Ўзбекистон ва БАА ўртасидаги инвестицияларни ҳимоя қилиш тўғрисидаги битим тасдиқланди

Президентнинг “Халқаро шартномани тасдиқлаш тўғрисида”ги қарори (ПҚ–283-сон, 15.09.2025 й.) қабул қилинди.

Қарорга мувофиқ, Ўзбекистон Ҳукумати билан Бирлашган Араб Амирликлари Ҳукумати ўртасида имзоланган Инвестицияларни ўзаро рағбатлантириш ва ҳимоя қилиш тўғрисидаги битим тасдиқланди.

Мазкур битим 2025 йил 15 январь куни Абу-Даби шаҳрида имзоланган.

🔹 Инвестициялар, саноат ва савдо вазирлиги халқаро шартномани амалга ошириш учун масъул орган этиб белгиланди.
🔹 Вазирлар Маҳкамаси ҳамда тегишли вазирлик ва идоралар раҳбарлари шартнома кучга киргандан кейин унинг қоидаларини бажарилишини таъминлайди.

Telegram I Facebook I YouTube I Instagram

Навоий вилоятида ер қимирлади

Ўзбекистонда соат 9:14 да ер силкинди.

Эпицентри Навоий вилоятининг Қонимех туманида бўлиб, сездириш кучи 4 баллни ташкил этди.
🔹 Ғиждувон туманида — 3 балл,
🔹 Қонимех туманида — 2 балл,
🔹 Навбаҳор туманида — 2 балл сезилди.

Telegram I Facebook I YouTube I Instagram

"Soliq" мобил иловасида фойдаланувчилар электр энергияси истеъмолини кузатишлари мумкин

📲 Солиқ 2.0.18 мобил иловасининг янгиланган версиясида “Mening uyim” бўлимидаги “Электр энергияси” хизмати такомиллаштирилди.

Бу ҳақда Солиқ қўмитаси ахборот хизмати хабар берди.

📊 Янги “Истеъмол тарихи” функцияси орқали электр энергиясининг кундалик ва ойлик истеъмолини реал вақт режимида кўриш мумкин.

Эндиликда электр энергияси учун тўловдан ташқари, энергия сарфини онлайн кузатиш имконияти ҳам мавжуд.

Келгусида шунга ўхшаш функциялар бошқа коммунал хизматлар учун ҳам қўшилади, дейилади хабарда.

Telegram I Facebook I YouTube I Instagram

Humo бошқарувида навбатдаги алмашинув: янги раҳбар тайинланди

Миллий банклараро процессинг маркази — Humo раҳбариятида яна ўзгариш юз берди. Ярим йил ичида учинчи марта алмашинув қайд этилди ва бу сафар бошқарув раиси лавозимига Улуғбек Хожитўраевич Баҳодиров тасдиқланди. Корпоратив ахборот порталида берилган маълумотга кўра, ягона акциядорнинг 12 сентябрдаги қарори ҳамда кузатув кенгашининг 15 сентябр санасидаги протоколига асосан у расман лавозимга киришди.

Ярим йиллик даврда Humo раҳбариятида қуйидаги тартибда ўзгаришлар бўлди:

7 мартдан 20 майгача — Алексей Максимов вақтинчалик раҳбарлик қилди;

20 майдан 16 сентябргача — Мақсаджон Муҳитдинов бошқарув раиси вазифасини бажарди;

16 сентябрдан эса — Улуғбек Баҳодиров раҳбар сифатида иш бошлади.


Маълумот учун: Улуғбек Баҳодиров 1975 йил январь ойида туғилган. 1997 йилда Тошкент молия институтининг “Халқаро валюта-кредит муносабатлари” йўналиши бўйича таълим олган. У авваллари “Пойтахт банки” кузатув кенгаши аъзоси ва “Ўзбекенгилсаноат” уюшмасига қарашли “Orange Textile Profi” корхонасида молия бўйича директор ўринбосари сифатида фаолият юритган.

