Непаллик намойишчилар томонидан илгари сурилган номзод мамлакатнинг вақтинча бош вазири этиб тайинланди — ОАВ

Непал президенти Рам Чандра Паудел мамлакат Олий судининг собиқ раиси Сушила Каркини муваққат ҳукумат раҳбари этиб тайинлади. Хабар қилинишича, Паудел намойишчиларнинг босимига таслим бўлган. Президент шунингдек, вакиллар палатасини (Непал парламентининг қуйи палатаси) тарқатишга ва фавқулодда ҳолат эълон қилишга ҳам рози бўлди.

Аввалроқ норозилик намойиши иштирокчилари Каркини бош вазирлик лавозимига асосий номзод сифатида танлагани эълон қилинган эди. У Непалда коррупцияга қарши фаол курашувчи сифатида танилган. 73 ёшли Карки 2026 йилда бўлиб ўтадиган кейинги парламент сайловларигача Непал ҳукуматини бошқаради.

Непалда 8 ва 9 сентябр кунлари коррупцияга ва ҳукуматнинг ижтимоий тармоқларни блоклаш қарорига қарши норозилик намойишлари бўлиб ўтди. “Z авлод” намойишлари номини олган норозиликлар тартибсизликлар ва полиция билан тўқнашувларга айланди. Буни оқибатида 51 киши ҳалок бўлди, 1300 дан ортиқ киши турли жароҳатлар олди. Норозилик акциялари натижасида ҳукумат ижтимоий тармоқларни блоклашни бекор қилди, бош вазир Шарма Оли эса истеъфо чиқди.

Telegram I Facebook I YouTube I Instagram

"Толибон" яна Ўзбекистон ва Тожикистондан ҳарбий техника қайтарилишини талаб қилди

"Толибон" ҳукумати ташқи ишлар вазири Амир Хон Муттақий яна бир бор Ўзбекистон ва Тожикистонга мурожаат қилиб, Қобулнинг қулаши пайтида афғон ҳарбийлари мамлакатдан олиб қочган ҳарбий авиатехника қайтарилишини сўради. Бу гал у айни дамдаги зилзила оқибатидаги гуманитар эҳтиёжлар, хусусан, вертолётлар зарурлиги билан асослади.

Аввалроқ Афғонистон ОАВ Ўзбекистон 57 та ҳарбий вертолётни қайтаришга рози бўлгани ҳақида хабар берганди. Бироқ Ўзбекистон ТИВ бу маълумотни рад этиб, республика позицияси ўзгармаганини таъкидлаган эди.

Telegram I Facebook I YouTube I Instagram

Ёш тадбиркорларга 130 млн сўмгача фоизсиз ссуда ажратилади

“Ёшлар тадбиркорлигини ривожлантириш жамғармаси” томонидан “Кўмак” лойиҳаси йўлга қўйилди.

Ёшлар ишлари агентлиги ахборот хизматига кўра, лойиҳа хорижий тиллар бўйича C1 даражадаги миллий ёки унга тенг халқаро сертификатга эга ёшлар учун мўлжалланган. Айниқса, чекка ҳудудларда чет тилларга ихтисослашган ўқув марказлари очиш ниятидаги тадбиркорларга қўллаб-қувватлаш кўрсатилади.

Ушбу имтиёз асосида ёшларга 130 млн сўмгача фоизсиз ссуда берилади. Қарз 3 йилга, шу жумладан 6 ойлик имтиёзли давр билан ажратилади.

Ариза топшириш учун сўровнома тўлдириш талаб этилади.

Telegram I Facebook I YouTube I Instagram

Иситиш мавсумида эҳтиёжманд оилаларга 1 млн сўмдан моддий ёрдам берилади

2025/2026 йилги иситиш мавсуми учун жорий йил ноябр ойида эҳтиёжманд оилаларга бир марталик 1 миллион сўм моддий ёрдам тўлаб берилади.

Моддий ёрдам қуйидаги тоифадаги оилаларга берилади:
✅ “Ижтимоий ҳимоя ягона реестри” орқали болалар нафақаси ва моддий ёрдам олувчи оилалар
✅ “Камбагал оилалар реестри”га киритилган оилалар
✅ “Маҳалла еттилиги” хулосаси асосида реестрга киритилмаган, аммо камбағалликка тушиш хавфи бўлган эҳтиёжманд оилалар.

