Ўзбекистон Доҳадаги ҳаво ҳужумини қоралади

Ўзбекистон Республикаси Ташқи ишлар вазирлиги Исроилнинг Қатар пойтахти Доҳадаги турар-жой ҳудудига уюштирган ҳужумларини кескин қоралади.

Баёнотда таъкидланишича, мазкур ҳаракат Қатар давлати суверенитетини бузиш, чегаралар дахлсизлиги ва хавфсизлигига тажовуз сифатида баҳоланади.

ТИВга кўра, бундай хатти-ҳаракатлар мутлақо номақбул бўлиб, БМТ Низоми ҳамда халқаро ҳуқуқнинг асосий меъёр ва тамойилларини жиддий равишда менсимаслик ҳисобланади.

Ўзбекистон халқаро муносабатларда куч ишлатишнинг ҳар қандай кўринишига ва Яқин Шарқда вазиятни янада кескинлаштириши мумкин бўлган қадамларга изчил равишда қарши эканини билдирди.

Telegram I Facebook I YouTube I Instagram

Ўзбекистондан Хитойга илк контейнер поезди жўнатилди

9 сентябрь куни Тошкентдан Ланчжоуга «Ўзбекистон – Қирғизистон – Хитой» мультимодал йўналиши бўйича илк контейнер поезди йўлга чиқди, деб хабар берди Транспорт вазирлиги ахборот хизмати.

Шунингдек, тадбир доирасида «Gansu International Logistics Group Co. Ltd.» компаниясининг Ўзбекистондаги янги логистика базаси ҳам фаолият бошлади.

Telegram I Facebook I YouTube I Instagram

🏗 Сифатсиз қурилиш оқибати: Самарқандда кўп қаватли уй бузилмоқда

Самарқанд вилояти ҳудудий қурилиш ва уй-жой коммунал хўжалиги соҳасида назорат қилиш инспекцияси вилоятдаги барча қурилишларда сифат масаласига қаттиқ эътибор қаратиб келмоқда. Доимий мониторинглар олиб борилиб, сифатсиз қурилиш ишлари жойида бартараф этилмоқда.

👷‍♂️ Инспекция таъкидлашича, ҳар қандай қурилиш инсон ҳаёти билан боғлиқ бўлгани учун масалани жиддий қабул қилиш зарур.

✔️ Хусусан, Самарқанд шаҳрининг Рўдакий кўчаси 207-манзилида жойлашган 7 қаватли турар-жой қурилишида жиддий қоидабузарликлар аниқланган.

Биринчи қавати савдо ва маиший хизмат биносидан ташкил топган ушбу уй инсон ҳаёти ва саломатлигига хавф туғдириши сабабли, суд қарорига асосан тўлиқ бузиб ташланмоқда.

🔎 Инспекция барча қурилиш ташкилотларини бу ҳолатдан тегишли хулоса чиқаришга чақирди.

Telegram I Facebook I YouTube I Instagram

Истанбулдаги Ўзбекистон фуқароларига хавфсизликка оид огоҳлантириш берилди

Истанбул шаҳрида кузатилаётган норозилик намойишлари муносабати билан Ўзбекистоннинг Истанбулдаги Бош консулхонаси Туркиядаги ватандошларга расмий мурожаат билан чиқди.

Мурожаатда фуқаролардан одам кўп тўпланадиган жойларга бормаслик, намойишлар ўтаётган ҳудудларга яқинлашмаслик ҳамда маҳаллий қонун-қоидаларга қатъий амал қилиш сўралди.

Маълумотга кўра, Туркия ҳукумати хавфсизлик чораси сифатида 11 сентябрга қадар 6 туманда, жумладан Бош консулхона жойлашган Бешиктош туманида оммавий тадбирлар ўтказишни вақтинча тақиқлади. Шунингдек, хорижий мессенжерлардан фойдаланишга муайян чекловлар жорий этилгани қайд этилди.

Норозилик намойишларининг аниқ сабаблари очиқланмаган.

