Ўзбекистонда рекорд даражада кийим ишлаб чиқарилди

Миллий статистика қўмитаси маълумотларига кўра, 2025 йилнинг январ–август ойларида Ўзбекистонда йирик корхоналар томонидан 24,4 трлн сўмлик кийим маҳсулотлари ишлаб чиқарилган.

Бу кўрсаткич мамлакатдаги кийим ишлаб чиқариш соҳаси учун рекорд даражани ташкил этиб, 2024 йилнинг мос даврига нисбатан 16,9 фоиз ўсган.

Ҳудудлар кесимида кийим ишлаб чиқариш ҳажми қуйидагича:

Андижон вилояти – 9,6 трлн сўм;
Наманган вилояти – 2,7 трлн сўм;
Тошкент вилояти – 2,6 трлн сўм;
Тошкент шаҳри – 1,8 трлн сўм;
Фарғона вилояти – 1,6 трлн сўм;
Навоий вилояти – 1,4 трлн сўм;
Қашқадарё вилояти – 1,1 трлн сўм;
Бухоро вилояти – 1 трлн сўм;
Самарқанд вилояти – 863,7 млрд сўм;
Сурхондарё вилояти – 437,0 млрд сўм;
Жиззах вилояти – 419,1 млрд сўм;
Қорақалпоғистон Республикаси – 333,4 млрд сўм;
Сирдарё вилояти – 291,5 млрд сўм;
Хоразм вилояти – 288,9 млрд сўм.

Telegram I Facebook I YouTube I Instagram

Фермер ва кластерларга ердан эркин фойдаланиш имкони берилди

Эндиликда фермер хўжаликлари, кластерлар ҳамда бошқа юридик шахс мақомидаги қишлоқ хўжалиги маҳсулотлари ишлаб чиқарувчиларга ер участкасининг 10 фоиз қисмида исталган экин турини экишга рухсат берилди.

Бу қарор уларга бозор талабидан келиб чиқиб, ердан самарали фойдаланиш имконини яратади.

Telegram I Facebook I YouTube I Instagram

Euronews Навоий вилоятининг туризм салоҳиятини дунёга тарғиб қилмоқда

Европанинг машҳур ахборот каналларидан бири — Euronews ўз дастурларида Навоий вилоятининг туризм салоҳияти, бой тарихи ва миллий ҳунармандчилигини дунё жамоатчилигига таништирмоқда.

Навоий вилояти — Марказий Осиёнинг юрагида жойлашган, барқарор туризм ва маданий мерос уйғунлашган ҳудуд сифатида таъкидланмоқда. Бу ердаги эко-қишлоқлар, оилавий меҳмон уйлари, тарихий қалъалар, петроглифлар ва анъанавий ўтовли лагерлар сайёҳлар эътиборини тортмоқда.

Лойиҳа Туризм қўмитаси ҳамда Навоий вилояти ҳокимлиги ҳамкорлигида амалга оширилган.

Telegram I Facebook I YouTube I Instagram

Ғазоликлар сулҳдан сўнг вайрон бўлган уйларига қайта бошлади

Жума куни сулҳ кучга киргач, минглаб фаластинликлар вайрон бўлган уйларига қайтиш учун йўлга чиқди. Шу вақтда Исроил аскарлари урушни тугатишга қаратилган келишувнинг биринчи босқичи доирасида орқага чекина бошлади.

Оддий фуқаролар қирғоқ йўли орқали пиёда ҳолда анклавнинг энг йирик шаҳри — Ғазо шаҳри сари йўл олди. Бу ҳудуд бир неча кун олдин Исроилнинг энг кучли ҳужумларидан бирига учраган эди. Жанубда эса одамлар Хон Юнус шаҳри томон ҳаракатланмоқда.

Фаластин соғлиқни сақлаш органлари маълумотича, Исроил армияси чекингандан сўнг тиббий жамоалар Ғазо бўйлаб 100 та жасадни топган.

ҲАМАС ички ишлар вазирлиги Исроил чиқиб кетган ҳудудларга ўз хавфсизлик кучларини жойлаштиришини маълум қилди.

АҚШ президенти Доналд Трамп сулҳ сақланиб қолишига ишонч билдирди:

«Улар ҳаммаси урушдан чарчаган»,

— деди у.

Трамп яқин кунларда Исроилга ва Мисрга ташриф буюриб, Ғазо бўйича халқаро саммит чақиришни режалаштирмоқда.