Humo раҳбариятида қисқа муддат ичида учинчи марта алмашинув юз бериши — тизимдаги барқарорлик масаласига эътибор қаратиш зарурлигини кўрсатмоқда. Банклараро тўлов тизими мамлакат молиявий инфратузилмасининг муҳим қисми ҳисобланади ва унинг самарали ишлаши раҳбариятда узлуксизлик ҳамда изчил стратегия талаб қилади. Улуғбек Баҳодировнинг молия соҳасидаги тажрибаси ва банк тизимидаги иштироки унинг олдида турган вазифаларни амалга оширишда муҳим омил бўлиши мумкин.

Telegram I Facebook I YouTube I Instagram

Эндиликда «Грин карта» лотереясида рўйхатдан ўтиш 1 доллардан бошланади

АҚШ ҳукумати «грин карта» лотереясини ўйнаш учун рўйхатдан ўтишни пулли қилишни режалаштирмоқда. АҚШ Давлат департаменти маълумотига кўра, энди лотереяда иштирок этмоқчи бўлганлар рўйхатдан ўтишда 1 доллар тўлашлари шарт бўлади. Янги тартиб жорий мавсумдан кучга киради.

Telegram I Facebook I YouTube I Instagram

Наманганда “Камбағалликдан фаровонлик сари” халқаро форуми бошланди


Президент Шавкат Мирзиёев Наманган шаҳрида 30 дан ортиқ нуфузли ташкилот ва 200 га яқин халқаро экспертлар иштирокида ўтказилаётган “Камбағалликдан фаровонлик сари” халқаро форумининг очилишида нутқ сўзлади.

Давлатимиз раҳбари анжуман иштирокчиларини самимий қутлар экан, Ислом тараққиёт банки президенти Муҳаммад Ал-Жассир, Осиё тараққиёт банки вице-президенти Инмин Янг, Япония халқаро ҳамкорлик агентлиги бош вице-президенти Сачико Имото, БМТнинг Марказий Осиё бўйича махсус вакили Каха Имнадзе, Жаҳон банкининг камбағалликни қисқартириш бўйича глобал директори Луис Фелипе Лопез-Кальва ва бошқа меҳмонларга миннатдорлик билдирди.

Президент Мирзиёев инсоният ҳозир ўта кескин ва мураккаб даврни бошидан кечираётганини таъкидлади. Дунёда геосиёсий, иқтисодий ва ижтимоий беқарорлик кучайиб бормоқда. Шунингдек, иқлим ўзгаришлари, сув танқислиги ва пандемиялар оғир синовларни келтириб чиқараётгани қайд этилди.

2015 йилдан буён глобал иқтисодий ўсиш суръати ўртача 3 фоизни ташкил этиб, олдинги ўн йилликка нисбатан секинлашди. Натижада, агар беш йил олдин дунёда 650 миллион киши камбағалликда яшаган бўлса, бугун улар сони 800 миллиондан ошган.

“Бу ҳолат барча давлатлар ва халқаро ташкилотлардан янги ва долзарб вазифаларга ечим топиш йўлида тезкор қарорлар қабул қилишни талаб этмоқда”, — деди Президент Шавкат Мирзиёев.

Telegram I Facebook I YouTube I Instagram

3,5 миллион аҳоли яшайдиган 1 мингта маҳаллада инфратузилма яхшиланмоқда

Ҳудудларда инфратузилмани яхшилаш ва одамларга қулай шарт-шароит яратиш кўп ўлчовли камбағалликни қисқартиришда муҳим аҳамият касб этмоқда.

Айни пайтда қарийб 3,5 миллион аҳоли яшайдиган шароити оғир 1 мингта маҳаллада инфратузилма янгиланмоқда. Жорий йилнинг ўзида 470 минг хонадон томорқасига сув етказилди, 790 минг хонадонда электр таъминоти яхшиланди.

Келгуси йилда маҳаллаларда инфратузилмани ривожлантириш, иш ўринларини кўпайтириш ва тадбиркорликни қўллаб-қувватлаш учун яна 400 миллион доллар ажратилиши белгиланган. Шунингдек, 32 та туман ва 328 та оғир аҳволдаги маҳаллада алоҳида ривожлантириш дастури амалга оширилади.