Telegram I Facebook I YouTube I Instagram

Аёлга жинсий алоқа эвазига сертификат ва лавозим ваъда қилган вазирлик ходими тизимдан четлатилди

Ижтимоий тармоқларда Мактабгача ва мактаб таълими вазирлиги ходимига тегишли деб айтилаётган аудиоёзув тарқалди. Унда эркак шахс аёлга нисбатан номуносиб таклиф билдириб, эвазига унга сертификат олиб бериш ва мактабга директор лавозимига тайинлашини айтган.

Аудиоёзувда у аёлга:

“Сертификатни олиб бераман. Кейин ўзим сени яхши мактабга директор қилиб қўяман. Директор бўлишингга ёрдам бераман”,

— дея мурожаат қилгани эшитилади.

Вазият юзасидан вазирлик ахборот хизмати раҳбари Дилфуза Собирова изоҳ берди. Унга кўра, мазкур ҳолат иштирокчиси бўлган ходим лавозимидан озод этилган.

“Айтиш лозимки, вазирлик коррупция ҳолатлари ва манфаатлар тўқнашувига мутлақо қарши. Шунингдек, тизимда меҳнат қилаётган барча ходимлар касбий одоб-ахлоқ қоидаларига қатъий амал қилиши шарт”,

— дейилади расмий баёнотда.

Шунингдек, вазирлик келгусида ҳам бундай ҳолатларга йўл қўйган шахсларга нисбатан қонунчиликка мувофиқ қатъий чоралар кўрилиши таъминланишини маълум қилди.

Telegram I Facebook I YouTube I Instagram

Украина махсус хизмати рэпер Тиматини қидирувга берди

Украина Хавфсизлик хизмати россиялик рэпер Тимати (ҳақиқий исми – Тимур Юнусов)ни қидирув рўйхатига киритди. Бу ҳақдаги маълумот Украина Ички ишлар вазирлиги базасида эълон қилинган. Маълум бўлишича, у 1 июлдан буён қидирувда ҳисобланади, аммо Россия ОАВ бу ҳолат ҳақида эндигина хабар тарқатди.

Махсус хизматларнинг қайд этишича, рэпер Украинанинг вақтинча оккупация қилинган ҳудудларига кириш тартибини бир неча бор бузган. Жумладан, у Қримда камида етти маротаба концертларда иштирок этган. Қрим 2014 йилда Россия томонидан аннексия қилинган эди.

СБУ Тиматини «Россия ташвиқотчилари»дан бири сифатида атади. Шунингдек, у 2012, 2018 ва 2024 йиллардаги президентлик сайловларида Владимир Путиннинг ишончли вакили сифатида қатнашгани қайд этилди.

Украина томони уни Россия агрессиясини қўллаб-қувватлаган, шу билан мамлакатнинг суверенитети ва ҳудудий яхлитлигини инкор этган шахс сифатида айбламоқда.

Telegram I Facebook I YouTube I Instagram

Норма ижодкорлиги фаолиятининг самарадорликка йўналтирилган янги тартиби жорий этилади

“Ислоҳотларни ҳуқуқий жиҳатдан таъминлаш самарадорлигини ошириш ҳамда ижтимоий муносабатларни тартибга солишда вазирлик ва идораларнинг масъулияти ва ташаббускорлигини кучайтириш чора-тадбирлари тўғрисида”ги Президент Фармони (ПФ–161-сон,08.09.2025 й.) қабул қилинди.

Фармонга кўра, вазирлик ва идоралар, агар уларга қонун ҳужжатлари, Президентнинг фармон ва қарорлари ҳамда Ҳукумат қарорлари билан тегишли соҳада давлат сиёсатини амалга ошириш бўйича ваколатлар берилган бўлса, идоравий ҳужжатлар қабул қилиши мумкин.

Идоравий ҳужжатларни қабул қилиш учун юқорироқ юридик кучга эга норматив-ҳуқуқий ҳужжатларда тегишли ҳужжатни қабул қилиш ваколати аниқ ёзиб қўйилган бўлиши талаб этилмайди.

