Сергелида 4-синф қиз 5 нафар синфдош ўғил болалар томонидан калтакланди

Ижтимоий тармоқларда Тошкент шаҳрининг Сергели туманида joyлашган 300-умумтаълим мактабида 4-синф ўқувчи қизнинг 5 нафар синфдош ўғил болалар томонидан калтаклангани акс этган видео тарқалди.

Ҳолат юзасидан Тошкент шаҳар Мактабгача ва мактаб таълими бош бошқармаси расмий баёнот берди.

Маълумотга кўра, мазкур воқеа Мактабгача ва мактаб таълими вазирлиги томонидан назоратга олинган бўлиб, ишчи гуруҳ томонидан ўрганилган.

Ўрганиш натижаларига кўра, ҳолат жорий йилнинг 20 сентябрь куни содир бўлган. Мактабнинг 4-синф ўқувчиси И.А. ва унинг синфдош ўғил болалари ўртасида дарсдан сўнг даҳанаки низо ортидан жанжал келиб чиққан. Мактаб маъмурияти бу ҳақда ҳудуд профилактика инспектори ҳамда мактабга бириктирилган инспектор-психологларга дарҳол хабар берган.

Текширув натижасига кўра, И.А. ва Е.Ж. исмли ўқувчиларнинг ота-оналари Маъмурий жавобгарлик тўғрисидаги кодекснинг 47-моддаси асосида маъмурий жавобгарликка тортилади.

Шунингдек, бу каби ҳолатларнинг такрорланишининг олдини олиш мақсадида ота-оналар билан йиғилиш ўтказилиб, тушунтириш ишлари олиб борилган. Мактаб директори ва масъул ходимларга нисбатан интизомий чора қўлланган.

Telegram I Facebook I YouTube I Instagram

Қашқадарёда икки аёлни пичоқлаб ўлдирган собиқ ҳарбий қўлга олинди

Қашқадарё вилоятининг Қамаши туманида икки аёл пичоқлаб ўлдирилгани билан боғлиқ жиноят иши бўйича нафақадаги ҳарбий хизматчи қўлга олинди.

Маълумотларга кўра, қотиллик 2025 йил 12 октябрь куни содир бўлган. Терговга кўра, гумонланувчи — оиланинг куёви бўлиб, илгари ҳарбий хизматда бўлган, ҳозирда эса мактабда ўқитувчи сифатида ишлаган.

Ҳозирда ҳолат юзасидан Жиноят кодексининг 97-моддаси (қасддан одам ўлдириш) билан жиноят иши қўзғатилган. Гумонланувчи ички ишлар органлари томонидан қўлга олинган.

Қотиллик қурбони бўлган аёлларнинг шахси ҳақида ҳозирча расмий маълумот берилмаган.

Тергов ҳаракатлари давом этмоқда.

Telegram I Facebook I YouTube I Instagram

Соғломлик манбаи — узум уруғи мойи!

“InnoWeek–2025” халқаро инновация ҳафталигида Фарғона давлат университети олимлари узум уруғи мойи асосида яратилган табиий ва инновацион препаратни тақдим этдилар.

Ушбу маҳсулот:
— терини озиқлантиради ва намлайди;
— чандиқсиз тикланишни таъминлайди;
— ошқозон ҳамда жигар фаолиятини яхшилашга ёрдам беради.

Omega-6 ва Omega-9 моддалари билан бойитилган бу препарат нафақат гўзаллик, балки соғлом ҳаёт учун ҳам бебаҳо манба саналади.

Фарғона давлат университети илмий жамоаси ишлаб чиққан ушбу маҳсулот яқин вақтларда Ўзбекистон бренди сифатида халқаро бозорда ўз ўрнини эгаллаши кутилмоқда.

Telegram I Facebook I YouTube I Instagram

Ўзбекистонда 7,5 мингдан ортиқ тадбиркорлик субъекти шубҳали операцияларда фош бўлди

Давлат солиқ қўмитаси маълумот беришича, мамлакат бўйлаб 7,5 мингдан зиёд тадбиркорлик субъекти шубҳали операцияларни амалга оширгани аниқланган.