810 та маҳаллада сув, канализация, йўл, мактаб ва боғча қуриш бўйича 1,3 миллиард долларлик лойиҳалар бошланади. Уй-жойга муҳтож ва даромади паст аҳоли учун ипотека тизими орқали ҳар йили 200 миллион доллар субсидия йўналтирилади.

Президентимиз халқаро молия институтларини ривожланаётган мамлакатларда инфратузилма лойиҳаларини молиялаштиришда камбағалликни қисқартириш талабини киритишга чақирди.

Telegram I Facebook I YouTube I Instagram

Ҳудудларда аҳолига электрон хизматлар кўрсатиш сифати оширилади

“Республиканинг ҳудуд, соҳа ва тармоқларида рақамли технологиялар жорий этилишини янада жадаллаштириш чора-тадбирлари тўғрисида”ги Президент қарори (ПҚ–286-сон, 16.09.2025 й.) қабул қилинди.

🔰 Қарорга кўра, “Рақамли ҳукумат” дастури доирасида 41 та устувор лойиҳани ишга тушириш, электрон давлат хизматлари улушини 70 фоизга етказиш тизимни 2025–2026 йилларда ривожлантиришнинг устувор йўналишларидан бири этиб белгиланди.

💰 2025 йил 1 ноябрдан мобил алоқа операторлари, тижорат банклари, тўлов ташкилотларига мобил иловалар орқали ЯИДХП (Ягона портал)даги пулли электрон давлат хизматларини кўрсатиш имконияти яратилади.

✅ 2025 йил 1 декабрдан нодавлат нотижорат ташкилотларига “Рақамли ҳукумат” тизимининг Идоралараро интеграциялашув платформаси орқали белгиланган тартибда электрон идоралараро ҳамкорликни амалга оширишга рухсат берилади.

🔗 2026 йил 1 январдан фуқароларнинг ижтимоий ёрдам кўрсатиш бўйича мурожаати, маҳаллалардаги оилалар ва аҳоли маълумотларини юритиш ҳамда маҳаллаларда аҳоли билан ишлаш жараёнлари “Рақамли маҳалла” платформаси орқали амалга оширилади.

Telegram I Facebook I YouTube I Instagram

Тошкентда жамоат транспортида навбатдаги шармандали ҳолат қайд этилди. 11-автобус ичида катта ёшли эркак талаба қизларга қўли билан тегишга уринган. Ушбу воқеа акс этган видео ижтимоий тармоқларда тарқалиб, жамоатчилик ғазабига сабаб бўлди.

Афсуски, бундай ҳолатлар айрим йўловчиларнинг бепарволиги ёки сукут сақлаши туфайли давом этмоқда. Бу эса наfaқат одобсизлик, балки жиноий қилмиш ҳисобланади.

Муассассади идоралар бу каби шахсларни аниқлаб, уларга нисбатан қатъий чоралар кўриши шарт. Йўловчилар эса ҳушёр бўлиб, шубҳали вазиятларни дарҳол ҳуқуқ-тартибот органларига хабар қилишлари зарур

Telegram I Facebook I YouTube I Instagram

Талабалар ижара тўловининг бир қисмини қайтариш бўйича my.gov.uz орқали мурожаат қилишлари мумкин бўлади

Қарорга кўра, 2026 йил 1 майдан ногиронликни белгилаш бўйича давлат хизматини кўрсатишда фуқароларга тиббиёт муассасаларига имтиёзли даволаниш учун бериладиган йўлланмани шакллантириш ва электрон навбатга қўйиш композит шаклда амалга оширилади.

Шунингдек, 2026 йил якунигача тиббий кўрик жараёнида шифокор нутқини автоматик баёнлаштирувчи овозли ёрдамчи ҳамда беморларга ташхис қўйишда кўмаклашувчи сунъий интеллектга асосланган “Шифокорнинг рақамли ёрдамчиси” дастури ишга туширилади.

2025 йил 1 ноябрдан давлат олий таълим муассасалари талабаларига ойлик ижара тўловининг бир қисмини қайтариш бўйича Ягона портал орқали мурожаат қилиш имконияти яратилади.

