Ҳайдовчилик гувоҳномасини онлайн тиклаш хизмати йўлга қўйилди

Эндиликда йўқотилган ҳайдовчилик гувоҳномасини тиклаш учун ЙҲХХ бўлимига бориш шарт эмас. Бу хизмат my.gov.uz портали орқали амалга оширилади.

Хизмат ҳақида:

🔷Давлат бозор қиймати — 370 800 сўм (0,9 БҲМ);

🔷Почта орқали етказиб бериш — 25 000 сўм;

🔷Гувоҳнома 1 иш кунида тайёрланади, почта орқали эса 3 иш кунида етказилади;

Маълумотлари тасдиқланмаганлар, ҳайдовчи ҳуқуқидан маҳрум этилганлар ёки Маъмурий кодекснинг 131 ва 136-моддалари бўйича иш қўзғатилган шахсларга хизмат кўрсатилмайди.

Telegram I Facebook I YouTube I Instagram

Сурхондарёда судья ёрдамчиси 800 доллар билан ушланди

➡️Жиноят ишлари бўйича Термиз туман судининг судья ёрдамчиси хизмат мавқеидан фойдаланган ҳолда мазкур туман судида кўрилаётган маъмурий ҳуқуқбузарликка оид иш бўйича ҳуқуқбузарга нисбатан енгиллик яратиб бериши эвазига дастлаб 500 минг сўм пул маблағини олиб, қўшимча равишда 800 АҚШ доллар талаб қилган.

🚨Давлат хавфсизлик хизматининг Сурхондарё вилояти бўйича бошқармаси ҳамда Бош прокуратура ҳузуридаги Департаментнинг ҳудудий бошқармаси ходимлари ҳамкорлигида Термиз шаҳрида ўтказилган тезкор тадбирда судья ёрдамчиси ўзининг қариндоши воситачилигида 800 АҚШ долларини олган вақтида ашёвий далиллар билан ушланган.

Ҳолат юзасидан унга нисбатан Жиноят Кодексининг 168-моддаси 3-қисми “в” банди ва 28,211-моддаси 1-қисми билан жиноят иши қўзғатилиб, қамоқ эҳтиёт чораси қўлланилди. Тергов ҳаракатлари олиб борилмоқда.

Telegram I Facebook I YouTube I Instagram

⚡️Женевада Ўзбекистон мустақиллигининг 34 йиллиги нишонланди, БМТда «Ўзбекистон хонаси» очилади

Женевада Ўзбекистон Республикаси мустақиллигининг 34 йиллиги муносабати билан қабул маросими бўлиб ўтди. Тадбирда Президент администрацияси раҳбари Саида Мирзиёева иштирок этди ҳамда Жаҳон савдо ташкилоти Бош директори Нгози Оконджо-Ивеала билан учрашди.

Маросимда яқин кунларда БМТ биносида «Ўзбекистон хонаси» очилиши маълум қилинди. Унда жаҳон ҳамжамияти мамлакатимиз маданияти ва анъаналари билан яқиндан танишиш имкониятига эга бўлади.

Учрашувда Ўзбекистонда амалга оширилаётган ислоҳотлар, ЖСТга аъзо бўлиш жараёни ҳамда халқаро ҳамкорлик масалалари муҳокама қилинди.

Таъкидланишича, Ўзбекистон ЖСТга қўшилиши орқали жаҳон бозорларига кенг йўл очиши, мамлакат маҳсулотларининг рақобатбардошлиги ошиши ҳамда истеъмолчилар сифатли ва арзон товарларга эга бўлиш имкониятига эришиши кутилмоқда.

Telegram I Facebook I YouTube I Instagram

Сирдарёда 36 та балиқ ноқонуний овланиб табиатга қарийб 700 млн сўм зарар етказилди

Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Давлат экологик назорат инспекцияси Сирдарё сув ҳавзасини назорат қилиш бўлими, вилоят ДХХ бошқармаси, прокуратура ва Миллий гвардия ҳамкорлигида ўтказилган рейд давомида ноқонуний балиқ овлаш ҳолати аниқланди.

