қуйидагича ёзди:

«Намангандаги воқеа — фақат бир педофилнинг разолати эмас, бу жиноятни йиллар давомида “ахлоқ тузатиш ишлари” деган юмшоқ ифода билан оқлаб келган тизимнинг юзи. Боланинг ҳаёти билан ўйнаш мумкин эмас. Бу фақат жиноят эмас — инсонийликка қарши қўзғолон».

Азизованинг таъкидлашича, педофилларнинг жазо муддатини «яхши хулқ» баҳонаси билан қисқартириб, кўчада эркин юриши «давлатнинг болага бўлган муносабатидан дарак».

«Қонун фақат қоғозда эмас, ҳаётда ҳам қаттиқ бўлиши керак. Бундай жиноятчилар учун кечириш, енгиллик ёки “яхши хулқ” деган гап бўлмаслиги шарт»,

— деб ёзди депутат.

Унинг сўзларига кўра, педофилларга нисбатан енгил муносабатда бўлиш — келажакни йўқ қилиш билан баробар.

Telegram I Facebook I YouTube I Instagram

Автомактаб битирувчиларига электрон гувоҳнома бепул берилади

Ўзбекистон Ҳукуматининг 2025 йил 15 октябрдаги 642-сонли қарори билан ҳайдовчиларни тайёрлаш ва қайта тайёрлашни якунлаганликни тасдиқловчи ягона намунадаги электрон гувоҳнома жорий этилди.

Эндиликда автомототранспорт ва шаҳар электр транспорти ҳайдовчиларини тайёрлашни муваффақиятли тугатган фуқароларга гувоҳнома имтиҳон комиссияси баённомаси асосида электрон шаклда расмийлаштирилади.

Электрон гувоҳномалар “eavtotalim.uz” платформаси орқали Ягона ахборот тизимида автоматик равишда шакллантирилиб, тадбиркорлик субъектларига реал вақтда тақдим этилади.

Гувоҳнома бериш учун ҳеч қандай тўлов ёки йиғим ундирилмайди.

Telegram I Facebook I YouTube I Instagram

Оқдарёда 43 млрд сўмлик ноқонуний қазиш ишлари аниқланди

Telegram I Facebook I YouTube I Instagram

Ўзбекистон нашрлари Франкфурт китоб ярмаркасида иштирок этмоқда

Германиянинг Франкфурт шаҳрида ўтаётган “Frankfurter Buchmesse” халқаро китоб кўргазмаси доирасида Ўзбекистон адабиётининг сара асарлари намойиш этилмоқда.

1949 йилдан бери ўтказиб келинаётган ушбу нуфузли тадбирда 90 дан ортиқ давлат, 1000 дан зиёд муаллиф ва 230 мингга яқин китоб ихлосмандлари иштирок этмоқда. Жорий йилги фахрий меҳмон — Филиппин давлати.

Ўзбекистон павильонида “Ўзбекистон”, “Янги аср авлоди”, “Credoprint”, “Asian Book House”, “Global Books”, “Дунё нашр”, “Ёш куч” каби нашриётлар ҳамда болалар ёзувчиси Мадина Мўминова иштирок этмоқда. Улар нафақат асарларини тақдим этмоқдалар, балки хорижий нашриётлар билан ҳамкорлик алоқаларини йўлга қўймоқдалар.

Тадбир “Ўзбекистон наширлари ва китоб савдоси ташкилотлари Миллий ассотсиасияси” ҳамкорлигида ташкил этилган бўлиб, 2025 йил 19 октябрга қадар давом этади.

Telegram I Facebook I YouTube I Instagram

Навоий, Сурхондарё ва Тошкентда коррупция ҳолатлари фош этилди

Давлат хавфсизлик хизмати ва Бош прокуратура ҳузуридаги Департамент ходимлари томонидан ўтказилган тезкор тадбирлар давомида Навоий, Сурхондарё вилоятлари ҳамда Тошкент шаҳрида қатор коррупция ҳолатлари аниқланди.

🔹 Навоий вилоятида, Қизилтепа тумани Фавқулодда вазиятлар бўлими бошлиғи “my.gov.uz” портали орқали келиб тушган мурожаат бўйича ижобий хулоса бериш эвазига 3 000 доллар талаб қилган. У хизмат хонасида пулни олган вақтда ашёвий далиллар билан ушланган. Унга нисбатан Жиноят кодексининг 210-моддаси 1-қисми билан жиноят иши қўзғатилиб, қамоқ эҳтиёт чораси қўлланган.

🔹 Сурхондарё вилоятида эса Жарқўрғон туман Мажбурий ижро бўлими бошлиғининг ўринбосари ва давлат ижрочиси фуқаролардан хорижга чиқиш таъқиқини бекор қилиш ва фермер хўжалиги ерларини аукционга чиқармаслик эвазига 600 доллар ҳамда 10 млн сўм олган вақтида қўлга олинган. Уларга нисбатан Жиноят кодексининг 168-моддаси 3-қисми “в” банди билан иш қўзғатилиб, тергов ҳаракатлари олиб борилмоқда.

🔹 Тошкент шаҳрида адвокатлик бюроси адвокати ва адвокатлик ҳайъати аъзоси 14 минг доллар талаб қилгани фош этилди. Улар жиноят ишида айбланувчига нисбатан қамоқ эҳтиёт чорасини уй қамоғига ўзгартиришни ваъда қилган. Тезкор тадбирда улар пулни олган вақтда ашёвий далиллар билан ушланган. Ушбу шахсларга нисбатан Жиноят кодексининг 168-моддаси 3-қисми “а,в” бандлари ва 28 орқали 211-моддаси 2-қисми “б” банди билан жиноят иши қўзғатилиб, қамоқ эҳтиёт чораси қўлланган.

❗️ДХХ маълумотида таъкидланишича, хизмат мавқеини суиистеъмол қилиб бойлик орттириш жиноий жавобгарликка сабаб бўлади. Фуқаролар коррупция домига тушиб қолмасликка, огоҳ бўлишга чақирилган.

Telegram I Facebook I YouTube I Instagram