Нақд шаклда пенсия тўлашда Face-ID тизими жорий этилди

Ўзбекистонда нақд шаклда пенсия олувчилар учун Face-ID орқали биометрик идентификация тизими жорий этилди. Бу ҳақда Пенсия жамғармаси матбуот хизмати хабар берди.

Маълумотларга кўра, фуқаролар нақд пенсия олиш вақтида Face-ID орқали шахсини тасдиқлайди ва пулни қабул қилганини электрон имзо орқали расмийлаштиради.

Пенсия жамғармаси маълумотида таъкидланишича, бу янгилик орқали ҳисоботларда “тўланди” деб қайд этилиб, амалда пенсия бермаслик ёки бошқа шахсга тўлаб юбориш ҳолатларининг олди олинади.

Расмий маълумотга кўра, октябр ойидан бошлаб ҳудудларда Face-ID орқали тўлов жараёни амалга оширила бошланган.

Аввалроқ Пенсия жамғармаси ижрочи директори Муродбек Отажонов ҳукуматда пенсия ёшини ошириш режаси борлигини тасдиқлаган эди.

Telegram I Facebook I YouTube I Instagram

Шавкат Мирзиёев Имомали Раҳмон билан телефонда гаплашди

Ўзбекистон президенти Тожикистон президентини таваллуд куни билан самимий қутлаб, унга мустаҳкам соғлик ва бахт-саодат, биродар Тожикистон халқига фаровонлик ва бардавом равнақ тилади.

Президент матбуот хизмати хабарида янгиланган визуал идентификациядан фойдаланилган. Аввалги хабарларда президент администрацияси биносининг визуал сурати акс этарди, энди эса унда президентнинг расмий белгиси (вензел) пайдо бўлганини кўриш мумкин.

Telegram I Facebook I YouTube I Instagram

“Бойсункўмир” хорижий инвесторларга сотувга қўйилди

Ўзбекистон Давлат активларини бошқариш агентлиги “Бойсункўмир” компаниясини хусусийлаштириш жараёни бошланганини маълум қилди.

Расмий маълумотга кўра, компанияни сотиб олиш бўйича маҳаллий ва хорижий компаниялардан тўртта номзод танлаб олинган ва улар мажбурий таклифларни тақдим этишга чақирилган.

Таклифлар 2025 йил 27 октябр, соат 23:59 гача қабул қилинади. Иштирокчилар таклиф нархининг 1 фоизи миқдоридаги кафолат депозитини “E-auksion” платформаси орқали тўлашлари лозим.

Инвесторларга компания ҳақидаги молиявий ва ҳуқуқий маълумотлар билан танишиш, шунингдек “Бойсункўмир” раҳбарияти билан учрашиш имкони берилади.

Маълумот учун, Бойсун кони Ўзбекистондаги 2 миллиард тоннадан ортиқ кўмир захирасига эга учта йирик конлардан бири ҳисобланади. “Бойсункўмир” компанияси Сурхондарё вилоятидаги “Жанубий Бойсун” конини ривожлантириш лицензиясига эга бўлиб, ушбу лицензия 2055 йилгача амал қилади.

Telegram I Facebook I YouTube I Instagram

🇺🇿🇨🇳 Ўзбекистон ва Хитой Қашқадарёда йирик ер ости газ омбори барпо этади

Ўзбекистон Энергетика вазирлиги ва Хитойнинг CNPC компанияси ҳамкорлик тўғрисидаги меморандумни имзолади. Ҳужжатга кўра, Қашқадарё вилояти Касби туманидаги “Қорабайир” конида 1,5 миллиард куб метр сиғимга эга ер ости газ омбори қурилиши режалаштирилган.

Янги инфратузилма мавсумий ёқилғи истеъмолидаги ўзгаришларни мувозанатлаштириш ҳамда мамлакатнинг энергетик барқарорлигини таъминлашга хизмат қилади.

Мутахассислар фикрича, бу ташаббус сўнгги йилларда энергетика соҳасида амалга оширилаётган энг йирик лойиҳалардан бири бўлади.

Telegram I Facebook I YouTube I Instagram

Космосдан назорат!

Ўзбекистонда дарахтзорларнинг ноқонуний кесилишига қарши кураш энди космос орқали амалга оширилади.