Гулистон туманининг "Теракзор" МФЙ ҳудудидан оқиб ўтувчи Сирдарё дарёси қисмида фуқаролар И.Д., Б.Й. ва И.Д. томонидан электр қармоқ ва резина қайиқ ёрдамида турли хилдаги 36 та балиқ, жумладан, Ўзбекистон Қизил китобига киритилган 1 дона “Туркистон мойловдори” овлангани маълум бўлди.

Натижада ҳайвонот дунёсига 694 миллион 220 минг сўм зарар етказилган. Ҳуқуқбузарлик юзасидан далолатнома расмийлаштирилиб, ноқонуний овланган балиқлар ва ускуналар вақтинча олиб қўйилди. Иш ҳужжатлари Сирдарё вилояти прокуратурасига юборилди.

Мутасаддиларнинг таъкидлашича, ноқонуний балиқ овлашга қарши рейд тадбирлари изчил давом этмоқда.

Telegram I Facebook I YouTube I Instagram

⚡️Россияда меҳнат муҳожирлари учун патент тизими бекор қилиниши мумкин

18 сентябрь куни Россия президенти Владимир Путин парламент фракциялари раҳбарлари билан учрашув ўтказди. Учрашувда «Адолатли Россия — Ҳақиқат учун» партияси раҳбари Сергей Миронов меҳнат муҳожирлари учун патент тизимини бекор қилиш таклифини илгари сурди.

Путин бу таклифни муҳокама қилишга тайёрлигини билдирди:
«Патент тизими кенг қўлланиляпти. Мен ҳеч нарсани истисно қилмайман. Бу масала бўйича ҳамкасблар билан биргаликда иш олиб боринг», — деди у.

Маълумот учун, ҳозирги тизимга кўра, Ўзбекистон, Тожикистон ва Озарбойжон каби визасиз давлатлардан келган муҳожирлар Россияда ишлаш учун патент олиши шарт. У 1 ойдан 1 йилгача амал қилади ва муайян ҳудуд ҳамда соҳаларда ишлашга рухсат беради.

Патент олиш учун муҳожирлар вақтинча рўйхатдан ўтиши, тиббий кўрикдан ўтиши, рус тили, тарих ва қонунчиликдан имтиҳон топшириши, зарур ҳужжатларни ИИВга тақдим қилиши ва давлат божини тўлаши талаб этилади.

Шунингдек, патентнинг амал қилиши учун ҳар ой белгиланган миқдорда НДФЛ бўйича аванс тўлови киритилиши шарт бўлиб, унинг ҳажми минтақага қараб фарқ қилади.

Telegram I Facebook I YouTube I Instagram

⚡️Фермер ва ер эгалари суғорилмайдиган ерларда хизмат кўрсатувчи объектлар қуриши мумкин

Адлия вазирлиги маълумотига кўра, 18 сентябрь 2025 йилда “Қишлоқ хўжалигига мўлжалланган ерлардан фойдаланиш бўйича давлат хизматларини кўрсатиш тизимини янада такомиллаштириш тўғрисида”ги Ҳукумат қарори қабул қилинди.

Қарорга мувофиқ, қишлоқ хўжалигига мўлжалланган суғорилмайдиган ерларда ер участкасидан рухсат этилган фойдаланиш турига мос хизмат кўрсатувчи объектларни қуришга рухсат этилади. Бунда ахборот тизимлари орқали ариза берувчида ижара ҳуқуқи мавжудлиги ва ер кадастридаги маълумотлар текширилади.

Шунингдек, чорвачилик йўналишида ижарага берилган ерларда 1 гектардан ошмаган, бироқ ижара контур майдонининг 1 фоизидан кўп бўлмаган қисмидан хизмат кўрсатувчи объектлар учун фойдаланиш мумкин бўлади.

