❗️Ўзбекистон глобал гендер тенглиги рейтингларида юқориламоқда

"Глобал гендер тафовути" индексининг 2025 йилги ҳисоботига кўра, жаҳон бўйича гендер тенглик даражаси 68,8% ни ташкил этди. Ўзбекистон ушбу индексда 148 давлат орасида 0,678 балл билан 110-ўринни эгаллади. Таълим (0,998), соғлиқни сақлаш (0,955) ва сиёсий ваколат (0,202) соҳалари юқори баҳоланган.

Марказий Осиё миқёсида Ўзбекистон сиёсий ваколат субиндекси бўйича 89-ўриндан 82-ўринга кўтарилиб, 20% дан юқори натижа қайд этган мамлакатлар қаторига кирди. Бу сиёсий соҳада ижобий ўзгаришлар кузатилаётганини кўрсатади.

Энг юқори натижаларга эга давлатлар қаторида Исландия, Финляндия, Норвегия, Буюк Британия ва Янги Зеландия Топ-5 ликни эгаллади. Бу ҳолат гендер тенглигини таъминлаш борасида етакчи мамлакатлар мавжудлигини ва глобал миқёсда сезиларли силжишлар кузатилаётганини кўрсатади.

Telegram I Facebook I YouTube I Instagram

Олмазорда 24 ёшли аёл икки фарзанди билан ўзини кўп қаватли уйдан пастга ташлади

Тошкент шаҳри Олмазор туманида фожиали ҳолат рўй берди. 2001 йилда туғилган 24 ёшли аёл оилавий низо оқибатида икки фарзанди билан ўзини пастга ташлади.

17 сентябрь куни соат 14:18 да у 1 ва 3 ёшли фарзандларини уйининг 4-қавати йўлагидан пастга ташлаб юборган. Ортидан эса 8-қаватдан ўзи ҳам сакраган.

Натижада аёл шифохонада вафот этган. Болалар эса шифокорлар саъй-ҳаракатлари билан тирик қолишган.

Бош прокуратура маълумотларига кўра, воқеага турмуш ўртоғи билан ўртасидаги рашк сабаб бўлган.

Ҳолат юзасидан Жиноят кодексининг 25 ва 97-моддалари асосида жиноят иши қўзғатилиб, тергов ҳаракатлари олиб борилмоқда.

Telegram I Facebook I YouTube I Instagram

🇺🇿 Ўзбекистондаги илк Миллий ГЭСнинг биринчи босқичи ишга тушди

Наманган вилоятининг Уйчи туманида барпо этилаётган Норин ГЭСлар каскади лойиҳаси – бу фақатгина бетон иншоотлар, тўғон ҳамда темир турбиналар эмас, балки жаҳон ичра тобора юксалиб бораётган Янги Ўзбекистоннинг ўзига хос куч-ғайрати, миллий тараққиётининг тимсоли, халқимизнинг фаровон ҳаёти учун яратилган замонавий энергетик мўъжизадир.

Роликда сиз қурилишнинг нолдан бошлаб бугунги кунгача бўлган жараёни ҳамда лойиҳанинг муҳим босқичлари билан танишишингиз мумкин.

Telegram I Facebook I YouTube I Instagram

Тошкентда йўлкира ҳақини тўламай ҳаракатланганларга нисбатан чоралар кўрилмоқда

Жорий йил бошидан бери Тошкент шаҳрида жамоат транспортидан йўлкирасиз фойдаланган 6 мингдан ортиқ йўловчига маъмурий жавобгарлик чоралари қўлланди. Бу ҳақда Транспорт вазирлиги маълумот берди.

Айтилишича, Транспорт назорати инспекцияси ҳамда шаҳар жамоат транспортини мониторинг ва назорат қилиш давлат муассасаси томонидан автобусларда йўлкира ҳақини тўламасдан юрган йўловчиларни аниқлаш бўйича махсус текширувлар олиб борилмоқда.

Натижада, йилнинг шу даврига қадар 6182 нафар фуқаро қоидабузар сифатида жаримага тортилган.