Telegram I Facebook I YouTube I Instagram

Андижонда мансабдорлар ишсиз аёллар учун ажратилган субсидия пулларини ўзлаштириб юборди

Андижон вилоятида ишсиз аёлларга мўлжалланган давлат субсидия маблағлари ноқонуний йўл билан ўзлаштирилгани аниқланди. Бу ҳақда Коррупцияга қарши курашиш агентлиги маълум қилди.

Маълумотларга кўра, Жалақудуқ туманидаги Камбағалликни қисқартириш ва аҳоли бандлигига кўмаклашиш бўлими масъул шахслари “С.Т.Х.” МЧЖ раҳбари билан тил бириктириб, 25 нафар аёл номига сохта ҳужжатлар расмийлаштирган.

Расмий маълумотларга кўра, гўёки бу аёллар корхонада касаначи сифатида иш билан таъминланган ва уларга 247 миллион сўмлик тикув асбоб-ускуналари берилгани ҳақида ёлғон маълумот киритилган.

Ҳолат юзасидан жиноят иши қўзғатилиб, тергов ҳаракатлари бошланган.

Telegram I Facebook I YouTube I Instagram

АҚШ Хитой маҳсулотларига 100 фоизлик янги бож жорий этди

АҚШ президенти Доналд Трамп Хитой билан савдо муносабатларида янги чекловлар жорий этилганини маълум қилди. Унинг баёнотига кўра, 1 ноябрдан бошлаб Хитойдан импорт қилинадиган барча маҳсулотларга амалдаги божлардан ташқари қўшимча 100 фоизлик тариф қўлланади.

Шунингдек, Америка ҳукумати Хитойга муҳим дастурий таъминот экспортини ҳам чеклашни режалаштирмоқда. Трамп бу қарорни Пекиннинг «ўта агрессив савдо сиёсати» билан изоҳлади.

Унинг таъкидлашича, Хитой бошқа давлатларни ўз ҳудудида ишлаб чиқарилган кўплаб маҳсулотларга экспорт чекловлари бўйича огоҳлантирган ва бу чоралар “барча мамлакатларга истисносиз таъсир кўрсатади”.

Хитой томони ҳозирча Трампнинг баёнотига муносабат билдирмади.

Маълумот учун, охирги ойларда АҚШ ва Хитой ўртасидаги савдо қарама-қаршилиги яна кучайди. Аввалроқ Трамп Жанубий Кореяда бўладиган Осиё–Тинч океани иқтисодий ҳамкорлиги саммитида Си Жинпинг билан учрашувига шубҳа билан қараётганини айтганди.

Telegram I Facebook I YouTube I Instagram

Европа Иттифоқи чегараларида Ягона кириш-чиқиш тизими жорий этилади

Ўзбекистон Ташқи ишлар вазирлиги 2025 йил 12 октябрдан бошлаб Европа Иттифоқи ташқи чегараларида Ягона кириш-чиқиш тизими босқичма-босқич жорий этилишини маълум қилди.

Янги рақамли тизим орқали паспортларга муҳр босиш амалиёти бекор қилинади. Энди учинчи давлатлар, шу жумладан, Ўзбекистон фуқароларининг Европа Иттифоқига кириш ва чиқиш маълумотлари электрон тарзда қайд этиб борилади.

Ташқи ишлар вазирлиги ЕИ мамлакатларига саёҳат қилишни режалаштираётган Ўзбекистон фуқароларидан янги тартиб қоидалар билан олдиндан танишиб чиқишни сўради.

Telegram I Facebook I YouTube I Instagram

Газсиз хонадон, лекин тўлов бор — бундан ким манфаатдор?

Самарқанд вилояти Қўшработ тумани Қўролос қишлоғидаги Норбоевлар оиласи сўнгги ойларда ғалати ҳолат билан юзма-юз келди: хонадонларига ҳали табиий газ уланмаган бўлса-да, банк карталаридан автоматик равишда газ учун тўлов ечиб олинаётгани маълум бўлди.

Бу ҳолат нафақат уларни, балки қишлоқдаги бошқа фуқароларни ҳам изтиробга солмоқда — агар газ йўқ бўлса, у ҳолда нега пул ундириляпти?

Молиявий амалиётлар фуқаронинг хабардорлиги ва розилигисиз амалга оширилган бўлса, бу ҳолат ҳуқуқий жавобгарликка сабаб бўлиши мумкин. Агар хонадон газ тармоғига уланмаган бўлса, ҳар қандай автоматик ечим асоссиз бойиш ёки давлат хизматидан нотўғри фойдаланишга киради.