Белгиланишича, ер майдонида объектлар учун ажратилган қисми бир марта белгиланади ва кейинчалик объект тури ўзгартирилган тақдирда ҳам хизмат ер майдони оширилмаслиги шарт.

Telegram I Facebook I YouTube I Instagram

Албанияда сунъий интеллект вазири илк нутқини парламентда сўзлади

Албанияда янги ташкил этилган Сунъий интеллект вазирлиги раҳбари Диелла парламент олдида илк нутқини сўзлади. У давлат харидлари учун масъул этиб белгиланган.

Мухолифат унинг тайинланишини “конституцияга зид” деб баҳолаган бўлса, Диелла бу фикрларни рад этди:

“Эслатиб ўтаман: Конституцияга ҳақиқий таҳдид ҳеч қачон машиналардан келмаган. Асосий хавф — ҳокимиятдагиларнинг қарорларидан”,

— деди вазир.

Таъкидланишича, бу тарихий воқеа Албанияда Сунъий интеллект вазирлиги ташкил этилгани ва унинг парламентда илк бор ҳимоя қилинаётгани билан аҳамиятлидир.

Telegram I Facebook I YouTube I Instagram

Самарқанддаги ДМТТ реконструкция жараёнида қатор камчиликлар аниқланди

Самарқанд вилояти ҳудудий Қурилиш ва уй-жой коммунал хўжалиги соҳасида назорат қилиш инспекцияси томонидан жойларда қурилаётган кўп қаватли уй-жойлар, шунингдек инфратузилма объектлари устидан назорат тадбирлари доимий равишда олиб борилмоқда.

Хусусан, вилоятнинг Пахтачи туманида ўтказилган навбатдаги тадбирлар давомида «Фаровон Йўлдошобод» маҳалласидаги 36-сонли ДМТТни реконструкция қилиш жараёнларида бир қанча камчиликлар аниқланган.

Жумладан, асосий бинонинг биринчи қават дераза откосларига лойиҳада цемент қоришма берилган бўлсада, пудратчи томонидан оҳак қоришма ишлатилгани сабабли демонтаж қилинди. Шунингдек, бинонинг иккинчи қаватида терилаётган пардеворларда лойиҳадан четланиб, SG-2 сетка қўймасдан уш бажарилганлиги аниқланиб, жойида демонтаж қилинган.

Бундан ташқари, туманнинг «Оқтепа» маҳалласидаги 11-сонли ДМТТнинг асосий биноси ошхона қисмида юк кўтарувчи деворларга терилаётган ғишт сифатсиз бажарилганлиги сабабли, ёзги ошхона фундаменти бетон қуйиш ишлари сифатсиз бажарилганлиги сабабли жойида демонтаж қилиниб, камчиликлар бартараф этилган.

Telegram I Facebook I YouTube I Instagram

Тошкентда ҳайвонга нисбатан шафқатсизлик ҳолати аниқланди

“Меҳр ва Оқибат” Ҳайвонларни ҳимоя қилиш жамиятининг колл-марказига фуқаро М.З. мурожаат қилди. Унинг сўзларига кўра, 16 сентябрдан 17 сентябрга ўтар кечаси мушукнинг чинқириқларини эшитган.

Балконига чиққан фуқаро қўшниси — Хитой фуқароси Й.З. мушукка қайта-қайта қайнаган сув қуйгани ва уни идишда ушлаб, ташқарилга чиқишига тўсқинлик қилаётганини кўрган.

“Меҳр ва Оқибат” жамияти айбдорни қонуннинг барча қатъий нормаларига мувофиқ жавобгарликка тортиш ҳамда уни Ўзбекистондан депортация қилиш масаласини кўриб чиқиш талаби билан ИИВ, ТИВ ва Хитой элчихонасига мурожаат йўллади.