Қўмита тадбиркорларга ўз бизнес ҳамкорларини танлашда эҳтиёткор бўлишни тавсия қилган.

«Бизнес ҳамкорларнинг ишончлилигини норасмий иқтисодий фаолият юритиб, шубҳали операцияларни амалга оширган 7 522 та субъектлар рўйхати келтирилган Солиқ қўмитаси сайти орқали текшириш мумкин. Ушбу рўйхат мунтазам равишда янгиланиб борилади», — дейилган қўмита баёнотида.

Маълумотга кўра, жорий йилнинг ўзида 902 та тадбиркорлик субъекти фаолиятида шубҳали ҳолатлар ва нақдлаштириш амалиётлари аниқланган.

Қўмита контрагентларнинг ишончлилигини баҳолашда молиявий ҳисоботларни сўраш ва таҳлил қилиш, Солиқ қўмитаси расмий сайтида реестр орқали текшириш ҳамда иш фаолияти амалга оширилаётган манзил, офис ва омборларнинг мавжудлигини тасдиқлаш муҳимлигини таъкидлаган.

Telegram I Facebook I YouTube I Instagram

Президент Рустам Аҳмедовнинг хизматларини юксак баҳолаб, таъзия билдирди

12 октябрь куни Ўзбекистон Республикасининг биринчи мудофаа вазири, истеъфодаги генерал-полковник Рустам Ўрмонович Аҳмедов 82 ёшида вафот этди.

Давлатимиз раҳбари ва ҳукумат аъзолари мазкур жадал хабар муносабати билан ҳамдардлик билдириб, марҳумнинг мамлакат мудофаа тизимини яратишдаги беқиёс хизматларини юксак баҳолади.

Рустам Аҳмедов 1943 йил 10 ноябрда Фарғона вилоятининг Бағдод туманида туғилган. У бутун умри давомида ҳарбий соҳада фаолият кўрсатиб, танк полкида взвод командири, танк дивизияси сиёсий бўлими ёрдамчиси, батальон командирининг сиёсий ишлар бўйича ўринбосари ҳамда Тошкент олий танк қўмондонлик билим юртида хизмат қилган.

Мустақилликдан сўнг Рустам Аҳмедов мамлакатнинг илк мудофаа вазири сифатида миллий армияни шакллантириш, давлат мудофаа тизимини мустаҳкамлаш ва ҳарбий кадрлар тайёрлашда муҳим рол ўйнади. Шунингдек, у маълум муддат Миллий гвардия қўмондони вазифасини бажарувчи сифатида ҳам ишлаган.

Президент таъзиясида Аҳмедовнинг миллий армияни яратиш ва Қуролли Кучларни модернизация қилиш йўлидаги хизматлари алоҳида эътироф этилди.

«Фахрий генерал улуғ ёшда бўлишига қарамасдан, Янги Ўзбекистонда ҳарбий соҳада амалга оширилаётган ислоҳотларда фаол иштирок этди. Қайси лавозимда хизмат қилмасин, ҳарбий қасамёдига содиқ қолиб, ватанпарварлик ва фидойилик намунасини кўрсатди»,

— дейилади ҳамдардлик баёнотида.

Telegram I Facebook I YouTube I Instagram

Чиқиндилар назорати энди янгича тизимда

Effect.uz жамоаси айни дамда Чиқиндиларни бошқариш агентлигининг Ситуацион марказида бўлиб турибди.

Марказдаги махсус монитор орқали Республика ҳудудида белгиланмаган жойларга чиқиндилар ташланиши GPS орқали кузатиб борилмоқда.

Тадбирда экология вазири Азиз Абдуҳакимов ҳам иштирок этди. У прокуратура тизими ходимларига агентлик томонидан амалга оширилаётган ишлар ҳамда такомиллаштирилаётган янги назорат тизими ҳақида тақдимот қилди.