Маъмурий жавобгарлик тўғрисидаги кодекснинг 144-моддасига мувофиқ, автобус, трамвай, троллейбус ёки маршрут таксида йўлкира ҳақини тўламай юк ташиш ҳолатида ҳар бир юк жойи учун базавий ҳисоблаш миқдорининг ўндан бир қисми — 41 200 сўм миқдорида жарима қўлланиши белгиланган.

Telegram I Facebook I YouTube I Instagram

Истеъмолчиларга давлат тилида ахборот тақдим этишда камчиликлар аниқланди

Рақобат қўмитаси томонидан ўтказилган текширувлар давомида мамлакат бўйлаб 3615 та савдо ва хизмат кўрсатиш объекти ўрганилди. Натижада 2510 ҳолатда хорижий тилларда ёзилган ёзувлар ва хатоликлар қайд этилди. Улардан 1993 таси бартараф этилди, 21 та субъектга нисбатан эса иш қўзғатилди.

Шунингдек, 2964 та корхона ва ташкилотга истеъмолчилар ҳуқуқлари ҳамда реклама ва ахборот бериш қоидалари бўйича огоҳлантириш хатлари юборилди. Бозорлар, савдо марказлари, умумий овқатланиш жойлари ва дорихоналарда профилактик ишлар ўтказилиб, давлат тилида ахборот тақдим этилишини таъминлаш вазифаси белгилаб берилди.

Таҳлилларга кўра, сўнгги йилларда рўйхатдан ўтган корхоналарнинг 20 фоиздан ортиғида номларда хорижий тил ёки ўзбек тили меъёрларига тўғри келмайдиган сўзлар ишлатилган. Ҳудудлар кесимида бундай ҳолатлар қуйидагича қайд этилган:

Самарқанд вилояти – 40%

Қорақалпоғистон – 39%

Сирдарё вилояти – 31%

Андижон вилояти – 30%

Наманган вилояти – 26%

Фарғона вилояти – 24%

Хоразм вилояти – 24%

Жиззах вилояти – 15%

Мутасадди идоралар томонидан давлат тилида ахборот тақдим этилишини таъминлаш юзасидан тушунтириш ва профилактик ишлар олиб борилмоқда.

Telegram I Facebook I YouTube I Instagram

Н.Э. Бауман номидаги Москва давлат техника университети филиали ташкил этилади

“Тошкент шаҳрида Н.Э. Бауман номидаги Москва давлат техника университети филиалини ташкил этиш тўғрисида”ги президент қарори қабул қилинди.

Қарорга кўра, Тошкент шаҳрида Н.Э. Бауман номидаги Москва давлат техника университети филиали ташкил этилади.

Филиал фаолиятининг асосий йўналишлари этиб қуйидагилар белгиланди, жумладан:

🔹 муҳандислик соҳасида инновацион ёндашувларни қўллай оладиган, чуқур илмий-техник билимларга эга бўлган юқори малакали кадрларни тайёрлаш;

🔹 муҳандислик соҳасида фундаментал ва амалий илмий-тадқиқотлар ўтказиш.

Филиалда таълим фаолияти 2026/2027 ўқув йилидан бошланади.

Филиалга талабаларни ўқишга қабул қилиш давлат гранти ҳамда тўлов-контракт асосида амалга оширилади.

2025/2026 ўқув йилидан Москва давлат техника университети ва Тошкент давлат техника университети ҳамкорлигида магистратура мутахассисликлари бўйича қўшма таълим дастурлари асосида кадрлар тайёрлаш йўлга қўйилади.

Филиал битирувчиларига Ўзбекистонда олий маълумот тўғрисидаги ҳужжат сифатида тан олинадиган Университетнинг белгиланган намунадаги дипломи берилади.

Telegram I Facebook I YouTube I Instagram

Олмалиқ давлат техника институти ташкил этилади

“Олмалиқ давлат техника институтини ташкил этиш тўғрисида”ги Президент қарори (ПҚ–279-сон, 08.09.2025 й.) қабул қилинди.