🖋 Қўшимча рўйхатга киритиладиган оилалар:
✅ Боқувчисини йўқотган оилалар
✅ Аъзолари I ёки II гуруҳ ногирони бўлган оилалар
✅ Ногиронлиги бўлган болани парваришлаётган оилалар
✅ Узоқ муддатли даволанишни талаб қиладиган касалликка чалинганлар бор оилалар
✅ Ёлғиз яшовчи, парваришга муҳтож шахслар
✅ Газ таъминоти йўқ ва марказлашган иситиш тизими мавжуд бўлмаган кўп қаватли уйларда яшовчи оилалар
✅ Бир хонадонда 3 ва ундан ортиқ оила биргаликда яшовчи оилалар.

📍 Агар сиз ушбу тоифага мос келсангиз, жорий йил 25 сентябрга қадар “Маҳалла еттилиги”га мурожаат қилинг.

Telegram I Facebook I YouTube I Instagram

Қирғизистон Ўзбекистон ва Қозоғистонга сувни пулли асосда беришни режалаштирмоқда

💧 Қирғизистонда янги таҳрирдаги Сув кодекси ишлаб чиқилмоқда. Унга кўра, сув ресурслари ҳам газ, нефт ва олтин каби табиий бойлик сифатида баҳоланиши таклиф қилинган.

📌 Лойиҳага кўра, дарё сувларини қўшни мамлакатларга — жумладан, Ўзбекистон ва Қозоғистонга пулли асосда бериш режалаштирилмоқда.

Telegram I Facebook I YouTube I Instagram

Бухорода янги туризм лойиҳаси

Бухоро туризм бошқармаси ташаббуси билан янги лойиҳа амалга оширилди.

🔹 7000 дан ортиқ керамик идишлар ташқи кўриниш учун ўрнатилди.

🔹 ички дизайнда эса маҳаллий кулоллар ясаган, тарихий обидалар тасвирланган 3000 дан ортиқ сопол лаганлар ишлатилган.

Telegram I Facebook I YouTube I Instagram

❗️Шаҳрисабзда қоидабузар ҳайдовчига кескин чора кўрилди

Куни кеча ижтимоий тармоқларда тарқалган видеода пиёдалар ўтиш жойидан ўтаётган мактаб ўқувчисини катта тезликда келган “Дамас” уриб кетишига сал қолди.

ИИБ маълумотига кўра, ҳайдовчи — 68 ёшли эркак. У бир кун давомида ҳуқуқни муҳофаза қилувчи органлардан яшириниб юрган.

Натижада, 1 йилга транспорт бошқариш ҳуқуқидан маҳрум қилинди. 25 БҲМ (10 млн 300 минг сўм) миқдорида жаримага тортилди

Telegram I Facebook I YouTube I Instagram

Иммунитет пасайганда болаларни асраш учун ССВдан 6 тавсия

Ҳаво совиши билан иммунитет сустлашиб, айниқса болаларда шамоллаш ва вирусли касалликлар хавфи ортади. Соғлиқни сақлаш вазирлиги ота-оналарга фарзандлари соғлиғини муҳофаза қилиш учун амалий тавсиялар берди.

ССВ тавсиялари қуйидагилардан иборат:

🔹 Қўл гигиенаси. Болалар кўпчилик орасида бўлгани учун қўлларни мунтазам совун билан ювиш, беморлар билан яқин алоқада бўлмаслик муҳим.

🔹 Шамоллаш белгиларида уйда қолдириш. Бу нафақат боланинг соғлиғини тиклашга, балки касаллик тарқалишининг олдини олишга ёрдам беради.

🔹 Фаслга мос кийим. Болалар на жуда енгил, на жуда қалин кийинмаслиги керак. Нам кийимлар эса дарҳол алмаштирилиши шарт.

🔹 Соғлом овқатланиш. Рационда мевалар, сабзавотлар, кўкатлар, сут ва балиқ маҳсулотлари, товуқ гўшти ва дуккакли егуликлар бўлиши керак. Газли ичимликлар, чипс ва ширинликлардан воз кечиш зарур.

🔹 Уйқу режаси. Мактаб ёшидаги болалар ҳар куни 8–10 соат ухлаши шарт. Ухлашдан олдин телефон ва планшетдан фойдаланмаслик тавсия этилади.

🔹 Шахсий гигиена. Юз-қўлларни ювиш, тишларни кунда икки марта тозалаш, кийимларни мунтазам алмаштириш соғлом ўсиш учун асосий шарт ҳисобланади.

Соғлиқни сақлаш вазирлиги ота-оналарни фарзандларига эътиборли бўлишга, уларнинг иммунитетини кучайтириш учун соғлом турмуш тарзини қўллаб-қувватлашга чақиради.

Telegram I Facebook I YouTube I Instagram