Идоравий ҳужжатларга, қонунчиликда белгиланган ҳолатлардан ташқари, қуйидаги қоидаларни киритишга йўл қўйилмайди:

🔸 шахсларга янги имтиёз ҳамда жавобгарлик чораларини белгилайдиган;

🔸 амалдаги тартиб-таомилларни асоссиз мураккаблаштирадиган, фуқароларнинг ҳуқуқ ва эркинликларини чеклайдиган;

🔸 асосланмаган қўшимча харажат ва тўловларни, янги турдаги солиқ ва йиғимларни, лицензиялаш, рухсат бериш ва хабардор қилиш тартиб-таомилларини жорий этадиган.

Telegram I Facebook I YouTube I Instagram

Идоравий ҳужжатларни қабул қилиш муддатларига оид қатъий талаблар ўрнатилади

“Ислоҳотларни ҳуқуқий жиҳатдан таъминлаш самарадорлигини ошириш ҳамда ижтимоий муносабатларни тартибга солишда вазирлик ва идораларнинг масъулияти ва ташаббускорлигини кучайтириш чора-тадбирлари тўғрисида”ги президент фармони (ПФ–161-сон,08.09.2025 й.) қабул қилинди.

Фармонга кўра идоравий ҳужжатларни қабул қилиш, уларни ҳуқуқий экспертиза ва давлат рўйхатидан ўтказиш муддатлари бўйича қуйидаги қатъий талаблар ўрнатилади:

🔹 идоравий ҳужжатларни қабул қилиш муддати, агар қонунлар, президент ва ҳукуматнинг ҳужжатларида бундан кўп муддат белгиланмаган бўлса, 2 ой этиб белгиланади;

🔹 идоравий ҳужжат лойиҳасини жамоатчилик муҳокамасидан ўтказиш муддати 10 кунни ташкил этади, агар лойиҳа юзасидан 5 кун ичида таклиф келиб тушмаса, уни ҳуқуқий экспертизадан ўтказиш учун Адлия вазирлигига киритиш мумкин бўлади;

🔹 идоравий ҳужжатларни Адлия вазирлиги томонидан ҳуқуқий экспертиза ва давлат рўйхатидан ўтказиш муддати 30 кундан 20 кунга, қўшимча ўрганишни талаб қиладиган ҳужжатлар бўйича эса кўриб чиқиш муддатини узайтириш 15 кундан 10 кунга қисқартирилади;

🔹 белгиланган талабларга риоя қилмасдан киритилган идоравий ҳужжатларни Адлия вазирлиги томонидан давлат рўйхатидан ўтказишни рад этиш муддати 30 кундан 15 кунга қисқартирилади.

Telegram I Facebook I YouTube I Instagram

❗️Қумариқ кўчасида вақтинчалик ёпилиш ва йўналишларда ўзгаришлар

«Veolia Energy Tashkent» маълумотига кўра, 2025 йил 10–30 сентябрь кунлари Сергели туманидаги Қумариқ кўчаси иссиқлик тармоқларини алмаштириш ишлари сабабли вақтинча ёпилади.

Шу муносабат билан қуйидаги автобус йўналишларида ҳаракат йўналиши ўзгаради:

✅61-йўналиш – А.С. Банокати, Г. Алиев, Темирйўлчилар, Кичик ҳалқа йўли, Бобур кўчалари орқали;

✅106-йўналиш – Сарикўл, Кичик ҳалқа йўли, Бобур кўчалари орқали;

✅40-йўналиш – Бобур, Кичик ҳалқа йўли, Туркистон, Тошкент вокзали, Темирйўлчилар, А.С. Банокати кўчалари орқали РЭТ заводи бекатигача;

✅66-йўналиш – Қумариқ, Бобур, Кичик ҳалқа йўли, Туркистон, Тошкент вокзали, Меҳржон, 8-Март, Эски Сарикўл, Янги Замон, Сарикўл, А.С. Банокати кўчалари орқали РЭТ заводи бекатигача;

✅52-йўналиш – Локомотив кўчаси бекати ва Тошкент вокзали оралиғида.