Telegram I Facebook I YouTube I Instagram

🌿 Ёшларнинг “яшил” ташаббусларига ҳар йили 10 млрд сўм ажратилади

Ҳукумат қарорига мувофиқ, Ёшлар ишлари агентлиги ҳузурида “Яшил ташаббусларни қўллаб-қувватлаш жамғармаси” ташкил этилди.

Ушбу жамғарма томонидан ҳар йили 10 миллиард сўмгача маблағ ажратилиб, қуйидаги йўналишлардаги экологик ташаббуслар молиялаштирилади:

🔹 Экологик маданиятни ошириш ва атроф-муҳитни муҳофаза қилиш лойиҳалари;
🔹 Чиқиндиларни қайта ишлаш, яшил энергия ва тоза технологияларни жорий этиш;
🔹 Дарахт экиш, ўрмонларни тиклаш ҳамда эко-туризмни ривожлантириш;
🔹 Иқлим ўзгаришига қарши йўналтирилган ёшлар ташаббуслари;
🔹 Эко мавзудаги медиа, видео ва мобил иловалар яратиш;
🔹 Энергия тежамкорлиги бўйича акция ва танловларни ўтказиш.

Ташаббуснинг мақсади — ёшлар орасида экологик онгни ошириш ва барқарор ривожланиш ғояларини қўллаб-қувватлашдир.

Telegram I Facebook I YouTube I Instagram

Қашқадарёда ноқонуний газ “бункери” фош этилди

Қашқадарё вилояти Ғузор тумани Эшонқудуқ қишлоғида 150 та маиший газбаллони (109 тўла, 41 бўш) ноқонуний сақланаётгани аниқланди. “Ҳудудгазтаъминот” АЖ ва ҳуқуқни муҳофаза қилувчи органлар ҳамкорлигида ўтказилган текширувда газ тарқатиш учун ажратилган 112 та баллон белгиланган манзилга етказилмагани маълум бўлди.

Ҳолат бўйича далолатнома расмийлаштирилиб, материаллар тегишли идораларга юборилди.

Telegram I Facebook I YouTube I Instagram

Эркинжон Турдимовнинг укаси янги лавозимга тайинланди

Шавкатжон Оқбўтаевич Турдимов Бош прокуратура ҳузуридаги Иқтисодий жиноятларга қарши курашиш департаментининг Тошкент вилояти бошқармаси бошлиғи лавозимига тайинланди.

Тайинловга қадар у шу департаментда бошқарма бошлиғининг ўринбосари сифатида фаолият юритган. 1980 йилда Самарқандда туғилган, олий маълумотли, 2006 йилда Тошкент молия институтини тамомлаган.

Telegram I Facebook I YouTube I Instagram

Ўзбекистонда Amazon билан ҳамкорликда сунъий йўлдош интернети йўлга қўйилади

Рақамли технологиялар вазири Шерзод Шерматов Amazon Kuiper компанияси билан учрашув ўтказди. Томонлар рақамли инфратузилмани ривожлантириш ва юқори тезликдаги интернет хизматларини жорий этиш масалаларини муҳокама қилди.

Учрашув якунлари бўйича Вазирлик ва Amazon Kuiper Commercial Services LLC ўртасида англашув меморандуми имзоланди, унга кўра Ўзбекистонда “Project Kuiper” орқали сунъий йўлдош интернети йўлга қўйилади.

Telegram I Facebook I YouTube I Instagram

Тошкентдаги мактабда ёнғин: зарар ва сабаби аниқланмоқда

Бугун, 13 октябрь соат 17:23 да Тошкент шаҳар Мирзо Улуғбек тумани “Шукур Бурхонов” МФЙдаги 208-мактабнинг таъмирланаётган бўш биносида ёнғин содир бўлди.

Фавқулодда вазиятлар вазирлиги маълумотларига кўра, ёнғин-қутқарув экипажлари соат 17:28 да ҳудудга етиб бориб, 17:39 да ёнғинни қуршаб олган ва 17:42 да уни бартараф этган.