Президентнинг махсус фармонига кўра, “Ўзбеккосмос” агентлиги 2026 йилдан бошлаб мамлакат ҳудудидаги геология, ер муносабатлари ва экология соҳаларидаги ноқонуний ҳолатларни космик йўл билан аниқлайди.

🛰 Йилига камида уч марта давлат космик мониторинги ўтказилади. Бу жараёнда орбита орқали олинган маълумотлар ёрдамида дарахтзорларнинг кесилиши, ер майдонларининг ўзлаштирилиши ва бошқа ҳуқуқбузарликлар кузатилади.

2026 йилдан бошлаб республика миқёсида ноқонуний дарахт кесиш ҳолатлари махсус космик мониторинг орқали назорат қилинади.

📡 Шунингдек:
• Тошкент вилояти Бўка туманидаги юқори кучланишли электр узатиш тармоқлари ҳолати аэрокосмик мониторинг орқали синовдан ўтказилади.
• Сурхондарё вилоятида қуёш панелларини самарали жойлаштириш мумкин бўлган майдонлар аниқланади.
• Тошкент–Ангрен темир йўли бўйлаб транспорт соҳасидаги аэрокосмик кузатувлар йўлга қўйилади.

Бу чоралар нафақат экологияни муҳофаза қилиш, балки энергетика ва инфратузилма соҳасида ҳам самарадорликни оширишга хизмат қилади.

Фармоннинг тўлиқ матни билан lex.uz орқали танишиш мумкин.

Telegram I Facebook I YouTube I Instagram

Шавкат Мирзиёев Озарбайжонга амалий ташриф билан боради

Ўзбекистон Республикаси президенти Шавкат Мирзиёев Озарбайжон Республикаси Президенти Илҳом Алиевнинг таклифига биноан жорий йилнинг 6–7 октябрь кунлари амалий ташриф билан ушбу мамлакатда бўлади.

Давлатимиз раҳбари Габала шаҳрида бўлиб ўтадиган Туркий давлатлар ташкилотининг навбатдаги саммитида иштирок этади.

Telegram I Facebook I YouTube I Instagram

Эндиликда автомобил рақамини бошқа шахсга ўтказиш мумкин бўлди

«Safe Road YHXX» иловасида янги имконият ишга туширилди. Энди фойдаланувчилар ўзларига тегишли чиройли давлат рақам белгисини тўлов эвазига бошқа шахсга ўтказишлари ёки бошқа автомобилларига тақишлари мумкин.

Шунингдек, аукционда сотилмай қолган 1–3-категорияли “чиройли рақамлар”ни ҳам илова орқали сотиб олиш имконияти мавжуд.

Telegram I Facebook I YouTube I Instagram

Ўзбекистон ҳудудида Қирғизистондаги зилзила сезилди

6 октябрь куни соат 01:29 атрофида Ўзбекистон ҳудудида сезиларли ер тебранишлари кузатилди. Бу тебранишлар Қирғиз Республикасининг Жалолобод вилояти ҳудудида содир бўлган 5,7 магнитудали зилзила оқибатида юзага келган.

Ўзбекистон Республикаси Фавқулодда вазиятлар вазирлиги ҳузуридаги Сейсмопрогностик мониторинг республика маркази маълумотларига кўра, зилзиланинг эпицентри Тошкентдан 199 км шимолий-шарқда, Жалолобод вилоятида жойлашган. Зилзила чуқурлиги 10 км, эпицентрдаги кучи эса 7 балл бўлган.

Ўзбекистон ҳудудида тебранишлар қуйидагича сезилган:
• Наманган вилоятида — 3–4 балл, 106 км масофада;
• Андижон вилоятида — 3 балл, 144 км;
• Фарғона вилоятида — 2–3 балл, 176 км;
• Тошкент шаҳрида — 2–3 балл, 199 км;
• Сирдарё вилоятида — 2 балл, 275 км масофада.

Telegram I Facebook I YouTube I Instagram

Марказий банк насия савдо бозори учун ахлоқ қоидалари лойиҳасини жамоатчилик муҳокамасига қўйди

Марказий банк Ўзбекистонда насия савдо бозори иштирокчилари учун ахлоқ қоидалари лойиҳасини эълон қилди. Ҳужжатда бозор фаолиятини тартибга солиш ва шаффофликни оширишга қаратилган бир қатор янги талаблар белгиланган.