Telegram I Facebook I YouTube I Instagram

“E-YER NAZORAT” тизими орқали ер соҳасидаги ҳуқуқбузарликларга чек қўйилади

Ўзбекистонда ер муносабатларида коррупцион омилларни бартараф этиш ва самарадорликни ошириш мақсадида янги чоралар жорий этилмоқда. Президент қарорига кўра, Кадастр агентлигининг “E-YER NAZORAT” тизими давлат ер назоратининг ягона электрон платформаси сифатида ишлайди.

2026 йил 1 январдан бошлаб ер қонунчилигига риоя этилмаслиги ҳолатлари, жумладан ерларни ўзбошимчалик билан эгаллаш ҳолатлари фақат ушбу тизим орқали назорат қилинади.

Ерга оид ҳуқуқбузарлик даражасига кўра ҳудудлар “қизил”, “сариқ” ва “яшил” тоифаларга ажратилади. “Қизил” тоифадаги ҳудудларда дронлар ёрдамида ҳар чоракда, “сариқ” ҳудудларда эса махсус самолётлар орқали ярим йилда бир марта мониторинг олиб борилади.

Бу чоралар ердан самарали фойдаланиш ва коррупция ҳолатларининг олдини олишга хизмат қилади.

Telegram I Facebook I YouTube I Instagram

Киев вилоятида ўзбекистонлик мигрантлар мажбурий меҳнатдан қутқарилди

Киев вилояти прокуратураси томонидан 13 нафар Ўзбекистон фуқаросини мажбурий меҳнатга жалб этган жиноий гуруҳ фош этилди.

Маълумотларга кўра, гуруҳ таркибидан Хитойнинг икки фуқароси, бир ўзбекистонлик ва бир украиналик аёл ўрин олган. Улар ижтимоий ҳимояга муҳтож шахсларни турли ваъдалар билан алдаб, оғир меҳнатга мажбурлаш орқали эксплуатация қилиб келган.

Жабрланувчилар ғайриинсоний шароитда сақланган, ҳатто ҳожатхонадан ҳам белгиланган вақтдагина фойдаланиш имконияти бўлган.

17 сентябр куни ўтказилган тинтув жараёнида 13 нафар жабрланувчи, уларнинг шахсий ҳужжатлари ҳамда пул маблағлари топилди. Гумонланувчиларга айблов қўйилиб, тергов ҳаракатлари давом этмоқда.

Telegram I Facebook I YouTube I Instagram

Божхона ва солиқ ходимларининг коррупция билан боғлиқ ҳаракатлари фош этилди

Давлат хавфсизлик хизмати ходимлари томонидан Божхона қўмитасининг Шахсий хавфсизлик бошқармаси, Тошкент шаҳар прокуратураси ва Бош прокуратура ҳузуридаги Департамент билан ҳамкорликда коррупцияга қарши йўналтирилган бир қатор тезкор тадбирлар ўтказилди.

1️⃣ Тошкент вилояти “Навоий” чегара божхона пости инспектори хизмат мавқеидан фойдаланиб, 7 кг олтинни декларациясиз чегарадан ўтказиш эвазига 5 минг доллар пора олган пайтда ашёвий далиллар билан ушланди. Унга нисбатан Жиноят кодексининг 210-моддаси билан иш қўзғатилди ва қамоқ эҳтиёт чораси қўлланди.

2️⃣ Шайхонтоҳур туман давлат солиқ инспекцияси бош инспектори МЧЖ фаолиятини тугатиб бериш эвазига 2500 доллар талаб қилган. У сўралган маблағни олган вақтда қўлга олинди. Унга нисбатан Жиноят кодексининг 168 ва 211-моддалари билан иш қўзғатилди.