2026 йил 1 январдан ўрта махсус, касбий ва олий таълим ташкилотларида таълим жараёни билан боғлиқ давлат хизматлари Ягона портал орқали кўрсатилади.

2025 йил 1 ноябрдан транспортга газ балони ўрнатилганлигига оид маълумотларни электрон шаклда юритиш орқали транспорт воситасини рўйхатдан ўтказиш гувоҳномасини қайта расмийлаштириш тартиби бекор қилинади.

Telegram I Facebook I YouTube I Instagram

Владивостокда ўзбекистонлик мигрантлар калтакланди

Владивосток шаҳрида бир гуруҳ ўсмирлар спиртли ичимлик таъсирида дўкон олдида одамларга ҳужум қилган. Улар орасида ўзбекистонлик мигрантлар ҳам жабрланган.

Россия Тергов қўмитаси ҳодиса юзасидан жиноят иши қўзғатган. Гумонланувчилардан бири қўлга олинган, яна иккита шахс қидирувда. Уларнинг аввал ҳам безорилик қилгани аниқланган.

Ўзбекистоннинг Владивостокдаги Бош консулхонаси жабрланувчиларга ҳуқуқий ёрдам кўрсатиб, Россия томонига расмий нота юборган.

Telegram I Facebook I YouTube I Instagram

Сурхондарёда ҳакамлик судининг кадрлар бўлими бошлиғига нисбатан жиноят иши қўзғатилди

Сурхондарё вилояти Медиация ва юридик маслаҳатлар ҳузуридаги ҳакамлик судининг кадрлар бўлими бошлиғи хизмат мавқеидан фойдаланган ҳолда, Термиз шаҳрида истиқомат қилувчи фуқарони юқори лавозимда ишловчи танишлари орқали вилоят Божхона бошқармасига назоратчи вазифасига ишга жойлаштириб қўйиш эвазига 1000 АҚШ доллари талаб қилади.

Давлат хавфсизлик хизматининг Сурхондарё вилояти бўйича бошқармаси ҳамда Термиз шаҳар прокуратураси ҳамкорлигида ўтказилган тезкор тадбирда ушбу шахс сўралган пул маблағини олган вақтида ашёвий далиллар билан ушланди.

⚖️Ҳозирда унга нисбатан Жиноят кодексининг 168-моддаси 3-қисми “в” банди ва 28,211-моддаси 1-қисми билан жиноят иши қўзғатилиб, “қамоқ” эҳтиёт чораси қўлланилди. Тергов ҳаракатлари олиб борилмоқда.

Telegram I Facebook I YouTube I Instagram

"Ўзбекистонда респиратор инфекцияларнинг кириб келиши хавфи сақланмоқда" — Санэпидқўмита

Россия ҳамда қўшни давлатларда ўткир респиратор инфекциялар (ЎРИ) авж олгани сабабли авиақатновлар, хизмат сафари ва меҳнат мигрантлари орқали ушбу касаллик Ўзбекистонга тарқалиш эҳтимоли бор. Бу ҳақда Санитария-эпидемиология қўмитаси маълум қилди.

Маълумотларга кўра, мамлакатда эпидемиологик вазият доимий назоратда турибди. Грипп ва ЎРИ турларини аниқлаш учун вирусологик текширувлар ўтказилмоқда.

Санэпидқўмита тасарруфидаги 15 та лабораторияда грипп ва унга ўхшаш касалликлар ташхиси йўлга қўйилган. Ҳозирча ЎРИ билан касалланиш кўрсаткичи кўп йиллик статистик кўрсаткичдан 36,5 фоизга камлиги кузатилган.

Шу билан бирга, таҳлиллардан маълум бўлишича, инфекцияга энг кўп чалинувчи гуруҳ — 0–1 ёшли болалардир. Айни пайтда республикада грипп ва ЎРИ бўйича вазият барқарор бўлиб, санитария органлари уни қатъий назоратга олган.

Telegram I Facebook I YouTube I Instagram

Скутер ва мопед ҳайдовчилари «A» тоифали ҳайдовчилик гувоҳномасига эга бўлиши шарт.

Энди кичик моторли транспорт воситаларини гувоҳномасиз бошқариш мумкин эмас.