Йўловчилардан вақтинчалик ўзгаришларни инобатга олиб, сафарларини олдиндан режалаштириш сўралади.

Telegram I Facebook I YouTube I Instagram

Давлат хизматлари кўрсатишда талаб қилинадиган ҳужжатлар сони қисқартирилади

“Давлат хизматларини кўрсатиш тизимини такомиллаштириш ҳамда соҳада бюрократик тартиботларни тубдан қисқартиришга доир қўшимча чора-тадбирлар тўғрисида”ги Президент Фармони (ПФ–157-сон, 08.09.2025 й.) қабул қилинди.

Фармонни қабул қилишдан кўзланган асосий мақсадлар этиб қуйидагилар белгиланди, жумладан:

🔹 2028 йилгача ЯИДХП (my.gov.uz) ва давлат хизматлари марказлари орқали тақдим этиладиган хизматлар сонини 900 тага етказиш;

🔹 проактив давлат хизматлари сонини 53 тага ҳамда композит давлат хизматларини 74 тага етказиш.

Фармонга кўра, 2025 йил 1 декабрдан идоралараро ахборот алмашинувини йўлга қўйиш орқали қуйидагилар бекор қилинади, жумладан:

🔸 никоҳни расмийлаштиришда ФҲДЁ органлари томонидан никоҳланувчи шахслардан тиббий кўрик натижаларини тақдим қилиш талаби;

🔸 никоҳдан суд қарори асосида ажратилганда никоҳдан ажралганлик ҳақидаги далолатнома ёзувини шакллантириш учун ФҲДЁ органлари томонидан суд қарорининг талаб қилиниши;

🔸 автомототранспорт воситасининг рўйхатдан ўтганлик гувоҳномасида автомототранспорт воситаси мулкдорининг манзилини кўрсатиш талаби.

Telegram I Facebook I YouTube I Instagram

ЯИДХПдаги шахсга доир маълумотлар уларнинг қоғоз шаклига тенглаштирилади

“Давлат хизматларини кўрсатиш тизимини такомиллаштириш ҳамда соҳада бюрократик тартиботларни тубдан қисқартиришга доир қўшимча чора-тадбирлар тўғрисида”ги президент фармони (ПФ–157-сон, 08.09.2025 й.) қабул қилинди.

Фармонга кўра 2025 йил 1 ноябрдан Ягона интерактив давлат хизматлари порталида (Ягона портал) жисмоний шахсларнинг белгиланган шахсга доир маълумотлари уларнинг шахсий кабинети орқали реал вақт режимида тақдим этилади. Бунда:

▪️ жисмоний шахснинг Ягона порталдаги шахсга доир маълумотлари уларнинг қоғоз шаклига тенглаштирилади;

▪️ ушбу маълумотлар Ягона порталнинг мобил иловасидан фойдаланган ҳолда кўрсатилганда давлат органлари ва ташкилотлари томонидан мазкур маълумотларнинг қоғоз шаклини талаб қилиш тақиқланади.

Шунингдек, 2025 йил 1 ноябрдан:

🔹 давлат хизматлари марказларига келиб мурожаат қилинганда пенсионер, ҳомиладор аёллар ва 3 ёшга тўлмаган боласи билан келган фуқарога давлат хизматларидан навбатсиз фойдаланиш бўйича имтиёз берилади;

🔹 жисмоний шахсларни ягона идентификация тизимидан (OneID) рўйхатдан ўтказишда муқобил тарзда шахсни биометрик идентификация қилиш (Face ID) тартиби йўлга қўйилади;

🔹 давлат хизматлари марказларига Ягона портал орқали жорий этилган барча давлат хизматлари бўйича аҳоли ва тадбиркорларга хизмат кўрсатиш ҳуқуқи берилади.