Қарорга кўра, Тошкент давлат техника университети Олмалиқ филиали негизида Олмалиқ давлат техника институти ташкил этилади.

Олмалиқ филиалида таҳсил олаётган барча талабалар ўқишини Институтда давом эттиради ҳамда 2025/2026 ўқув йилидан битирувчи курс талабаларига белгиланган тартибда Институт дипломи берилади.

Институтнинг юқори курс талабалари ҳақ тўланадиган амалиётга жалб этилади.

Институтда геология, металлургия ва техникага ихтисослашган илғор муҳандислик мактаби (“ГеоМетТех”) ташкил этилади.

Ушбу мактабда таълим олиш учун академик кўрсаткичлари юқори талабалар танлов асосида саралаб олинади ва амалиётга йўналтирилган махсус таълим дастурлари асосида ўқитилади.

“ГеоМетТех” илғор муҳандислик мактаби йўналишига мос саноат ҳамкорлари белгиланиб, уларни техник ва технологик жиҳатдан таъминлаш учун замонавий лабораториялар ташкил этилади.

Telegram I Facebook I YouTube I Instagram

Камбағал оилалар тиббий хизмат ва дори-дармон билан давлат ҳисобидан таъминланади

Президент Шавкат Мирзиёев “Камбағалликдан фаровонлик сари” халқаро форумини очар экан, инсон саломатлигига эътиборсизлик унга бериладиган имкониятларни чеклаб қўйишини таъкидлади.

Шу мақсадда мамлакатда 140 минг камбағал оилага шифокор бириктирилиб, улар йилига камида бир маротаба тўлиқ тиббий кўрикдан ўтказилиши йўлга қўйилди. Давлат томонидан кафолатланган тиббий хизматлар кўлами кенгайтирилиб, аҳолининг бунга йўналтириладиган харажатлари икки баробар камайтирилади. Энг муҳими, бундай оилалар энди бепул дори-дармон ва кафолатланган тиббий хизматлар пакетини олади.

Ижтимоий ҳимоя тизими ҳам тубдан ислоҳ қилинди: аввал 6 та ташкилотга тегишли бўлган ваколатлар Ижтимоий ҳимоя миллий агентлигига бирлаштирилди. Қисқа вақт ичида ҳар бир туман ва шаҳарда “бир дарча” асосида 100 дан ортиқ хизмат кўрсатадиган “Инсон” марказлари фаолият бошлади. Шу билан бирга, маҳаллаларда ижтимоий ходимлар аҳоли билан бевосита ишлаяпти.

Аҳолининг имконияти чекланган қатламини камбағалликдан ҳимоя қилиш учун янги ёндашувлар жорий этилмоқда. Инклюзивлик асосида жамиятга қўшилиши учун шарт-шароит яратилиб, бу йилнинг ўзида 150 минг ногиронлиги бор шахс ишга жойлашди. Давлат уларни ҳаётий зарур тиббий жиҳозлар, аравача ва протезлар билан бепул таъминламоқда.

Telegram I Facebook I YouTube I Instagram

Россияда қийналган 1366 нафар ўзбекистонлик ватанига қайтарилди

Ўзбекистонда 30 июлдан 30 августга қадар хорижда қийналган фуқароларни олиб келишга қаратилган “Ватанга қайтариш” инсонпарварлик акцияси ўтказилди.

Акция доирасида Ўзбекистоннинг Россиядаги элчихонаси ва Миграция агентлиги ваколатхонаси кўмагида 1366 нафар мушкул аҳволда қолган фуқаро Ўзбекистонга қайтарилди. Шунингдек, моддий қийинчиликка дуч келган 323 нафар фуқарога молиявий ёрдам кўрсатилди.

Тадбир давлат раҳбариятининг ҳар бир ватандош тақдирига бўлган эътибори ва ғамхўрлигидан далолат беради.

Telegram I Facebook I YouTube I Instagram

Сирдарёда исм ёзилган рақам билан ҳаракатланган ҳайдовчи жаримага тортилди

Сирдарё вилоятида ЗИЛ-53 юк машинаси ҳайдовчиси давлат рақам белгиси ўрнига “20 FARRUX” ёзувини тақиб ҳаракатланди.