Бу тартиб йўл ҳаракати хавфсизлигини таъминлаш ва бахтсиз ҳодисаларни камайтириш мақсадида жорий этилмоқда.

Гувоҳномасиз ҳайдовчилар:
— жаримага тортилади;
— транспорт воситаси жарима майдонига олиб қўйилиши мумкин.

Ҳуқуқни муҳофаза қилувчи органлар барчани қонунчиликка риоя қилишга чақирмоқда.

Telegram I Facebook I YouTube I Instagram

Афғонистондан олиб келинган катта миқдордаги наркотик моддалар тўхтатиб қолинди

1️⃣Гиёҳвандлик воситалари, уларнинг аналоглари ҳамда психотроп моддалар контрабандаси ва ноқонуний айланмасига қарши курашиш йўналишида Давлат хавфсизлик хизмати ходимлари томонидан Фарғона вилоятида тезкор тадбир ўтказилди.

Хусусан, муқаддам наркокуръерлар томонидан Афғонистон Республикасидан контрабанда йўли билан Сурхондарё вилояти ҳудудига олиб ўтилган ва Ёзёвон туманига келтирилиб, дала майдонидаги хуфия жойга яшириб кўйилган 9 кг 896 гр “гашиш” моддасини қабул қилиб олган вақтларида Марғилон шаҳрида яшовчи, 1983 й.т. хусусий тадбиркор ва унинг 1989 й.т. жиноий шериги ашёвий далиллар билан ушланди.

Шунингдек, воқеа жойидан қочишга уринган хусусий тадбиркорнинг ёнида бўлган 14 минг 500 АҚШ доллари ва 6 млн. 250 минг сўм ҳам процессуал тартибда расмийлаштириб олинди.

Терговга қадар текширув давомида, ушбу ноқонуний ишга алоқадор бўлган учинчи шахснинг яшаш хонадонидан эса 110 гр. “опий” моддаси, 2 та электрон тарози, 1200 АҚШ доллари ҳамда 28 млн. сўм процессуал тартибда расмийлаштириб олинди.

Таъкидлаш лозимки, ушбу ажал оғуси Фарғона водийсидаги истеъмолчиларга сотилиши керак бўлган.
2️⃣Афғонистон йўналишида наркотик моддалар контрабандасига қарши курашиш доирасида Давлат хавфсизлик хизмати органлари ходимлари томонидан яна бир тезкор тадбир ўтказилди.

Жумладан, Қорақалпоғистон Республикаси Тўрткўл туманида яшовчи, 1963 й.т., муқаддам наркотик моддалар савдоси билан боғлиқ жинояти учун судланган шахс Хоразм вилояти Хазорасп туманида истиқомат қилувчи, 1978 й.т. фуқаро билан ўзаро тил бириктириб, келгусида сотиб, мўмай даромад топиш мақсадида афғонистонлик наркосавдогарларга катта миқдордаги гиёҳвандлик воситасини буюртма беришади.

Ўз навбатида наркокуръерлар томонидан ажал оғуси Афғонистондан Сурхондарё вилояти ҳудудига олиб ўтилиб, кейинроқ Тўрткўл туманидаги хуфия жойга қолдириб кетилади.

Ўтказилган тезкор тадбирда Тўрткўл ва Хазорасплик мазкур шахслар хуфия жойдан 6 кг 149 гр “опий” моддасини ва 9 кг 814 гр кўкнори сомонини олган вақтларида ашёвий далиллар билан ушланди.

⚖️Ҳозирда уларга нисбатан Жиноят кодексининг 28,246-моддаси 2-қисми ва 273-моддаси 5-қисми билан жиноят иши қўзғатилиб, “қамоқ” эҳтиёт чораси қўлланди.

Ҳозирда мазкур шахсларнинг барчасига нисбатан Жиноят кодексининг 246 ва 273-моддалари билан жиноят ишлари қўзғатилиб, “қамоқ” эҳтиёт чораси қўлланди.

Тергов ҳаракатлари доирасида уларнинг жиноий алоқаларини аниқлаш бўйича зарур чора-тадбирлар кўрилмоқда.

Telegram I Facebook I YouTube I Instagram