Лойиҳага кўра, барча насия бозори иштирокчилари FinTex Ассоциациясига аъзо бўлиши шарт бўлади. Ассоциация орқали “Ишонч белгиси” тизими жорий этилади — бу белги насия хизматлари қонунга мувофиқ ва ошкора йўлга қўйилганини англатади.

Шартномалар ва маълумот ошкоралигига оид талаблар асосида, ҳар бир ташкилот ўз расмий сайтида маҳсулотлар, тўлов тартиби, комиссия ва жарималар ҳақида тўлиқ маълумот бериши лозим. Мижозлар шартнома тузишдан олдин йиллик фоиз (APR), умумий тўлов суммаси ва кечиктириш оқибатлари ҳақида хабардор қилинади. Шунингдек, рекламада “0%”, “бепул”, “барчага мос” каби чалғитувчи иборалардан фойдаланиш тақиқланади.

Янги талабларга кўра, насия хизматлари фақат 18 ёшдан катта фуқароларга кўрсатилади. Илк лимит — 2 миллион сўм, қарз юки эса мижоз даромадининг 50 фоизидан ошмаслиги лозим. Қарздорликни ундириш жараёнида таҳдид ёки босим ўтказиш каби ноқонуний усуллар қатъий ман этилади.

Бундан ташқари, фирибгарликнинг олдини олиш мақсадида янги мижозлар биометрик усулда рўйхатдан ўтказилади, ташкилотларда ахборот ва киберхавфсизлик бўлимлари ташкил этилади. Шунингдек, кредит бюролари билан маълумот алмашинуви йўлга қўйилади.

Марказий банк лойиҳани такомиллаштириш бўйича жамоатчиликдан таклифлар қабул қилмоқда.

Telegram I Facebook I YouTube I Instagram

Божхона қўмитаси мобил қурилмалар учун янги тартибларни маълум қилди

Бугунги кунда жисмоний шахслар томонидан божхона чегараси орқали нотижорат мақсадида мобил қурилмаларни олиб киришда тўловлар билан боғлиқ кўплаб саволлар пайдо бўлмоқда.

Маълумки, Вазирлар Маҳкамасининг 2025 йил 19 апрелдаги 244-сон қарорига мувофиқ, жисмоний шахслар шахсий эҳтиёжи учун республикага олиб кириши мумкин бўлган товарларнинг божсиз меъёрлари қуйидагича белгиланган:

🔶ҳаво транспортида — 1000 АҚШ доллари,
🔶темирйўл ва дарё транспортида — 500 АҚШ доллари,
🔶автомобиль (пиёда) ўтказиш пунктлари орқали — 300 АҚШ доллари.

Агар мобил қурилманинг қиймати белгиланган меъёрдан ошса, ортиқча қисмига нисбатан 30 фоиз миқдорида ягона божхона тўлови ундирилади.

Шунингдек, Вазирлар Маҳкамасининг 2025 йил 31 январдаги 55-сон қарорига асосан, божхона кирим ордерини тўлдириш ва расмийлаштириш учун базавий ҳисоблаш миқдорининг 25 фоизи (103 минг сўм) миқдорида йиғим ундирилади.

Мобил қурилманинг божхона қиймати харид чеки, квитанция ёки бошқа тижорат ҳужжатларида кўрсатилган нарх асосида белгиланади. Агар ҳужжатлар мавжуд бўлмаса, божхона органи қийматни ўз электрон базасидаги маълумотлар ёки ишлаб чиқарувчи компаниянинг расмий сайти маълумотларига асосан белгилайди.

Масалан, “iPhone 17” модели олиб кирилганда, агар чек ёки квитанция мавжуд бўлса — ундаги нарх асосида, бўлмаса — “Apple” компаниясининг фуқаро келаётган давлатдаги расмий сайтидаги нархлардан келиб чиқиб божхона қиймати белгиланади.

Божхона қўмитаси маълум қилишича, “iPhone 17” русумидаги мобил қурилмаларни расмийлаштиришда қўлланилаётган божхона қиймати ҳақидаги маълумотлар улар энг кўп олиб кирилаётган давлатлар кесимида эълон қилиб борилади.

Маълумотлар янгиланганда қўшимча хабар берилади.