Вилоят ИИБ ЙҲХБ маълумотига кўра, қоидабузарлик акс этган видео ижтимоий тармоқларда тарқалгандан сўнг ҳолат ўрганилган. Ҳайдовчи аниқланиб, у иши қонунбузарлик эканини билишини айтган ва кечирим сўраган.

Ҳолат юзасидан йўл-патрул хизмати инспекторлари томонидан маъмурий баённома расмийлаштирилди. Транспорт воситаси эса вақтинчалик сақлаш учун жарима майдонига жойлаштирилди.

Telegram I Facebook I YouTube I Instagram

НОТАНИШ КИШИЛАРГА БАНКОМАТДАН ПУЛ ЕЧИШГА ЁРДАМ БЕРМАНГ

Ўзбекистонда сўнгги вақтларда бегона кишига банкоматдан пул ечишда ёрдам берган фуқароларнинг ўзи жавобгарликка тортилиш ҳолатлари қайд этилмоқда.

Фирибгарларнинг усули оддий: улар одамларни банкомат ёнида тўхтатиб, “яқиним картангизга пул ташлайди, илтимос, уни ечиб беринг” деб мурожаат қилади. Пул карта ҳисобингизга тушади, сиз эса уни банкоматдан нақд қилиб берасиз.

Аммо бу пул аслида ноқонуний йўл билан топилган бўлиши мумкин. Натижада:

Сизнинг картангиз рақами банкомат тизимида қайд этилади;

Камераларда юзингиз тасвири ёзиб олинади;

Масъулият фирибгар эмас, айнан пулни ечиб берган одам — сизнинг зиммангизга юкланади.

Шу боис, бегона кишининг картасидан келган пулни нақдлаштиришга асло рози бўлманг.

Шу каби фирибгарлик ҳолатлари Тошкент, Андижон ва Самарқанд шаҳарларида кузатилгани маълум қилинди.

Telegram I Facebook I YouTube I Instagram

Ёш оилаларга уй ижараси учун компенсация ажратилади

Ижтимоий ҳимояга муҳтож ёш оилаларга тураржой ижара харажатларини қоплаш мақсадида давлат томонидан компенсация тўлаб берилади.

Telegram I Facebook I YouTube I Instagram

Россия меҳнат мигрантлари учун “кел, ишла ва кет” тизимини жорий қилмоқчи

Россия хориждан ишчи кучини жалб қилиш сиёсатида янги йўналишни қўлламоқда. Иқтисодий ривожланиш вазири Максим Решетников маълум қилишича, эндиликда “қайтиш миграцияси” моделига ўтилиши кўзда тутилган.

Унинг сўзларига кўра, меҳнат бозорида ишчи кучига эҳтиёж борлиги учун хорижликларни чақиришга тўғри келади. Аммо асосий тамойил шундай бўлади: мигрантлар келиб ишлайди, маош олади ва ўз юртига қайтади.

“Бу тизимда бизга оилалар керак эмас. Мактабларда болаларга дарс бериш каби мажбуриятлар юзага чиқмайди. Яъни миграция узоқ муддатли эмас, балки вақтинчалик жараён сифатида ташкил қилинади”,

— деди вазир.

Шу билан бирга, Решетниковнинг таъкидлашича, Россиянинг асосий вазифаси — маҳаллий аҳолининг меҳнат унумдорлигини ошириш. Бу мақсадда иқтисодиёт имкониятларига мос махсус лойиҳа ишлаб чиқилган.

Telegram I Facebook I YouTube I Instagram

Ҳудудларнинг инвестициявий жозибадорлиги рейтинги жорий этилади

Ҳукумат қарори билан “Рейтинг кўрсаткичлари асосида “Ҳудудларнинг инвестициявий жозибадорлиги рейтинги”ни баҳолаш” регламенти тасдиқланди.

Регламент рейтинг кўрсаткичлари асосида ҳудудларнинг инвестициявий жозибадорлиги рейтингини баҳолаш тартибини белгилайди.