Telegram I Facebook I YouTube I Instagram

“Vakolat.uz” платформаси ишга туширилади

Фармонга кўра, 2026 йил 1 январдан қуйидагиларни назарда тутувчи “Vakolat.uz” платформаси ишга туширилади:

➖ давлат хизматларидан фойдаланиш ва давлат хизмати натижаларини олиш бўйича бошқа шахсларга ишончномаларни расмийлаштириш;

➖ юридик шахслар томонидан расмийлаштирилган ишончномаларни ихтиёрий рўйхатдан ўтказиш;

➖ барча турдаги ишончномаларнинг ҳақиқийлигини онлайн режимда текшириш.

➖ “Vakolat.uz” платформасидан бепул асосда фойдаланиш.

2026 йил 1 январдан Давлат хизматлари ягона реестри Адлия вазирлиги томонидан ишлаб чиқиладиган “Давлат хизматлари” автоматлаштирилган онлайн ахборот тизимида юритилади.

Бунда ҳар бир давлат хизмати бўйича унинг рақамли паспорти шакллантирилади ҳамда ҳар бир давлат хизматини Давлат хизматлари ягона реестрига киритиш норматив-ҳуқуқий ҳужжат асосида амалга оширилади.

Telegram I Facebook I YouTube I Instagram

Таълим соҳасидаги юқори лавозимларга янги раҳбарлар тайинланди

Сардор Бахтиёрович Ражабов Олий таълим, фан ва инновациялар вазирининг биринчи ўринбосари этиб тайинланди. У бу лавозимга қадар Мактабгача ва мактаб таълими вазирининг ўринбосари сифатида фаолият юритган.

Бундан ташқари, Бахтиёр Ғайратжонович Йўлдашев Президент Администрацияси ҳузуридаги Таълим сифатини таъминлаш миллий агентлиги директори сифатида лавозимга келтирилди. У аввал «Янги Ўзбекистон» университети проректори эди.

Telegram I Facebook I YouTube I Instagram

Тошкентда руҳий хаста она 7 ёшли қизини пичоқлаб ўлдирди

2022 йилда Тошкент зоопаркида қизини айиқ қафасига ташлаган она уч йилдан кейин фарзандининг жонига қасд қилди.

Маълумотларга кўра, у 2022 йил январь ойида содир этган ҳаракатидан сўнг психиатрия шифохонасига мажбурий даволанишга юборилган эди. Аммо 2022 йил 2 август куни амбулатор даволаниш учун уйига чиқарилган.

Орадан уч йил ўтиб, Сергели туманида яшовчи аёл 7 ёшга тўлган қизига ошхона пичоғи билан бир нечта зарба бериб, ўлдирган. Қизалоқ сентябрь ойидагина мактабнинг биринчи синфига қадам қўйган эди.

Ҳозирда она Жиноят кодексининг 97-моддаси (Қасддан одам ўлдириш) билан айбланиб, ҳибсга олинди. Умрбод озодликдан маҳрум қилиниши мумкин. Ҳолат Бош прокуратура назоратига олинган.

Эслатиб ўтамиз, 2022 йилдаги айиқ қафасига ташлаш воқеасидан сўнг, Тошкент зоопарки қизалоқни даволаш харажатларини тўлиқ ўз зиммасига олган эди. Кейинчалик у буви ва бувиси қўлига топширилган, акаси эса болалар уйига жойлаштирилган.

Telegram I Facebook I YouTube I Instagram

Мактабгача ва мактаб таълими вазирига ўринбосар тайинланди

Азизбек Турдиев мактабгача ва мактаб таълими вазири ўринбосари этиб тайинланди.

У бу лавозимга тайинланишидан олдин вазир маслаҳатчиси сифатида ишлаган. Шунингдек, Турдиев узоқ йиллар Ўзбекистон телевидениесида фаолият юритган. Хусусан, «Ассалом Ўзбекистон» кўрсатувида бош муҳаррир ўринбосари сифатида ҳам фаолият кўрсатган.

Шу билан бирга, вазирлик расмий хабарларида унинг телевидениедаги меҳнати ҳақида маълумот берилмаган. Фақат МТРКда ишлаган даврида мактабда дарс бергани ҳақидагина қайд этилган.

Telegram I Facebook I YouTube I Instagram