Ҳодиса вақтида мактабда ходим ва ўқувчи бўлмаган, ҳеч ким тан-жароҳати олмаган.

Ёнғиннинг сабаби таъмирлаш ишлари даврида ёнғин хавфсизлик қоидаларига риоя этмаслик эҳтимоли билан боғлиқ деб тахмин қилинмоқда, зарар миқдори ҳам аниқланмоқда.

Telegram I Facebook I YouTube I Instagram

Қурилиш соҳасида қонунбузилишлар аниқланди — чоралар кўрилди

Қурилиш ва уй-жой коммунал хўжалиги соҳасида назорат қилиш инспекцияси ўтган ҳафта давомида амалга оширилган ишлар юзасидан ахборот берди.

Инспекция маълумотларига кўра:

🔷Бекобод туманида кўп қаватли уйлар атрофида ўзбошимчалик билан қурилган иншоотлар мулкдорларнинг ўз ихтиёри билан буздирилмоқда.

🔷Самарқанд вилоятида инспекторлар сифатсиз боғча қурилишига йўл қўймасликка эришди.

🔷Андижон вилоятида ичимлик суви тармоқларига ўзбошимчалик билан уланган тадбиркорлик субъекти аниқланди.

🔷Бухоро вилояти Жондор туманида қурилиш объектларида сифат талабларига жавоб бермайдиган ишлар аниқланиб, тегишли қисмлари буздирилди.

🔷Навоий шаҳрида кўп қаватли уйнинг юк кўтарувчи конструкцияларини бузган фуқарога нисбатан қонун доирасида чора кўрилди.

Инспекция аҳолини қурилишда белгиланган меъёр ва қоидаларга қатъий риоя этишга чақирди.

Янгилик ва хабарларни Қурилиш ва уй-жой коммунал хўжалиги соҳасида назорат қилиш инспекциясининг расмий саҳифаларида кузатиб бориш мумкин.

Telegram I Facebook I YouTube I Instagram

Сув хўжалигида рақамлаштириш ва хусусий секторни жалб этиш бўйича янги чоралар белгиланди

Президент Шавкат Мирзиёев сув хўжалиги соҳасини рақамлаштириш, бошқарувни такомиллаштириш ва унинг хусусий сектор учун жозибадорлигини оширишга қаратилган тақдимот билан танишди.

Маълум қилинишича, янги ёндашув асосида сув ҳисобини юритиш тўлиқ электрон шаклга ўтказилади. “Suv hisobi” ахборот платформаси орқали фойдаланилган сув миқдори аниқ ҳисобланиб, истеъмолчиларга электрон тарзда етказилади.

Шунингдек, 2026 йил апрелига қадар “Давлат сув кадастри” ахборот тизими ишга туширилади. У орқали сув ресурсларига оид маълумотлар тегишли вазирлик ва идоралардан йиғилиб, ягона базада шакллантирилади.

Эндиликда сув хўжалиги соҳасини рақамлаштириш масалалари билан алоҳида вазир ўринбосари шуғулланади.

2026 йилдан бошлаб ходимларни рағбатлантириш тизими амалий натижаларга боғланади. Яъни етказилган сув миқдори ва фойдаланилган ҳажм ўртасидаги тафовут асосида баҳолаш жорий этилади.

Қолаверса, 2026 йилда Жиззах, Қашқадарё, Навоий, Наманган, Самарқанд ва Сирдарё вилоятларидаги насос станцияларининг 50 фоизи, 2027 йилга келиб эса Наманган вилоятидаги барча насос станциялари хусусий шерикликка берилиши режалаштирилмоқда.

Муассасаларнинг молиявий мустақиллигини ошириш мақсадида сув солиғидан тушган маблағларнинг 40 фоизини ўзининг моддий-техник базасини мустаҳкамлашга йўналтиришга рухсат берилади.

Telegram I Facebook I YouTube I Instagram