3️⃣ Миробод тумани солиқ инспекцияси инспектори солиқ текширувлари ўтказмаслик ва олдиндан маълумот бериш шарти билан 10 млн сўмни шахсий картасига ўтказиб олган. Унинг ҳам ноқонуний ҳаракатларига чек қўйилди ва энди қонун олдида жавоб беради.

Telegram I Facebook I YouTube I Instagram

Ногиронликни белгилашнинг рақамлаштирилган тизими жорий этилмоқда

Ҳукуматнинг 587-сон қарорига мувофиқ, ногиронликни белгилаш тизими рақамлаштирилиб, қатор ўзгаришлар амалга оширилмоқда.

Эндиликда ногиронлик масаласида мурожаатларни “Инсон” марказлари, ижтимоий ходимлар, my.gov.uz портали ва оилавий шифокорлар орқали юбориш имконияти яратилди. Тошкент шаҳри ва Навоий вилоятидаги тажриба даврида 12,5 минг ариза қабул қилинган.

Янги тартибга кўра, ногиронликни белгилаш учун ягона муддат талаб этилмайди, балки касаллик турига қараб индивидуал даволаниш муддатлари белгиланади. Шунингдек, сиртдан ногиронлик белгиланадиган касалликлар рўйхати 48 тадан 60 тага кенгайтирилди.

Эндиликда ногиронликка олиб келувчи асосий касалликлар ягона электрон мезонлар асосида баҳоланади. 2025 йил 1 октябрга қадар тизим республиканинг барча ҳудудларида жорий этилади.

Янги қарор асосида тиббий-ижтимоий эксперт комиссияларида ягона ёндашув жорий этилиб, Республика комиссияси таркибида терапевт, невролог, хирург, педиатр ва бошқа мутахассислар иш олиб боради.

Эндиликда ногиронлиги бўлган шахслар учун индивидуал реабилитация дастури ҳам “Ягона миллий ижтимоий ҳимоя” ахборот тизимида электрон шаклда шакллантирилади.

Telegram I Facebook I YouTube I Instagram

🌀 “1FIT” МЧЖ реклама қонунчилигини бузгани учун жаримага тортилди

Рақобат қўмитаси томонидан реклама қонунчилигига риоя этилишини назорат қилиш мақсадида мунтазам мониторинг ишлари олиб борилмоқда.

Мониторинг жараёнида “1FIT” МЧЖ томонидан ижтимоий тармоқларда жойлаштирилган рекламаларда бўрттирувчи ва адаштирувчи ифодалар қўлланилгани аниқланди.

Шу боис қўмита Махсус комиссияси томонидан “Реклама тўғрисида”ги қонун талаблари бузилган ҳолат юзасидан иш қўзғатилиб, молиявий жарима қўллаш ҳақида қарор қабул қилинди.

Шунингдек, қонунбузилиш ҳолатини бартараф этиш ва келгусида бу каби хатоларга йўл қўймаслик бўйича кўрсатма берилди.

Маълумот учун, ушбу қарордан норози бўлган томон қўмитанинг Апелляция кенгашига ёки судга мурожаат қилиш ҳуқуқига эга.

Telegram I Facebook I YouTube I Instagram

Ўзбекистон фуқаролари олтин қуймаларни чекланмаган миқдорда сотиб олиши мумкин

Ўзбекистон Республикаси Вазирлар Маҳкамасининг 412-сонли қарорига кўра, эндиликда мамлакат фуқаролари олтин қуймаларни чекланмаган миқдорда харид қилиш ҳуқуқига эга бўлади.

Шунингдек, сертификати бузилмаган ҳолдаги қуйма олтинларни хорижга ҳам чекловсиз олиб чиқиш мумкин.

Мутахассислар таъкидлашича, ушбу тартиб аҳолига олтиндан жамғарма ва инвестиция воситаси сифатида фойдаланиш билан бирга, уни халқаро миқёсда ҳам эркин тасарруф этиш имкониятини тақдим этмоқда.

Telegram I Facebook I YouTube I Instagram