Telegram I Facebook I YouTube I Instagram

Қурилиш соҳасидаги назорат ишлари натижалари маълум қилинди

Қурилиш ва уй-жой коммунал хўжалиги соҳасида назорат қилиш инспекцияси 2025 йилнинг 9 ойи давомида амалга оширилган ишлар юзасидан ахборот берди.

Маълумотларга кўра, инспекция томонидан ўтган давр мобайнида назорат тадбирлари самарадорлиги оширилиб, қурилиш соҳасида қонунбузилиш ҳолатларининг олдини олиш ва объектларда хавфсизлик талабларига риоя этилишини таъминлаш бўйича ишлар амалга оширилган.

Telegram I Facebook I YouTube I Instagram

Тошкентда ҳаво сифати яна меъёрдан ошиб кетди

Тошкентнинг шарқий қисмида жойлашган “Янги Ўзбекистон” боғида ҳаводаги майда РМ–2.5 заррачалар миқдори миллий рухсат этилган меъёрдан 3 баробар юқори экани аниқланди.

Пойтахтнинг бошқа ҳудудларида ҳам соат 10:00 ҳолатига кўра ҳаводаги майда дисперс заррачалар даражаси миллий меъёрдан камида 2 баробар, Жаҳон соғлиқни сақлаш ташкилоти (ЖССТ) талабларидан эса 12 баробар юқори экани қайд этилмоқда.

Маълумотларга кўра, “Янги Ўзбекистон” боғи шаҳар инфратузилмасидан нисбатан узоқ ҳудудда жойлашган бўлса-да, ҳозирда у ерда катта қурилиш ишлари амалга оширилмоқда. Мутахассислар фикрича, ҳавонинг ифлосланиши айнан шу қурилиш жараёнлари билан боғлиқ бўлиши эҳтимолдан холи эмас.

Сўнгги пайтларда ҳаво ифлосланиши бутун мамлакат бўйлаб, айниқса пойтахтда, такрорланиб турибди. Экологлар бу ҳолат инсон соғлиги учун хавфли эканини таъкидлаб, аҳолини эҳтиёт чораларини кўришга чақирмоқда.

Ҳукумат тузилмалари ҳозирча аҳолига ҳаво ифлосланиши ҳолатларида қандай ҳаракатланиш бўйича расмий тавсия бермаган.

Telegram I Facebook I YouTube I Instagram

“HUGGIES” товар белгисидан рухсатсиз фойдаланиш ҳолати бўйича чора кўрилди

Рақобат қўмитасининг Тошкент вилояти ҳудудий бошқармасига "Kimberly-Clark" МЧЖдан келиб тушган мурожаат асосида, “Ahangaron Hygienic Pro” МЧЖнинг “HUGGIES” товар белгисидан ноқонуний фойдалангани аниқланди.

Мазкур ўрганишлар давомида “Ahangaron Hygienic Pro” МЧЖ ҳақиқатдан ҳам “Kimberly-Clark” МЧЖга тегишли товар белгисидан фойдаланган ва унинг обрўсига салбий таъсир кўрсатаётгани аниқланди.

Шу муносабат билан корхонага нисбатан иш қўзғатилиб, қонунбузилиш ҳолати юзасидан молиявий жарима қўллаш тўғрисида қарор қабул қилинди. Шунингдек, бундай ҳолатларни келгусида такрорланмаслиги бўйича кўрсатмалар берилди.

Telegram I Facebook I YouTube I Instagram

Шавкат Мирзиёев марҳум Жўрабеков хонадонига таъзияга борди

Президент Шавкат Мирзиёев жорий йил 28 сентябрь куни вафот этган атоқли давлат ва жамоат арбоби Исмоил Жўрабеков хонадонига ташриф буюриб, марҳумнинг оила аъзоларига ҳамдардлик билдирган.
Исмоил Жўрабеков ўтган ойнинг 28 санасида 94 ёшида вафот этган эди.

Исмоил Жўрабеков 1990 йилларда давлат агросаноатини бошқарган, 1994—1998 йилларда Қишлоқ ва сув хўжалиги вазири бўлиб ишлаган, 2000—2004 йилларда эса Ўзбекистон Президентининг қишлоқ хўжалиги масалалари бўйича давлат маслаҳатчиси лавозимларида фаолият юритган.

Telegram I Facebook I YouTube I Instagram