Рейтинг 2 йўналишда баҳоланади:

🔹 инвестиция салоҳияти. Мазкур йўналишда статистик кўрсаткич ва субкўрсаткичлардан иборат бўлган устувор омиллар ва уларнинг вазнлари асосида ҳудудлар инвестиция салоҳияти баҳоланади;

🔹 бошқарув самарадорлиги. Мазкур йўналишда ҳудудларда тадбиркорларнинг сўров натижалари орқали кўрсаткич ва субкўрсаткичлар асосида бошқарув самарадорлиги баҳоланади.

Инвестициялар, саноат ва савдо вазирлиги рейтингни баҳолаш оператори бўлиб, куйидаги вазифаларни бажариш учун масъул ҳисобланади:

🔸 баҳолаш жараёнини умумий мувофиқлаштириш;

🔸 электрон платформани бошқариш;

🔸 натижаларни тақдим этиш.

Рейтинг баллари 4 та босқичда электрон платформа орқали ҳисобланади.

Баҳолаш оператори рейтинг баҳолаш натижалари бўйича таҳлилий маълумотнома тайёрлайди.

Telegram I Facebook I YouTube I Instagram

Автомобил бензини учун ойлик компенсация тўланадиган тоифалар маълум қилинди

Қонунчиликка мувофиқ, қуйидаги шахсларга автомобил бензини сотиб олиш бўйича ойлик пул компенсацияси тўланади:

🔹 уруш қатнашчилари ва уларга тенглаштирилган шахслар;
🔹 уруш фахрийлари ва уларга тенглаштирилган шахслар;
🔹 меҳнатда майиб бўлган ҳамда касб касаллиги туфайли I ва II гуруҳ ногиронлар;
🔹 I ва II гуруҳ болаликдан ногиронлар.

Компенсация миқдори ҳар чоракда Идоралараро тариф комиссияси томонидан белгиланиб, чакана савдода энг кўп тарқалган бензин маркасининг ўртача нархидан келиб чиқиб, 20 литр бензин қийматига тенг миқдорда тўланади.

Telegram I Facebook I YouTube I Instagram

Ўзбекистонда 2026–2030 йиллар «Долзарб озиқ-овқат хавфсизлиги даври» деб эълон қилинди

Вазирлар Маҳкамаси қарорига кўра, 2026–2030 йиллар Ўзбекистонда «Долзарб озиқ-овқат хавфсизлиги даври» деб белгиланди.

Ушбу даврда аҳолига етарли ва сифатли озиқ-овқат маҳсулотларини етказиб бериш, ортиқча исрофнинг олдини олиш, тўғри овқатланиш тарғиботини кучайтириш ва озиқ-овқат чиқиндиларини қайта ишлаш чоралари амалга оширилади.

Шунингдек, тўйлар, оилавий тантаналар, маърака ва маросимлар белгиланган тартибда ўтказилиши қатъий назоратга олинади.

Қарор билан «Оқилона истеъмол» (Save Food) дастури тасдиқланди. Унга кўра, умумий овқатланиш корхоналари чиқиндиларни камайтириш, канализация тизимига уланиш, ҳавони ифлослантирувчи моддаларни тозалаш қурилмаларини ўрнатиш ва озиқ-овқат чиқиндиларини компостлаш каби талабларга амал қилади.

Шунингдек, қишлоқ хўжалиги маҳсулотларининг йўқотилишини камайтириш мақсадида йиғиш, саралаш, ташиш ва сақлаш жараёнлари мониторинг қилинади. Дўконларда муддати яқинлашган маҳсулотларга чегирма тизими кенгроқ жорий этилади.

Эслатиб ўтамиз, тўй ва маърака тартибини белгилайдиган регламент 2019 йилда тасдиқланган, унга кўра иштирокчилар сонига чеклов ўрнатилган ва қоидаларни бузганлик учун жарималар белгиланган эди. 2025 йил баҳорида мазкур тартиб янгиланиши кутилган, аммо ҳужжат ҳали эълон қилинмаган.

Telegram I Facebook I YouTube I Instagram