EFFECT.uz таҳририяти ушбу ҳолат юзасидан газ таъминоти идорасининг расмий изоҳини олишга ҳаракат қилмоқда ва натижалар ҳақида қўшимча хабар беради.

Telegram I Facebook I YouTube I Instagram

2141 нафар давлат хизматчиси ишдан бўшатилади: сунъий интеллект улар ўрнини эгаллайди

Ўзбекистонда давлат бошқарувини рақамлаштириш ва самарадорлигини оширишга қаратилган ислоҳотлар доирасида жорий йил октябрь ойи охиригача 2141 нафар давлат хизматчисини ишдан бўшатиш режалаштирилган. Бу ҳақда “Дунё” ахборот агентлиги Украинадаги “Корреспондент” ва “ТСН” нашрларига таяниб хабар берди.

Маълумотларга кўра, энг кўп лавозимлар Давлат солиқ қўмитаси, Сув хўжалиги, Қишлоқ хўжалиги ва Адлия вазирликларида қисқартирилади. Шунингдек, ислоҳотлар бошқа давлат идораларига ҳам таъсир кўрсатиши кутилмоқда.

Қарор доирасида сунъий интеллект тизимлари айрим вазифаларни инсон меҳнатининг ўрнига бажариши режалаштирилган. Бу орқали давлат бошқаруви органларида рақамли технологиялар ва бозор механизмларини кенг жорий этиш, маъмурий харажатларни камайтириш ҳамда самарадорликни ошириш мақсад қилинган.

Ҳужжатда қайд этилишича, ишдан бўшатилган хизматчиларни янги иш билан таъминлаш масаласида Бандлик ва меҳнат муносабатлари вазирлиги ҳамда Ўзбекистон Касаба уюшмалари Федерациясига кўмаклашиш вазифаси юклатилган.

Telegram I Facebook I YouTube I Instagram

Боғчага қабул тартиби ўзгаргани ҳақидаги хабарлар рад этилди

Ижтимоий тармоқларда болаларни боғчага 2 ёшдан қабул қилиш ёки энди фақат 6 ёшгача боғчага бориши ҳақидаги асоссиз хабарлар тарқалмоқда.

Бу маълумотлар ҳақиқатга тўғри келмаслиги ҳақида Мактабгача ва мактаб таълими вазири матбуот котиби Дилфуза Собирова расмий аудиобаёнот берди.

Таъкидланишича, мазкур хабарлар ҳеч қандай ҳуқуқий асосга эга эмас. Аҳолига фақат расмий манбалар орқали эълон қилинаётган маълумотларга ишониш тавсия этилган.

Батафсил маълумот вазирликнинг аудиобаёнотида келтирилган.

Telegram I Facebook I YouTube I Instagram

"Қалблар дардига дармон" биринчи замонавий санъат биенналеси

5 сентябридан 20 ноябрига қадар Бухоро шаҳрида давом этадиган тадбирда 40 та мамлакатдан 70 га яқин рассом, ҳунармандлар, дизайнер ва ошпазлар иштирок этмоқда.

Бухоро биенналеси учун 3,5 гектар майдон тайёрланган. 14 та тарихий объект реставрация қилинди. 70 та арт-объект ва инсталляция яратилди. Бу манзил креатив кластерга айланди.

Асарлар турли кўргазма майдонларини бирлаштириб, ташриф буюрувчилар ва шаҳарнинг ушбу қисмида яшовчи ва ижод қилувчи бухороликлар ўртасида алоқа ўрнатади.

Биеннале замонавий санъат, гастрономия, мусиқа, кино ва анъанавий ҳунармандчиликни бирлаштирган ҳолда минтақа маданий ривожланишининг янги босқичи рамзига айланди.

Telegram I Facebook I YouTube I Instagram

Божхона декларациясини мобил илова орқали тўлдириш имкони яратилди

Давлат Божхона қўмитаси “Йўловчи-декларацияси” номли янги мобил иловани ишга туширди. Энди фуқаролар декларацияни онлайн ва соддалаштирилган тартибда тўлдириш имкониятига эга бўлади.

Илова орқали паспорт маълумотлари автоматик тарзда тўлдирилади, IMEI-код сканерланади ҳамда чегара пунктларидаги бепул Wi-Fi орқали фойдаланиш мумкин.

Айни пайтда хизмат “Тошкент” халқаро аэропортида синов тариқасида ишламоқда. 2025 йил 1 ноябрдан бошлаб эса мазкур тизим барча чегара пунктларида жорий этилиши режалаштирилган.

Telegram I Facebook I YouTube I Instagram